Read Koonzime 2 Pétrus 1 Bible Online

2 Pétrus 1 - Koonzime bible

2 Pétrus 1

¹Yé ó mɛm Simon Pétrus, syɛ̂l mesâ ti e mʉr milʉ́mlʉ́ mé Yésʉs-Krîst ó dí ecɛma bɨ́n mekaná mâ. Mě cɛmá ó, bɨ̌n bʉr o bɨ́h le onɔ́ɔ́ bé á bi mbǐ búʼó gwár bá. Búʼó yaá, odimé o tɨ̂, wé ó jwɨʼ gwár páʼ gá nyɨ́ná. Mɨná bé á bi gá búʼó yaá ó, ɨ́ lɔ̌b syɛ́ɛla mé Yésʉs-Krîst tîtyěl mʉr, Nzyɛ̌m gá wɨ́ná, Tiʼbʉr gá wɨ́ná.

²Metyɛʼ me mpóm le mepyɛbla, mé díʼee e bɨ̌n ɨ́ ntʉʉʉ́, duho ɨ́ ngwɨ́á bɨ́n dí egʉ́ǎ Nzyɛ̌m, bé e Tî gá wɨ́ná Yésʉs wɨ́.

³Nzyɛ̌m á si gbâ nkul nyé lɨ́ edwe mɨ́ná gá sá yɨ́yɛ̂h dí e nyɔm lɨ́ esú ó, mɨná tíʼaa gá, le egúmo gá e né yɨ́. Nye á jébe mɨná gá ó, ɨ́ nzɨ̌ kûm nyé le mbɨambɨa njwɨr wé.

⁴Mɨná mû bi gá ó, menkɛ̌ʼ nyé á boo kɛʼ mɨná gá, maá me dí ɨ́ buo ódimé má. Ɨ́ jɔʼ mɨ́ná bûʼlá gá menkɛ̌ʼ maá yɨ́, mɨná bé lɨ́ ebi gá ntémé njwɨr mé Nzyɛ̌m tɨ̂. Bʉr ó sí yɨ̂, bé mû ó lɨ́ ebo, duho ɨ́ mpwaʼ bigwɨ́má bísâ. Nó mɨná bɨɛ bé ókpɛ́ɛ gá bigwɨ́má byaá.

⁵Sɨ́ǎ yaá ó mé dí elɛ́ɛ e bɨ̌n ó, gbáʼ gá nkul lɨ́ etâʼ bísá bîʼ ɨ́ nkalá nkalá: ɨ́ búʼó yɨ́n, bɨ̌n e kɛ́l mbɨambɨa njwɨr. Ɨ́ mbɨambɨa njwɨr, bɨ̌n e kɛ́l ngwɨ́á.

⁶Ɨ́ ngwɨ́á, bɨ̌n e kɛ́l émâr é léme. Lɨ́ emâr é léme, bíhwó. Lɨ́ bíhwó, kʉ̌ tyen mpâ.

⁷Ɨ́ kʉ̌ tyen mpâ, esó páʼ bɨ́ɔɔ́ e bɨ́ɔɔ́. Lɨ́ esó páʼ bɨ́ɔɔ́ e bɨ́ɔɔ́, kpɛ̌l.

⁸Métum maá sí nyɨ̂n ɨ́ bɨ̌n nó, bɨ̌n bé ogʉ́a Tî gá wɨ́ná Yésʉs-Krîst. Ngwɨ́á waá, wé ádi ntémé wé omér. Wé óbe ó mbáʼrá e bisyɛ́ɛla bimpâ wé dí ebyâ bí. Bɨ̌n bé ótô le esâ bísyɛ́ɛla byaá dóló ó, ɨ́ nzɨ̌ ngwɨ́á waá.

⁹Sâ gwár, mʉr dí asâ bísyɛ́ɛla bimpâ byaá nyá, mejwôʼlʉ mé, mé atô lɨ́ ejaa. Nye ó mpʉ ántím. Nye lɨ́ ejɨha ó, Nzyɛ̌m á be ó sí pubo nyê, lɨ́ epɛʼ mísyóm nyé á be e myé mélú mé épíhe mí.

¹⁰Sɨ́ǎ yaá ó mé dí elɛ́ɛ bɨ́n, bɨ́ɔɔ́ bâm ó, gbáʼ gá nkul lɨ́ eséa ɨ́ piiia, lɨ́ esú ó, bɨ̌n gʉ́ŋaa tyeetye ó, Nzyɛ̌m á si jébe bɨ̌n, le etwâr bɨ́n yɨ́. Bɨ́n sá nó wá, bɨ̌n bé ákóʼó duma lɨ́ ebébe.

¹¹Nó ntémé ó Nzyɛ̌m ósúʼo bɨ́n e menzɨ̌ mɨ́mɛ̂h lɨ́ esú ó, bɨ̌n níʼee ɨ́ Mpóʼo mé Tî gá wɨ́ná le Tiʼbʉr gá wɨ́ná Yésʉs-Krîst yɨ́. Mpóʼo nyaá, nye ódi ó njʉ̌m dǐ e njʉ̌m dǐ.

¹²Bɨ̌n bé lɨ́ eboó gʉ́a ótyeetye dí egʉ́ŋɔɔ ɨ́ jɔʼ yɨ̂ʼ wɨ́. Milɔ̌b mi tɨ̂ʼ ó dí esâ ó, bɨ̌n tyɛ́bɨɨ mekʉ̌ sí ɨ́ sɨ́ŋ, apɨ́ŋla yɨ́. Bɨ̌n damá gʉ́a nó, me ósímsa bɨ́n otyeetye waá ɨ́ jɔʼ yɨ́yɛ̂h.

¹³Yé ó nó. Mě bee ó, yê tîtyěl ó, me símsaa bɨ̌n wǎ ɨ́ nzɨ̌ milɔ́ɔ́ myâm, tyé yɨ́yɛ̂h mé dína ɨ́ twǐʼ sí yɨ̂ʼ yɨ́, bɨ̌n nkʉ̂ kubla.

¹⁴Ebě, me lɨ́ egʉ́a ó, me mû ó kúno epɛʼɔɔ médwôʼlʉ mpʉ Tî gá wɨ́ná Yésʉs-Krîst á boo lɛ́ɛ me ɨ́ hwɨ́m yɨ́.

¹⁵Me ósâ sɨ́n lɨ́ elíʼe bɨ́n e micɛmá ngá jɨjɨm bɨ́n bitɔŋlá ɨ́ milɔ̌b mínɨ̌, píe l'eswie lâm ɨ́ jɔʼ yɨ́yɛ̂h mí.

¹⁶Ebě, ɨ́ jɔʼ bɨ́h á dwe bɨ̌n lɛ́ʼlá dí edumo e nzéá dí lwɨ́ŋlá e nkul mé Tî gá wɨ́ná Yésʉs-Krîst wɨ́ yɨ́, bɨ̌h bé á bé akala bɨ́n bikɨkɛna bʉ̂r bé á kûhlo e pɨʼ nyɔ́ɔ́ bí. Lɛ́ʼlá wɨ́h waá, wé á bɔma ó e mboʼlá wɨ́h, bɨ̌h bʉr o b'á bee mpwaʼ nyé bá.

¹⁷Nzyɛ̌m Sɔ́ŋ á si dwe nye dúu le kûm. Ɨ́ jɔʼ nyé á ntɨh twíí, duho ɨ́ diá kûm nɨ́nɨ́ɨ́ yé yɨ́, nye á lɛ́ɛ ó: «Mwân wǎm mé dí ɨ́ buú kpɛl nyá ó nyâ. Me lɨ́ ekʉ́ mɛɛla e né.»

¹⁸Bɨ̌h bʉr o tɨ̂, bé á si jóʼo twíí nyaá lɨ́ eduho ɨ́ jʉ́o kʉ́, ɨ́ jɔʼ bɨ́h le onɔ́ɔ́ bé á be lɨ́ ecwɨ̂ʼ e dí tí lɨ́ yɨ́.

¹⁹Nó, lɔ́ɔ́ ógwíha o mílɔ̌b bé á tutúno wɨ́, wé ó sá mɨ́ná mû sí gʉ́a gá ɨ́ pébébé yɨ́. Bɨ̌n e kʉ́ gwá di le ocwóó, ebě, wé ó mpʉ éláma e dí epan ɨ́ gúmó yé á bɨbe lɨ́ edúrʉ́ʉ́ yɨ́ lɨ́. Tóʼ gá dóló le ebúʼlǎ lɔ́ɔ waá, tó kumo ɨ́ jɔʼ dʉ́o lé ójɨma yɨ́, le ɨ́ jɔʼ twítwén melɔ́ma mé mɛ́n ópan bɨ́n ɨ́ miléme yɨ́.

²⁰Bɨ̌n e gʉ́á sɨ̂: yé abe e mʉr á gwîh milɔ̌b mé Nzyɛ̌m ɨ́ lɔ̌b gwɨ́má yé ánta nye. Ogwíha o mílɔ̌b, bé á gwigwîh milɔ̌b myé ó, lɨ́ edû mpʉ̌ Sísǐm mé Nzyɛ̌m, wé á lɛ̂ʼle bé yɨ́. Ogwíha o mílɔ̌b pǎ nyɛɛ́ dû gwɨ́má mé Nzyɛ̌m, á dwɛʼra e mʉr ókǎ pâʼla míngwíhá mílɔ̌b myɔ́ɔ́ nyá! Sá bé á nyɛɛ gwîh, nzě cɛma yɨ́, mʉr nyé ajala le epâʼla yé mpʉ̌ gwɨ́má lémé wé dí yɨ́.