Read Koonzime 1 Yʉánɛs 1 Bible Online

1 Yʉánɛs 1 - Koonzime bible

1 Yʉánɛs 1

¹Lɔ́ɔ́ bɨ́h mû lɨ́ elɛ́ɛ bɨ́n wɨ́, wé ó, ɨ́ lɔ̌b Lwǐb Twiʼ. Nye á boo be ó tɨ̂, kʉ́ e sí apǎ bě kuhá. Bɨ̌h bé á si jóʼo twíí nyé, bee ntémé nye e míh mɨ́h. Nye ó mʉr bɨ́h á siŋle, waá mebó mɨ́h, mé á kúna nyá.

²Etín é Twiʼ laá, lé á si nyɨ̂n ɨ́ sí yɨ̂. Bɨ̌h bé á si bee nye, bɨ̌h nzě táare éboʼlo, dumo e mʉr waá. Nó yaá ó bɨ́h dí etyɛ̂b kwá nyɨ́n le túnó dí edumo le Etín é Twiʼ wɨ́. Etín é Twiʼ, lé di ó njʉ̌m dǐ e njʉ̌m dǐ. Bé e Nzyɛ̌m Sɔ́ŋ ó b'á be. Nye nzě nyɨ̂n ɨ́ sí yɨ̂.

³Sá bɨ́h á bee e míh mɨ́h, jóʼo e megwǎl mɨ́h yɨ́, yé ó bɨ́h dí etúno bɨ́n ntémé yɨ́, mbi dí ó, mɨná nkʉ̂ di gá ɨ́ mpúhlá, mɨná gá óbɛ̂h. Mpúhlá mɨ́ná ngá pûhla gá nyɨ́, óbe ó e Nzyɛ̌m Sɔ́ŋ, bé e Mwân wé, Yésʉs-Krîst.

⁴Bɨ̌h cɛma bɨ́n mekaná mâʼ ó, sʉhʉʉ gá yɨ́ná, yé díʼee lwɨ́ŋlá.

⁵Mpáŋla bɨ́h á bi ɨ́ nzɨ̌ mé Yésʉs-Krîst nyɨ́, nye ó nyɨ̂. Nye ó bɨ́h dí eboʼlo bɨ́n ɨ́ báánâʼ nyɨ̂. Nye ó: Nzyɛ̌m ó dí njʉl. Edúrúú, lé abá be ɨ́ nye, damá jóʼo ó, mâ bím twáʼwó.

⁶Mɨ́ná bé lɛ́ɛ́ gá ó, mɨná bɨ́ pûhla gá e né, mɨná yɨ́ɛ lɨ́ entíma gâ, le edû kʉ̌ tyen ébébe nó, lɛ́ɛ́, mɨná bé lɨ́ elɛ́ɛ gá bibɛr. Mɨná bé asâ gá bisyɛ́ɛla bi dí edû ótyeetye bí.

⁷Mɨ́ná tyé gá ɨ́ myɛ́n tʉ́ŋlʉ̌, mpʉ̌ Nzyɛ̌m mʉr tɨ̂ʼ dí ɨ́ myɛ́n yɨ́ nó, ɨ́ jɔʼ yaá ó mɨ́ná óbe gá e mpǎŋ mpúhlá páʼ gá nyɨ́ná yɨ́. Metié me Mwân wé, Yésʉs, mé ópubo gá mɨná misyóm mímyɛ̂h ɨ́ jɔʼ yaá.

⁸Mɨ́ná lɛ́ɛ́ gá ó, mɨná bé asâ gá misyóm nó, lɛ́ɛ́, mɨná dímlé gá ó, mɨná bʉr o tɨ̂. Otyeetye, wé abe ɨ́ mɨná gâ.

⁹Sâ gwár, mɨ́ná gwíh gá misyóm gá mɨ́ná nó, Nzyɛ̌m ópɛʼ bíbaa bí ébébe nyé á niʼe mɨná gá bí, le epubo mɨ́ná gâ, le epɛʼ mɨ́ná gá mebyaʼ gá mɨ́ná mɨ́mɛ̂h. Nye ósâ nó ó, ebě, nye ó tîtyěl mʉr jálá le ebúʼlɔɔ nyá.

¹⁰Mɨ́ná lɛ́ɛ́ gá ó, mɨná bé apǎ sâ gá syóm nó, nó ó, mɨná lɛ́ɛ́ gá ó, nye ó mʉr bibɛr. Lwǐb yé, yé abe kwá gá nyɨ́ná.