Read Koonzime Twóm 1 Bible Online

Twóm 1 - Koonzime bible

Twóm 1

¹Yésʉs-Krîst á si gwîh bisá Nzyɛ̌m á tɨ́e nye ó, nye lɛ̂ʼlaa osyɛ̂l o mésá bé, ó bé gʉ́ŋaa sá mû kúno epyâl bé yɨ́. Nye á gwîh byé ó, lɨ́ elómo éngeles wé kwá me, Yʉánɛs, syɛ̂l mesâ wé.

²Yʉánɛs waá, nye ó mboʼlo lɨ́ esú é sá yɨ́yɛ̂h nyé á bee yɨ́. Nyě boʼló ó, dumo e lɔ́ɔ́ mé Nzyɛ̌m, ti e twiʼ mé Yésʉs-Krîst.

³Metyɛʼ me mpóm, mé díʼee e waá dí eláa míngwíhá mílɔ̌b mi dí ɨ́ mekaná mâʼ mí nyá. Metyɛʼ me mpóm, mé díʼee ntémé e bʉr o dí ejóʼo le ebaʼle métwɨ́ɨ́ me dí tɨ̂ʼ má bá. Gʉ́ŋáá gá ó, sá nyé á bee yɨ́, yé mû ó kúno epyâl.

⁴Yé ó mɛm Yʉánɛs ó dí ecɛma bɨ́n mekaná mâʼ nyá, bʉr ó Mbɛ̌r-Nzyɛ̌m dí ɨ́ binkana nzaangbá bi dí ɨ́ sí Azía bí. Nzyɛ̌m sʉ́ʼoo bɨ̌n metyɛʼ me mpóm le egbâ mépyɛbla ɨ́ milémé mín. Mé díʼee e bɨ̌n, duho e waá á boo be nyá. Nye ntémé ó dína. Nye ntémé ónze. Mé díʼee e bɨ̌n ntémé, duho e misísǐm nzaangbá dí ɨ́ mpǒm mecwɨ́ɨ́ mé jwɨ́ɨ́ mé Nzyɛ̌m mí.

⁵Yésʉs-Krîst sʉ́ʼoo bɨ̌n metyɛʼ me mpóm, le egbâ mépyɛbla ɨ́ sɔ́má yɨ́n. Nye ó mboʼlo jálá le ebúʼlɔɔ nyá. Nye ó dí mwâ medwéʼe mé Nzyɛ̌m á pah, duho lɨ́ odwe nyá. Nye ó dí Njwɨ́ɨ mesí mé sí yɨ̂ʼ mɨ́mɛ̂h. Nye lɨ́ ekpɛl mɨ́ná gâ. Nyɨ́ sʉ métié mé sí, ntɔ̂ʼ pɛʼ bibaa bí ébébě Nzyɛ̌m á niʼe ɨ́ lɔ̌b mísyóm gá míná bí, ɨ́ nzɨ̌ ndwéá wé.

⁶Nye ó b'á liŋ mɨná gá bʉr o Mpóʼo nyé, le esâ ó, mɨná díʼee gá opara dí eséa e waá dí Nzyɛ̌m wé, waá dí ntémé Sɔ́ŋ wé nyá bá. Kûm e nkul, byé díʼee e né njʉ̌m dǐ e njʉ̌m dǐ. Amɛn.

⁷Paá bee gâ: nye lɨ́ enze ɨ́ dwiné. Bʉr bɨ́bɛ̂h, bé óbee nyê, damá be ó baá bé á lúmo nye ekʉá bá. Bʉr o bíkúl bí sí yɨ̂ʼ bíbyɛ̂h, bé ójɨ médwê le ekâm ékúhó lé. Eee! Amɛn!

⁸Dâ Nzyɛ̌m, nyě lɛ́ɛ́ ó: «Me ó dí waá esôʼ ndu e waá epíhe. Me waá á boo be, waá dína, ndu e waá ngá nze nyá. Me ó dí Nzyɛ̌m nkul nyɨnyɛ̂h.»

⁹Yé ó mɛm Yʉánɛs, mɨ́ɔɔ́ wɨ́n. Mɨná gá bé ɨ́ mpúhlá e Yésʉs ó, lɨ́ esia e mitúú mímpwár. Mɨná gá óbɛ̂h bé ɨ́ mpóʼo Yésʉs dí ejwɨ́ɨ yɨ́. Mɨná gá óbɛ̂h ó dí e bíhwó nyé dí egbâ bʉ̂r ɨ́ miléme nyɨ́. Bé á mɛ̂r me, pɨrɔɔ mé wâʼ ɨ́ tíhé dí ejébɔɔ «Pátmos» wɨ́ ó, ebě, lɔ́ɔ́ mé Nzyɛ̌m le milɔ̌b mé Yésʉs mé dí eboʼlo mí.

¹⁰Ɨ́ gúú móhó sábat, me á be ó, ɨ́ nkul Sísǐm mé Nzyɛ̌m. Nó ó mé á jóʼo twíí lɨ́ elwib ɨ́ koo wâm píhe, lɨ́ enwɨɨla e sébé. Nye á lwib ó kʉ́kʉ́.

¹¹Nye e me ó: «Sá gó mû lɨ́ ebee yɨ́, go e cɛ́má yé ɨ́ mekaná. Gó otyen mé ɨ́ bʉr ó Mbɛ̌r-Nzyɛ̌m dí ɨ́ binkana nzaangbá bi dí Éfɛsɔs, Smírna, Pɛ́rgamos, Teatîr, Sárdɛs, Filadɛ́lfia, ndu e Laodiséa bí.»

¹²Jɔʼ mé á dwira ó, mě dwɛ́ʼ ó mʉr á be lɨ́ elwib e me nyá yɨ́, nó ó mé á dwira, nzě bee bítyélátyéla méláma bí gʉ̂l nzaangbá.

¹³Témé bityélátyéla méláma byaá, me á si bee nyʉ́ʉ́ mʉ̂r á nwɨɨla e mwân mé mʉr nyá. Nye á bwâr ó, dur ɨ́ jaa jaa, pyâl ɨ́ mekʉ̌ sí. Nye á be ntémé ó e kaná gʉ̂l ɨ́ kuó tyeelá.

¹⁴Mpuo lʉ́ nyé, nye á be ó, ɨ́ pumo pumo mpʉ égul, ɨ́ pumo pumo mpʉ épɛ́m. Míh mé, mé á be ó mpʉ̌ njʉ̌l siʼe.

¹⁵Mekʉ̌ mé, mé á be ó, nyʉ̂l ɨ́ cʉʼ, mpʉ̌ nkóho mû sí gbáŋɔɔ ɨ́ duró lé ólûl yɨ́. Twíí nyé, nye á jwɨ̂ʼ ɨ́ megwǎl ó, ɨ́ mpʉ mésʉʼ méntíbé ɨ́ buo buo.

¹⁶Lɨ́ ekœ́h lé éjʉ́m lé, nye á be ó le ocwícwén nzaangbá. Nye ntémé e pasoŋ, njebá myoo mipáʼ mímbá. Pasoŋ waá, nye á duho nye ó, ɨ́ num. Mpǒm nyé, nye á pɨpan ó, ɨ́ keleb keleb, mpʉ̌ mbah dʉ́o dí epan témé móhó wɨ́.

¹⁷Jɔʼ mé á bee nye yɨ́, me kúrwo sí, píʼe mpóm ɨ́ bibwǎh ɨ́ mekʉ̌ mé, mpʉ̌ múu ɨ́ séhé. Nye ntɔ̂ʼ kɛ̌l mbó éjʉ́m wé ɨ́ nyʉ̂l nyǎm. Nye e me ó: «Akǎ jóʼo bʉ́á. Me ó dí mʉr esôʼ ndu e mʉr epíhe.

¹⁸Me ó waá dí kublakúbla nyá. Me á si dwe. Paá bee gâ: me mû ó, ɨ́ twǐʼ njʉ̌m dǐ! Me ó dí le osab o dí edib kwár odwe bá.

¹⁹Nó ó, cɛmaa bísá gó dí ebee bí. Cɛmaa bísá mû lɨ́ esyɛ́ɛ ndu e byaá ngá syɛ́ɛ bí.

²⁰Ocwícwén nzaangbá gó dí ebee lɨ́ ekœ́h lé éjʉ́m lâm bâʼ le bityélátyéla méláma bí gʉ̂l nzaangbá, sá dí elɛ́ɔɔ tɨ̂ʼ ɨ́ lwǐb ódîm yɨ́ ó yɨ̂: ocwícwén nzaangbá, bé ó beéngeles nzaangbá dí edwéele bʉ̂r ó Mbɛ̌r-Nzyɛ̌m dí ɨ́ binkana nzaangbá bá. Bityélátyéla méláma byaá bíɛ, byê mveʼle ó, bʉr ó Mbɛ̌r-Nzyɛ̌m dí ɨ́ binkana nzaangbá bá.»