Read Koonzime Ebrœ̂ 4 Bible Online

Ebrœ̂ 4 - Koonzime bible

Ebrœ̂ 4

¹Nzyɛ̌m á líʼe nkɛ̌ʼ e mɨná gá ó, nye ódib nzɨ́ egbalá lɨ́ esú gá lɨ́ná. Sâ gwár, gwá di gá le ocwóó, lɨ́ ekpɛ́ɛ ó, mʉr ngwár ɨ́ sɔ́má yɨ́n ámû sû myɛ́na maá, nye ntɔ̂ʼ akǎ nî lɨ́ egbalá laá.

²Mɨná bé á be gá ó, sí jóʼǒ Mbɨambɨa Lɔ́ɔ jwɨʼ gwár e gwár e bimpám gá bíná. Sâ gwár, wé á bé abe byé e nyɔm, ebě, byé á bé abûʼla ɨ́ jɔʼ byé á jóʼo wé yɨ́.

³Mɨná gá bɨɛ obûʼla ó dí egbala gâ, ebě, Nzyɛ̌m á lɛ́ɛ, dumo e bé ó: Ɨ́ nkpaa nyǎm nyaá, me á si káale ó: «Bʉr ópǎ bee gá nkʉ̂ bé ókǎ báʼǎ nî lɨ́ egbalá lâm!» Nzyɛ̌m damá lwib nó, syɛ́ɛ́ yé, yé á síe tyeetye ó, jɔʼ nyé á sîl ebono sí yɨ̂ʼ yɨ́.

⁴Ebě, yê cɛmá ɨ́ yʉ́ʉ́ péh Mékaná mé Nzyɛ̌m, dumo e móhó nzaangbá ó: «Nzyɛ̌m á gbala syɛ́ɛ́ yé yɨ́yɛ̂h ó, ɨ́ móhó nzaangbá.»

⁵Yúú péh Mékaná mé Nzyɛ̌m, yé ó: «Bʉr ópǎ bee gá nkʉ̂ bé ókǎ báʼǎ nî lɨ́ egbalá lâm!»

⁶Ebě, lɔ̌b, wɨ́ tɨ̂ʼ tyeetye ó, bâʼ bʉ̂r, bé ógbala, bé e boo Nzyɛ̌m sɔ́má. Nó ó, bʉr o b'á nyɛɛ bi Mbɨambɨa Lɔ́ɔ, ó bé níʼee ɨ́ gúmó égbalá yaá bá, bé á bé agbala, ebě, bé á si sâ ebɨ̌h e Nzyɛ̌m.

⁷Sá tɨ̂ʼ ó Nzyɛ̌m á ka baʼa tyêl gúú móhó nyé dí ejɨjébe ó, «mûh» wɨ́ yɨ́. Nye á si boo sâ nó, nye nzě lɛ́ɛ mɨ́ná gá lɔ̌b waá ɨ́ num mé David mpʉ bɨ̂h nyɛɛ cɛma yɨ́ ó: «Bɨ́n jóʼó twíí mé Nzyɛ̌m múh nɛ́ɛ: mʉr alelě léme.»

⁸Yé bé Josué á si tô e bʉr bé, tó níŋle bé ɨ́ gúmó égbalá nó, lɛ́ɛ́, Nzyɛ̌m á bé akǎ lwib ɨ́ lɔ̌b móhó égbalá swîh.

⁹Lɔ̌b, wɨ́ tɨ̂ʼ ntémé ó, bʉr o mé Nzyɛ̌m, bé ónî lɨ́ egbalá, laá e dʉ́ó é sábat.

¹⁰Ebě, mʉr dí enî lɨ́ egbalá lé nyá, nyě gbalá bísyɛ́ɛ́ ó, jwɨʼ gwár e gwár e mpʉ̌ Nzyɛ̌m á gbala byaá byé ntémé yɨ́.

¹¹Nó mɨná gbâʼ gá nkul lɨ́ esú lé énî ɨ́ gúmó bʉ̂r dí egbala yɨ́. Gwá di gá le ocwóó, ó mʉ̌r sá asâ ébɨ̌h e Nzyɛ̌m, nkʉ̂ duma sí mpʉ bímpám gá bíná byé á duma yɨ́.

¹²Lwǐb mé Nzyɛ̌m, yé ó sá dí kublakúbla yɨ́. Yé e nkul! Yé ntémé, yé ɨ́ bábla, laa pâsoŋ dí njebá myoo mipáʼ mímbá yɨ́. Ɨ́ jɔ̌ʼ Nzyɛ̌m dí elwib yɨ́, lwǐb yé, yé lɨ́ ekʉ́ bánǎ syɛ̂h bípúno, tó kumo ɨ́ mebɨ̌l, ntɔ̂ʼ pin bítíl bí nyʉ̂l ɨ́ mebʉó. Yé lɨ́ ekpâhlǎ gúmó léme ndu e sísǐm dí edira yɨ́. Yé lɨ́ epahle le egbâ mbɔ́ʼ ɨ́ miléme ndu e bijwɨʼ gá bíná.

¹³Yé abe e yʉ́ʉ́ kwihá sɔ̂ʼ dí solá ɨ́ míh mé Nzyɛ̌m. Sá yɨ́yɛ̂h nyé á komlo yɨ́, yé ɨ́ ponó, ɨ́ nkɛŋlɛ̂m ɨ́ míh mé. Bíbyɛ̂h, byé ókar mínkar myɔ́ɔ́ ó, ɨ́ mpǒm nyé.

¹⁴Mɨná gá bé e ánɨ̂nɨ̂n njwɨ́ɨ opara: Yésʉs, Mwân mé Nzyɛ̌m. Nye á si ntaa jʉ́o, le ejwoo le baántɛ́n, tó di ɨ́ jʉ́o kʉ́. Nó, mɨná tôʼ gá dóló le ekǎm búʼó gá yɨ́ná.

¹⁵Ebě, njwɨ́ɨ opara gá wɨ́ná, nye ó waá dí e nkul ejɨ̂ʼ nkóó e mɨná gá ɨ́ jɔʼ nyé dí ebee étyɛʼ gá lɨ́ná yɨ́ nyá. Nye á si bóblɔɔ mimbi mímyɛ̂h, jwɨʼ gwár e gwár e mɨná gâ; sâ gwár, nyɨɛ l'aduma, nkʉ̂ sâ syóm.

¹⁶Nó, mɨná sîhlaa gá bǎʼ e né, tó pyâl pyáláa ɨ́ mecwɨ́ɨ́ mé jwɨ́ɨ́ yé. Mɨná pyálaa gá ɨ́ mpǒm nyé, abáawǒ sɔ̂ʼ, le ebúʼla ó, nyě dǐ ɨ́ mecwɨ́ɨ́ maá ó, lɨ́ esú ó, nye sâʼ bʉr mpam, le ejɨ̂ʼ bé nkoó. Mɨná bi gá mpam nyé ó, ɨ́ jɔʼ mɨ́ná dí ebuú jɨ gá nkɔ̌m nyé yɨ́.