Read Koonzime Jacques 5 Bible Online

Jacques 5 - Koonzime bible

Jacques 5

¹Bɨ̌n bʉr o dí okúmá ó bʉ̂r bá, jóʼlááá gá me: Jɨʼee gâ. Tímáá gá ɨ́ lɔ̌b mítúú mû lɨ́ enze kwá nyɨ́n mí.

²Okúm le ogbaa wɨ́n, wé ó bol. Mikán mín, mí dɨ́ɨ ósyôʼ.

³Gʉ̂l ndu e mɔnɨ́ yɨ́n, yɨ́ bǐl myámnkɛ̂l. Myámnkɛ̂l waá, wé óboʼlo mébébe mɨ́n. Wé ntémé, wé ódîʼ bɨ́n mpʉ̌ siʼe, ebě, bɨ̌n bé á si komo okúm ɨ́ melú mé épíhé mâ.

⁴Bɨ̌n bé á bé ajána e bilóbila byé á lilî bipemé bín bí. Jóʼláá gá bipurá byɔ́ɔ́. Dâ Nzyɛ̌m, dí Njwɨ́ɨ bisɔ́má bí mɔ̂m nyá, nyɨ́ jóʼo bítím bí ókpɛma bô.

⁵Bɨ̌n bé á tíʼe ɨ́ sí yɨ̂ʼ ó, ɨ́ mepwaʼ, lɨ́ ejaá sáǎ njɨ elóŋlǒ gwɨ́má bísâ. Bɨ̌n ntémé bé á be ó sí buú de ɨ́ de de de, bwǎʼ mpʉ mímyáʼ ɨ́ tu, bɨ̌n bɨɛ lɨ́ ekʉ́ gwá gʉ́a ó, yé e dʉ́ó mímyáʼ ngá tíʼɔɔ lɨ́.

⁶Bɨ̌n bé á si dwe bʉr o b'á be akúnwo e mpɨŋ bá mebě, le ejʉ̂ bê. Bé á bé akamle e menyʉ́l mɔ́ɔ́.

⁷Bɨ́ɔɔ́ bâm! Okɛ́l bâm! Diʼee gá e bíhwó, tó pyâl ɨ́ jɔʼ Tî gá wɨ́ná óbáʼǎ nze yɨ́. Diʼee gá e bíhwó mpʉ óbel o mémpeʼ dí e nye yɨ́. Ebě, bé lɨ́ edûhwo, ó bipemé bé á be bí, byé gúmaa mpumó mpâ. Bé dúhwó ó, ebóno ómpíé bé ésôʼ le baá bé épíhe.

⁸Júhwáá gâ. Biʼee gá nkul ɨ́ miléme, ebě, Tî gá wɨ́ná mû ó kúno ebáʼǎ nze.

⁹Bɨ́ɔɔ́ bâm! Okɛ́l bâm! Ayɨ́ sɛ́ɛla gá bipurá páʼ nyɨ́n, ebě, Nzyɛ̌m nkʉ̂ be, atíʼe bɨ́n lɔ̌b tɨ̂. Tîʼ milɔ̌b mû ó kúno enze.

¹⁰Bɨ́ɔɔ́ bâm! Okɛ́l bâm! Ogwíha o mílɔ̌b bé á dûhwo mitúú e bíhwó bá, bé ó bɨ́n jálá le edû bá. Bé ó b'á kala mɨná gá lwǐb mé Dâ.

¹¹Mɨná lɨ́lɛ́ɛ́ gá ó, mʉr á dûhwo mitúú e bíhwó nyá, nyě e metyɛʼ me mpóm. Bɨ̌n bé á be ó sí jóʼǒ mpʉ̌ Job nyɨɛ á dûhwo mitúú yɨ́. Bɨ̌n ntémé bé lɨ́ egʉ́ǎ mpʉ̌ Dâ Nzyɛ̌m á ka sâ nye mpam lɨ́ epíhé yɨ́, ebě, Dâ Nzyɛ̌m, nyě e njɨ́ʼá nkóó. Nye ɨ́ buú cwɨ́a e bʉr.

¹²Bɨ́ɔɔ́ bâm! Okɛ́l bâm! Kʉ́ buú syɛ̂hle gá entaa mínkâl. Akáale, gbâ díé é jʉ́o ɨ́ minkâl. Agbâ díé é sí ɨ́ minkâl. Lɛ́yɨ́ɨ́ gá jɔʼ yɨ́yɛ̂h ó: «Heʼé!» ɨ́ jɔʼ yé dí «Heʼé!» yɨ́, nkʉ̂ ó: «Eee!» ɨ́ jɔʼ yé dí «Eee!» yɨ́, lɨ́ ekpɛ́ɛ ó, bɨ̌n ámû jaá nʉa mébě ɨ́ tíʼá mílɔ̌b mé Nzyɛ̌m.

¹³Mʉ̂r sɔ́má yɨ́n bê sí bee ó, nye ɨ́ mitúú nó, nye jɨ̂ʼlaa e Nzyɛ̌m. Nyʉ́ʉ́ mʉ̂r bé ɨ́ bisʉhʉʉ nó, nye ɨ́ jala le edyɛɛ méjéme mé édwě Nzyɛ̌m kûm.

¹⁴Waá nyɨnyɛ̂h dí ebíle ɨ́ sɔ́má yɨ́n nyá, nye jébaa otyɛ̂b bé ésôʼ ó Mbɛ̌r-Nzyɛ̌m. Bé onzě jɨʼla e Nzyɛ̌m lɨ́ esú lé, le elœm nyé múlo, le epɨr e díé mé Tî gá wɨ́ná.

¹⁵Minjɨʼla myaá, myé sɨ́sáŋɔ́ɔ́ ó e búʼó. Nó yé ósâ ó, Nzyɛ̌m tíʼɨɨ mʉr waá yɨ́. Yé bé nye á be ó sí sâ syóm nó, Nzyɛ̌m ópɛʼ nyé baa ébébe nyé á pa niʼe ɨ́ lɔ̌b syóm waá yɨ́.

¹⁶Jɔʼ bɨ́n dí ebíle yɨ́, mʉr nyɨnyɛ̂h, nye ɨ́ jala le egwîh ébébe lé. Bɨ̌n bé ɨ́ jala le ejɨʼla páʼ nyɨ́n, bɨ̌n bʉr o tɨ̂, ɨ́ jɨʼla jɨʼla, tó pyâl ɨ́ jɔʼ bɨ́n ngá tíʼe yɨ́, ebě, minjɨʼla mi mʉ̂r dí tîtyěl nyá, myé e nkul.

¹⁷Elie á be ó mʉr mpʉ mɨ́ná gâ. Nye á si jɨʼla e nkul ó, mpíé sá akǎ nwɨ́ɨ, tó pyâl ɨ́ jɔʼ mpíé á bana tyɛ̂b, akǎ nwɨ́ɨ tâŋ mimbú mílɛ̂l e pêh yɨ́.

¹⁸Píe tɨ̂, nye á si baʼa jɨʼla. Jʉ́o ntɔ̂ʼ sul mpíé. Sí yaá ntɔ̂ʼ táare égúmo méde.

¹⁹Bɨ́ɔɔ́ bâm! Okɛ́l bâm! Mʉ̂r ɨ́ sɔ́má yɨ́n sí dû míkóo, bɔ́ʼa le otyeetye, nyʉ́ʉ́ mʉ̂r ntɔ̂ʼ nze e né ɨ́ nzɨ̌ twiʼ nó,

²⁰gʉ́ŋáá gá ó, mʉr waá dí epɛʼ syɛ̂l misyóm ɨ́ nzɨ̌ misyóm myé, tyêl nyé ɨ́ nzɨ̌ mpâ nyá, nyɨ́ tǐʼ sísǐm me syɛ̂l misyóm waá. Nyɨ́ sâ ó, Nzyɛ̌m pɛ́ʼɛɛ nye bibaa bí ébébe ɨ́ buo buo.