Read Koonzime Ebrœ̂ 7 Bible Online

Ebrœ̂ 7 - Koonzime bible

Ebrœ̂ 7

¹Mɛlkisédɛk waá á be ó njwɨ́ɨ nkanǎ Salɛ̂m. Nye ntémé á be ó njwɨ́ɨ opara lɨ́ esú é Nzyɛ̌m dí Lʉ́ bísá bíbyɛ̂h nyá. Ɨ́ jɔ̌ʼ Abraham á tô ɨ́ dɔm lɨ́ etó lwímla e bʉ́ʉ́ ójwɨ́ɨ yɨ́, mpúla nyé á búla, nyé osí ntaa bé ɨ́ dɔm yɨ́, Mɛlkisédɛk ntɔ̂ʼ tô, tó bɔma e né, nzě syɛɛ nyé metyéelé.

²Ɨ́ bisá bíbyɛ̂h Abraham á nʉa ɨ́ dɔm laá bí, nye ntémé á si dwe Mɛlkisédɛk nkɔb mpwár ɨ́ menkɔb kám. Díé é «Mɛlkisédɛk», lé páʼlɔ́ɔ́ ɨ́ lwǐb ébrœ̂ ó: «njwɨ́ɨ dí tîtyěl mʉr nyá». Mpʉ nyé á be njwɨ́ɨ Salɛ̂m yɨ́, díé é Salɛ̂m lɨ́ɛ, lé páʼlɔ́ɔ́ ó, «mepyɛbla». Nó ó, nye ó b'á gbɨgbâ bʉr mepyɛbla ɨ́ miléme.

³Yé abe e mʉr ngwár dí egʉ́a sɔ́ŋ, nkʉ̂ nyɔ̌ŋ mé Mɛlkisédɛk, nkʉ̂ ntán yé. Mʉr, nyé agʉ́ǎ mpʉ̌ Mɛlkisédɛk á byɛ̂l yɨ́, agʉ́a ntémé nkʉ̂ nye á si dwe. Nyě nwɨɨlá ó e Mwân mé Nzyɛ̌m. Nyě dǐ ɨ́ dǐ pára yé ó, njʉ̌m dǐ e njʉ̌m dǐ.

⁴Paá dwɛ̂ʼ gá mpʉ nyé dí mpaŋ mʉ̂r yɨ́! Abraham, sɔ́ŋ kúl bʉ̂r o b'Ɨ́zraɛ̂l á dwe nye ɨ́ bisá nyé á búla e byé ɨ́ dɔm bí ó, nkɔb mpwár ɨ́ menkɔb kám.

⁵Bʉr o bó ónzweh mé Levî, bé ó dí enʉǎ dǐ pára. Etié, lé dwé bé nkul ntémé ó, bé nʉ́aa péh bísá bíbyɛ̂h bʉ̂r o b'Ɨ́zraɛ̂l dí ebi bí, jala e nkɔb mpwár ɨ́ menkɔb kám. Bé bibi nkɔ̂b nyaá ó, ɨ́ mebó mé bɨ́ɔɔ́ bɔ́ɔ́, dí onta mé Abraham bá.

⁶Tó kœb ó, Mɛlkisédɛk á bé abe mʉ̂r onzweh mé Levî. Damá jóʼo nó, Mɛlkisédɛk waá á be ó sí dî Abraham ó, Abraham dwêʼ nye nkɔb bisá bíbyɛ̂h nyé ngá bi bí, jala e nkɔb mpwár ɨ́ menkɔb kám. Mɛlkisédɛk ntɔ̂ʼ syɛɛ Abraham metyéelé, nyɨɛ mʉr á pa bi menkɛ̌ʼ mé Nzyɛ̌m nyá.

⁷Yé abe e mʉr dí e nkul esóŋlǒ sá yɨ̂: le mʉr dí e dǐ nɨ́nɨ́ɨ́, le waá dí abe e yé nyá, waá dí e dǐ yaá nyá ó dí esyɛɛ nyʉ́ʉ́ metyéelé.

⁸Ɨ́ wɨ̂ʼ pâʼ, mɨná bé á be ɨ́ bee gá mpʉ ónzweh mé Levî wé á nʉnʉa nkɔb mpwár ɨ́ menkɔb kám, bɨ́ɛ ntémé lɨ́ edwidwe nyé yɨ́. Ɨ́ gúú pâʼ, mɨná bé lɨ́ ebee gá ntémé mpʉ̌ Mɛlkisédɛk dí enʉa nkɔ̂b nyaá, nye yɨ́ɛ l'adwe nyʉ́ʉ́ mʉ̂r nyé nkɔ̂b yɨ́. Ebě, micɛmá, myé boʼlo ó nó.

⁹Mɨná bé óbɛ̌m lɛ́ɛ gá ntémé ó, Mɛlkisédɛk waá á be ó sí tyêl Levî etié ó, nyɨɛ bíʼee péh bísá bíbyɛ̂h Levî ngá bibi bí, jala e nkɔb mpwár ɨ́ menkɔb kám. Ebě, Levî, mʉr dí enʉnʉa míndwéá mí bʉ́ʉ́ bʉ̂r nyá, á si dwe Mɛlkisédɛk wé ndwéá mpúhlá le waá Abraham á dwe Mɛlkisédɛk wɨ́.

¹⁰Ebě, mpʉ̌ Levî á be apǎ byɛ̂l yɨ́, yé á be ó mpʉ̌ sá lɛ́ɛ́, nye á be ó, nye dína tʉ́ŋlʉ̌ nyʉ̂l mé sɔ́ŋ mpám wé Abraham, ɨ́ jɔʼ bé e Mɛlkisédɛk, bé á bɔma yɨ́.

¹¹Dǐ pára bʉ̂r o bó ónzweh mé Levî, bé á didi yɨ́, yé ó b'á be etín é métié mé á tyélɔɔ bʉr o b'Ɨ́zraɛ̂l má. Yé bé oLevît, bé á si lóŋlo syɛ́ɛ́ yɔ́ɔ́ mbɨ̂mbɨá nó, lɛ́ɛ́, yé á bé akǎ be e nyɔm ó, nyʉ́ʉ́ pára swîh dílaa bê, nwɨɨla e Mɛlkisédɛk. Nye ntémé á bé abyɛ̂l ɨ́ mpóʼo mé Árɔn.

¹²Yé bé syɛ́ɛ́ pára, yé mû ó sí céne nó, yé jɨ ntémé ó, metié mé ésôʼ, mé cénɔɔ, ó maá meswîh, mé tyélɔɔ.

¹³Mɨná bé lɨ́ egʉ́a gá ó, mʉr dí elwibɔɔ ɨ́ lɔ̌b wé nyá, á bé abyɛ̂l lɨ́ onzweh mé Levî. Nye á byɛ̂l ó, ɨ́ waá oswîh. Tɔʼ e mʉr onzweh waá á tirwo e syɛ́ɛ́ édîʼ míndwéá lɨ́ alatâr.

¹⁴Bʉr bɨ́bɛ̂h, bé lɨ́ egʉ́a ó, Tî gá wɨ́ná á byɛ̂l ó, lɨ́ onzweh mé Yʉ́da. Nó ó, Moyɨ̂z á bé alɛ́ɛ̌ sɔ̂ʼ, dumo le onzweh waá, ó nyʉ́ʉ́ mʉ̂r tɨ̂ʼ óbɛ̌m nʉǎ dǐ pára.

¹⁵Sá bɨ́h dí elɛ́ɛ yɨ́, yé nyɨ́n ó, yé ó tyeetye, ebě, para swîh mû sí pyâl lɨ́ esú lé éséǎ syɛ́ɛ́ yaá nyá, nye ɨ́ buú nwɨɨla e Mɛlkisédɛk!

¹⁶Nye á bé anʉǎ dǐ pára ɨ́ lɔ̌b mbyɛ́lá wé, nkʉ̂ ebe métié le mempéné. Nye á tyélɔɔ ɨ́ dǐ njwɨ́ɨ opara ó e nkul nyé nye mʉr tɨ̂, le twiʼ yé dí abe e nkul epɛʼɔɔ yɨ́.

¹⁷Ebě, péh Mékaná mé Nzyɛ̌m, yé lɨ́ eboʼlo, dumo e né ó: Go ódidi pára ó, ɨ́ melú mé mpóʼo mɨ́mɛ̂h. Go ó mbi párǎ Mɛlkisédɛk á be wɨ́.

¹⁸Nzyɛ̌m á si dyɛ̂ʼ metié mé ésôʼ lɨ́ empah, ebě, mé á bé abe e nkul. Mé ntémé, mé á bé abe bʉ̂r e bá mâ nyɔm.

¹⁹Ebě, metié mé ésôʼ maá, mé á bé abe e nkul epubo syɛ̂l misyóm ɨ́ mipáʼ mímyɛ̂h. Nó ó, mpǎŋ sá dí elaa métié maá yɨ́, yɨ́ pyâl: mpûʼla mɨ́ná mû e nye ɨ́ léme nyɨ́. Nye ó dí esâ ó, mɨná sîhlaa gá bǎʼ e Nzyɛ̌m.

²⁰Yʉ́ʉ́ sɔ̂ʼ ntémé ó yɨ̂: jɔ̌ʼ Nzyɛ̌m á tyêl Tî Yésʉs ɨ́ dǐ njwɨ́ɨ opara yɨ́, nye á ntaa ó minkâl. Sâ gwár, ɨ́ jɔʼ bʉ́ʉ́ bʉ̂r bɨ́ɛ, bé á nʉnʉa dǐ yaá yɨ́, nye á bé antaa myê.

²¹Nzyɛ̌m á si ntaa minkâl ɨ́ lɔ̌b wé. Nye á lwib ó mbi wɨ̂: Dâ á si ntaa minkâl. Nye ácéně jwɨʼ yé. Nye á lɛ́ɛ ó: Go ódidi pára ó, ɨ́ melú mé mpóʼo mɨ́mɛ̂h.

²²Mpʉ̌ Nzyɛ̌m á ntaa minkâl nó yɨ́, yé á nze sâ ó, Yésʉs díʼee e mbeʼ ébaʼle sáá nyé á tyêl nyɨ́. Sá tɨ̂ʼ ó sáá nyaá dí ɨ́ mbɨa, laa nyaá esôʼ yɨ́.

²³Opara bé ésôʼ, bé á be ɨ́ buo, ebě, bé á be ó, nyâʼ dwe, nyʉ́ʉ́ dila. Eswie ó b'á kamle nyʉ́ʉ́ mʉ̂r ɨ́ sɔ́má yɔ́ɔ́ lɨ́ edǐ dǐ yaá ɨ́ bea bea.

²⁴Sâ gwár, mpʉ̌ Yésʉs dǐ njʉ̌m dǐ e njʉ̌m dǐ yɨ́, nyě baʼlé yé dǐ pára yaá ó, njɨ nye omér.

²⁵Sá tɨ̂ʼ ntémé ó nyé dí e nkul etíʼ bʉ̂r o ngá sîhlě bǎʼ e Nzyɛ̌m, cɨɨ ɨ́ nzɨ̌ nyé bá. Nyě jaá pɛʼ mébébe mɔ́ɔ́ ó mɨ́mɛ̂h. Mpʉ nyé dí njʉ̌m dǐ e njʉ̌m dǐ yɨ́, nó ntémé ó nyé dí e nkul ejɨʼla e Nzyɛ̌m lɨ́ esú lɔ́ɔ́ ɨ́ jɔʼ yɨ́yɛ̂h yɨ́.

²⁶Nye ó mbi njwɨ́ɨ opara wé á kʉ jala e mɨná gá wɨ́: nye ó mʉr dí tí, waá dí akúnwo e mpɨŋ nyá. Sá mébomo, yé abe ɨ́ nye. Nyé akúnwo bá le osyɛ̂l o mísyóm. Nye ntémé, nye ó mbɨ́ná kʉ́, laǎ jʉ́o le ejwoo le baántɛ́n.

²⁷Nyé abě mpʉ bʉ́ʉ́ ójwɨ́ɨ bé ópara, bé á bɨbe yɨ́. Yé abe nyé bi ó, nye díʼɨɨ mindwéá melú mɨ́mɛ̂h lɨ́ etáǎ góo, táare e mebyaʼ mé, kumo e maá me bʉ́ʉ́ bʉ̂r, ebě, nye á jaa dwe Nzyɛ̌m ndwéá ó, njɨ jɔʼ gwár, lɨ́ misyóm gá míná mímyɛ̂h, ɨ́ jɔʼ nyé á dwe twiʼ yé nye mʉr tɨ̂ʼ yɨ́.

²⁸Metié, mé á jaa tyêl ɨ́ dǐ njwɨ́ɨ opara ó, bʉr o b'á be ɨ́ tyɛʼ bá. Nó ó, píe metié maá, Nzyɛ̌m á si káale, nye mʉr tɨ̂ʼ ntɔ̂ʼ tyêl Mwân wé ɨ́ dǐ njwɨ́ɨ opara lɨ́ esú é bíjɔʼ bíbyɛ̂h. Mwân wé waá ó dí e nkul elóŋlǒ syɛ́ɛ́ yaá yɨ́yɛ̂h.