Read Koonzime Jacques 2 Bible Online

Jacques 2 - Koonzime bible

Jacques 2

¹Bɨ́ɔɔ́ bâm! Okɛ́l bâm! Yé ɨ́ mbɨǎ mpʉ bɨ́n dí edyêʼ koo e Tî gá wɨ́ná Yésʉs-Krîst, waá mɨ́ná dí egúmlo gá nyá yɨ́. Sâ gwár, sá adwáawo bʉ́ʉ́ bʉ̂r mempǒm, pyêh bʉ́ʉ́.

²Ebě, ɨ́ jɔʼ bɨ́n sá bígwɨ́hlá bín yɨ́, bɨ̌n sɨ́sá nyá? Bɨ̌n sɨ́sá ó: bʉ̂r obá, bé ópyâl ɨ́ gwɨ́hlá yɨ́n: nyâ, e milɔná mí gʉ̂l ɨ́ mpiné ndu e mikán ɨ́ nyʉ̂l ɨ́ nkaaá; nyʉ́ʉ́, e binyɛɛ́la míkán ɨ́ nyʉ̂l nó,

³bɨ̌n lɨ́lɛ́ɛ́ e mʉr dí e mikán ɨ́ nyʉ̂l ɨ́ nkaaá nyá ó: «Beě mbɨambɨa diá? Diʼee wâ.» Ntɔ̂ʼ kǎ lɛ́ɛ le ántéʼenteʼe mʉr nyɨɛ ó: «Tyɛ́bɨ́ɨ́ náǎ tîtyěl» nkʉ̂ ntɔ̂ʼ ó: «Diʼee wâʼ ɨ́ bibwǎh, gúmó mékʉ̌ mâm dí yɨ̂.»

⁴Bɨ̌n bé así gbâ mímbɔ́ʼ ɨ́ milémé mín ɨ́? Syɛ́ɛla yɨ́n yaá, yé lɛ́ʼlé ó, bɨ̌n mû kǎ pɨpahle mílɔ̌b ó e pɨʼ dí onzyɛ́h ónzyɛ́h wɨ́.

⁵Bɨ́ɔɔ́ bâm! Okɛ́l bâm! Bʉr mé dí ekpɛl bá! Jóʼláá gâ: Nzyɛ̌m á si twâr baántéʼenteʼe o bʉ̂r ó sí yɨ̂ʼ lɨ́ esú ó, nye gbâʼ bé buobuo búʼó ɨ́ miléme. Nzyɛ̌m á si kɛʼ bʉr o dí ekpɛl nyé bá ó, nye ódwe bé mimbɨambɨa bísâ ɨ́ Mpóʼo nyé. Ntʉ báántéʼenteʼe o bʉ̂r ó sí yɨ̂ʼ ó ngá lîʼ e bisá nyé á kɛʼ bí ɛ́?

⁶Tó kœb ó, bɨ̌n bé á si sâ baántéʼenteʼe o bʉ̂r baá bisá bí ésɔ́m! Ntʉ ókúm ó bʉ̂r ónɨ̌ ó dí esâ bɨ́n mpêl ɛ̌? Ntʉ bé dí etó pur bɨ́n ɨ́ mempáh mílɔ̌b ɛ́?

⁷Ntʉ bé dí epyêh mbɨambɨa díé mé Yésʉs-Krîst bɨ́n dí ejwɨrɔɔ e tɨ̂ʼ lɨ́ ɛ́?

⁸Yé kʉ́ jala ó bɨ̌n dúʼoo etié me Njwɨ́ɨ gá wɨ́ná. Lé lɨ́ elɛ́ɛ ó: «Kpɛlɨɨ mɨ́ɔɔ́ gǒ mʉr mpʉ gó dí ekpɛl gó mʉr tɨ̂ʼ yɨ́.»

⁹Nó ó, bɨ́n gbá mbɔ́ʼ páʼ bʉ̂r e bʉr, le edwáawo bʉ́ʉ́ bʉ̂r mempǒm nó, bɨ̌n bɨ́ sâ syóm ó tɨ̂ʼ yɨ́. Etié laá, lé ókʉ́ lɛ̂ʼle bɨ́n ó, bɨ̌n bɨ́ gbah lê.

¹⁰Mʉ̂r sá sɨ́n lɨ́ ebaʼle métié mé Nzyɛ̌m mɨ́mɛ̂h, kǎ gbah étié egwár nɛ́ɛ: nye mû ó mbyɔʼ ó tɨ̂ʼ yɨ́. Yê ɨ́ wé pâʼ mpʉ̌ sá lɛ́ɛ́ ó, nyɨ́ gbah mɨ́mɛ̂h.

¹¹Ebě, mʉr ngwár á pa lɛ́ɛ ó: «Asâ médyɛ̂n» nyá, nye ntémé ó b'á lɛ́ɛ ó: «Ajʉ̂ mʉ̂r.» Nó ó, gó bé asâ médyɛ̂n, jʉ̂ yɨ́ɛ mʉr nó, go ó, gʉ́ bánǎ ntaa mpéné Nzyɛ̌m á gbâ nyɨ́ ó tɨ̂ʼ yɨ́.

¹²Nó, ɨ́ jɔʼ bɨ́n mû lɨ́ ekpɛl écɨ ékǎn eswîh, ekǎn é kɛl, nkʉ̂ ó, bɨ̌n sá ó yʉ́ʉ́ syɛ́ɛla yɨ́, bɨ̌n e gʉ́á ó, Nzyɛ̌m ópahle mékǎn le bisyɛ́ɛla bín. Nye ókʉ́ dû étié e dí esâ ó, mɨná díʼee gá onzyɛh o bʉ̂r lɨ́.

¹³Mʉ̂r bé ajɨ̂ʼ bʉ́ʉ́ bʉ̂r nkoó nó, ɨ́ jɔ̌ʼ Nzyɛ̌m ólwǐb lɔ̌b wé yɨ́, nye ájɨ̂ʼ nyé ntémé nkoó. Sâ gwár, mʉr dí ejɨ̂ʼ bʉ̂r nkoó nyá, nye ábáawǒ sɔ̂ʼ ɨ́ jɔ̌ʼ móhó élab, wé ópyâl yɨ́.

¹⁴Bɨ́ɔɔ́ bâm! Okɛ́l bâm! Mʉ̂r sí lɛ́ɛ ó, nye lɨ́ edyɛ̂ʼwo e Nzyɛ̌m, nyɨɛ yɨ́ɛ abe e bisyɛ́ɛla bi dí ebɔma e milɔ́ɔ́ myé bí nó, lɛ́á wé waá, wé ópʉgʉ́ be nyé e wáǎ nyɔm? Búʼó yaá, yé ákóʼó tíʼ nyê.

¹⁵Yé bé mɨ́ʉ̌ nkʉ̂ nyʉ́ʉ́ kɛ́lô, nyé abe e mimbór le sá nyé dêʼ ɨ́ dʉ́ó lɨ́lɛ̂h nó,

¹⁶nyʉ́ʉ́ mʉ̂r ɨ́ sɔ́má yɨ́n lɛ́ɛ́ e né ó: «Gua tóʼ mbɨ̂mbɨá! Go e swámá kán ɨ́ nyʉ̂l lɨ́ epemle éjwóo. Go e dé, díle» nó, nyé bé adwe nyé bisá nyé dí egwɨ̂m bí nó, go ó, lɛ́á wé waá, wé abá be nyé e nyɔm.

¹⁷Ebûʼlǎ Nzyɛ̌m, lé ó nó. Mʉ̂r dí abe lɨ́ esâ bísyɛ́ɛla bimpâ nyá, búʼó yé, yé ó mpʉ̌ múu, ɨ́ jɔʼ yé dí yé omér yɨ́.

¹⁸Mʉr óbɛ̌m lɛ́ɛ ó: «Gua, go lɨ́ edyɛ̂ʼwo e Nzyɛ̌m; mɛm, mě e bisyɛ́ɛla bimpâ.» Nó ó mé dí elɛ́ɛ e mʉr dí njɨ búʼó e búʼó nyá ó nɛ́ɛ: Lɛ́ʼláá mé búʼó yô, abe ɨ́ nzɨ̌ bisyɛ́ɛla bi tɨ̂. Nó ó, mɛm ólɛ̂ʼle gúa bisyɛ́ɛla bimpâ byâm, ó go béyɨɨ ó, mě dyɛ́ʼwó ó e Nzyɛ̌m.

¹⁹Nzê gǒ bûʼlá ó, Nzyɛ̌m, nye ó njɨ ngwár ɛ̌? Yé ó mbɨ̂mbɨá! Damá jóʼo méleme, mé lɨ́ ebánǎ bûʼla ntémé nó. Meleme maá, mé lɨ́ ebúʼla ndu e l'esâʼ ɨ́ ngba ngba ngba.

²⁰Go sá mʉ̂r yɨ̂! Nzê yê tyeetye ó, go lɨ́ edǐ gʉ́a ó, mʉ̂r bûʼlá Nzyɛ̌m, asâ yɨ́ɛ bisyɛ́ɛla bimpâ nó, nyé abá dirǎ nyɔm ɨ́ lɔ̌b syɛ́ɛla yé yaá ɛ́?

²¹Sɔ́ŋ mpám gá wɨ́ná Abraham á bi nkam ɨ́ míh mé Nzyɛ̌m ɨ́ yé? Yé á be ó, ɨ́ lɔ̌b syɛ́ɛla nyé á sâ ɨ́ jɔʼ nyé á nʉa mwân wé, Isaac ó, nyě tó tíʼe ó nye, dwě Nzyɛ̌m nyǎ yɨ́.

²²Go lɨ́ egʉ́a ó, Abraham á si bûʼla. Nye á si sâ ntémé bisyɛ́ɛla bimpâ. Bisyɛ́ɛla nyé á sâ Nzyɛ̌m bí, byé ó b'á swâhle búʼó nyé á bûʼla Nzyɛ̌m yɨ́.

²³Yé ntɔ̂ʼ pyâl mpʉ bé á cɛma ɨ́ Mekaná mé Nzyɛ̌m yɨ́. Yê cɛmá ó: Abraham á si dyêʼ koo e Nzyɛ̌m. Nzyɛ̌m nzě beě mpʉ̌ Abraham á dyɛ̂ʼwo e né yɨ́. Nye ntɔ̂ʼ láa ó, nye ó tîtyěl mʉr ɨ́ lɔ̌b búʼó yé yaá yɨ́. Nzyɛ̌m nzě jwɨr nyé «só wé».

²⁴Nó ó, bɨ̌n bɨ́ bee ó, mʉr bi nkâm ɨ́ míh mé Nzyɛ̌m ó, ɨ́ lɔ̌b bísyɛ́ɛla bimpâ yɨ́. Nyé abi nkâm ɨ́ lɔ̌b búʼó yé, yé omér.

²⁵Símsáá gá ntémé Rahâb, sadága mʉ́má. Jɔʼ bʉ̂r o mílʉ́mlʉ́ bé Ɨ́zraɛ̂l, bé á nze kwá nyé yɨ́, nye á si kɛm bê, lɛ̂ʼle bé nyʉ́ʉ́ nzɨ́ ó, bé kpɛ́yɨɨ. Sá tɨ̂ʼ ó nyé á be ngwár á bi nkam ɨ́ mɨ́h mé Nzyɛ̌m nyá yɨ́.

²⁶Sísǐm sí pʉʼa mʉ̂r ɨ́ nyʉ̂l nó, mʉr waá mû ó múu. Edyɛ̂ʼwo e Nzyɛ̌m ntémé, lé ó nó. Bísyɛ́ɛla bimpâ, byé bé anyɨ̂n kwá mʉr dí edyêʼ nyé koo nyá nó, lɛ́ɛ́, búʼó mʉ̂r waá, yé ó múu.