Read Koonzime 2 Yʉánɛs 1 Bible Online

2 Yʉánɛs 1 - Koonzime bible

2 Yʉánɛs 1

¹Yé ó mɛm, tyɛ̂b esôʼ ɨ́ Mbɛ̌r-Nzyɛ̌m. Me lɨ́ ecɛmǎ dimé mʉ́má Nzyɛ̌m á twâr nyá, bé e bwán bé. Me lɨ́ ekpɛl bɨ́n lɨ́ otyeetye. Ntʉ mé omér dí ekpɛl bɨ́n. Yé ntémé, yé ó bɨ̌h e baá bɨ́bɛ̂h dí egʉ́a ótyeetye bá.

²Mě cɛma bɨ́n mekaná mâʼ ó, lɨ́ esú ó, me pâʼlaa otyeetye o dí ɨ́ mɨná gá tʉ́ŋlʉ̌ wɨ́. Wé ódi ɨ́ mɨná gá ó, melú mé mpóʼo mɨ́mɛ̂h.

³Metyɛʼ me mpóm, le njɨ́ʼá nkóó le mepyɛbla, byé díʼee e mɨná gâ, duho e Nzyɛ̌m Sɔ́ŋ, bé e Yésʉs-Krîst, Mwân mé Nzyɛ̌m Sɔ́ŋ ɨ́ nzɨ̌ otyeetye wɔ́ɔ́ ti e kpɛ̌l yɔ́ɔ́.

⁴Me á si bu jóʼo membɨa ɨ́ jɔʼ mé á jóʼo ó, bwán bô, bé lɨ́ edû kʉ̌ tyen lɨ́ otyeetye tʉ́ŋlʉ̌, lɨ́ edû mpʉ̌ Nzyɛ̌m Sɔ́ŋ á tyêl mɨná gá etié yɨ́.

⁵Nó, ɨ́ báánâ, ntʉ édwán lé étié mé dí ecɛma bɨ́n lɨ̂. Yé ó etié e myâ bɨ́n á boo bi, duho ɨ́ menyɛ̌l lɨ́. Dimé mʉ́má nyâ, mě jɨʼlá e bɨ̌n ó, mɨná kpɛ́laa gá páʼ gá nyɨ́ná!

⁶Mpʉ mʉ̂r jálá le elɛ̂ʼlě kpɛ̌l yɨ́ ó yɨ̂: mɨná bâʼlaa metié mé. Nó ó, etié laá, lé ó laá bɨ́n á jóʼo, duho ɨ́ menyɛ̌l lɨ́. Nzyɛ̌m á tyêl bɨ̌n lǎ ó, lɨ́ esú ó, bɨ̌n dúʼoo kʉ̌ tyen waá.

⁷Ebě, bibɨ́bla bí ólɛ̂ʼla, byé mû ó sí buo ɨ́ sí yɨ́yɛ̂h, lɨ́ etô le edímle bʉ̂r. Byé akpɛl ékam ó, Yésʉs-Krîst á nze ɨ́ sí yɨ̂ʼ ó e nyʉ̂l mʉr mpâ. Mʉr kɛ́lá búʼó gá yɨ́ná nyá, nye ó ndímla bʉr le ntɨ̂m e mbɨn mé Yésʉs-Krîst.

⁸Bɨ̌n e báʼ gá bɨ̌n bʉr o tɨ̂. Abîr gá ó, bɨ̌n dímlaa sá mɨ́ná bé á boo séa gá lɨ́ esú lé yɨ́. Sáŋáá gá ó, bɨ̌n bíʼee myɛ́na maá ɨ́ ntʉʉʉ́.

⁹Nyʉ́ʉ́ mʉ̂r nyɛɛ́ jɨ̂ʼ lɛ́ʼlá mé Krîst, ɨ́ jɨ̂ʼ jɨ̂ʼ, kǎ líʼě lɛ́ʼlá waá, ntaa, tó púma dóló e gúú swîh nó, nyé atíʼe ɨ́ mpúhlá e Nzyɛ̌m. Waá dí ejɨ̂ʼ lɛ́ʼlá waá, alíʼe wé nyá, nyɨ́haá ó dí ɨ́ mpúhlá e Sɔ́ŋ, ti e Mwân bɨ́bɛ̂h.

¹⁰Ebe nó, mʉ̂r swáhwá nze, adwe bʉ̂r lɛ́ʼlá ngwár waá nó, mʉ̌r sá anʉa nyé ɨ́ mimbɛ̌r mín tʉ́ŋlʉ̌. Abára gá e né ntémé.

¹¹Ebě, mʉ̌r bárá e né nyá, nye lɨ́ enʉa ntœ́b ɨ́ bisyɛ́ɛla bí ébébe mʉ̂r waá dí esâ bí.

¹²Me ɨ́ buo bísá bí élɛ́ɛ bɨ́n. Nó ó, mɨ́ tíʼe ɨ́ lémé wâm ó, me ácɛma bɨ́n byǎ lɨ́ epéb ndu e medíbé mé lwâb. Mě bûʼlá ó, me ónze kwá nyɨ́n, mé olwib e bɨ̌n, mɨná nkʉ̂ beela gá mempǒm, mbi dí ó, sʉhʉʉ gá yɨ́ná, yé díʼee ntinɨ̂ e ntinɨ̂ wɨ́.

¹³Bwán mé mɨ́ɔɔ́ gǒ, bʉr ó Nzyɛ̌m á twâr bá, bé ntémé bé lɨ́ esoho gô.