Read Koonzime 1 Yʉánɛs 5 Bible Online

1 Yʉánɛs 5 - Koonzime bible

1 Yʉánɛs 5

¹Mʉr nyɨnyɛ̂h dí ebúʼla ó, Yésʉs, nye ó Mʉ̌r Nzyɛ̌m á lœm múló mé jwɨ́ɨ nyá, nyɨ́ byɛ̂l e nzɨ̌ nkul mé Nzyɛ̌m. Mʉr nyɨnyɛ̂h dí ekpɛl sɔ́ŋ nyá, nye lɨ́ ekpɛl ntémé mwân wé.

²Mpʉ mɨ́ná dí egʉ́a gá ó, mɨná bé ɨ́ kpɛl gá bwán mé Nzyɛ̌m yɨ́ ó yɨ̂: ɨ́ jɔʼ mɨ́ná dí ekpɛl gá Nzyɛ̌m, le ebaʼle métié mé yɨ́.

³Mpʉ mʉ̂r jálá le elɛ̂ʼlě Nzyɛ̌m kpɛ̌l yɨ́ ó yɨ̂: ebaʼle métié mé. Metié mé, mé abuú dile yɨ́ɛ lɨ́ ebaʼle,

⁴ebě, mʉr nyɨnyɛ̂h dí mbyɛ́á ɨ́ nzɨ̌ nkul mé Nzyɛ̌m nyá, nye lɨ́ entaǎ bɨ́blǎ sí yɨ̂. Nkul nyé dí e né, nyaá dí esâ ó, nye búlaa le onkɔ́ɔ́ nyɨ́, nye ó nyɨ̂: búʼó gá yɨ́ná.

⁵Nzé dí e nkul entaǎ bɨ́blǎ sí yɨ̂? Yé ó njɨ waá dí ebúʼla ó, Yésʉs ó dí Mwân mé Nzyɛ̌m nyá.

⁶Yésʉs-Krîst, nye ó mʉr á duŋɔɔ e medíbé, báʼǎ duŋɔɔ e metié lɨ́ eswie ɨ́ kolôs nyá. Nye á bé anzě duŋɔɔ̌ njɨ e medíbé mé omér. Ndubó wé, wé á be ó e medíbé ndu e metié. Sísǐm mé Nzyɛ̌m ó dí eboʼlo ɨ́ lɔ̌b ndubó wé. Nyě boʼló nó ó, ebě, nyě le otyeetye.

⁷Tó kœb ó, bisâ bi dí eboʼlo ɨ́ lɔ̌b Mwân mé Nzyɛ̌m bí, byé ó bilɛ̂l:

⁸Sísǐm mé Nzyɛ̌m, ndubó médíbé, ndu e ndubó métié. Oboʼlo olɛ̂l ónɨ̌, bé ó twíí.

⁹Mɨná bé lɨ́ ekam gá ɨ́ jɔʼ bʉ̂r dí eboʼlǒ lɔ̌b yɨ́. Tó kœb ó, mboʼlá mé Nzyɛ̌m, wé ɨ́ jala le edweŋɔɔ̌ dúu, laa waá bʉ̂r dí esâ wɨ́, ebě, wé ó mboʼlá Nzyɛ̌m mʉr tɨ̂ʼ á boʼlo, dumo e Mwân wé wɨ́.

¹⁰Mʉr dí edyɛ̂ʼwo e Mwân mé Nzyɛ̌m nyá ó dí ejóʼǒ mboʼlá waá ɨ́ lémé wé tʉ́ŋlʉ̌. Mʉr dí abûʼlǎ Nzyɛ̌m nyá, nyɨ́ swêʼ Nzyɛ̌m Sɔ́ŋ ó, nye ó mʉr bibɛr, ebě, nyé akam ébûʼlǎ mboʼlá Nzyɛ̌m á boʼlo, dumo e Mwân wé wɨ́.

¹¹Mboʼlá mé Nzyɛ̌m waá, wé ó wɨ̂: Nzyɛ̌m á be ɨ́ dwe mɨ́ná gá twǐʼ njʉ̌m dǐ. Twiʼ yaá, yé di ó, ɨ́ Mwân wé.

¹²Mʉr dí ɨ́ mpúhlá e Nzyɛ̌m Mwân nyá, nyě e twǐʼ njʉ̌m dǐ. Mʉr dí adi ɨ́ mpúhlá e Mwân mé Nzyɛ̌m nyá, nyé abe e twiʼ yaá.

¹³Milɔ̌b mê cɛmá mî, me cɛmá myé ó, bɨ̌n bɨɛ, bʉr o dí edyɛ̂ʼwo e Mwân mé Nzyɛ̌m bá. Me cɛmá bɨ́n myǎ ó, bɨ̌n gʉ́ŋaa ó, bɨ̌n mû ó e twǐʼ njʉ̌m dǐ.

¹⁴Pyálá mɨ́ná ngá pyâl gá ɨ́ mpǒm mé Nzyɛ̌m wɨ́, wé óbe ó, mpûʼla, nyé osí lóŋlo mílémé gá míná. Mɨná bɨ́ gʉ́a gá ó, mɨ́ná jɨ́ʼlá gá e né, le edû mítíʼá mí lémé wé nó, nye ójóʼo mínjɨʼla gá míná myaá mbɨ̂mbɨá.

¹⁵Mɨ́ná gʉ́á gá ó, nye lɨ́ ejóʼo mɨ́ná gá mbɨ̂mbɨá nó, mɨná bé ógʉ́a gá ntémé ó, nye ódwe mɨ́ná gá sá mɨ́ná ngá gwâm gá nye yɨ́, yé damá be yáǎ sɔ̂ʼ.

¹⁶Mʉ̂r sí bee mɨ́ɔɔ́ wé lɨ́ esâ syóm, syóm waá, abe waá dí etyen nyé lɨ́ eswie wɨ́ nó, nye jɨ̂ʼlaa e Nzyɛ̌m. Nzyɛ̌m ókʉ́ tíʼ mɨ́ɔɔ́ wé. Yé e nyɔm ó, ɨ́ páʼ mɨ́ɔɔ́ dí sí sâ mbǐ syóm dí abe lɨ́ etyen mʉ̂r lɨ́ eswie wɨ́ nyá. (Sâ gwár, gúú mbǐ syóm, wé yɨ́ɛ ó tɨ̂: waá dí etyen mʉ̂r lɨ́ eswie wɨ́. Mé alɛ́ɛ ó, bɨ̌n jɨ̂ʼlaa e Nzyɛ̌m lɨ́ esú é mbi syɛ̂l misyóm waá.)

¹⁷Bisyɛ́ɛla bi dí egbah métié bí, bíbyɛ̂h, byé ó misyóm. Yé ntémé, yé e misyóm mi dí atyen mʉ̂r lɨ́ eswie mí.

¹⁸Mɨná bé lɨ́ egʉ́a gá ó, mʉr nyɨnyɛ̂h mû mbyɛ́lá ɨ́ mpóʼo mé Nzyɛ̌m nyá, nyé akǎ tô dóló le esâ mísyóm. Mwân Nzyɛ̌m á byâ nyá, nye lɨ́ ekamle e mbi mʉ̂r waá. Ebe nó, Sátan, nyé abe e nkul esâ nyé ebébe.

¹⁹Mɨná bé lɨ́ egʉ́a gá ó, mɨná gá bé ó, bwán mé Nzyɛ̌m. Bʉr ó sí yɨ̂ʼ yɨ́yɛ̂h bɨ́ɛ, bé lɨ́ ejaʼra e mpêl mé Sátan.

²⁰Mɨná bé lɨ́ egʉ́a gá ntémé ó, Mwân mé Nzyɛ̌m á si nze. Nye nzě gbâ mɨ́ná gá pɨʼ ɨ́ miléme ó, mɨná gʉ́ŋaa gá Nzyɛ̌m, mʉr dí le otyeetye nyá. Mɨná di gá ó, ɨ́ mpúhlá gá nyɨ́ná e mʉr dí le otyeetye waá nyá. Mʉr waá, nye ó Mwân wé, Yésʉs-Krîst. Nye ó dí Nzyɛ̌m mpâ. Nye ntémé ó dí Etín é Twǐʼ njʉ̌m dǐ.

²¹Bwán bâm, kánwáá gâ, ó bɨ̌n cɛ́raa e bikpɛʼkpɛ̂ʼ bí ónzyɛ̌m.