Read Koonzime Jacques 1 Bible Online

Jacques 1 - Koonzime bible

Jacques 1

¹Yé ó mɛm Jacques, syɛ̂l mesâ mé Nzyɛ̌m le Tî Yésʉs-Krîst ó dí ecɛma bɨ́n mekaná mâ. Me lɨ́ esoho bɨ́n, bʉr o ménzweh kám e mebá mû mingbɛhá míngbɛhá ɨ́ sí yɨ́yɛ̂h bá.

²Bɨ́ɔɔ́ bâm! Okɛ́l bâm! Jɔʼ bé dí ebóblo bɨ́n mimbi mímyɛ̂h yɨ́, bɨ̌n e gʉ́á ó, yê bɨ̌n ó jɔʼ bísʉhʉʉ.

³Ebě, bɨ̌n bé ɨ́ jala le egʉ́a ó, ɨ́ jɔʼ yaá, yé ónyɨ̂n ɨ́ ponó ɨ́ míh mé bʉ̂r, nkʉ̂ bɨ̌n bé lɨ́ edyɛ̂ʼwo e Nzyɛ̌m lɨ́ otyeetye. Búʼó yɨ́n, yé ódwe bɨ́n bíhwó ɨ́ buo buo.

⁴Kamaa gá bé edûhwǒ sá yɨ́yɛ̂h, ebě, bíhwó nyaá, nye óbe bɨ́n e nyɔm. Bɨ̌n bé otɔ́ma ɨ́ mipáʼ mímyɛ̂h. Bɨ̌n bé óbe ó e sá yɨ́yɛ̂h, abe e sá yé ósâ bɨ́n sɔ́ɔlʉ.

⁵Nyʉ́ʉ́ mʉ̂r ɨ́ sɔ́má yɨ́n bé lɨ́ ejɨ ócwóó nó, nye jáʼaa Nzyɛ̌m wǎ. Nye ókʉ́ dwe nyé wǎ. Nzyɛ̌m dwídwé bʉ̂r ocwóó ó, dwě dwêʼ, abe e túú ɨ́ léme.

⁶Sâ gwár, nye ɨ́ jala le ejɨʼla e Nzyɛ̌m ó, lɨ́ ekʉ́ dyɛ̂ʼwo e né. Nyě sá ó, alíʼa lɨ́ ejaʼ ócwóó waá, ebě, mʉr dí elíʼa lɨ́ ejaʼ míndwéá mé Nzyɛ̌m nyá, nyě nwɨɨlá ó, le obóʼó ó mâŋ pubó dí etíne, tyěn gúmó yɨ́yɛ̂h wɨ́.

⁷Nó ó, mʉr dí e milémé mímbá nyá, nye ákóʼó bi yʉ́ʉ́ sɔ̂ʼ kwá mé Dâ ɨ́ lɔ̌b mínjɨʼla myé myaá.

⁸Ebě, nye ó mekʉ̌ me kwɨ̂h. Kʉ̌ tyen wé ntémé, wé ó ɨ́ yéŋe yeŋé yéŋê.

⁹Mɨ́ɔɔ́ wɨ́ná ɨ́ Mbɛ̌r-Nzyɛ̌m dí ántéʼenteʼe mʉr nyá, nye ɨ́ jala le enkʉ́na ɨ́ lɔ̌b dǐ nɨ́nɨ́ɨ́ Nzyɛ̌m á tyêl nye tɨ̂ʼ yɨ́.

¹⁰Nó ó, mɨ́ɔɔ́ gá wɨ́ná dí ɨ́ twíha nyá, nye ɨ́ jala le enkʉ́na ɨ́ dǐ nkóó Nzyɛ̌m á dil nye tɨ̂ʼ yɨ́. Nye ɨ́ jala le egʉ́a ó, nye ólaǎ mpʉ nzɔ́m bilɨ́.

¹¹Dʉ́o, lé lɨ́ ekah; dwéhé, dîʼ nzɔ́m. Nye lɨ́ ekur sí; ojɔɔ́ wé bʉ̂r bé á bɨbee wɨ́, wé ntɔ̂ʼ síe. Yé lɛ́ʼlé ntémé ó mpʉ kúmá mʉr ngá dumlo yɨ́. Nye ódwě ntuʼ ɨ́ jɔʼ nyé óbe, nye dína lɨ́ elûhwa lɨ́ edû mílɔ̌b myé yɨ́.

¹²Metyɛʼ me mpóm, mé díʼee e mʉr dí edûhwo mébʉ́blá nyá. Ebe mʉ̂r tɨ̂ʼ síl ébóblɔɔ nó, nye óbi myɛ́na me tɨ̂: twǐʼ Tî Yésʉs á kɛʼ bʉr o dí ekpɛl nyé bá yɨ́.

¹³Jɔʼ mʉ̂r mû lɨ́ ekʉ́ bóblɔɔ yɨ́, nye sá alɛ́ɛ ó, Nzyɛ̌m ô lómó nyé ó, nye sâʼ ebébe. Nzyɛ̌m, nyé abe e nkul ebóblɔɔ ɨ́ nzɨ̌ ebébe. Nye ntémé, nye ábóbló mʉ̂r.

¹⁴Bibébebébe bígwɨ́má bi dí ɨ́ léme bí, byé ó dí etíne mʉ̂r tɨ̂ʼ ó, nye sâʼ ebébe. Byé lɨ́ ekwâb nyê.

¹⁵Bigwɨ́má mû lɨ́ etíʼe ɨ́ léme tʉ́ŋlʉ̌ bí, byé súʼlá ó, byâ mwân. Mwân waá, nye ó misyóm mɨ́ná dí esâ gá mí. Jɔʼ mísyóm gá míná, myé óbe, myé mû sí bwaʼ yɨ́, míɛ, myé okǎ byâ wé mwân: eswie.

¹⁶Bɨ́ɔɔ́ bâm! Okɛ́l bâm, bʉr mé dí ekpɛl bá! Mʉ̌r sá ajéʼě sɨ̂:

¹⁷bisá bíbyɛ̂h bi dí ɨ́ mbɨa bí, le mindwéá mi dí ɨ́ pémémé ɨ́ mipáʼ mímyɛ̂h mí, byé duho ó, ɨ́ jʉ́o kʉ́, kwá mé Nzyɛ̌m Sɔ́ŋ. Nzyɛ̌m ó b'á komlo ocwícwén, le dʉ́o ti e l'álomó. Nó ó, nyé abe lɨ́ ecéně mpʉ bísâ byaá dí ecéne bítyé byɔ́ɔ́ yɨ́. Nyé acéně mpʉ dʉ́o, sá dí edíme, kǎ líʼe bʉ̂r ɨ́ pyóo yɨ́.

¹⁸Nye mʉr tɨ̂ʼ á byâ mɨná gá ó, ɨ́ lɔ̌b gwɨ́má yé, ɨ́ nzɨ̌ lwǐb yé dí tyeetye yɨ́. Nó ɨ́ bisá bíbyɛ̂h nyé á komlo bí, mɨná ó dí gá ɨ́ tyé ésôʼ.

¹⁹Bɨ́ɔɔ́ bâm! Okɛ́l bâm, bʉr mé dí ekpɛl bá! Gʉ́ŋáá gá ó: mʉr, nye ɨ́ jala le ekpâhwǎ jóʼo, sâ gwár, akpâhwǎ lwib, akpâhwǎ kpaa ébúʼ.

²⁰Ebě, ɨ́ jɔ̌ʼ lémé mʉ̂r dí ɨ́ kpɔɔ kpɔɔ yɨ́, mʉr tɨ̂ʼ, nyé abe e nkul ekǎ sâ syɛ́ɛla dí tîtyěl ɨ́ míh mé Nzyɛ̌m yɨ́.

²¹Pɛʼɛɛ gá mebomo dí ɨ́ sɔ́má yɨ́n má. Bɨ̌n e gwâʼ le esâ ébébe é léme, ntaa sʉ́ŋa. Bɨ̌n e nʉ́á lwǐb mé Nzyɛ̌m e miléme mi dí ɨ́ pyɛɛɛ mí. Lwǐb yé yaá, yé mû ó mbeá tʉ́ŋlʉ̌ milémé mín. Lwǐb yaá ó dí e nkul etíʼ bɨ́n.

²²Sá Nzyɛ̌m mû lɨ́ elɛ́ɛ bɨ́n yɨ́, bɨ̌n e sá yé mejóʼo. Ayɨ́ jóʼo gá njɨ e megwǎl. Bɨ́n jóʼó njɨ e megwǎl nó, lɛ́ɛ́, bɨ̌n kʉ́á ó bɨ̌n bʉr o tɨ̂.

²³Ebě, mʉr dí ejóʼǒ lwǐb yaá, agbâ yé ɨ́ nkɔb nyá, nye ó mpʉ mʉ̂r dí edwɛ̂ʼ mpóm nyé lɨ́ enyɨ́n, beě mpʉ nyé á byɛ̂l yɨ́.

²⁴Le nyé dwír koo, le ntɔ̂ʼ nyé jɨ́há mpʉ nyê bé yɨ́.

²⁵Nó ó, mʉr waá dí esâ étié mé Nzyɛ̌m mejóʼo, le esâ sɨ́n lɨ́ ebaʼle lé nyá, nyɨ́haá ó Nzyɛ̌m ngá sʉ métyɛʼ me mpóm. Nye óswɨɨ métyɛʼ me mpóm ɨ́ syɛ́ɛla yé yɨ́yɛ̂h nyé ngá sâ yɨ́, ebě, nyé abě mbi mʉ̂r dí, le nyê jóʼó, le nyê jɨhá nyá. Nye lɨ́ esâ bísyɛ́ɛla bi tɨ̂. Etié laá, lé ó mbɨ̂mbɨá ɨ́ mipáʼ mímyɛ̂h. Lé e nkul etyêl mɨ́ná gá ɨ́ tyé ónzyɛh o bʉ̂r.

²⁶Mʉ̂r láá ó, nye ó mbûʼla, nye l'amɛ̂r jɨ̂m yé nó, nyě kʉ́á ó nye mʉr tɨ̂. Búʼó mʉ̂r waá, yé ó dwêh.

²⁷Mpǎŋ búʼó ɨ́ míh mé Nzyɛ̌m Sɔ́ŋ ɨ́ pémémé, yé ó nɛ́ɛ: mʉr tôʼ bwá bé ónyʉ̌l ɨ́ menɔɔlʉ. Nye súʼaa ntémé mikúho mi dí esia e mitúú mí. Nye díʼee e ncɛrá le bisá bí sí yɨ̂, lɨ́ esú ó, byé ayɨ́ kala nyé bilœ̌ʼ byɔ́ɔ́.