Read Koonzime 1 Pétrus 4 Bible Online

1 Pétrus 4 - Koonzime bible

1 Pétrus 4

¹Krîst á si sia e mitúú ɨ́ nkǒ páʼ nyʉ̂l bipúno. Sá tɨ̂ʼ ó bɨ́n jálá le eboó bǐ mbǐ pahlá ngwár nyé á be e wé wɨ́ yɨ́, ebě, waá mû sí sia e mitúú ɨ́ nkǒ páʼ nyʉ̂l bipúno nyá, nyé abe lɨ́ ekǎ sɨsâ ébébe.

²Mbi mʉ̂r waá ókǎ títíʼe ɨ́ sí yɨ̂ʼ ó, njɨ lɨ́ elóŋlǒ gwɨ́má mé Nzyɛ̌m. Ɨ́ jɔʼ nyé óbe, nye dína ɨ́ nyʉ̂l bipúno yɨ́, nye ósyɛ̂hle bísyɛ́ɛla bi dí eduho ɨ́ bigwɨ́má bí bʉ̂r bí.

³Bʉr, bɨ́ buú lɛ̌ŋ jɔʼ ɨ́ buo buo lɨ́ elóŋlo bígwɨ́má óhááden dí eboó dudû bî: egbâ ményʉ̂l lɨ́ esâ bímolá nzam le ekomo, ejóʼǒ nzɔ́ɔ́ bísâ, elɔ̂ʼwa lɨ́ ebɛble ményoʼ, elɔ̂ʼwa lɨ́ ede méde, epuro ményoʼ, le edweŋɔɔ bíkpɛʼkpɛ̂ʼ bí ónzyɛ̌m kûm. (Yé ó sá Nzyɛ̌m dí ekamle yɨ́.) Bím syɛ́ɛla yaá, yɨ́ kǎ jala!

⁴Ohááden ónɨ̌, bé mû ó lɨ́ ekʉ́ kâm lɨ́ ebeě mpʉ bɨ́n dí, akǎ lɔ̂ʼwa lɨ́ esâ bísyɛ́ɛla bí ébébě mpʉ bɨ́n le onɔ́ɔ́, bé á nyɛɛ sɨsâ yɨ́. Bé mû ó lɨ́ elwɨ́ɨ bɨ́n tɨ̂.

⁵Bé ókar mílɔ̌b myɔ́ɔ́ ɨ́ mpǒm mé Nzyɛ̌m. Nye mû ó ɨ́ cǎr ó, nye tíʼaa mikublakúbla le odwe milɔ̌b.

⁶Nó ntémé ó Mbɨambɨa Lɔ́ɔ wé á túnɔɔ kwá odwe yɨ́. Wé á túnɔɔ gʉ̂ʼ ó, Nzyɛ̌m nkʉ̂ dwe bʉ̂r o tɨ̂ʼ mebě, duho ɨ́ bisyɛ́ɛla ményʉ́l mɔ́ɔ́. Bé e bʉr bɨ́bɛ̂h oswîh, bé ódweŋɔɔ mébě jwɨʼ gwár e gwár. Bé okǎ tíʼe píe tɨ̂ʼ ɨ́ nkǒ páʼ mísísǐm mi dí mikublakúbla, nwɨɨla e Nzyɛ̌m mí.

⁷Ɨ́ báánâ, bisá bíbyɛ̂h, byé mû ó kúno ekumo ɨ́ meswéhlɨ́. Dwéʼ gá menyʉ́l mɨ́n medile. Máráá gá miléme, lɨ́ esú ó, bɨ̌n sâʼ minjɨʼla.

⁸Sá ésôʼ, yé jala ó, bɨ̌n kpɛ́laa páʼ nyɨ́n kpɛ̌l ápurapúra, ebě, kpɛ̌l ó dí edímle mébébe ɨ́ buo buo.

⁹Atárwa gá lɨ́ ebaʼla páʼ nyɨ́n ɨ́ mimbɛ̌r mín.

¹⁰Mpʉ mʉ̂r nyɨnyɛ̂h ɨ́ sɔ́má gá yɨ́ná á bi wé mbǐ ndwéá yɨ́, bɨbaʼlaa gá mindwéá mín myaá lɨ́ esú lé ékɛm bʉ̂r ó sɔ́má yɨ́n oswîh. Sɨ́sáʼ gá nó, ebě, bɨ̌n bé ó osyɛ̂l o mésá mé Nzyɛ̌m dí ɨ́ mbɨǎ njwɨr, baá bé á bi metyɛʼ me mpóm mé Nzyɛ̌m mimbi mimbi bá.

¹¹Yé bé mʉr ólwib mílɔ̌b mé Nzyɛ̌m nó, nye lɛ́yɨɨ sá yɨ́yɛ̂h mpʉ mʉ̂r dí ekala mílɔ̌b mé Nzyɛ̌m nyá jálá le esâ yɨ́. Yé bé nyě súʼó ó bʉ́ʉ́ bʉ̂r nó, nye súʼaa bé e nkǔl Nzyɛ̌m mʉr tɨ̂ʼ á ntɨh nye nyɨ́. Nó ó Nzyɛ̌m ngá dweŋɔɔ kûm ɨ́ sá yɨ́yɛ̂h ɨ́ nzɨ̌ mé Yésʉs-Krîst yɨ́. Kûm le nkul, byé dwéŋɔɔ nye njʉ̌m dǐ e njʉ̌m dǐ. Amɛn.

¹²Bʉr ó kpɛ̌l bâm! Atwɨra gá ɨ́ jɔʼ bɨ́n dí ebee mébʉ́blá me dí enze má yɨ́. Mitúú bɨ́n dí esia e myé, myaá mi dí ɨ́ díʼa díʼa mpʉ̌ siʼe mínɨ̌, myé abe mítúú bɨ́n jálá le etwɨra mí.

¹³Sohaa gá ɨ́ buo buo ɨ́ jɔʼ bɨ́n dí esia e mitúú mé Krîst yɨ́. Bɨ́n ósia e mitúú myé myaá le bisʉhʉʉ nó, bɨ̌n ntémé bé óbuú soho ɨ́ jɔʼ méntyɛnwa mé, mé ónyɨ̂n ɨ́ ponó yɨ́.

¹⁴Metyɛʼ me mpóm, mé díʼee e bɨ̌n ɨ́ jɔʼ bʉ̂r bé ópya bɨ́n ɨ́ lɔ̌b búʼó bɨ́n dí ebúʼlǎ Krîst yɨ́, ebě, Sísǐm mé Nzyɛ̌m, dí Sísǐm kûm wɨ́, wé lɨ́ edi ɨ́ bɨ̌n ɨ́ jɔʼ yaá.

¹⁵Mʉ̂r sɔ́má yɨ́n bɔ́má e bintɨ́ʼá nó, yé ajala le eduho e mʉr waá mʉr tɨ̂. Nye ayɨ́ bɔma e bintɨ́ʼá ebe nyé dí njʉ̂l bʉr, nkʉ̂ syɛ̂l ebébe, nkʉ̂ mʉr dí elâʼ lʉ̂ ɨ́ milɔ̌b myé onkán nyá.

¹⁶Sâ gwár, mʉr dí esia e bintɨ́ʼá ebe nyé dí krǐsten nyá, nyě sá ajóʼo bá sôn ɨ́ lɔ̌b bíntɨ́ʼá byaá. Nye gúmlaa njɨ Nzyɛ̌m le epɨr e díé mé Krîst.

¹⁷Etíʼ é mílɔ̌b gá lɨ́ná, lɨ́ pyâl. Nzyɛ̌m nyɛl élwib mílɔ̌b ó, myaá mi bʉ̂r ó Mbɛ̌r-Nzyɛ̌m. Tíʼá mílɔ̌b waá pǎ nyɛɛ́ nyan kwá gá nyɨ́ná, bʉr bé, á dwɛʼra e bʉr o dí abûʼlǎ Mbɨambɨa Lɔ́ɔ́ mé Nzyɛ̌m bá! Ndumló syɛ́ɛla yɔ́ɔ́ yaá, wé óbe yé?

¹⁸Ebě, yê cɛmá ó: «Otîtyěl o bʉ̂r pǎ nyɛɛ́ bǐ twiʼ ti e mekɔbla, á dwɛʼra e bʉr o dí adwáawǒ Nzyɛ̌m bá, le osyɛ̂l o mísyóm! Bɨ́ɛ, bé ókǎ tó nyɨ̂n ɨ́ yáǎ sûm?»

¹⁹Ebe nó, baá Nzyɛ̌m á tíʼe ɨ́ lémé wé ó, nyě dwé ó bé mitúú bá, bé ɨ́ jala le etímle bé bʉr o tɨ̂ʼ ɨ́ mebó mé Kwihbʉr gá wɨ́ná, dí mʉr jálá le ebúʼlɔɔ nyá. Bé otô dóló le esâ bísyɛ́ɛla bimpâ.