Read Koonzime 1 Pétrus 3 Bible Online

1 Pétrus 3 - Koonzime bible

1 Pétrus 3

¹Ɨ́ jwɨʼ gwár yaá, bɨ̌n bʉbá, sáʼ gá ojʉ́m bɨ́n mejóʼo. Nyʉ́ʉ́ mʉ̂r ngwár ɨ́ sɔ́má ójʉ́m bɨ́n béné ébûʼla mílɔ̌b mé Nzyɛ̌m nó, nye óbɛ̌m kǎ bûʼla yɨ́ɛ ó, ɨ́ lɔ̌b kʉ̌ tyen mʉ́má wé dí edû wɨ́. Yé ajɨ ɨ́ páʼ mʉ́má ó, nye lɛ́yɨɨ njʉ̂m lʉ́ʉ́ ékǎn eswîh.

²Ebě, ojʉ́m bɨ́n, bé óbeě mpʉ bɨ́n dí ejóʼǒ Nzyɛ̌m bʉ́á, le edû kʉ̌ tyen dí e medile wɨ́ yɨ́.

³Ojaá wɨ́n, wé ayɨ́ duho ɨ́ mimbi bísâ bi dí egbáŋɔɔ ɨ́ nyʉ̂l kʉ̌l bí. Ojaá wɨ́n, wé ajala le ebě njɨ ɨ́ pená bɨ́n dí epɨpene mísíné wɨ́, nkʉ̂ ɨ́ mbwárá bɨ́n dí ebwâr mékɔ́m mé gʉ̂l wɨ́, nkʉ̂ ɨ́ mbi bɨ́n dí ebwâr mímbôr mi dí le onɔ̂m mí wɨ́.

⁴Ojaá wɨ́n, wé ɨ́ jala le ebe ó, waá o tʉ́ŋlʉ̌, mbi ójaa dí abe e nkul ekúrwo wɨ́. Lémé wɨ́n díʼee ɨ́ tala tala, ɨ́ pyɛɛɛ. Mbi ójaá waá ó dí ɨ́ buo ódimé ɨ́ míh mé Nzyɛ̌m.

⁵Ɨ́ mimbú mí píhe, bʉbá bé á be tí ɨ́ míh mé Nzyɛ̌m bá, bé á si bi mpûʼla ɨ́ miléme ɨ́ páʼ mé Nzyɛ̌m, bé ntɔ̂ʼ sáa égbâ ójaá ompâ waá ɨ́ menyʉ́l mɔ́ɔ́ tʉ́ŋlʉ̌. Bé á sɨsâ ojʉ́m bɔ́ɔ́ ó, mejóʼo.

⁶Diʼee gá mpʉ̌ Sara. Nye á si sâ Abraham mejóʼo, le ejɨjébe nyé ó: «Dâ ɛ̌!» Nó ó, diʼee gá mpʉ mísile mé Sara, lɨ́ esâ émbɨa, le epɛʼ bʉ́á ɨ́ milémé mín.

⁷Ɨ́ jwɨʼ gwár yaá, bɨ̌n bɨɛ ojʉ̂m, diʼee gá mbɨ̂mbɨá, bɨ̌n e bʉbá bɨ́n. Bɨ̌n e gʉ́á ó, le mʉmá, le mʉrʉ̂m, mʉmá ó dí ɨ́ tyɛʼ, laa mʉ́rʉ̂m. Dwéʼ gá bé dúu, ebě, bɨ́ɛ ntémé óbi émbɨǎ Nzyɛ̌m á kɛʼ baá nyé á tíʼ bá lɨ́. Lé ó dí nkɔb líʼe nyɔ́ɔ́. Bɨ́n óbe, atíʼe nó wá, yé óbɛ̌m kɔbla bɨ́n ɨ́ jɔʼ bɨ́n dí ejɨʼla e Nzyɛ̌m yɨ́.

⁸Lʉ́ ékǎn ɨ́ mekaná mâʼ lɨ́ esú é bɨ́n óbɛ̂h, wé ó: diʼee gá e mbǐ pahlá ngwár. Jóʼáá gá mebúʼ mémpwár. Kpɛlaa gá páʼ nyɨ́n kpɛ̌l dí páʼ bɨ́ɔɔ́ e bɨ́ɔɔ́ yɨ́. Lɛ́ʼláá gá kpɛ̌l dí eduho ɨ́ lémé tʉ́ŋlʉ̌ yɨ́. Jɔrɨɨ gá menyʉ́l mɨ́n páʼ nyɨ́n.

⁹Mʉ̌r sá abɔlǎ syɛ́ɛla ébébe le ebébe. Mʉ̌r sá abɔla mélwɨ́ɨ́ e melwɨ́ɨ. Yé jala yɨ́ɛ ó, bɨ̌n yálaa baányâ-melwɨ́ɨ ó, lɨ́ esyɛɛ bé metyéelé, ebě, Nzyɛ̌m á jébe bɨ̌n ó, bɨ̌n sâʼ nó. Bɨ̌n bé onʉa métyɛʼ me mpóm mé Nzyɛ̌m mpʉ nkɔ̂b líʼe nyɨ́n.

¹⁰Ebě, yê cɛmá ó: «Mʉr nyɨnyɛ̂h dí egwɨ̂m étíʼě mbɨ̂mbɨá le egwɨ̂m ébee mélú mé émbɨa nyá, nyě sá alɛ́ɛ̌ sá dí ɨ́ bébe yɨ́. Nye gwáʼaa elɛ́ɛ bísá míkóo.

¹¹Nye túmaa koo le ebébe. Nye sɨ̂saʼ njɨ embɨa. Nye tôʼ le egbâ mépyɛbla páʼ bʉ̂r e bʉr. Nye dúʼoo nzɨ̌ dí e mepyɛbla nyɨ́.

¹²Ebě, míh mé Dâ Nzyɛ̌m, mé dwɛ́ʼ ó, otîtyěl o bʉ̂r. Nyě jóʼló ó, minjɨʼla myɔ́ɔ́. Nyě pěm ó, bʉr bɨ́bɛ̂h o dí esâ ébébe bá.»

¹³Nzé ósâ bɨ́n ebébe ɨ́ jɔʼ mílémé mín mû ɨ́ báná báná ó, bɨ̌n sâʼ embɨa yɨ́ ɛ́?

¹⁴Bɨ́n ósia yɨ́ɛ e mitúú ebe bɨ́n dí edû bísyɛ́ɛla bí ótîtyěl nó, go ó, Nzyɛ̌m ósʉ bɨ́n metyɛʼ me mpóm tɨ̂. Ajóʼo gá bʉ́á páʼ bʉ̂r. Milémé mín sá akoro bɨ́n tɨ̂.

¹⁵Díʼéé gá e tiŋé ɨ́ miléme ó, bɨ̌n bé ódwě Krîst kûm, ebe nyé dí Tî wɨ́n yɨ́. Diʼee gá ntémé ɨ́ cǎr ó, bɨ̌n gwâ yala mʉ̂r nyɨnyɛ̂h ngá dî bɨ́n tíá, dumo e sá dí egbâ bɨ́n mpûʼla ɨ́ léme yɨ́.

¹⁶Sáʼ gá nó e njwɨr ɨ́ tala tala, ndu e bʉ́á. Mipahlá mílémé mín, myé díʼee njɨ myaá mi dí ɨ́ pyɛɛɛ mí. Bɨ́n dú mbɨambɨa kʉ̌ tyen ɨ́ Krîst, bʉ̂r kǎ swêʼ bɨ́n míe náǎ tɨ̂ʼ nɛ́ɛ: bé ósûʼlǎ kǎ jóʼo sôn, ebe bé dí bʉr o mélwɨ́ɨ.

¹⁷Nzyɛ̌m óbě sí tíʼe ɨ́ lémé wé ó, nyě dwé ó go túú nó, yé mbɨa ɨ́ páʼ gô ó, go síaa e túú waá, duho ɨ́ bisyɛ́ɛla bimpâ byô, laa ó, go síaa e túú duho ɨ́ syóm gô pa sá wɨ́.

¹⁸Ebě, Krîst mʉr tɨ̂ʼ á si dwe jɔʼ gwár lɨ́ esú é bíjɔʼ bíbyɛ̂h ɨ́ lɔ̌b bísyɛ́ɛla bí ébébe bín. Nyɨɛ tîtyěl mʉr á búra ó, le onzyɛ́h ó bʉ̂r, lɨ́ esâ ó, nye tôʼ e bɨ̌n nkǒ Nzyɛ̌m dí yɨ́. Bʉr bé á si jʉ̂ nye ɨ́ nkǒ páʼ bípúno. Nzyɛ̌m nyɨɛ nzě sâ ó, nye bíʼee nkul ɨ́ nkǒ páʼ Sísǐm wé.

¹⁹Ɨ́ Sísǐm waá ó nyé á nze to túno Mbɨambɨa Lɔ́ɔ kwá misísǐm myé á be mikómó mí.

²⁰Bé á nyɛɛ be ó, asâ Nzyɛ̌m mejóʼo ɨ́ melú mé épíhe. Ɨ́ jɔʼ yaá, Nzyɛ̌m á bʉbóno ó e bíhwó, tó pyâl ɨ́ jɔ̌ʼ Nóe á sil ekpaʼ byɛ̂l yɨ́. Ɨ́ jɔʼ yaá, yé á jaa be ó njɨ mâ dœ́h é bʉ̂r, apʉgʉ́ buo, njɨ bʉr mwom, ó b'á tíʼe ɨ́ byɛ̂l waá tʉ́ŋlʉ̌. Bé á tíʼɔɔ ó, ɨ́ medíbé.

²¹Medíbé maá, mé mveʼle ó, ndubó dí etíʼ bɨ́n ɨ́ báánâʼ wɨ́. Ndubó gá wɨ́ná, wé atíʼ mɨ́ná gâ ɨ́ lɔ̌b wé dí epɛʼ mɨ́ná gá mebomo. Wé tíʼ mɨ́ná gá ó, ebe wé dí gwɨ́má yɨ́ná ó, Nzyɛ̌m púbaa mɨná gâ, tó kumo ɨ́ milémé gá míná tʉ́ŋlʉ̌, ó mipahlá mi tɨ̂ʼ nkʉ̂ di ɨ́ pyɛɛɛ. Wé pubo mɨ́ná gá miléme myaá ó, ɨ́ nzɨ̌ pahá sóo mé Yésʉs-Krîst.

²²Yésʉs waá á si bɨ́nɔɔ ɨ́ jʉ́o kʉ́. Nye mû ó lɨ́ mbó éjʉ́m mé Nzyɛ̌m Sɔ́ŋ, gúmó nyé dí ejwɨ́ɨ bééngeles, le misísǐm mi dí e jwɨ́ɨ le myaá mi dí e nkul mí yɨ́. Byé á si gbáŋɔɔ ɨ́ jwɨ́ɨ́ yé.