Read Koonzime Ebrœ̂ 8 Bible Online

Ebrœ̂ 8 - Koonzime bible

Ebrœ̂ 8

¹Lʉ́ ékǎn e bísá bɨ́h dí elɛ́ɛ bɨ́n bí, wé ó wɨ̂: mɨná gá bé ó e mbi njwɨ́ɨ opara waá. Nye ó ndîndǐl ɨ́ jʉ́o kʉ́ ɨ́ mbó éjʉ́m mé Nzyɛ̌m Sɔ́ŋ nkul nyɨnyɛ̂h.

²Nyě séá syɛ́ɛ́ njwɨ́ɨ opara yé ó, ɨ́ gúmó dí ɨ́ buú buǒ tí yɨ́. Nó ó, nyě séá ó, ɨ́ mbɛ̌r kán mpâ, waá Dâ Nzyɛ̌m mʉr tɨ̂ʼ á sumo wɨ́. Wé abě sumá mébó mé bʉ̂r.

³Njwɨ́ɨ opara nyɨnyɛ̂h, nye tyélá ɨ́ dǐ pára yé ó, nye táŋaa mebyaʼ me bʉ̂r le edwidwě Nzyɛ̌m mindwéá. Nó ntémé ó Yésʉs á be ɨ́ bi ó, nye tôʼ dwě Nzyɛ̌m yʉ́ʉ́ sɔ̂ʼ.

⁴Yé bé syɛ́ɛ́ pára yé, yé á jala le eséɔɔ ó, ɨ́ sí yɨ̂ʼ nó, mpa Yésʉs á bé abe pára, ebě, yé le opara oswîh o dí edwě Nzyɛ̌m mindwéá, dû mpʉ métié mé Moyɨ̂z dí etɨ́e yɨ́ bá.

⁵Opara bɨ́ɛ, bé sɨ́séá ó, ɨ́ mpáh Nzyɛ̌m, nyaá sí yɨ̂. Nye ó njɨ lɨ́ ebaŋa mpáh Nzyɛ̌m mpâ dí ɨ́ jʉ́o kʉ́ nyɨ́. Nó ɨ́ jɔ̌ʼ Moyɨ̂z á be ó, nyě sumó ó mbɛ̌r kán mé Nzyɛ̌m yɨ́, Nzyɛ̌m á lɛ́ɛ e né ó: «Gwá sumǒ sá yɨ́yɛ̂h lɨ́ edû mveʼlě mbɛ̌r gó á lɛ̂ʼlɔɔ lɨ́ ecwɨ̂ʼ kʉ́ yɨ́.»

⁶Syɛ́ɛ́ pára Yésʉs dí eséa lɨ́ esú gá lɨ́ná ɨ́ báánâʼ yɨ́, yé e nyɔm ɨ́ buo buo, laǎ syɛ́ɛ́ pára yé á duho myâ yɨ́. Nye ó dí mesaádɔm dí etyɛ̂b páʼ gá nyɨ́ná e Nzyɛ̌m nyá. Saá dwân Nzyɛ̌m á tyêl páʼ nyɔ́ɔ́ e bʉr nyɨ́, nye ɨ́ buo nkûl ɨ́ lɔ̌b ménkɛ̌ʼ Nzyɛ̌m á sâ má. Menkɛ̌ʼ maá, mé ɨ́ mbɨa, laa maá me sáá esôʼ.

⁷Saá esôʼ, nye á bé agwá jala. Yé bé nye á si jala nó, mpa Nzyɛ̌m á bé akǎ dila nyé e nyaá mbá.

⁸Sâ gwár, Nzyɛ̌m á be ɨ́ kœb ó, bʉr, bé e bidyɛʼ. Sá tɨ̂ʼ ó nyé á lɛ́ɛ ó: «Dâ Nzyɛ̌m lɛ́ɛ́ ó: “Jɔʼ, yé ópyâl. Jɔʼ yaá ó mé ótyêl sáá swîh páʼ nyɨ́h e bʉr o b'Ɨ́zraɛ̂l yɨ́. Me ótyêl nyé ntémé ó, páʼ nyɨ́h e bʉr ó Yʉ́da.

⁹Jɔʼ mé á mɛ̂r bimpám byɔ́ɔ́ ɨ́ mebô, pɛʼ bé ɨ́ sí Egɨ̂ptɛn yɨ́, me á si tyêl saá páʼ nyɨ́h le onɔ́ɔ́. Nó ó, edwán é sáá mé ókǎ báʼǎ tyêl lɨ́, lé ákǎ bě mpʉ nyɨ́haá. Bé á bé adû métié mé sáá esôʼ mé á tyêl páʼ nyɨ́h le onɔ́ɔ́ nyɨ́. Sá tɨ̂ʼ ó mé á túmo koo e bé yɨ́.”»

¹⁰Ebě, Dâ Nzyɛ̌m lɛ́ɛ́ ó: «Píe melû maá, saá mé ngá tyêl páʼ nyɨ́h e kúl bʉ̂r o b'Ɨ́zraɛ̂l nyɨ́, nye óbe ó, mbi wɨ̂: Me ólíʼe métié mâm ɨ́ lʉ́ wɔ́ɔ́. Me ócɛma bé mǎ ɨ́ miléme. Me óbe ó Nzyɛ̌m wɔ́ɔ́. Bɨ́ɛ, bé óbe ó bʉr bâm.

¹¹Yé ákóʼó kǎ be e mʉr ókǎ tó lɛ́ɛ só wé, nkʉ̂ mɨ́ɔɔ́ wé ó: “Wɛɛ, paá cɨ́! Me páa lɛ̂ʼle gó mpʉ mɨ́ná jálá le egʉ́ǎ Dâ Nzyɛ̌m yɨ́! Ebě, bɨ́bɛ̂h, bé óbánǎ gʉ́a mê, táare e bwá ó ntwǒm, kala le otɔ́má bʉ̂r.

¹²Me ójɨ̂ʼ bʉ̂r o b'á gbah metié mâm bá nkoó. Me ákǎ símsa mísyóm myɔ́ɔ́.”

¹³Ɨ́ mpʉ̌ Nzyɛ̌m á jébe saá mbá «edwán é sáá» yɨ́, nye á si liŋ nyaá esôʼ mbǒr. Nó ó, sá mû mbǒr, nkʉ̂ yaá mû sí jwɨm yɨ́, yé mû ntémé ó kúno edîm yɨ́yɛ̂h!