Read Koonzime Jacques 3 Bible Online

Jacques 3 - Koonzime bible

Jacques 3

¹Bɨ́ɔɔ́ bâm, yé ajala ó, bʉr ɨ́ buo buo díʼee ɨ́ dǐ lɛ̂ʼla. Bɨ̌n bé lɨ́ egʉ́a ó, jɔ̌ʼ Nzyɛ̌m ótíʼe bɨ́h, olɛ̂ʼla, milɔ̌b yɨ́, nye ótíʼe myé ó e ngɨ́r ɨ́ léme, abě mpʉ nyé ótíʼe bʉ́ʉ́ bʉ̂r myɔ́ɔ́ yɨ́.

²Mɨná gá óbɛ̂h, bé lɨ́ esâ gá mebébe, mimbi mímyɛ̂h. Yé bé nyʉ́ʉ́ mʉ̂r, nye lɨ́ eboó lwib ɨ́ lwib lwib, sîl, asâ ébébe nó, lɛ́ɛ́, mʉr waá, nyɨ́ pʉʼa lɨ́ ontwǒm, tô lɨ́ obwam. Mʉr waá, nyě e nkul ekamle nyʉ̂l nyé nyɨnyɛ̂h lɨ́ esâ ébébe.

³Mɨná swam gá binkóho ɨ́ minum bíkablá ó, byé sâʼ mɨná gá mejóʼo. Ɨ́ mbi waá ó mɨ́ná dí etyen gá menyʉ́l mɔ́ɔ́ nko mɨ́ná dí egwɨ̂m étô gá yɨ́.

⁴Yʉ́ʉ́ mveʼle, yé ó sitímǎ nɨ́nɨ́ɨ́. Yé damá bwaʼ yáǎ bím, nkúǒ damá kwoolo e nkǔl nɨ́nɨ́ɨ́, yé e mâ nkɔ́b nɛrá nkǒ píhe dí etyen yé nko ndûl sitíma kpɛ́l étô yɨ́.

⁵Jɨ́m mʉ̂r, yé ó nó. Yé damá twâʼwo, yé e nkul enkʉ́na ɨ́ bisá bínɨ́nɨ́ɨ́ yé dí esâ bí. Sá swîh ó yɨ̂: Mâ njʉ̌l siʼe ábéá le edîʼ ékomo é dwǐʼ ebeɔɔ.

⁶Yê tyeetye ó, jɨ̂m, yé ó mpʉ̌ siʼe. Syɛ́ɛla yɨ́yɛ̂h dí egbah métié yɨ́, yé duho ó tɨ̂. Diá jɨ̂m dí edi ɨ́ num mʉ̂r yɨ́, yé sá ó lœ̌ʼ kuó mʉ̂r wɨ́wɛ̂h. Yé lɨ́ edîʼ mɨ́ná gâ, dîʼ ntémé sá gá yɨ́ná yɨ́yɛ̂h! Siʼe, yé á taare ekalwo tɨ̂ʼ ó, duho ɨ́ bɨ́ siʼe.

⁷Mʉr, nye lɨ́ egbâ míkómó mí ótír bɨ́bɛ̂h ɨ́ jwɨ́ɨ́ yé. Nye á be ɨ́ bánǎ gbâ bé ɨ́ jwɨ́ɨ́ yé, táare le otír, binʉ̌n, onyʉ́a, osû, tótôʼ.

⁸Abe e mʉr ngwár dí ɨ́ pǎ mɛ̂r num wé, ó wé sá alɛ́ɛ̌ sá ébébe. Jɨ́m mʉ̂r, yé ɨ́ buú bébe. Yé abána mʉ̂r ó, nye kámlaa jɨ́m yé lɨ́ elɛ́ɛ ébébe, jɨ̂m yɨ́ɛ lwɨ́ŋlá e joʼo nó.

⁹Mɨná bé lɨ́ egúmlo gá Dâ Nzyɛ̌m, dí Sɔ́ŋ gá wɨ́ná nyá. E jɨ̂m gwár e gwár yaá ó mɨ́ná dí esyɛm gá bʉr, baá Nzyɛ̌m á komlo ɨ́ mveʼle wé bá.

¹⁰Num ngwár waá, wé lɨ́ epyêl méswomlʉ ndu e syɛá métyéelé. Bɨ́ɔɔ́ bâm! Okɛ́l bâm! Yé ajala le ebe nó.

¹¹Nzê enó é díbé égwár, lé e nkul epyêl médíbé me dí edwie má ndu e maá mempâ ɛ̌?

¹²Bɨ́ɔɔ́ bâm! Okɛ́l bâm! Lɨ́ nkoo, yé abe e nkul egúmǒ bwǎn. Lɨ́ ójɔɔ agúmǒ bumó nwâʼ. Médíbé me dí ɨ́ jómo má sí pyâl lɨ́ enó nó, lɛ́ɛ́, enó laá, lé abe e nkul epyêl médíbé mé éde.

¹³Wáa mʉ̂r ɨ́ sɔ́má yɨ́n dí le ocwóó? Wáa mʉ̂r dí egʉ́a mékaná, sâ bínzololo? Yé jala ó, mʉr waá gʉ́ŋaa elɛ̂ʼle ócwóó wé ɨ́ nzɨ̌ mbɨambɨa kʉ̌ tyen nyé dí edû yɨ́. Nye sâʼ bisyɛ́ɛla bimpâ. Nye díʼee le njwɨr dí ɨ́ tala tala wɨ́. Mpaŋ ócwóó ó tɨ̂ʼ wɨ́.

¹⁴Sâ gwár, yé bé bɨ̌n bé lɨ́ esâ égú le epɨra e bʉr ɨ́ milémé mín nó, ayɨ́ nkʉ́na gá dwêh. Milɔ́ɔ́ bíbɛr myaá, myé ó kwahaá tʉ̂toʼó.

¹⁵Ntʉ ócwóó wɨ́n waá dí eduho kwá mé Nzyɛ̌m. Sá ócwóó yaá, yé duho ó ɨ́ sí yɨ̂, ɨ́ bipúno bi bʉ̂r. Yé lɨ́ eduho ntémé kwá sɔ́ŋ meleme.

¹⁶Ebě, gúmó bʉ̂r dí esâ égú, le epɨra e bʉr yɨ́, tɨ̂ʼ yé ó, le oleŋéleŋé, ndu e mebébe mimbi mímyɛ̂h.

¹⁷Sá ésôʼ mɨ́ná jálá le elɛ́ɛ gá yɨ́ ó yɨ̂: ocwóó dí eduho kʉ́ wɨ́, wé abe ɨ́ mpúhlá le ebébe. Píe tɨ̂, wé ó sá dí esâ ó, bʉr tíʼaa ɨ́ mepyɛbla yɨ́. Wé ó sá dí elɛ̂ʼle mʉ̂r mpʉ nyé tálaa njwɨr, le edi e léme sulá sí yɨ́. Ocwóó waá ó dí esâ ó, mʉr jɨ́ʼɨɨ bʉ́ʉ́ bʉ̂r nkoó. Wé lɨ́ edwe mʉ̂r ngwɨ́á ésâ bísyɛ́ɛla bimpâ. Wé abe e nkɔ̌m ɨ́ gúú pâʼ. Wé abe e mikóo.

¹⁸Bʉr o dí egbâ mépyɛbla páʼ bʉ̂r e bʉr bá, bé sá nó ó e miléme mi dí ɨ́ mepyɛbla mí. Sá dí eduho ɨ́ bʉr baá yɨ́, yé ó bisyɛ́ɛla bi dí tîtyěl ɨ́ míh mé Nzyɛ̌m bí.