Read Koonzime 1 Yʉánɛs 2 Bible Online

1 Yʉánɛs 2 - Koonzime bible

1 Yʉánɛs 2

¹Bwán bâm, mě cɛmá bɨ́n bisá bîʼ ó, bɨ̌n nkʉ̂ gwâʼ ékǎ sâ mísyóm. Sâ gwár, yé ká pyâl yɨ́ɛ ó, mʉr, nyɨ́ sâ syóm nó, gʉ́ŋáá gá ó, mɨná gá bé e mʉr nkɔ̌m kwá mé Nzyɛ̌m: Yésʉs-Krîst, mʉr dí tîtyěl nyá.

²Ebě, Yésʉs-Krîst, nye ó mʉr á búra e misyóm gá míná lɨ́ esú lé éleʼě Nzyɛ̌m ɨ́ nkpaa nyé nyá. Abě njɨ myaá gá míná, myé omér. Nye á dwe twiʼ ó, lɨ́ esú é bʉ̂r ó sí yɨ́yɛ̂h.

³Mɨ́ná báʼlé gá metié mé Nzyɛ̌m nó, syɛ́ɛla yaá, yé óbe ó dweʼle dí eboʼlo ó, mɨná bɨ́ gʉ́a gá nye yɨ́.

⁴Mʉr dí elɛ́ɛ ó: «Me lɨ́ egʉ́ǎ Nzyɛ̌m,» nyɨɛ yɨ́ɛ abaʼle métié mé nyá, nye ó mʉr bibɛr. Otyeetye, wé abe ɨ́ nye tʉ́ŋlʉ̌.

⁵Nó ó, mʉr dí ebaʼle métwɨ́ɨ́ mé nyá, kpɛ̌l mé Nzyɛ̌m, yé ó, ɨ́ nye ntinɨ̂ e ntinɨ̂. Ɨ́ mbi waá ó mɨ́ná dí egʉ́a gá ó, mɨná bé ɨ́ nye yɨ́.

⁶Mʉr dí elɛ́ɛ ó, nye ɨ́ mpúhlá e Nzyɛ̌m nyá, jala ó, le edû kʉ̌ tyen mé Yésʉs.

⁷Bʉr ó kpɛ̌l bâm, ntʉ édwán lé étié mé dí ecɛma bɨ́n lɨ̂. Yé ó etié e myâ bɨ́n á boo bi, duho ɨ́ menyɛ̌l lɨ́. Etié e myâ laá, lé ó lwǐb bɨ́n á boo jóʼo yɨ́.

⁸Dǎm jóʼo nó, lé yɨ́ɛ ó edwán lé étié mé dí ecɛma bɨ́n lɨ́. Yé lɨ́ enyɨ̂n ó, lê tyeetye ó, ɨ́ Yésʉs-Krîst tʉ́ŋlʉ̌, le kwá nyɨ́n ntémé. Edúrʉ́ʉ́, lé mû ó lɨ́ esɔ́a. Njʉl, wé mû ó lɨ́ epǎn myɛ́n mpâ.

⁹Mʉr dí elɛ́ɛ ó, nye ɨ́ myɛ́n tʉ́ŋlʉ̌, nyɨɛ yɨ́ɛ lɨ́ enwim mɨ́ɔɔ́ wé nyá, nye dína ó lɨ́ edúrʉ́ʉ́, pyâl ɨ́ jɔʼ yɨ̂.

¹⁰Nó ó, mʉr waá dí ekpɛl mɨ́ɔɔ́ wé nyá ó dí ɨ́ myɛ́n tʉ́ŋlʉ̌. Nye ágbâ ébɔ̌ʼ lé óbɨma mɨ́ɔɔ́ wé ɨ́ léme ó, nye sâʼ ebébe lɨ́.

¹¹Sâ gwár, mʉr waá dí enwim mɨ́ɔɔ́ wé nyá, nye dína ó, lɨ́ edúrʉ́ʉ́. Nye ntémé dína ó lɨ́ entíma. Nyé abá gʉ́ǎ nko nyé dí etô le entíma yɨ́, ebě, edúrʉ́ʉ́, lɨ́ liŋ nyé ántím.

¹²Bwán bâm, mě cɛmá bɨ́n ó, ebě, Nzyɛ̌m, nyɨ́ pɛʼ bíbaa bí ébébe nyé á niʼe bín ɨ́ lɔ̌b mísyóm mín bí. Nye á sâ nó ó, ɨ́ nzɨ̌ mé Yésʉs-Krîst.

¹³Osɔ́ŋ, mě cɛmá bɨ́n ó, ebě, bɨ̌n bé lɨ́ egʉ́a mʉ̂r á boo be, duho ɨ́ menyɛ̌l nyá. Mě cɛmá bɨ́n, biloʼo ó, ebě, bɨ̌n bɨ́ ntaǎ Sátan ɨ́ nkul. Ontwǒm, mě cɛmá bɨ́n ó, ebě, bɨ̌n bɨ́ gʉ́ǎ Nzyɛ̌m Sɔ́ŋ.

¹⁴Osɔ́ŋ, mě cɛmá bɨ́n ó, ebě, bɨ̌n bɨ́ gʉ́a mʉ̂r á boo be, kʉ́ e sí apǎ bě kuhá nyá. Biloʼo, mě cɛmá bɨ́n ó, ebě, bɨ̌n bé e nkul. Lwǐb mé Nzyɛ̌m, yé lɨ́ edi ɨ́ milémé mín. Bɨ̌n ntémé, bɨ̌n bɨ́ ntaǎ Sátan.

¹⁵Ayɨ́ kpɛl gá sí yɨ̂, nkʉ̂ bisâ bi dí tɨ̂ʼ bí. Mʉ̂r kpɛ́l sí yɨ̂ʼ nó, lɛ́ɛ́, kpɛ̌l mé Nzyɛ̌m Sɔ́ŋ, yé abá be ɨ́ nye.

¹⁶Bisá bíbyɛ̂h bi dí egúmo e sí yɨ̂ʼ bí, bisá bíbɨ́bla bi bʉ̂r dí egwɨ̂m bí, byaá míh mɔ́ɔ́ dí egwɨ̂m bí, bisá bé dí esâ jáálé ɨ́ lɔ̌b wɔ́ɔ́ bí, bisâ byaá bíbyɛ̂h, byé aduho kwá mé Nzyɛ̌m Sɔ́ŋ. Byé duho ó, ɨ́ sí yɨ̂.

¹⁷Sí yɨ̂, le bisá bíbyɛ̂h bʉ̂r dí egwɨ̂m tɨ̂ʼ bí, byé lɨlaa ó laŋáa. Nó ó, mʉr dí esâ sá Nzyɛ̌m á tɨ́e yɨ́ nyá, nyě tíʼé ó, njʉ̌m dǐ e njʉ̌m dǐ.

¹⁸Bwán bâm, esúʼlá é sí yɨ̂ʼ mû ó ɨ́ nérénére. Bɨ̌n bé á si boo jóʼo ó, Ntɨ̂m e mbɨn mé Krîst, nye ɨ́ jala le enze. Ɨ́ báánâ, ontɨ̂m le obɨn mé Krîst, bé mû ó, sí buo. Nó ó mɨ́ná dí egʉ́a gá ó, yɨ́ kumo lɨ́ esúʼlá é sí yɨ̂ʼ yɨ́.

¹⁹Bʉr baá, bé á si duho ɨ́ sɔ́má gá yɨ́ná. Bé á bé abe yɨ́ɛ bɨ́ɔɔ́ gá bɨ́ná. Yé bé bé á be ó bʉr ó sɔ́má gá yɨ́ná nó, mpa mɨná gá le onɔ́ɔ́, bé dína ó tɨ̂, kumo mûh. Tó kœb ó, yé á jala ó, bé tôʼ, yé nkʉ̂ nyɨ̂n ɨ́ kpɛŋlɛm ó, abe e mʉr sɔ́má yɔ́ɔ́ á be ɨ́ nkɔ̌m gá nyɨ́ná.

²⁰Ɨ́ wɨ́n pâʼ, Mʉr mé Nzyɛ̌m dí tí nyá á si lœm bɨ̌n, lɨ́ entɨh bɨ́n Sísǐm mé Nzyɛ̌m. Bɨ̌n bɨ́bɛ̂h, bɨ̌n bé lɨ́ egʉ́a ótyeetye.

²¹Mé acɛma bɨ́n ebě bɨ̌n bé lɨ́ ejéʼe ótyeetye. Mě cɛmá bɨ́n ó, ebě, bɨ̌n bɨ́ gʉ́a wê. Bɨ̌n ntémé bé lɨ́ egʉ́a ó, sâ bíbɛr, yé abe e nkul eduho lɨ́ otyeetye.

²²Nzé dí ányâ-bibɛr? Nye ó mʉr dí elɛ́ɛ ó, Yésʉs, nyé abe Mʉ̂r Nzyɛ̌m á lœm múló mé jwɨ́ɨ nyá. Mʉr Dɔm mé Yésʉs, nye ó mʉr nyɨnyɛ̂h dí ekɛ́lǎ Nzyɛ̌m Sɔ́ŋ le Nzyɛ̌m Mwân nyá.

²³Mʉr dí ekɛ́la ó, Yésʉs, nyé abe Mwân mé Nzyɛ̌m nyá, nyé agúmo e Nzyɛ̌m Sɔ́ŋ. Tó kœb ó, waá dí elɛ́ɛ ó, Yésʉs, nye ó Mwân mé Nzyɛ̌m nyá, Nzyɛ̌m Sɔ́ŋ le Nzyɛ̌m Mwân, bé ó ɨ́ nkɔ̌m nyé.

²⁴Gwá símsa gá mpáŋla bɨ́n á jóʼo, duho ɨ́ menyɛ̌l nyɨ́. Mpáŋla bɨ́n á jóʼo, duho ɨ́ menyɛ̌l nyɨ́, ódi bɨ́n ɨ́ miléme nó, bɨ̌n bé ódi ntémé ó, ɨ́ mpúhlá nyɨ́n e Nzyɛ̌m Mwân, bé e Nzyɛ̌m Sɔ́ŋ bɨ́bɛ̂h.

²⁵Nó ó, nkɛ̌ʼ Nzyɛ̌m Sɔ́ŋ mʉr tɨ̂ʼ á dwe mɨná gá nyɨ́, nye ó nyɨ̂: twǐʼ njʉ̌m dǐ.

²⁶Mě cɛmá bɨ́n bisá bîʼ ó, dumo e bʉr o dí esáa édímle bɨ́n bá.

²⁷Ɨ́ wɨ́n pâʼ, bɨ̌n bé á si bi Sísǐm, waá Nzyɛ̌m á lœm bɨ̌n wǎ wɨ́. Bɨ̌n e Sísǐm mé Nzyɛ̌m waá ó mû. Sɨ́ǎ yaá ó bɨ́n dí, abe lɨ́ ekǎ jɨ lɛ̂ʼla yɨ́. Nzyɛ̌m á ntɨh bɨ̌n Sísǐm wé ó, nye díʼee lɛ̂ʼla wɨ́n ɨ́ milɔ̌b mímyɛ̂h. Sísǐm mé Nzyɛ̌m, nye ntémé, nye ó sísǐm mé Nzyɛ̌m mpâ. Nyě lɛ́ɛ́ ó, otyeetye; nyé alɛ́ɛ bíbɛr. Mpʉ nyé dí elɛ̂ʼle bɨ́n yɨ́, diʼee gá ɨ́ mpúhlá e nye.

²⁸Nó ó, bwán bâm, diʼee gá ɨ́ mpúhlá e Krîst, mbi dí ó, jɔʼ nyé óbáʼǎ nyɨ̂n yɨ́, mɨná nkʉ̂ nʉa gá pîm ɨ́ búʼó. Mɨná nkʉ̂ be gá asɔ́ma ɨ́ míh mé, ɨ́ jɔʼ nyé óbáʼǎ nze yɨ́.

²⁹Bɨ̌n bé lɨ́ egʉ́a ó, Krîst, nye ó tîtyěl mʉr. Bɨ̌n bé ɨ́ jala le egʉ́a ntémé ó, mʉr nyɨnyɛ̂h dí esɨsâ bísyɛ́ɛla bimpâ nyá, nyɨ́ byɛ̂l e nzɨ̌ nkul mé Nzyɛ̌m.