Read Koonzime Ebrœ̂ 6 Bible Online

Ebrœ̂ 6 - Koonzime bible

Ebrœ̂ 6

¹Nó, mɨná gwáʼaa edwe gá milɛ́ʼlá bé dí enyɛɛ́ jɨ̂ʼ ésôʼ, myaá mi dí edumo e Krîst mí. Mɨná dwéelaa gá myaá mi dí esâ ó, mʉr tɔ́maa ɨ́ pɨʼ mí. Bɨ̌h bé ákǎ báʼǎ lɛ̂ʼle bɨ́n milʉ́ mékǎn mâ: etúmǒ koo e bibol bísyɛ́ɛla, edwirǎ léme, edyêʼ koo e Nzyɛ̌m,

²milɛ́ʼlá mi dí edwɛ̂ʼ míndubó mí, myaá mi dí edwɛ̂ʼ kɛlá mébô mí, nkʉ̂ ɨ́ lɔ̌b pahá ódwe, nkʉ̂ ɨ́ tíʼá mílɔ̌b, waá mésíé.

³Nzyɛ̌m ókpɛl nó, mɨná bé ókʉ́ dweela gá milɛ́ʼlá mi dí edwe bʉ̂r pɨʼ otɔ́má bʉ̂r mí.

⁴Nó ó, bʉr o b'á nyɛɛ kʉnɔɔ mimbah bá, bé á be lɨ́ enyɛɛ́ bibi míndwéá mi dí eduho ɨ́ jʉ́o kʉ́ mí. Ɨ́ jɔʼ yaá, Sísǐm mé Nzyɛ̌m bé e boo nɔ́ɔ́ ó b'á bɨbe.

⁵Bé á be lɨ́ ebibi ntémé lɔ́ɔ́ mé Nzyɛ̌m dí ɨ́ buú mbɨa wɨ́, jóʼo ménwǎn me tɨ̂. Bɨ́ɛ, bé á si nyɛɛ dweŋɔɔ mbi nkûl ngá dweŋɔɔ ɨ́ mpóʼǒ Nzyɛ̌m ngá tyêl nyɨ́ wɨ́.

⁶Ɨ́ jɔ̌ʼ mbi bʉ̂r baá ká dímlě búʼó yɔ́ɔ́ yɨ́, yé abe e yʉ́ʉ́ sá swîh dí e nkul ekǎ sâ ó, mʉr báʼa túmǒ koo le mebébe mé, le edwirǎ léme. Ebě, bé bʉr o tɨ̂, bɨ́ bomlo Mwân mé Nzyɛ̌m e binzâŋ, bɨ́nɔɔ nyé ɨ́ kolôs kʉ́ ɨ́ jɔʼ mbá, lɨ́ esâ ó, nye búu pyaŋɔɔ ɨ́ kpɛŋlɛm.

⁷Gʉ́ŋáá gá ó, pemé ómpíé dí enwɨ́ɨ tɨ̂ʼ jɔʼ yɨ́yɛ̂h, dí egúmo mpúmó lɨ́ esú é mépwaʼ mé óbel o tɨ̂ʼ yɨ́, yé óswɨɨ métyɛʼ me mpóm mé Nzyɛ̌m.

⁸Yé sí kǎ be yɨ́ɛ ó, pemé yaá, yé páh ó, mbɨ́ biká mpʉ míndwínɨ́nɨ́ le ntʉ̌msakpɛl nó, go ó, pemé yaá, yé abe e nyɔm. Yé ókǎ lîʼ ó, tyé médwíne mé nyâ ó, nye syɛ́mɨɨ yê. Bé ójaá kǎ dîʼ yé ó, díʼɨ́ɨ.

⁹Bʉr ó kpɛ̌l bâm, bɨ̌h damá lwib nó, mě e mpûʼla ɨ́ léme ɨ́ lɔ̌b wɨ́n ó, sá dí mbɨa, laa méswomlʉ le medíʼe yɨ́, yé ó bɨ̌n dóló. Sâ yaá, yé ó twǐʼ njʉ̌m dǐ.

¹⁰Ebě, Nzyɛ̌m, nyé abe waá onzyɛ́h ónzyɛ́h. Nye ájɨ́há syɛ́ɛ́ bɨ́n dí eséa nyé yɨ́. Nye ntémé, nyé abe e nkul ejɨhǎ kpɛ̌l bɨ́n dí elɛ̂ʼle nyé yɨ́. Yé á si nyɨ̂n ɨ́ ponó ɨ́ jɔʼ bɨ́n á be lɨ́ ekɛm bʉ̂r bé yɨ́. Bɨ̌n ntémé dína ó lɨ́ etô e menkɔ̌m maá dóló.

¹¹Bɨ̌h gwɨ́m ó, mʉr nyɨnyɛ̂h sâʼ sɨ́n lɨ́ eséǎ syɛ́ɛ́ yaá, tó kumo lɨ́ odumo, akâr. Jɔʼ yaá ó lémé wé ngá lóno ɨ́ mpûʼla yɨ́.

¹²Bɨ̌h bé akpɛl ó, bɨ̌n díʼee mipwɨ́pwɨ̂h mí ósyɛ̂l o mésâ. Bɨ̌h jaá gwɨ̂m ó, njɨ bɨ̌n sâʼ mpʉ bʉ́ʉ́ óbûʼla mé Nzyɛ̌m dí eboó sɨsâ yɨ́: bé e búʼó ndu e bíhwó. Bɨ́ɛ ntémé ó ngá nʉǎ sá Nzyɛ̌m á kɛʼ bé yɨ́, jala e nkɔb líʼe nyɔ́ɔ́.

¹³Yé á be ó, ɨ́ jɔ̌ʼ Nzyɛ̌m á kɛʼ Abraham bisá bí émbɨa yɨ́, nye á si ntaa minkâl. Mpʉ yé dí ó, yé abe e mʉr dí elaǎ Nzyɛ̌m yɨ́, nó ó nyé á gbâ díé lé nye mʉr tɨ̂ʼ ɨ́ minkâl yɨ́.

¹⁴Nye á lɛ́ɛ ó: «Lɨ́ otyeetye, me ósʉ gó metyɛʼ me mpóm, le edwe gó bwân mebɨ̂ʼ mepǎm.»

¹⁵Abraham á si dûhwo mpʉ̂n. Sá tɨ̂ʼ ó nyé á bi sâ Nzyɛ̌m á kɛʼ nye yɨ́.

¹⁶Jɔʼ bʉ̂r ntɨ́ntáá mínkâl yɨ́, bé ntɨntaa myé ó, lɨ́ egbâ díé é mʉ̂r dí entaa bé ɨ́ dúu nyá ɨ́ minkâl. Minkál myɔ́ɔ́ myaá, myé lɨ́ egbâ nkǎ-tí ɨ́ mesónó.

¹⁷Nzyɛ̌m á tíʼe ɨ́ lémé wé ó, nyě sá ó bʉr gʉ́ŋaa lɨ́ otyeetye ó, nye ábîr mbɨambɨa nkɛ̌ʼ nyé. Nó yaá ó nyé á ntaa minkâl ɨ́ jɔʼ nyé á kɛʼ bʉr membɨa mé yɨ́. Minkál myé myaá ó b'á lɨl nkɛ̌ʼ nyé. Bʉr o jálá le ebi nkɛ́ʼ nyaá bá, bé ogʉ́ǎ tyeetye ó, bé ókʉ́ bi nyê.

¹⁸Yé e bisá bíbá bi dí abe e nkul ecénɔɔ bí: bisâ byaá, byé ó nkɛ̌ʼ ti e minkál mé Nzyɛ̌m. Mɨná nʉa gá pîm ɨ́ búʼó ó, duho tɨ̂. Nzyɛ̌m, nyé abe e nkul elɛ́ɛ bíbɛr ɨ́ sí, tɔʼ e bá tîtííǎ. Mɨná gá bé ó bʉr o mû sí bîr sá yɨ́yɛ̂h, lɨ́ esú lé édi e mpûʼla ɨ́ milémé gá míná bá. Mpûʼla nyaá, nye ó kwahaá ɨ́ ponó ɨ́ míh gá mɨ́ná.

¹⁹Mpûʼla nyaá, nye lɨ́ esúʼo míléme gá míná e nkul. Nyé abá tyɛ̂b. Nyě súʼó mílémé gá míná ó, ɨ́ kpɨ́ɨ́ɨ́ mpʉ̌ kǒl dí emɛ̂r byɛ̂l ɨ́ sʉ̌m díbé wɨ́. Mpûʼla nyaá, nye ó mpʉ̌ kǒl dí entaǎ kán ébê dí tyelá ɨ́ mpáh Nzyɛ̌m wɨ́. Wɨ̂ʼ ódumo ó kǒl waá, wê tyeelá ó, ɨ́ mɨná gâ. Gúú ódumo wɨ́ɛ, wé ó ɨ́ gúmó dí tí yɨ́, ɨ́ mpáh Nzyɛ̌m tʉ́ŋlʉ̌.

²⁰Tɨ̂ʼ ó Yésʉs á nî yɨ́. Nye á nî ó, esôʼ e mɨná gâ. Nye mû ó njwɨ́ɨ opara gá wɨ́ná, mpʉ̌ Mɛlkisédɛk á be yɨ́. Nye ódi ntémé ó njɨ nó, njʉ̌m dǐ e njʉ̌m dǐ.