Read Koonzime 1 Pétrus 1 Bible Online

1 Pétrus 1 - Koonzime bible

1 Pétrus 1

¹Yé ó mɛm Pétrus, mʉr milʉ́mlʉ́ mé Yésʉs-Krîst ó dí ecɛma bɨ́n mekaná mâ. Mě cɛmá ó, bʉr ó Nzyɛ̌m á twâr, dí etíʼě mpʉ ójwóo ɨ́ sí yɨ́yɛ̂h, mingbɛhá míngbɛhá ɨ́ mesí mé Pɔ́ŋtos, Galásia, Kapadosía, Azía le Bitinî bá.

²Nzyɛ̌m Sɔ́ŋ ó b'á twâr bɨ̌n, bʉr o nyé á boo gʉ́a, kʉ́ e sí dína apǎ bě kuhá bá. Píe jɔʼ nyé á twâr bɨ̌n yɨ́, Sísǐm wé nzě pubo bɨ́n. Nye á pubo bɨ̌n ó, lɨ́ emyɛʼ bɨ́n e metié mé Yésʉs-Krîst, lɨ́ esú ó, bɨ̌n sâʼ nye mejóʼo. Metyɛʼ me mpóm mé Nzyɛ̌m le mepyɛbla mé, mé díʼee e bɨ̌n ɨ́ ntʉʉʉ́.

³Mɨná gúmlaa gá waá dí Nzyɛ̌m mé Tî gá wɨ́ná Yésʉs-Krîst, waá dí Sɔ́ŋ wé nyá. Nyɨ́ buú jɨ̂ʼ mɨ́ná gá nkoó, ntɔ̂ʼ dwe mɨ́ná gá nkul ebyɛ̂l jɔʼ mbá, lɨ́ esú ó, mɨná díʼee gá lwɨ́ŋlá e mpûʼla ɨ́ miléme. Mpûʼla nyaá, nyě duhó ó, ɨ́ nkul pɛhá nyé á pɛh Yésʉs-Krîst ɨ́ soo wɨ́.

⁴Nye á byâ mɨná gá jɔʼ mbá ntémé ó, lɨ́ esú lé édwe mɨ́ná gá mepwaʼ me dí komá ɨ́ jʉ́o kʉ́ má, jala e nkɔb líʼe gá nyɨ́ná. Sá dí komá lɨ́ esú gá lɨ́ná yɨ́, yé ábo, atô mébomo, abe e nkul edwɛ̂hla.

⁵Nzyɛ̌m mû baʼle bícwiʼ bín ó e nkul nyé, ebe bɨ́n dí edyɛ̂ʼwo e né yɨ́. Nyě baʼlé mɨ́ná gá ó, lɨ́ esú lé édwe mɨ́ná gá twǐʼ njʉ̌m dǐ. Twiʼ yaá ó dí ebóno mɨ́ná gá yɨ́. Nye ólɛ̂ʼle bʉ̂r bɨ́bɛ̂h yǎ ó, lɨ́ elú lé ósûʼla lɨ́.

⁶Bɨ̌n mû ó lɨ́ ekʉ́ buú sohǒ sâ yaá ɨ́ báánâ, damá jóʼo bɨ́n dína lɨ́ elɛŋ bá mâ jɔʼ lɨ́ esia e mitúú e mindɛ̌l, duho ɨ́ mebʉ́blá bé dí ebóblo bɨ́n mimbi mimbi má.

⁷Ndyɛ́ʼwá bɨ́n dí edyɛ̂ʼwo e Nzyɛ̌m wɨ́, wê bɨ̌n ó, ɨ́ buo ódimé, laǎ gʉ̂l. Gʉ̂l pǎ nyɛɛ́ gbáŋɔɔ ɨ́ duró lé ólûl, ó yé gwâ nyɨ̂n tyeetye ó, yé ó yaá mpâ, yɨ́ɛ yé ó sá dí ó, yé ódîm yɨ́, á dwɛʼra e búʼó gá yɨ́ná! Yé ógbáŋɔɔ ɨ́ duró, bʉr nkʉ̂ gʉ́a bee ó, yé ó búʼó mpâ. Nó bʉ̂r, bé ógúmlǒ Nzyɛ̌m, le edwe nyé kûm ɨ́ jɔ̌ʼ Yésʉs-Krîst óbáʼǎ nze yɨ́.

⁸Bɨ̌n bé lɨ́ ekpɛl nyé, bɨ̌n l'apǎ bee yɨ́ɛ nye. Bɨ̌n bé lɨ́ edyɛ̂ʼwo e né, damá be ó bɨ̌n dína ó, apǎ bee nyê, nzě pyâl ɨ́ báánâ. Ɨ́ tɨ̂, diʼee gá lwɨ́ŋlá e bisʉhʉʉ. Sohaa gá ɨ́ mbi mʉ̂r dí abe e nkul ejwɨʼ, nkʉ̂ lɛ́ɛ byé wɨ́. Kûm, nyě e bɨ̌n tɨ̂.

⁹Milémé mín, mí bǐ twǐʼ njʉ̌m dǐ. Twiʼ yaá, yé duho ó, ɨ́ búʼó bɨ́n dí ebúʼlǎ Krîst yɨ́.

¹⁰Ogwíha o mílɔ̌b mé Nzyɛ̌m, bé á si boo gwîh, lɛ́ɔɔ ó, Nzyɛ̌m ósâ bɨ́n mpam ɨ́ buo buo. Bé á be yɨ́ɛ ó, agʉ́a ménzɨ̌ Nzyɛ̌m á be ó, nye ótíʼ mɨ́ná gá e tɨ̂ʼ má.

¹¹Bé á be ó lɨ́ egwɨ̂m égʉ́a mʉ̂r Sísǐm mé Krîst á lwilwib, dumo e né nyá, le jɔʼ nyé ótíʼe yɨ́. Tó kœb ó, Sísǐm mé Nzyɛ̌m, wé á boʼlo ó, dumo e mitúú Krîst á jala le esia e myé mí, ti e kûm nyé ókǎ báʼǎ bi píe tɨ̂ʼ nyɨ́. Nye á boʼlo nó ó, bisyɛ́ɛla bi tɨ̂ʼ dína apǎ syɛ́ɛ.

¹²Nzyɛ̌m á lɛ́ɛ le ogwíha o mílɔ̌b baá ó, túnó bé á to le etúno wɨ́, wé á bé abe lɨ́ esú lɔ́ɔ́ bé bʉr o tɨ̂, ó bé gʉ́ŋaa wé ɨ́ pébébé. Bé á tyɛ̂b le túnó ɨ́ jɔʼ yaá ó, lɨ́ esú lɨ́n. Bɨ̌n ó dí edirǎ nyɔm e túnó waá ɨ́ báánâ. Bʉr o b'á to le etúno Mbɨambɨa Lɔ́ɔ waá bá, bé á tutúno wé ó e nkul Sísǐm á duho ɨ́ jʉ́o kʉ́ nyɨ́. Lɔ́ɔ́ bé á lɨlɛ́ɛ bɨ̌n wɨ́, wé ó waá bééngeles dí ɨ́ buú gwɨ̂m ésʉ médwôʼlʉ tɨ̂ʼ wɨ́.

¹³Nó, diʼee gá ɨ́ cǎr ó, bɨ̌n sâʼ bisyɛ́ɛla bimpâ. Gwá mâr gá miléme. Mpûʼla, nye díʼee bɨ̌n ɨ́ miléme ó, bɨ̌n bé ódweŋɔɔ̌ mpǎŋ ndwéá ɨ́ jɔ̌ʼ Yésʉs-Krîst óbáʼǎ nyɨ̂n yɨ́.

¹⁴Mpʉ bɨ́n dí eboó sɨsâ Nzyɛ̌m mejóʼo yɨ́, akǎ dû gá bigwɨ́má bɨ́n á nyɛɛ bɨbe e byé, bɨ̌n dína bigʉʼlʉgʉ́ bí.

¹⁵Nzyɛ̌m, mʉr á jébe bɨ̌n nyá, nye ó tí. Sá tɨ̂ʼ ó bɨ́n jálá le edi bʉ̂r o dí tí bá, ɨ́ páʼ kʉ̌ tyen wɨ́n yɨ́.

¹⁶Ebě, yê cɛmá ó: Diʼee gá bʉr bâm dí tí bá, mpʉ mé mʉr tɨ̂ʼ dí tí yɨ́.

¹⁷Bɨ̌n kɨkɛn díé mé Dâ, mʉr dí etíʼe bʉ̂r milɔ̌b lɨ́ otîtyěl, adwáawo bʉ̂r mempǒm nyá. Nyě títíʼé bé milɔ̌b myɔ́ɔ́ myaá ó, dû mpʉ bísyɛ́ɛla byɔ́ɔ́, byé á be yɨ́. Mpʉ bɨ́n dí ekɛ̌n Dâ Nzyɛ̌m yɨ́, jwɨʼ gwár e gwár yaá ntémé ó bɨ́n jala le elɛ̌ŋ twiʼ yɨ́n yɨ́, lɨ́ edû kʉ̌ tyen dí elɛ̂ʼle ó, bɨ̌n bé lɨ́ edwáawo nyé wɨ́.

¹⁸Bɨ̌n bé á bé adwihɔɔ ɨ́ mpila ébébe ɨ́ lɔ̌b nzyɛ́ɛ́lá bisâ bi dí edímle ódimé wɔ́ɔ́ bí. Nzyɛ̌m á bé asyɛ́ɛlǎ nkóhó mɔnɨ́, nkʉ̂ gʉ̂l lɨ́ esú lé étáǎ góo ɨ́ lɔ̌b mébyaʼ mɨ́n. Bɨ̌n bé á dwihɔɔ ɨ́ mpila ébébe ó, jɔʼ myɛ́na ménɨ́nɨ́ɨ́, mé á jánɔɔ yɨ́. Bɨ̌n bé á duho ɨ́ mpila métum bímpám bín ó,

¹⁹ɨ́ metié mé Yésʉs-Krîst. Mé ó dí ndwéá dí ɨ́ buo ódimé wɨ́. Yésʉs-Krîst á be ó mpʉ mâ nteme dí abe e dyɛ̂m, abe ntémé e metyɛ́l nyá.

²⁰Nzyɛ̌m Sɔ́ŋ á si boo gʉ́a, kʉ́ e sí, byé l'apǎ bě kuhá ó, Krîst ólóŋlǒ syɛ́ɛ́ yaá. Nye nzě kǎ lɛ̂ʼle mɨ́ná gá nyǎ ɨ́ melú mé épíhe mâʼ lɨ́ esú lɨ́n.

²¹Krîst ó b'á sâ ó, bɨ̌n dyɛ̂ʼwaa e Nzyɛ̌m, mʉr á pɛh nye, dwih nyé lɨ́ odwe, dwe nyé kûm ntémé nyá. Sá tɨ̂ʼ ó búʼó yɨ́n le mpûʼla nyɨ́n dí njɨ ɨ́ Nzyɛ̌m yɨ́.

²²Njóʼá bɨ́n á jóʼo otyeetye wɨ́, wê nzě pubo bɨ́n ɨ́ páʼ ébébe. Mejóʼo bɨ́n á dwe Nzyɛ̌m má, mɨ́ lɛ̂ʼle bɨ́n mpʉ bɨ́n jálá le ekpɛla, kpɛ̌l dí ápurapúra yɨ́. Yé ó yaá mpâ dí eduho bɨ́n ɨ́ miléme, yaá dí abě mbáʼrá e mikóo yɨ́.

²³Nó, bɨ̌n mû ó sí báʼǎ byɛ̂l. Mpeʼ yé á beŋɔɔ ɨ́ milémé mín yɨ́, yé abě sá dí e nkul ebo yɨ́; yé ó lwǐb mé Nzyɛ̌m dí edǐ njʉ̌m dǐ e njʉ̌m dǐ yɨ́. Mpeʼ yé á beŋɔɔ ɨ́ bɨ̌n yɨ́, yé jaá di ó diʼée, acénecene.

²⁴Yê cɛmá ɨ́ Mekaná mé Nzyɛ̌m ó: «Bʉr bɨ́bɛ̂h, bé ó mpʉ bíká. Okúm le ogbaa wɔ́ɔ́ wɨ́wɛ̂h jaá nwɨnwɨɨla ó njɨ e nzɔ̌m. Ebě, biká, byé lɨ́ edwɛ̂hla; nzɔ̌m swaʼre.

²⁵Lwǐb mé Dâ yɨ́ɛ̌ di ó, njʉ̌m dǐ e njʉ̌m dǐ.» Tó kœb ó, lwǐb yaá, yé ó Mbɨambɨa Lɔ́ɔ bé á túno bɨ̌n wɨ́.