Read Koonzime Ebrœ̂ 5 Bible Online

Ebrœ̂ 5 - Koonzime bible

Ebrœ̂ 5

¹Ebě, bé pɨ́pɛ́h njwɨ́ɨ opara nyɨnyɛ̂h ó, tʉ́ŋlʉ̌ bʉr. Nye tyélá ɨ́ dǐ yaá ó, nye tyɛ́bɨɨ ɨ́ medilá me bʉ̂r ɨ́ páʼ bísâ bi dí edwɛ̂ʼ Nzyɛ̌m bí. Nye ó mʉr dí etɨtáa mébyaʼ mɔ́ɔ́ nyá, le edîʼ Nzyɛ̌m mindwéá.

²Para nyɨnyɛ̂h, nyě e nkul ekɛm bígʉʼlʉgʉ́ le bʉr o mû sí dîm bá, ebě, ɨ́ mipáʼ mímyɛ̂h, etyɛʼ lé, lé lɨ́ enyɨ̂n ɨ́ míh mé.

³Sâ yaá ó nyé dí ejala le etáa mébyaʼ mé ɨ́ lɔ̌b mísyóm myé jwɨʼ gwár e gwár e mpʉ nyé jálá le etáa mébyaʼ me bʉ́ʉ́ bʉ̂r yɨ́.

⁴Mʉr, nyé abe e nkul egbân dǐ pára, nkʉ̂ dúú tɨ̂. Bʉr ó Nzyɛ̌m á jébe bá ó dí ejala e dǐ yaá. Yé ó jwɨʼ gwár mpʉ̌ Nzyɛ̌m á nyɛɛ jébe Árɔn, tyêl nyé ɨ́ dǐ pára yɨ́.

⁵Jwɨʼ gwár e gwár yaá ntémé e Krîst. Nye á bé agbân dǐ njwɨ́ɨ opara, nkʉ̂ sáa kûm dí tɨ̂ʼ nyɨ́. Nye á si tyélɔɔ ɨ́ dǐ yaá. Mʉr á tyêl nye nyá, á lɛ́ɛ ó: «Go ó mwân wǎm. Mɨ́ byâ gó mûh.»

⁶Ɨ́ yʉ́ʉ́ péh Mékaná mé Nzyɛ̌m swîh, Nzyɛ̌m á lɛ́ɛ ntémé ó: «Go ódidi para wǎm ó, ɨ́ melú mé mpóʼo mɨ́mɛ̂h. Go ó mbi párǎ Mɛlkisédɛk á be wɨ́.»

⁷Jɔ̌ʼ Krîst á títíʼe ɨ́ sí yɨ̂ʼ yɨ́, nye á bɨbe lɨ́ ejɨʼla e mʉr á be e nkul epɛʼ nyé lɨ́ eswie nyá. Nye á si bʉ̂ bitím, jɨ kʉ́kʉ́, Nzyɛ̌m ntɔ̂ʼ jóʼo nyé ntémé ɨ́ lɔ̌b méjóʼǒ Yésʉs á sâ nye má.

⁸Damá bě mpʉ nyé á be Mwân mé Nzyɛ̌m yɨ́, nye á be ó si jɨ̂ʼ ésâ Nzyɛ̌m mejóʼo. Nye á jɨ̂ʼ mejóʼo maá ó, ɨ́ nzɨ̌ mitúú nyé á sia e myé mí.

⁹Píe mitúú myé myaá ó nyé á ka be, nye mû lwɨ́ŋlá ɨ́ nkʉ́ŋ wé yɨ́. Nye á be ó, nye mû sá ngá kǎ dwe bʉ̂r twǐʼ njʉ̌m dǐ yɨ́. Bʉr bɨ́bɛ̂h ngá sâ nyé mejóʼo bá, bé óbǐ twiʼ yaá.

¹⁰Nó ó Nzyɛ̌m á tyêl nye njwɨ́ɨ opara ɨ́ mpʉ mé Mɛlkisédɛk yɨ́.

¹¹Bɨ̌h bé ɨ́ buo mílɛ́ʼlá mí édwe ɨ́ lɔ̌b wɨ̂. Sâ gwár, yé ɨ́ buú kɔbla lɨ́ edwe bɨ́n myǎ, ɨ́ lɔ̌b élele e mílémé mín lɨ́ enʉa mílɛ́ʼlá myaá.

¹²Yɨ́ boó laǎ jɔʼ bɨ́n á jala le epyâl ólɛ̂ʼla yɨ́. Yé jɨ ó, bé báʼa nzě lɛ̂ʼle bɨ́n bisá bí ésôʼ bɨ́n á nyɛɛ lɛ̂ʼlɔɔ ɨ́ milɔ̌b mé Nzyɛ̌m bí. Bɨ̌n dína ó mpʉ bítyéé bi dí ede ébêl bí. Bɨ̌n bé apǎ dyɛnwa e mede mé ótɔ́má bʉ̂r.

¹³Yé ó nó, ebě, mʉr dína lɨ́ ede ébêl nyá, nyé apǎ dyɛnwa le milɛ́ʼlá mi dí edumo le otîtyěl gá wɨ́ná mí, ebě, nye dína ó mâ tyéé.

¹⁴Otɔ́má bʉ̂r bɨ́ɛ ó dí ejala e mpǎŋ mede. Bɨ́ɛ e bɨ́ɛ ó dí e pɨʼ dí ó, bé gʉ́ŋaa ebɛ̂ʼ páʼ ébébe le embɨa nyɨ́. Bé bi pɨ̂ʼ nyaá ó, ɨ́ lɔb nzyéé bé dí egbâ lɨ́ egʉ́a ébɛ̂ʼ bísâ byaá nyɨ́.