Read Koonzime 3 Yʉánɛs 1 Bible Online

3 Yʉánɛs 1 - Koonzime bible

3 Yʉánɛs 1

¹Yé ó mɛm, tyɛ̂b esôʼ ɨ́ Mbɛ̌r-Nzyɛ̌m. Me lɨ́ esoho gó, Gáywis, mʉr dí ɨ́ buú kpɛlɔɔ nyá. Me lɨ́ ekpɛl gó lɨ́ otyeetye.

²Mbɨambɨa só kpɛ̌l wǎm, me lɨ́ ejɨʼla e Nzyɛ̌m ó, go bûʼwaa ɨ́ mipáʼ mí twiʼ bípúno e bidwehé, jwɨʼ gwár mpʉ gó dí mbɨ̂mbɨá ɨ́ nkǒ páʼ sísǐm gô yɨ́.

³Me á si bu jóʼo membɨa ɨ́ jɔʼ bɨ́ɔɔ́ gá bɨ́ná, bé á pyâl yɨ́. Bé á boʼlo ɨ́ páʼ gô ó, go lɨ́ ekʉ́ gwá baʼle ótyeetye, le edû ntémé kʉ̌ tyen ótyeetye.

⁴Mé apǎ jóʼo yʉ́ʉ́ sɔ̂ʼ embɨa mbi mé dí ejóʼo ɨ́ jɔʼ bé dí elɛ́ɛ ó, bwán bâm, bé lɨ́ etíʼe lɨ́ otyeetye yɨ́.

⁵Mbɨambɨa mɨ́ɔɔ́ wǎm, go lɨ́ ekʉ́ sâ méjóʼo ɨ́ jɔʼ gó dí ebaʼle bɨ́ɔɔ́ bô yɨ́, damá be ó, bê go ó ojwóo.

⁶Bé á si boʼlo ɨ́ míh mé bʉ̂r ó Mbɛ̌r-Nzyɛ̌m mpʉ gó á cwɨ́a e bé yɨ́. Gbáʼ nkûl lɨ́ esúʼo bé ɨ́ tyen yɔ́ɔ́ mpʉ ósyɛ̂l o mésâ mé Nzyɛ̌m jálá le esusúʼɔɔ yɨ́.

⁷Bé mû ó sí sulo ɨ́ nzɨ̌ syɛ́ɛ́ mé Krîst. Bé séá syɛ́ɛ́ yaá ntémé ó, anyémle óhááden, ó bé súʼaa bê.

⁸Mɨná gá bɨɛ jálá le ekɛm gá mbi bʉ̂r waá ó, mɨná gá le onɔ́ɔ́ bɨ́bɛ̂h, bé nʉ́aa ntœ̌b ɨ́ syɛ́ɛ́ bé dí eséǎ Nzyɛ̌m lɨ́ esú lé ótyeetye yɨ́.

⁹Me á si cɛma Mbɛ̌r-Nzyɛ̌m mekaná. Sâ gwár, Diotrɛ́fes, mʉr dí egwɨ̂m édi njwɨ́ɨ wɨ́n nyá, nyé akpɛl ésâ bɨ́h mejóʼo.

¹⁰Ɨ́ tɨ̂, mé óbáʼǎ nze nó, me óláa nyé bibaa bí ébébe, le elɛ́ɛ̌ syɛ́ɛla ébébe yɨ́yɛ̂h nyé á pa sâ yɨ́. Nye lɨ́ elɛ́ɛ bíbébebébe bílwǐb ɨ́ lɔ̌b wɨ́h. Abě njɨ bím yaá. Nye lɨ́ ebene énʉa bɨ́ɔɔ́ gá bɨ́ná dí epyâl bɨ́n bá. Nó ó, bʉr o b'á tíʼe ɨ́ myɔ́ɔ́ mílémé ó, bé baʼle ó ojwóo baá bá, nyɨɛ, nye lɨ́ ekamle bé lɨ́ enʉa bê, lɨ́ egwá sâ ó, nye sôʼ bé ɨ́ Mbɛ̌r-Nzyɛ̌m, pyêl bé kʉ̌l.

¹¹Mbɨambɨa só wǎm, ayɨ́ baŋǎ sá dí ɨ́ bébe yɨ́, njɨ yaá dí ɨ́ mbɨa yɨ́. Mʉr dí esâ bísyɛ́ɛla bi mpâm nyá, duho ó kwá mé Nzyɛ̌m. Syɛ̂l ebébe nyɨɛ, nyé apǎ beě Nzyɛ̌m.

¹²Bʉr bɨ́bɛ̂h, bé lɨ́ eboʼlo, dumo e Demétrios ó, nyɨ́ gwá sâ. Otyeetye wé mʉr tɨ̂, ndu e mboʼlá bɨ́h bɨɛ dí eboʼlo wɨ́, byé ó dí eboʼlo ɨ́ lɔ̌b wé. Go lɨ́ egʉ́a ó, mboʼlá wɨ́h, wé ó tyeetye.

¹³Me bé ɨ́ buo bísá bí élɛ́ɛ bɨ́n. Sâ gwár, mé akpɛl ó, me tílaa bɨ̌n byǎ le medíbé mé lwâb ndu le esǎ.

¹⁴Mě bûʼlá ó, me mû ó kúno enzě bee gô. Mɨná bé ólwibla, le ebeela mémpǒm. Nzyɛ̌m gbâʼ go mepyɛbla ɨ́ léme. Osó bô dí wâʼ bá, bé lɨ́ esoho gô. Sohaa mé osó gá bɨ́ná, lɨ́ etwóolo bé míe.