Read Koonzime 2 Pétrus 2 Bible Online

2 Pétrus 2 - Koonzime bible

2 Pétrus 2

¹Bibɨ́bla bí ógwíha o mílɔ̌b, byé á si pyâl ɨ́ mimbú mí píhe kwá bʉr o mé Nzyɛ̌m. Jwɨʼ gwár e gwár yaá ó, bíbɨ́bla bí ólɛ̂ʼla ngá báʼǎ nî ɨ́ sɔ́má yɨ́n yɨ́. Milɛ́ʼlá bé ódwe mí, myé ódulo mpɔ́ʼá menkɔ̌m ɨ́ bɨ̌n, le edímle bʉ́ʉ́ bʉ̂r. Byé óbánǎ kɛ́la Tyɛ̂b esôʼ gá wɨ́ná á táa mebyaʼ mɔ́ɔ́ nyá. Byé ódulo ébébe ɨ́ menyʉ́l mɔ́ɔ́. Lé ópyâl bé ó, metwɨrâ, ntɔ̂ʼ dímle byê.

²Kʉ̌ tyen wɔ́ɔ́ ntémé, wé ódímle bʉ̂r ɨ́ buo buo, ebě, bʉr oswîh, bé ósâ bímolá nzam le ekomo lɨ́ ebaŋa byê. Sá tɨ̂ʼ ó ngá tíne bʉ̂r ó, bé swéʼee díé é búʼó gá yɨ́ná, dí le otyeetye yɨ́.

³Bibɨ́bla bí ólɛ̂ʼla byaá, byé ókûhlo bíkɨkɛna lɨ́ edû gwɨ́má ébi bísâ. Byé onze le egwâm bɨ́n bisâ. Sâ gwár, boó táarě kɔ́m, Nzyɛ̌m, mʉr pá dí Tîʼ milɔ̌b wɔ́ɔ́ nyá, nye mû ó ɨ́ cǎr lɨ́ edwe byé bintɨ́ʼá ɨ́ milɔ̌b myɔ́ɔ́ nyé á boo tíʼe mí. Mʉr ngá dwe byé bébebébe bintɨ́ʼá waá, jʉ̂ byé nyá, nye ɨ́ doho ɨ́ mpʉ̂n nyɔ́ɔ́.

⁴Ebě, Nzyɛ̌m á bé abîr bééngeles bé á sâ syóm bá. Nye á jaa guho bé ó, njɨ ɨ́ bɨ́ siʼe. Nye ntɔ̂ʼ gbâ bé ɨ́ mpǐl, lɨ́ ebónǒ móhó étíʼ é mílɔ̌b.

⁵Nzyɛ̌m ntémé á bé abîr bʉ̂r o myâ. Nye á si ntɨh mpɨɨ ɨ́ sí yɨ̂ʼ lɨ́ ejʉ̂ mínjéʼe-Nzyɛ̌m. Nye á jaa tíʼ ó, njɨ Nóe, á lɨlɛ́ɛ bʉr sá dí tîtyěl yɨ́ nyá, bé e bʉ́ʉ́ bʉ̂r nzaangbá.

⁶Nzyɛ̌m á si dwe binkana bí Sodôm e Gómɔr bintɨ́ʼá, nye nzě dîʼ byé, dwir byé meswií. Nó, nye á sâ mpʉ́nʉ̌ ó, lɨ́ edwe mɨ́ná gá mveʼle édû. Minjéʼe-Nzyɛ̌m, myé ósûʼla ntémé ó njɨ jwɨʼ gwár yaá.

⁷Nye ntémé á si tíʼ Lôt, tîtyěl mʉr. Ekɛ̂n, lé á be ɨ́ swɨɨ̌ Lôt ɨ́ nyʉ̂l lɨ́ ebee bʉ̂r o b'á be, agbâ mémpéné ɨ́ nkɔb bá. Bɨ́ɛ, bé á jaa sâ ó, njɨ bimolá nzam le ekomo.

⁸Ebě, tîtyěl mʉr waá á títíʼe páʼ nyɔ́ɔ́ ó, lɨ́ ebee le ejóʼo bísyɛ́ɛla bí ébébe byɔ́ɔ́ ɨ́ dʉ́ó lɨ́lɛ̂h. Byé á be lɨ́ entɨ̂ʼ ótîtyěl ó lémé wé.

⁹Yé bé Dâ Nzyɛ̌m á si nyɛɛ sâ bʉr baá nó wá, nó ntémé, nye ókʉ́ gʉ́ǎ mpʉ nyé ósyɛb bʉ̂r o dí egúmo e né bá ɨ́ mebʉ́blá yɨ́. Nye lɨ́ egʉ́a ntémé mpʉ nyé ókab ónzyɛ́h ó bʉ̂r bintɨ́ʼá, le egbâ bé ɨ́ mpila, lɨ́ ebónǒ móhó étíʼ é mílɔ̌b yɨ́.

¹⁰Nye ódwe bíntɨ́ʼá, ntaa sʉ́ŋa ó, bʉr o dí elóŋlǒ njwɨr myâ gá wɨ́ná bá, bɨ́ɛ ntémé lɨ́ epyêh bʉ̂r o dí e jwɨ́ɨ bá. Bé jaá mɨmɛɛla ó, njɨ e bé bʉr o tɨ̂, le bijwɨʼ mílémé myɔ́ɔ́. Bibɨ́bla bí ólɛ̂ʼla mê lɛ́ɛ́ bɨ́n bî, byé ajóʼo bʉ́á lɨ́ epya mísísǐm mí édúrʉ́ʉ́ mi dí e jwɨ́ɨ mí.

¹¹Beéngeles mé Nzyɛ̌m bɨ́ɛ damá laa bʉ̂r baá ɨ́ nkul le pîm, bé ákɛ́l mélwɨ́ɨ ɨ́ bipurá ɨ́ jɔʼ bé dí epur mísísǐm mí édúrʉ́ʉ́ ɨ́ mpǒm mé Dâ Nzyɛ̌m yɨ́.

¹²Bibɨ́bla bí ólɛ̂ʼla byaá, byé sɨ́sá sá bé dí agʉ́a yɨ́ nkěh. Byé ó kwahaá mpʉ ótír ó dwǐʼ, lúʼo pɨ̂ʼ. Tó kœb ó, tír jaá byɛ̂l njɨ ó, nye mɛ́rɔɔ. Nyé ojʉ́ŋɔɔ. Jwɨʼ gwár e gwár yaá ó bʉ̂r baá, bé ópɛʼɔɔ médwôʼlʉ yɨ́. Bé ódwe ó, bé dína lɨ́ ekʉ́ sâ bísyɛ́ɛla mélwaʼwo bé á bu kpɛl bí.

¹³Bé óbi myɛ́na mé ébébe bé á pa sâ bʉr lɨ́. Bé mɨmɛɛla ó, lɨ́ edi ɨ́ twiʼ mépwaʼ témé móhó. Jɔʼ bé dí esyɛŋa e bɨ̌n lɨ́ ede yɨ́, nkʉ̂ bɨ̌n nwɨɨla ó e nyʉ̂l, bé ó dí mebar me nyʉ̂l nyaá. Bé lɨ́ esahle lɨ́ ede, lɨ́ edû bígwɨ́má byɔ́ɔ́. Byé lɨ́ edímle bé ɨ́ nzɨ̌ mikóo myɔ́ɔ́.

¹⁴Míh mɔ́ɔ́, mé jaá sáa ó, njɨ bʉbá bé sâʼ medyɛ̂n e bé bá. Bé abá gbala lɨ́ esâ syóm. Bé sɨ́sáá ó, bʉr o dí ɨ́ tyɛʼ bá, bé bílɨɨ ɨ́ bilám byɔ́ɔ́. Bé jaá gbâ lémé ɨ́ dwííí ó, njɨ lɨ́ ejɨ̂ʼ édû bígwɨ́má ményʉ́l mɔ́ɔ́. Nzyɛ̌m, nyɨ́ syɛm bê.

¹⁵Bé á si líʼe tîtyěl nzɨ̌, nzě dyɛ̂l ɨ́ nzɨ̌ swîh, ntɔ̂ʼ dîm lɨ́ edû nzɨ́ mé Balâm, mwân mé Bosɔ̂r. Nye ó b'á be lɨ́ ebuú soho ɨ́ jɔʼ nyé á bi myɛ́na píe l'ebébe yɨ́.

¹⁶Kamntʉl yɨ́ɛ, tír dí abe lɨ́ elwǐb lwǐb mʉ̂r nyá, bánǎ lwib le etyél é mʉ̂r, ntɔ̂ʼ nkáŋla e ngwíha milɔ̌b waá, lɨ́ ekamle nyé lɨ́ esâ bébebébe syɛ́ɛla nyé á gwa sâ lɨ́ ogʉ̌ wé yɨ́.

¹⁷Bʉr baá nwɨɨla ó e menó. Bé ó menó mû sí jwɨ̂l, akǎ be le etáŋ é médíbé egwár má. Bé ó mpʉ nkûr nkúo dí etíne wɨ́. Nzyɛ̌m, nyɨ́ boó komlo bé diá lɨ́ edúrʉ́ʉ́ e dí ɨ́ nkom nkom lɨ́.

¹⁸Bé lwilwib ó e mekǎn mé jáálé, maá me dí dwêh má. Ɨ́ nzɨ̌ bigwɨ́má ményʉ́l mébomo mɔ́ɔ́, bé lɨ́ edulo bʉ̂r o bé alúno syɛb ményʉ́l mɔ́ɔ́ ɨ́ sɔ́má bígʉʼlʉgʉ́ bá.

¹⁹Bé kɛʼ bé ó, bé ópɛʼ bé lɨ́ otúʼǎ, dil bé ɨ́ dǐ ónzyɛh o bʉ̂r. Tó kœb ó, bé bʉr o tɨ̂ʼ, bé ó mpǎŋ bitúʼǎ, lɨ́ edû métum me dí etyen mʉ̂r lɨ́ eswie má, ebě, sá yɨ́yɛ̂h dí ejwɨ́ɨ mʉ̂r yɨ́, mʉr waá, nye ó túʼǎ sâ yaá.

²⁰Mʉ̂r gʉ́á Tî gá wɨ́ná le Tiʼbʉr gá wɨ́ná Yésʉs-Krîst, le epʉʼa ɨ́ bibol bísyɛ́ɛla bí sí yɨ̂ʼ nó, nyé sí báʼǎ kǎ bîr ó, ebébe laá, lé nʉ́aa nkul ɨ́ twiʼ yé nó, twiʼ yé, yé ókǎ bébe, ntaa sʉ́ŋa, laǎ mpʉ yé á nyɛɛ bébe ɨ́ metááré yɨ́.

²¹Yé á gwa mbɨa bʉr baá ó, mpa bé á bé apǎ dyɛ̂l ɨ́ nzɨ̌ dí elɛ̂ʼle bʉ̂r kʉ̌ tyen dí tîtyěl wɨ́ nyɨ́, laa ó, bé osí dyɛ̂l tɨ̂ʼ nɛ́ɛ: bé ntɔ̂ʼ kǎ bwóolo ntúʼó, túmǒ koo e metié me dí tí, maá Nzyɛ̌m á tyêl má.

²²Sâ pyál bé yɨ́, yé lɛ́ʼlé ó mpʉ bíkɨkɛna bibá bîʼ dí elɛ́ɛ lɨ́ otyeetye yɨ́ ó: «Mpyê, nyě swíʼ ó, tó de bíjwɨ́ɨlɨ́ byé.» Yʉ́ʉ́ tɨ̂ʼ, yé lɛ́ɛ́ ó: «Le bê jwɨɨ nkʉ́, le ntɔ̂ʼ nyê swîʼ, tó byɛ́ɛla ɨ́ mindě.»