Read Koonzime 2 Pétrus 3 Bible Online

2 Pétrus 3 - Koonzime bible

2 Pétrus 3

¹Bʉr o mé dí ekpɛl bá, mekaná membá mé mû sí cɛma bɨ́n má ó mâ. Mě cɛmá bɨ́n ó, me jɨ́mɨɨ bɨ̌n bitɔŋlá, bɨ̌n nkʉ̂ pahle byé e miléme mi dí abe e mikóo mí.

²Mě gwɨ́m ó, bɨ̌n símsaa lɔ́ɔ́ ógwíha o mílɔ̌b mé Nzyɛ̌m bé á lɛ́ɛ ɨ́ melú mé épíhe wɨ́, ti e metié mé Tî Yésʉs, dí ntémé Tiʼbʉr gá wɨ́ná nyá. Metié maá ó bɨ́n á jóʼo ɨ́ nzɨ̌ bʉr o mílʉ́mlʉ́ bé má.

³Sá ésôʼ, gwá gʉ́a gá sɨ̂: ɨ́ melú mé ósûʼla má, yé óbe ó e bʉr o ngá kpɛl étíʼě mpʉ bígwɨ́má byɔ́ɔ́ dí etíne bé yɨ́ bá. Bé óbe ó bʉr ó pyêh,

⁴ebě, bʉr baá bé ólɨlɛ́ɛ ó: «Lɔ́ɔ́ nyé á lɨlɛ́ɛ ó, nye ónze wɨ́, wé ó kwahaá dwêh. Odâ, bɨ́ boó dwe, nye l'apyâlpyal. Sá yɨ́yɛ̂h, yé ó jwɨʼ gwár e gwár e mpʉ yé á boo be, duho ɨ́ metááré mé kʉ́ e sí yɨ́.»

⁵Sá bé á boo gʉ́a yɨ́, bé sɨ́sáá ó, bé jɨ́haa yê. Sâ yaá, yé ó: lwǐb mé Nzyɛ̌m ó b'á kuho jʉ́o le ejwoo le baántɛ́n ɨ́ jɔʼ myâ. Lwǐb yé ntémé ó b'á sâ ó, kʉ́ e sí, byé díʼee, duho ɨ́ medíbé. Lwǐb ntémé, yé á komlo byé ó e medíbé.

⁶Medíbé mémpwár maá, mé ntɔ̂ʼ bíla bʉ̂r ó sí bɨ́bɛ̂h, jʉ̂ bê.

⁷Lwǐb mé Nzyɛ̌m gwár e gwár yaá ó dí ebaʼlě jʉ́o, le ejwoo le sí. Yé óbaʼle byé ó, tó pyâl ɨ́ móhó étíʼ é mílɔ̌b. Byé odíʼɔɔ. Minjéʼe-Nzyɛ̌m, myé ódwe ɨ́ móhó waá.

⁸Bʉr ó kpɛ̌l bâm, ajɨha gá sɨ̂: ɨ́ páʼ mé Dâ Nzyɛ̌m, dʉ́o egwár, lé ó mpʉ tɔ́ɔ́sin mimbû; tɔ́ɔ́sin mimbû nyɨɛ, nye ó mpʉ dʉ́o egwár.

⁹Dâ Nzyɛ̌m, nye ábea le elóŋlo nkɛ́ʼ nyé mpʉ bʉ́ʉ́ bʉ̂r dí ejwɨʼ ó, nye álɨ̌ dira nkɛ́ʼ nyaá yɨ́. Nye ɨ́ buo bíhwó ɨ́ bɨ̌n, ebě, nyé agwɨ̂m ó, nyʉ́ʉ́ mʉ̂r dímɨɨ ɨ́ nkɔb bʉr. Gwɨ́má lémé wé, yé ó, bʉr bɨ́bɛ̂h túmaa mikoo e mebébe mɔ́ɔ́, le edwira míléme.

¹⁰Ɨ́ jɔʼ Tî Yésʉs óbáʼǎ nze yɨ́, nye ópyâl bʉ̂r ó, metwɨrâ, mpʉ̌ ndíblʉ̌. Jʉ́o le ejwoo le baántɛ́n, byé ótɨ̂l e duú ɨ́ buo buo. Bisá Nzyɛ̌m á komlo byé e tɨ̂ʼ bí, nye ódîʼ bíbyɛ̂h. Sí yɨ̂ʼ ti e bisá bíbyɛ̂h bi dí esumɔɔ tɨ̂ʼ bí, byé ódíʼɔɔ.

¹¹Yé bé bisá bîʼ bíbyɛ̂h, byé ógbahɔɔ nó, wáǎ mbǐ kʉ̌ tyen bɨ́n jálá le edû wɨ́? Yé ó kʉ̌ tyen dí ejala e bʉr o dí tí, baá o dí egúmo e Nzyɛ̌m bá wɨ́.

¹²Jɔʼ yɨ́yɛ̂h mɨ́ná dú gá kʉ̌ tyen waá yɨ́, mɨná bónó gá ó, móhó Nzyɛ̌m ngá báʼǎ nze wɨ́. Mɨná séá gá ntémé ó, syɛ́ɛ́ ngá sâ ó, nye kpâhwa nze yɨ́. Ɨ́ móhó waá ó, jʉ́o le ejwoo le baántɛ́n ngá jɔǎ siʼe, ntɔ̂ʼ dinwa. Bisá Nzyɛ̌m á komlo byé e tɨ̂ʼ bí, byé ójǎ siʼe, buma mínjʉl.

¹³Nzyɛ̌m á kɛʼ mɨná gá ó, edwán é jʉ́o, edwán lé édwoo, ti e sí dwân. Mɨná gá bé ɨ́ mpʉ̂n, lɨ́ ebóno byê. Gúmo yaá ó ótîtyěl mé Nzyɛ̌m ngá kœb ódiá wé yɨ́.

¹⁴Bʉr ó kpɛ̌l bâm! Mpʉ mɨ́ná dí ebóno gá móhó waá yɨ́, sáʼ gá sɨ́n lɨ́ edi e mepyɛbla páʼ nyɨ́n, tó pyâl ɨ́ jɔʼ nyé óbáʼǎ nze yɨ́. Sáŋáá gá ó, bɨ̌n díʼee mpʉ nyʉ̂l mé Krîst dí abe e mebar nyɨ́. Diʼee gá abe le ebébe bé óboʼlo bɨ́n e tɨ̂ʼ lɨ́.

¹⁵Jɔʼ yɨ́yɛ̂h bɨ́n béé ó, Tî gá wɨ́ná, nyé apǎ báʼǎ nze yɨ́, lɛ́yɨ́ɨ́ gá ɨ́ bijɔʼ byaá ó: «Nye ɨ́ buo bíhwó ɨ́ páʼ bʉ́ʉ́ ósyɛ̂l bé ébébe, lɨ́ esú ó, nye tíʼɨɨ bê.» Nó ntémé ó, mɨ́ɔɔ́ kpɛ̌l gá wɨ́ná Pɔ̂l á cɛma bɨ̌n yɨ́. Nye á cɛma nó ó, lɨ́ ocwóó Nzyɛ̌m á dwe nye wɨ́.

¹⁶Nyě cɨcɛmá bɨ́n milɔ̌b mimpwár myaá ó, ɨ́ mekaná mɨ́mɛ̂h nyé dí ecɛma má. Ɨ́ mʉ́ʉ́ mékaná, nye á cɛma ó, bisâ bi dí elára bʉ́ʉ́ bʉ̂r bí. Bʉr o dí anʉa mílɛ́ʼlá, baá o dí le ocábcab bá, ɨ́ jɔʼ bé láá mɨ́haá mékaná yɨ́, bé lɨ́ edwir mílɔ̌b mi tɨ̂ʼ gúú mbi swîh. Yé ó mpʉ bé dí eboó sɨsâ ntémé ɨ́ jɔʼ bé láá byúú bípéh Mékaná mé Nzyɛ̌m yɨ́. Bʉr baá, bé guŋlo ó, mempɨ́ mɔ́ɔ́ bé bʉr o tɨ̂ʼ ngá lʉ́ŋa, ntɔ̂ʼ dwe tɨ̂ʼ má.

¹⁷Ɨ́ páʼ wɨ́n, bɨ̌n osó bâm ɛ̌! Bɨ̌n bé lɨ́ eboó gʉ́ǎ lɔ̌b waá. Gwá di gá le ocwóó páʼ bʉ̂r o dí agbâ mémpéné ɨ́ nkɔb bá. Bɨ̌n ámû jaá dyɛ̂l ɨ́ nzɨ̌ nyɔ́ɔ́, ntɔ̂ʼ tó dîm. Apʉʼa gá ɨ́ tyé mélele bɨ́n dí tɨ̂ʼ yɨ́.

¹⁸Tóʼ gá dóló le egwɨ́e ɨ́ mpam mé Tî gá wɨ́ná Yésʉs-Krîst, dí ntémé Tiʼbʉr gá wɨ́ná nyá. Bɨ̌n e gwɨ́é ntémé, ebě, bɨ̌n bɨ́ gʉ́a nyé ɨ́ pébébé. Nye omér ó dí ejala e kûm, táare ɨ́ jɔʼ yɨ̂, tó kumo ɨ́ twǐʼ njʉ̌m dǐ. Amɛn.