Read Koonzime Ebrœ̂ 9 Bible Online

Ebrœ̂ 9 - Koonzime bible

Ebrœ̂ 9

¹Saá Nzyɛ̌m á nyɛɛ tyêl páʼ nyɔ́ɔ́ e Moyɨ̂z nyɨ́, á be ó e metié e mempéné mé, mɨ́ɛ lɨ́ ejwɨ́ɨ̌ mbi mʉ̂r jálá le edwě Nzyɛ̌m kûm wɨ́. Nye á be ntémé ó e yʉ́ʉ́ gúmo ɨ́ sí yɨ̂ʼ lɨ́ esú é syɛ́ɛ́ yaá.

²Mbɛ̌r kán waá, wé á sumɔɔ ó, mbi wɨ̂: Ntɔ́ɔ esôʼ, nye á jébɔɔ ó «ntɔ́ɔ á be tí nyɨ́». Tɨ̂ʼ tʉ́ŋlʉ̌, yé á be ó e tyélátyéla éláma ndu e téble. Biblêr bé á dwidwe Nzyɛ̌m bí, byé á tyélɔɔ ó, kʉ́ téble waá.

³Yé á be ó e gúú kán wé á be lɨ́ ela ébê wɨ́. Wɨ́haá kán ébê, wé ó waá mbá pára dí ebɔma e wé ɨ́ jɔʼ nyé ní ɨ́ mpáh Nzyɛ̌m yɨ́ wɨ́. Nko píhe kán ébê waá, yé á bě e ntɔ́ɔ mbá, nyaá bé á jébe ó «ntɔ́ɔ dí ɨ́ buú buǒ tí nyɨ́.»

⁴Alatâr á be ó tɨ̂, waá á sáŋɔɔ ɨ́ gʉ̂l nyá. Bé á si titira duró tɨ̂ʼ kʉ́, lɨ́ edidîʼ ótú ó dúu. Yé á be ntémé ó e mpɔra sáá. Mpɔra yaá, yé á si gbáŋɔɔ gʉ̂l ɨ́ mipáʼ mímyɛ̂h. Ɨ́ mpɔra tʉ́ŋlʉ̌, bé á si komo mpɨ̌ á sáŋɔɔ ɨ́ gʉ̂l nyɨ́. Nye á be ó lwɨ́ŋlá e manne.[2] Ɨ́ mpɔra sáá yaá, yé á be ntémé ó e ntúm mé Árɔn wé á pâh biká wɨ́. Mpɔra yaá, yé á be ntémé ó e bipéh mékóʼ bíbá. Metié mé Njʉ̌m sáá, mé á be ó mɨtilá ɨ́ mekóʼ maá.

⁵Yé á be ntémé ó e mbúrá mpɔ́ra sáá, súm bé á mi-myɛʼ metié mé á lɨleʼe kpaa mé Nzyɛ̌m yɨ́. Ɨ́ mbúrá waá kʉ́, yé á be ó, le okerʉ̂b obá. Mempabaá mɔ́ɔ́, mé á be ó mɨsyɛ́má, lé esâ dúʼwó ɨ́ nkǒ páʼ mbúrá. Bé ó w'á be lé elɛ̂ʼle ó, Nzyɛ̌m, nye ó tɨ̂ʼ sûm yaá. Mé abe le epʉ́la ɨ́ báánâʼ ó, me lɛ́yɨɨ bisâ byaá bíbyɛ̂h.

⁶Jɔʼ bé á sil ekomlo bisâ byaá bíbyɛ̂h, le ekomo byé ɨ́ bijá byɔ́ɔ́ yɨ́, opara bɨ́ɛ nzě táare éninî ɨ́ ntɔ́ɔ esôʼ ɨ́ ti ti ti, lɨ́ etô le elóŋlǒ syɛ́ɛ́ yɔ́ɔ́.

⁷Sâ gwár, njwɨ́ɨ opara nye omér ó b'á ninî ɨ́ ntɔ́ɔ mbá. Nye á jaa ninî tɨ̂ʼ ó, njɨ jɔʼ gwár ɨ́ mbû. Nye á tʉ̂to gʉ̂ʼ ó e sʉ́á métié mé ótír, ó Nzyɛ̌m pɛ́ʼɛɛ bibaa bí ébébe nyé á pa niʼe bí, byaá ɨ́ lɔ̌b ébébe lé nye mʉr tɨ̂, ti e laá e bʉ̂r oswîh, bé á sâ, bɨ́ɛ l'agʉ́a lɨ́.

⁸Sísǐm mé Nzyɛ̌m lɛ́ʼlé mɨ́ná gá ɨ́ lɔ̌b waá ó, jɔ̌ʼ mbɛ̌r kán mé Nzyɛ̌m dína tîtyěl yɨ́, mʉr, nyé abe e nkul edi e nzɨ̌ mběʼ dí ó, nye kúmaa ɨ́ ntɔ́ɔ á be ɨ́ buú buǒ tí nyɨ́.

⁹Yɨ̂ʼ, yé ó mveʼle dí elɛ̂ʼle mɨ́ná gá ɨ́ jɔʼ yɨ̂ʼ ó, bʉ̌r damá tíʼe ótír, táǎ Nzyɛ̌m mebyaʼ mɔ́ɔ́ ɨ́ nzɨ̌ mindwéá myaá, myé abe e nkul epubo míléme mi bʉ̂r o dí edîʼ nyé myǎ bá. Myé abe lɨ́ esâ ntémé ó, mipahlá mílémé myɔ́ɔ́, myé díʼee ɨ́ pyɛɛɛ.

¹⁰Nzyɛ̌m á tíʼe ɨ́ lémé wé ó, bʉr, bé ósɨsâ nyé mbǐ yébé nɨ̌ ó, tó pyâl ɨ́ jɔʼ nyé ókǎ tyêl bʉ̂r metié me dí tîtyěl má yɨ́. Metié le mempéné mé ésôʼ, mé á jaa dwɛ̂ʼ ó, njɨ ɨ́ páʼ nyʉ̂l mʉr. Metié maá, mé á jaa tɨ́e mʉr ó, njɨ mimbi méde le menyoʼ myé á jala ó, nye dêʼ mí, le mimbi míndubó myé á jala ó, nye dúŋɔɔ mí.

¹¹Krîst, nye mû ó sí nʉǎ dǐ njwɨ́ɨ opara. Nye á nze ó, lɨ́ enzě kab mɨ́ná gá bisá bí émbɨa mɨ́ná mû kúno enʉa gá bí. Nyě séá ó ɨ́ mpǎŋ mpáh Nzyɛ̌m, nyaá dí ɨ́ buo kûm nyɨ́. Yé abe e sá dí esâ sɔ́ɔlʉ tɨ̂. Nye á bé asumɔɔ e mebô. Nye ntémé, nyé abe lɨ́ egúmo e sí yɨ̂. Nye lɨ́ elaa mpáh nyé á nyɛɛ be nyɨ́ ɨ́ mpwaʼ.

¹²Jɔ̌ʼ Yésʉs á nî mpáh Nzyɛ̌m nyaá yɨ́, nye á bé anʉa sʉ́á métié mé óntamakǎ, nkʉ̂ maá bíntœœ. Metié nyé á nʉa, nî e mé má, mé á be ó maá mé nye mʉr tɨ̂. Nye nzě tó nî ɨ́ ntɔ́ɔ á be ɨ́ buú buǒ tí nyɨ́. Nye á nî ó, jɔʼ gwár lɨ́ esú é bíjɔʼ bíbyɛ̂h, ó nye nkʉ̂ táa góo, le edwih mɨ́ná gá ɨ́ mpila ébébe, ó mɨná díʼee gá onzyɛh o bʉ̂r, njʉ̌m dǐ e njʉ̌m dǐ.

¹³Bʉr o b'á pa syel biti bá, bé á ka pubɔɔ ɨ́ páʼ ményʉ̂l ó e metié. Metié bíntœœ ndu e maá mé óntamakǎ, le meswií bwá bíntœœ, pǎ nyɛɛ́ pubo mʉ̂r,

¹⁴á dwɛʼra e metié mé Krîst! Nye ókʉ́ pubo mípahlá mílémé gá míná, e nzɨ̌ Sísǐm mé Nzyɛ̌m dí edǐ njʉ̌m dǐ e njʉ̌m dǐ wɨ́. Mɨná damá sâ gá Nzyɛ̌m bisyɛ́ɛla bi dí mpʉ mímúu bí, mɨná bé ógwá pubɔɔ gá tɨ̂ʼ ó e metié mé, ánta nye, maá nyé mʉr tɨ̂ʼ á nkɛ́ɛ, tó dwě Nzyɛ̌m Sɔ́ŋ má. Nye á be ntémé ó, abe e sâ gwár bʉ̂r, bé á gwa dwe nye mebě tɨ̂. Ɨ́ tɨ̂ʼ ó mɨ́ná bé ókǎ sâ gá Nzyɛ̌m dí kublakúbla nyá gwɨ́hlá óbûʼla mpâ yɨ́.

¹⁵Mpʉ̌ Krîst á sâ nó yɨ́, nye mû ó mesaádɔm dí etyɛ̂b páʼ gá nyɨ́ná e Nzyɛ̌m nyá. Nye á tyɛ̂b nó ó, lɨ́ esâ édwán é sáá páʼ gá nyɨ́ná e Nzyɛ̌m. Saá nyaá, nye tɨ̂ʼ ó, lɨ́ esú é bʉ̂r ó Nzyɛ̌m á jébe bá, ó bé bíʼee twǐʼ njʉ̌m dǐ, jala e nkɔb líʼe nyɔ́ɔ́. Yé ó sá Nzyɛ̌m á kɛʼ bé yɨ́, ebě, Krîst á si dwe, lɨ́ enzě táǎ góo, le edwih mɨ́ná gá ɨ́ mpila ébébe, pɛʼ mɨ́ná gá ɨ́ fá. Mɨná bé á be gá ɨ́ mpila yaá ó, tɨ̂ e bisyɛ́ɛla bí ébébe mɨ́ná bé á sâ gá ɨ́ jɔʼ mɨ́ná bé á be gá ɨ́ saá esôʼ yɨ́.

¹⁶Mʉ̂r sí cɛma mékaná mé líʼe, nzě dwe nó, bʉr, bé ókabla bílíʼe byé byaá ó, bé osí pǎ nyɛɛ́ beě jwɨʼ dí elɛ̂ʼle ó, mʉr á pa cɛma mekaná maá nyá, nyé akǎ be ɨ́ twiʼ yɨ́.

¹⁷Yé bé mʉr á cɛma mekaná mé líʼe nyá, nye dína ɨ́ twiʼ nó, mekaná maá, mé ápǎ gbáŋɔɔ ɨ́ nkɔb. Mé ójaá kǎ gbáŋɔɔ ɨ́ nkɔb ó, njɨ píe l'eswie lé.

¹⁸Saá esôʼ Nzyɛ̌m á tyêl páʼ bé e bʉr nyɨ́, á taare enʉa nkul ó, ɨ́ jɔʼ métié mé ótír, mé á swɨɨ sí yɨ́.

¹⁹Jɔ̌ʼ Moyɨ̂z á be, nye mû sí láa bʉ̂r o b'Ɨ́zraɛ̂l bɨ́bɛ̂h metié mé Nzyɛ̌m mɨ́mɛ̂h yɨ́, nye á si tíʼe bwá bíntœœ le ontamakǎ, nʉa métié mɔ́ɔ́, nzě pûhla mé e medíbé. Nye nzě sâ ébúhó é bíká bí lɨ́ ésɔp ndu e myě bínteme, mé á dubɔɔ ɨ́ bikaá má, nzě nʉa ébúho laá, dubo lé ɨ́ metié, nzě pupubo mekaná métié maá, ndu e bʉr baá bɨ́bɛ̂h.

²⁰Nye á lɛ́ɛ e bé ó: «Mâʼ, mé ó metié mû lɨ́ eswɨɨ, sâ sáá páʼ gá nyɨ́ná le Nzyɛ̌m má.»

²¹Moyɨ̂z á be ntémé ó, sí pubǒ mbɛ̌r kán mé Nzyɛ̌m e metié maá, pubo ntémé bisá bíbyɛ̂h nyé á bibi ɨ́ bijɔʼ nyé á dwe Nzyɛ̌m kûm bí.

²²Metié mé Nzyɛ̌m, mé lɛ́ɛ́ ó, bé púbaa bɛ̌m bě sá yɨ́yɛ̂h e metié mé ótír. Jɔʼ métié me tɨ̂ʼ dína apǎ swɨɨ sí yɨ́, Nzyɛ̌m, nyé abe lɨ́ epɛʼ mʉ̂r bibaa bí ébébe nyé á niʼe nye bí.

²³Yé á kʉ jala ó, bʉr púbaa bisá bí sí yɨ̂ʼ e metié mé ótír, ebě, byaá bí sí yɨ̂ʼ, byé ó bimveʼle, lɨ́ emveʼle byaá bimpâ bi dí ɨ́ jʉ́o kʉ́ bí. Nó ó, bisâ bimpâ byaá bíɛ, byé ɨ́ jala le epubɔɔ ó, ɨ́ nzɨ̌ mpǎŋ ndwéá métié. Wɨ́haá ndwéá, wé lɨ́ esyɛ́ɛla e waá ésôʼ. Wé ntémé ó dí ɨ́ buú buo ódimé.

²⁴Ebě, Krîst á bé anî mbɛ̌r kán bʉ̂r, bé á sumo Nzyɛ̌m wɨ́, waá dí enwɨɨla e mpǎŋ mpáh Nzyɛ̌m wɨ́. Mbɛ̌r waá, wé ó njɨ mveʼle, lɨ́ enwɨɨla e mpáh mpâ. Nye á nî ó, ɨ́ jʉ́o kʉ́. Nye mû ó lɨ́ etyɛ̂b ɨ́ jʉ́o kʉ́ ɨ́ míh mé Nzyɛ̌m lɨ́ elwib ɨ́ nkɔ̌m gá nyɨ́ná.

²⁵Njwɨ́ɨ oparǎ nʉnʉa métié, ninî e tɨ̂ʼ ɨ́ ntɔ́ɔ dí ɨ́ buú buǒ tí nyɨ́ ó, mbú wɨ́wɛ̂h. Nye átô e metié mé, ánta nye. Krîst nyɨɛ á bé anî ɨ́ jʉ́o nzɔʼ nzɔʼ, lɨ́ etó dwě Nzyɛ̌m nyʉ̂l nyé.

²⁶Yé bé nye á dwidwe ndwéá wé ó, nzɔʼ nzɔʼ nó, mpa nye á sia ntémé e mitúú ó, nzɔʼ nzɔʼ, táare ɨ́ jɔ̌ʼ Nzyɛ̌m á kuho kʉ́ e sí yɨ́. Nye á jaa nyɨ̂n ɨ́ sí yɨ̂ʼ ó, njɨ jɔʼ gwár ɨ́ kpɔ́ŋ. Yé á be ó, ɨ́ jɔʼ éswéhlɨ́ é sí yɨ̂, lé á pyâl ɨ́ mɨná gá yɨ́. Nye nzě dwě Nzyɛ̌m nyʉ̂l nyé, lɨ́ epɛʼ bʉ̂r misyóm myɔ́ɔ́ lɨ́ esú é bíjɔʼ bíbyɛ̂h.

²⁷Sâ Nzyɛ̌m á komo lɨ́ esú é mʉ̂r nyɨnyɛ̂h yɨ́, yé ó, nye dwêʼ jɔʼ gwár. Píe tɨ̂, mʉr waá ótô kwá mé Nzyɛ̌m, ó nye tôʼ pahlɔɔ.

²⁸Jwɨʼ gwár e gwár e Krîst. Nye á si dwe jɔʼ gwár, ó nye búraa le misyóm lɨ́ esú é bʉ̂r ɨ́ buo buo. Ɨ́ jɔʼ mbá nyé ókǎ nze yɨ́, nye ákǎ báʼǎ nze ɨ́ lɔ̌b ébúra e misyóm. Nye ónze ó, lɨ́ enzě tíʼ bʉ̂r o dí ebóno nyé bá.