Read Koonzime 1 Pétrus 2 Bible Online

1 Pétrus 2 - Koonzime bible

1 Pétrus 2

¹Myahaa gá bé bisyɛ́ɛla bîʼ bíbyɛ̂h: ebébe é léme, mimbi mímyɛ̂h, bilwǐb míkóo, mimbi mímyɛ̂h, bilwǐb bíbá bíbá, nzwíí ti e mesyɛ́ɛla mimbi mímyɛ̂h.

²Gwɨ́mɨ́ɨ́ gá mbɨambɨa lɛ́ʼlá dí abe mpúhlá e mebomo, waá dí ejala e misísǐm mín wɨ́. Wé ó ngá sâ ó, bɨ̌n gwɨ́aa, ntɔ̂ʼ tó kumo ɨ́ twǐʼ njʉ̌m dǐ. Gwɨ́mɨ́ɨ́ gá yé mpʉ bítyéé dí egwɨ̂m ébêl, ó byé nkʉ̂ dwaʼ le egwɨ́e yɨ́.

³Ebě, bɨ̌n bɨ́ gʉ́ǎ Dâ Nzyɛ̌m, gʉ́a ntémé ó, nye ɨ́ mbɨa.

⁴Síhláá gá bé bǎʼ e Tî Yésʉs. Nye ó ekóʼ e dí kublakúbla, laá bʉ̂r, bé á bene lɨ́. Nzyɛ̌m nyɨɛ á si pɛ̂h lé, bee lé le odimé.

⁵Kamaa gá ó, Nzyɛ̌m súmaa mbɛ̌r Sísǐm wé ngá di tɨ̂ʼ wɨ́. Diʼee gá mekóʼ me dí kublakúbla má, maá ngá kɛlɔɔ tɨ̂ʼ ɨ́ nzumó nyaá má. Bɨ̌n bé ósûʼla bʉ̂r o dí tí, baá o dí ɨ́ sɔ́má ópara bé bá. Mindwéá bɨ́n ngá dwidwě Nzyɛ̌m e nzɨ̌ Sísǐm wé mí, Nzyɛ̌m óbee myé mbɨ̂mbɨá ó, lɨ́ esú mé Yésʉs-Krîst.

⁶Ebě, yê cɛmá ɨ́ Mekaná mé Nzyɛ̌m ó: «Me á si pɛ̂h ekóʼ e dí ɨ́ buo ódimé lɨ́. Lé ó mê komó báánâ mpʉ ékóʼ e dí esúʼo nkân mbɛ̌r lɨ́. Waá nyɨnyɛ̂h ódyɛ̂ʼwo e lé nyá, ákóʼó kǎ soŋɔɔ.»

⁷Ekóʼ laá, lé ɨ́ buo ódimé ɨ́ mbeá wɨ́n, bɨ̌n bʉr o b'á dyɛ̂ʼwo e lé bá. Sâ gwár, bʉr o dí ebene édyɛ̂ʼwo e lé bá, bɨ́ɛ bee lé ó mpʉ «Ékóʼ óswim ó mbɛ̌r bé á bene lɨ́. Lé ó b'á ka sûʼla ekóʼ e dí esúʼo nkân mbɛ̌r lɨ́.»

⁸Mekaná mé Nzyɛ̌m, mé lɨ́ elɛ́ɛ, dumo e Krîst ó: «Ekóʼ lé écwehle bʉ̂r, lé ó ebɔ̌ʼ ngá bɨma bʉ̂r ó, bé twêʼ ɨ́ nkɨ́ŋlɨ́m lɨ́.» Bé jaá twitwe ó, njɨ nko bé dí abûʼlǎ lɔ́ɔ́ mé Nzyɛ̌m yɨ́. Nkɔ̌b Nzyɛ̌m á boo dwe bé nyɨ́ ó tɨ̂ʼ nyɨ́.

⁹Sâ gwár, bɨ̌n bɨɛ bé ó mpóʼǒ Nzyɛ̌m á boo twâr nyɨ́. Nye á twâr bɨ̌n ó, bɨ̌n séaa nye syɛ́ɛ ópara, le edǐ kúl bʉ̂r dí tí ɨ́ míh mé yɨ́. Bɨ̌n bé ó sá mé Nzyɛ̌m, ánta nye, lɨ́ esú ó, bɨ̌n gúmlaa mʉr á jébe bɨ̌n nyá. Njɨ́blɨ́ wé waá, wé ó b'á pɛʼ bɨ̌n lɨ́ edúrʉ́ʉ́, tyen bɨ́n ɨ́ myɛ́n dí ɨ́ ntyɛ̌n ntɨ̂ ntyɛ̌n yɨ́.

¹⁰Ɨ́ mimbú mí píhe, bɨ̌n bé á bé abě kúl bʉ̂r mé Nzyɛ̌m. Nó ó, ɨ́ báánâ, bɨ̌n mû ó kúl bʉ̂r dí egúmo e nye yɨ́. Ɨ́ mimbú mí píhe, abe e mʉr á jɨ̂ʼ bɨ̌n nkoó. Nó ó, ɨ́ báánâ, Nzyɛ̌m, nyɨ́ kʉ́ jɨ̂ʼ bɨ́n nkoó.

¹¹Mě jɨʼlá e bɨ̌n, osó bâm ó, bɨ̌n díʼee mpʉ̌ sá lɛ́ɛ́, bɨ̌n bé ó milaa-nkpǎʼ, nkʉ̂ mpʉ ójwóo dí ɨ́ mesí mé sí yɨ̂ʼ bá. Ɨ́ nzɨ̌ nyaá ó bɨ́n ngá tí bísá bʉ̂r ó sí yɨ̂ʼ dí egwɨ̂m bí yɨ́. Bisâ byaá ó dí elwímla e misísǐm mín.

¹²Diʼee gá e kʉ̌ tyen mpâ témé ohááden. Bé damá swêʼ bɨ́n, nkʉ̂ lɛ́ɛ ó, bɨ̌n bé ɨ́ bébe, bé óbánǎ bee bísyɛ́ɛla bimpâ bɨ́n dí esâ bí, ntɔ̂ʼ dwě Nzyɛ̌m kûm tɨ̂ʼ ɨ́ móhó nyé ónze mɨ́ná gá ɨ́ menɔɔlʉ wɨ́.

¹³Sáʼ gá otyɛ̂b bé ésôʼ o dí etyélɔɔ bá mejóʼo, ɨ́ lɔ̌b mé Tî Yésʉs. Sáʼ gá njwɨ́ɨ sí yɨ́n mejóʼo, ebě, nye ó dí lʉ́ ótyɛ̂b bé ésôʼ bɨ́bɛ̂h.

¹⁴Sáʼ gá ntémé mingóvina nyé ólómlo bɨ́n mí mejóʼo. Myé ó dí bʉr o jálá le edwe bíbɨ́bla bi bʉ̂r bíbyɛ̂h bintɨ́ʼá mí. Myé ntémé ó ngá sêʼle bʉ̂r o dí esâ émbɨa bá.

¹⁵Sá Nzyɛ̌m dí egwɨ̂m ɨ́ wɨ́n pâʼ yɨ́, yé ó: bɨ̌n sâʼ bisyɛ́ɛla bimpâ, bɨ̌n díblaa bigʉʼlʉgʉ́ minum, byé l'akǎ lwǐb sá dí asiŋa ɨ́ lɔ̌b wɨ́n yɨ́.

¹⁶Dúʼóó gá kʉ̌ tyen mpâ ónzyɛh o bʉ̂r jálá le edû wɨ́. Bɨ̌n damá be ónzyɛh o bʉ̂r, sâ gwár, asâ gá ebébe ɨ́ lɔ̌b dǐ bɨ́n dí tɨ̂ʼ yɨ́. Dǐ yaá, yé ajala le esûʼlǎ sá bɨ́n búbló ébébe é léme lɨ́n e tɨ̂ʼ yɨ́. Tiʼaa gá mpʉ bítúʼǎ bi dí egúmo e Nzyɛ̌m bí.

¹⁷Dwéʼ gá bʉr bɨ́bɛ̂h dúu. Kpɛlɨɨ gá bɨ́ɔɔ́ gá bɨ́ná. Jwááwáá gá Nzyɛ̌m. Dwéʼ gá njwɨ́ɨ sí yɨ́n dúu.

¹⁸Bitúʼǎ, sáʼ gá ojwɨ́ɨ́ bɨ́n mejóʼo, e dúú yɨ́yɛ̂h. Bɨ̌n bé ɨ́ jala le edwáawo ójwɨ́ɨ bɨ́bɛ̂h, abě njɨ baá o dí ɨ́ talǎ njwɨr bá. Jwááwáá gá ntémé ojwɨ́ɨ dí esâ bɨ́n cére bá.

¹⁹Bé dwé mʉ̂r mebě me mpéne, ntɔ̂ʼ dwe mʉ̂r waá bintɨ́ʼá tɨ̂ʼ nɛ́ɛ: mʉ̂r waá ódûhwo bíntɨ́ʼá byaá ɨ́ lɔ̌b lémé wé dí edwáawǒ Nzyɛ̌m wɨ́ nó, syɛ́ɛla yaá, yé ɨ́ mbɨa ɨ́ míh mé Nzyɛ̌m.

²⁰Bɨ́n sá mísyóm, ntɔ̂ʼ dûhwo ébíʼé é tɨ̂ʼ nó, bɨ̌n bé ólîʼ e wáǎ nyɔm tɨ̂ʼ ɨ́ míh mé Nzyɛ̌m? Tó kœb ó, ɨ́ jɔʼ bɨ́n ósâ syɛ́ɛla mpâ, bɨ̌n ntɔ̂ʼ sia e bintɨ́ʼá le bíhwó yɨ́, syɛ́ɛla yaá, yê bɨ̌n ó mpǎŋ syɛ́ɛla ɨ́ míh mé Nzyɛ̌m.

²¹Nzyɛ̌m á jébe bɨ̌n ó, bɨ̌n sâʼ nye syɛ́ɛla yaá ó, ebě, Krîst mʉr tɨ̂ʼ á si sia e mitúú lɨ́ esú é nyɔm wɨ́n. Ɨ́ tɨ̂ʼ, nye á si lɛ̂ʼle bɨ̌n mveʼle bɨ́n jálá le edû yɨ́. Nye á sâ nó ó, bɨ̌n nkʉ̂ dû mébo mé. Yê cɛmá ɨ́ Mekaná mé Nzyɛ̌m ó:

²²«Nye á bé asâ syóm. Lwǐb míkóo, yé aduho ɨ́ num wé.»

²³Ɨ́ jɔʼ bé á lwɨlwɨ́ɨ nye yɨ́, nye á bé abɔla mélwɨ́ɨ maá. Ɨ́ jɔʼ nyé á sia e mitúú yɨ́, nye á bé abɛ̂ŋ óntɨ̂m le obɨn bé. Nye á jaa sáa ó, njɨ enʉǎ twiʼ yé, tímlě Nzyɛ̌m, mʉr dí etíʼe mílɔ̌b lɨ́ otîtyěl nyá.

²⁴Krîst á si bɛb misyóm gá míná, ntɔ̂ʼ dwe e myé ɨ́ kolôs. Nye á sâ nó ó, mɨná nkʉ̂ dwe gá ɨ́ nkǒ páʼ mísyóm, ntɔ̂ʼ tíʼe lɨ́ otîtyěl. Mɨná bé á be gá ó, mimbêl. Mɨná ntɔ̂ʼ kǎ tíʼe gá ɨ́ nkul mepɨ́ɨ́ mé.

²⁵Ebě, bɨ̌n bé á be ɨ́ melú mé épíhe ó, mpʉ bínteme byé á dîm bí. Nó ɨ́ báánâ, bɨ̌n mû ó sí swîʼ, tó kœb mbɔ̂ʼlʉ wɨ́n. Nye ntémé ó pá di mbɔ̂ʼlʉ misísǐm mín.