Read Koonzime Yʉ̂d 1 Bible Online

Yʉ̂d 1 - Koonzime bible

Yʉ̂d 1

¹Yé ó mɛm Yʉ̂d, syɛ̂l mesâ mé Yésʉs-Krîst, mɨ́ɔɔ́ mé Jacques ó dí ecɛma bɨ́n mekaná mâ. Mě cɛmá ó, bɨ̌n bʉr ó Nzyɛ̌m Sɔ́ŋ á kpɛl, baá nyé á jébe le ebaʼle mbɨ̂mbɨá ɨ́ nzɨ̌ mé Yésʉs-Krîst bá.

²Njɨ́ʼá nkóó, le mepyɛbla, ti e kpɛ̌l, byé díʼee e bɨ̌n ɨ́ ntʉʉʉ́.

³Bʉr ó kpɛ̌l bâm, léme, wé á nyɛɛ be me ɨ́ báná báná ó, me tílaa bɨ̌n lɔ̌b swîh: mpʉ̌ twǐʼ njʉ̌m dǐ e njʉ̌m dǐ dí jwɨʼ gwár lɨ́ esú gá lɨ́ná yɨ́. Me nzě kǎ bee ó, me ó lɨ́ bi ó, me tílaa bɨ̌n ó, bɨ̌n lwímlaa dɔm. Lwímláá gá lé, lɨ́ ekamle e búʼó gá yɨ́ná Nzyɛ̌m á boo ntɨh bʉr bé yɨ́.

⁴Bʉ́ʉ́ bʉ̂r, bɨ́ nî ɨ́ sɔ́má yɨ́n ɨ́ myaaa, bɨ̌n l'agʉ́a. Mekaná mé dí edwe bé mebě, le ekab bé bintɨ́ʼá má, mɨ́ boó cɛmɔɔ. Bɨ́ɛ bé ó minjéʼe-Nzyɛ̌m. Bé jaá gwɨ̂m ó, njɨ edirǎ nyɔm e mpam mé Nzyɛ̌m gá wɨ́ná, bé nkʉ̂ sâ bímolá nzam le ekomo. Bé ntémé, bé lɨ́ ekɛ́lǎ Yésʉs-Krîst. Nye omér ó dí Tyɛ̂b esôʼ le Tî gá wɨ́ná.

⁵Yê tyeetye ó, bɨ̌n bɨ́ boó gʉ́ǎ lɔ̌b waá wɨ́wɛ̂h. Damá jóʼo nó, me páa símsa bɨ́n yɨ́ɛ lɔ̌b wɨ̂: Dâ Nzyɛ̌m ó b'á pɛʼ bʉr o b'Ɨ́zraɛ̂l ɨ́ sí Egɨ̂ptɛn. Píe tɨ̂, nye nzě kǎ jʉ̂ baá bɨ́bɛ̂h bé á bɨbene lɨ́ edyɛ̂ʼwo e né bá.

⁶Símsáá gá ntémé beéngeles o b'á be akpɛl édi ɨ́ mecwɨ́ɨ́ mɔ́ɔ́ bá. Bé á si kpɛ́ɛ bidǐ bimpâ byɔ́ɔ́, kǎ tó gbáŋɔɔ ɨ́ mpǐl. Nzyɛ̌m á si gbâ bé lɨ́ edúrʉ́ʉ́ tʉ́ŋlʉ̌, bé mû mikɛ́ʼá. Okuluu bɔ́ɔ́, bé ódi ó, kɔ́m ti e kɔ́m, atiɔɔtiɔɔ. Tɨ̂ʼ ó beéngeles baá dí ebónǒ tíʼá mílɔ̌b épíhe yɨ́.

⁷Símsáá gá ntémé bʉr ó Sodôm, e Gómɔr ti e bʉr o b'á di ɨ́ bwá bínkana byé á be ɨ́ mepʉ́la mɔ́ɔ́ bá. Bʉr baá, bé á si bɛ́ma bé bʉr o tɨ̂ʼ lɨ́ esâ bímolá. Bé á si syɛŋa bijoó e mbi mʉ̂r bé dí abe lɨ́ ekœb ɨ́ joó wɨ́. Nó ó, bé á si ka bi bintɨ́ʼá ɨ́ siʼe dí edúǒ kɔ́m ti e kɔ́m yɨ́. Nzyɛ̌m á sâ bé syɛ́ɛla yaá ó, lɨ́ elɛ̂ʼle bʉ̂r bɨ́bɛ̂h mveʼle.

⁸Damá jóʼo nó, bʉr o dí edumo e lɔ̌b wɨ̂ʼ bá, bé ó nó: pɨʼ milémé myɔ́ɔ́, nyé ajɨma ɨ́ jô. Bé lɨ́ elœʼ ményʉ́l mɔ́ɔ́, le epyêh jwɨ́ɨ́ mé Nzyɛ̌m le entuhlo bééngeles dí e kûm bá.

⁹Tó kœb ó, njwɨ́ɨ beéngeles Michel mʉr tɨ̂ʼ á bé antuhlo sɔ́ŋ meleme, mʉr bé e nɔ́ɔ́ á pa pére mekǎn, lɨ́ edǐ gʉ́ǎ mpʉ̌ múú mé Moyɨ̂z, wé á jala le edebe yɨ́ nyá. Ɨ́ jɔ̌ʼ Michel á dwe sɔ́ŋ meleme mebě yɨ́, nye á bé antuhlo nyê. Nye á jaa lɛ́ɛ ó: «Dâ Nzyɛ̌m, nye ntɨ́ʼɨɨ go!»

¹⁰Bʉr baá bɨ́ɛ ntuhlo ó, sá yɨ́yɛ̂h bé dí agʉ́a yɨ́. Yaá bé dí egʉ́a yɨ́ yɨ́ɛ, yé lɨ́ edímle bê. Sá ngwɨ́á yɔ́ɔ́ yaá, yé antaǎ bím ótír ó dwǐʼ dí egʉ́a bísɔ̂ʼ yɨ́.

¹¹Nkoó, nye ó e bʉr baá! Ebě, bɨ́ dû nzɨ́ Kayɨ̂n á kar nyɨ́. Bé á si dîm, lɨ́ edû nzɨ́ mikóo mé Balâm, ebě, bé á gwɨ̂m ó myɛ́na. Bé á ka to dwe ó mpʉ bʉ̂r ó Korê bé á dwe ɨ́ jɔʼ bé á gbɔba e Moyɨ̂z yɨ́.

¹²Jwɨʼ yɔ́ɔ́, yé lɨ́ entɨ̂ʼ ɨ́ páʼ wɨ́n. Bé buú ntɨ̂ʼ ó, ɨ́ jɔʼ bɨ́n le onɔ́ɔ́ dé méde ɨ́ Mbɛ̌r-Nzyɛ̌m yɨ́. Bé dɨ́dé ó, lɔ̂ʼwǎ lɔ́ʼwáa, ajóʼo bá sôn. Bé jaá gbɨgbâ méde ó, njɨ ɨ́ myɔ́ɔ́ mínum. Bé ó mpʉ médwíne me mpíé, pubó dí etíne, mpíé nyɨɛ akǎ nwɨ́ɨ má. Bé ntémé, bé ó mpʉ bílɨ́ bi dí abe lɨ́ egúmo mpúmó ɨ́ jɔ̌ʼ nkóno bí. Byé lɨ́ edwe nzɔ̂ʼ bá, ebě, byé lɨ́ emuna sí.

¹³Bé nwɨɨla ntémé ó e mbi óbóʼó ó mâŋ dí epyêl mégûl ɨ́ ntomo ntomo wɨ́. Bé lɨ́ esâ ébébe, ajóʼo bá sôn. Bé nwɨɨla ó, le ocwícwén o dí adû bítyé byɔ́ɔ́ bá. Sá tɨ̂ʼ ó Nzyɛ̌m dí ejaá bɨbaʼle bé bidiá byɔ́ɔ́ njɨ lɨ́ edúrʉ́ʉ́ e dí ɨ́ nkom nkom lɨ́ yɨ́. Edúrúú laá, lé ódidi nó ó, kɔ́m ti e kɔ́m.

¹⁴Énɔk á be ó ngwih ebaalé mé Ádam. Nye á si gwîh milɔ̌b mé Dâ Nzyɛ̌m, dumo e bʉr baá. Nye á lɛ́ɛ ó: «Paá jóʼo gâ: Tî gá wɨ́ná ónze ó e beéngeles bé dí tí bá, tâŋ mekám mé ótɔ́ɔ́sin,

¹⁵lɨ́ enzě tíʼe bʉ̂r bɨ́bɛ̂h milɔ̌b. Nye ólɛ̂ʼle mínjéʼe-Nzyɛ̌m mímyɛ̂h misyóm myɔ́ɔ́. Misyóm myaá, myé nyɨ́nyɨ́n ó, ɨ́ mpʉ bé dí esâ bísyɛ́ɛlǎ Nzyɛ̌m nyɨɛ dí ebene bí yɨ́. Nye ólɛ̂ʼle bé ntémé mpʉ mínjéʼe-Nzyɛ̌m dí esâ Nzyɛ̌m nkěh ɨ́ mbi mékǎn bé dí ecɨ nyé má.»

¹⁶Bʉr baá, bê ɨ́ jɔʼ yɨ́yɛ̂h ó, lɨ́ elwib ɨ́ bébe bébe dumo e Nzyɛ̌m. Bê ɨ́ jɔʼ yɨ́yɛ̂h ó, lɨ́ etítíne nkɔ̂b nyé dwídwé bé nyɨ́. Bé jaá dû ó, njɨ bigwɨ́má byɔ́ɔ́. Bé lɨ́ elwib bílwǐb bí jáálé. Bé lɨ́ edwáawo bʉ̂r mempǒm, bɨ́ɛ lɨ́ egʉ́a ó, bé e nkul edira wɔ́ɔ́ nyɔm tɨ̂.

¹⁷Bʉr ó kpɛ̌l bâm, símsáá gá mekǎn bʉ̂r o mílʉ́mlʉ́ mé Tî gá wɨ́ná Yésʉs-Krîst á lɛ́ɛ má.

¹⁸Bé á lɛ́ɛ bɨ̌n ó, mbi wɨ̂: «Ɨ́ melú mé ósûʼla má, yé óbe ó e bʉr ó kpêʼle ngá dû mpʉ bígwɨ́má byɔ́ɔ́ dí etíne bé yɨ́ bá. Bigwɨ́má byɔ́ɔ́, byé kʉ́ lɛ̂ʼle ó, bé lɨ́ ejéʼě Nzyɛ̌m.»

¹⁹Bɨ́haá, bé ó dí egbâ mpɔ́ʼá menkɔ̌m páʼ bʉr. Nkul le pɨʼ nyɔ́ɔ́, nye ó njɨ nyaá nyʉ̂l bipúno. Sísǐm mé Nzyɛ̌m, wé apǎ nî bé ɨ́ miléme.

²⁰Bɨ̌n bɨɛ, bʉr ó kpɛ̌l bâm, búʼó bɨ́n dí e yé, yaá dí tí yɨ́, nʉaa gá pîm ɨ́ búʼó yaá. Jɨjɨʼlaa gá ntémé e nzɨ̌ Sísǐm mé Nzyɛ̌m.

²¹Baʼlaa gá bicwiʼ bín, lɨ́ edi baá Nzyɛ̌m dí ekpɛl bá. Bɨ̌n e bónó móhó Tî gá wɨ́ná Yésʉs-Krîst ngá báʼǎ nze wɨ́. Nye ónze ó, nzě jɨ̂ʼ mɨ́ná gá nkoó. Bónáá gá nye. Nye ódi e bɨ̌n ó, tô tóʼ, tó pyâl pyáláa ɨ́ twǐʼ njʉ̌m dǐ.

²²Jɨ́ʼɨ́ɨ́ gá bʉr o dí le elíʼa bá nkoó.

²³Tiʼɨɨ gá baá mû sí lʉ́ŋa ɨ́ siʼe bá. Syɛbɨɨ gá bé ɨ́ siʼe yaá. Jɨ́ʼɨ́ɨ́ gá bʉr nkoó. Milémé mín jɨ́ʼɨɨ bé nkoó, lɨ́ ekɛ̂n bɨ́n dí ejóʼo ɨ́ bisyɛ́ɛla byɔ́ɔ́ lɨ́. Benaa gá syɛ́ɛla ébébe yɔ́ɔ́ yɨ́yɛ̂h, kumǒ kumáa e mikán bé á bubwâr ɨ́ menyʉ́l mɔ́ɔ́ mí, ebě, myé mû ó sí bil mpîr.

²⁴Kûm, mpwaʼ, nkul le jwɨ́ɨ, byé díʼee e mʉr dí e nkul ekamle e bɨ̌n ó, bɨ̌n sá atwe, waá ntémé dí e nkul etyêl bɨ́n ɨ́ míh mé, abe e sá ébébe nyé óboʼlo bɨ́n e tɨ̂, le bisʉhʉʉ ɨ́ buo buo nyá.

²⁵Nye omér ó dí Nzyɛ̌m. Kûm dwéŋɔɔ Nzyɛ̌m, dí Tiʼbʉr gá wɨ́ná nyá, ɨ́ nzɨ̌ mé Yésʉs-Krîst, Tî gá wɨ́ná, táare ɨ́ mimbú mí píhe, le ɨ́ báánâ, tó kumǒ kumáa ɨ́ twǐʼ njʉ̌m dǐ e njʉ̌m dǐ. Amɛn.