Read Koonzime Twóm 10 Bible Online

Twóm 10 - Koonzime bible

Twóm 10

¹Píe tɨ̂, me nzě bee gúú njɨ́h éngeles á duho ɨ́ jʉ́o kʉ́, sulo sí wɨ́. Yé á bwâr ó, dwiné ɨ́ nyʉ̂l mpʉ̌ kán. Nkulyɛ̂n á be lɨ́ elyɛrǎ lʉ́ wé ɨ́ nká. Mpǒm nyé á pɨpan ó mpʉ dʉ́o. Mekʉ̌ mé, mé á be ó, ɨ́ mpʉ mínjʉl mí siʼe.

²Nye á be ó e mâ mekaná ɨ́ mbô. Mâ mekaná maá á be ó mbɔ́á, mʉr bɛ̌m láa. Nye á si tyêl kʉ̌ éjʉ́m wé témé mâŋ. Kʉ̌ émyɛ̌l, wɨ́ɛ, lɨ́ bibwǎh tín.

³Nye nzě bɨ̂n twíí kʉ́kʉ́. Twíí nyé, nye á jwɨjwɨ̂ʼ ó, ɨ́ mpʉ nyaá ngbampɨɨ ɨ́ jɔʼ wé dí emwóolo yɨ́. Jɔʼ nyé á lwib nó yɨ́, me ntɔ̂ʼ jóʼo míndum mi mpíé nzaangbá.

⁴Jɔʼ míndum mi mpíé myé á dumo nó yɨ́, me á si gwa cɛma sá myé á lɛ́ɛ yɨ́. Nó ó, me á si jóʼo nyʉ́ʉ́ twíí swîh lɨ́ eduho ɨ́ jʉ́o kʉ́. Nyɨ́haá lɨ́ elɛ́ɛ e me ó: «Solɨɨ̌ sá míndum mi mpíé mínɨ̌ lɛ́ɛ́ yɨ́. Acɛma yê.»

⁵Éngeles mé á bee lɨ́ etyɛ̂b wɨ̂ʼ kʉ̌ tín, wɨ̂ʼ kʉ̌ ɨ́ mâŋ nyá, á si bɨ̂n mbó éjʉ́m wé kʉ́.

⁶Nye nzě káale ɨ́ díé mé Nzyɛ̌m, ebě, nye ó dí e twǐʼ njʉ̌m dǐ nyá. Nye ó b'á kuho kʉ́ e sí, ndu e le ekomlo bísá bíbyɛ̂h bi dí tɨ̂ʼ tʉ́ŋlʉ̌ bí. Nye ntémé ó b'á komlo mâŋ, ndu e sá yɨ́yɛ̂h dí tʉ́ŋlʉ̌ mâŋ yɨ́. Éngeles waá, nye ntɔ̂ʼ túno ó: «Jɔʼ éngeles nzaangbá ólʉ́o sébé wé yɨ́, Nzyɛ̌m, nyé olóŋlo mítíʼá mí lémé wé nyé á gwîh ɨ́ lwǐb ódîm mí. Yé óbe ó mpʉ nyé á lɛ́ɛ ogwíha o mílɔ̌b dí eséa e né bá yɨ́. Bisyɛ́ɛla bé á gwîh bí, byé mû ó lɨ́ esyɛ́ɛ ɨ́ báánâ.»

⁸Twíí mé á jóʼo ɨ́ jʉ́o kʉ́ nyɨ́, á lɛ́ɛ e me ó: «Tó nʉa mékaná ɨ́ mbó éngeles, waá dí e gúú kʉ̌ ɨ́ mâŋ, gúú tín nyá. Nʉaa mékaná maá. Mé ó mbɔ́á.»

⁹Nó ó mé á mɔa, tô nko éngeles waá á be yɨ́. Nó ó mé á lɛ́ɛ e né ó: «Dwéʼ mé mâ kálǎr nɨ̌.» Nó nyé á baʼa lɛ́ɛ e me ó: «Nʉaa mékaná. Go e dê. Nye óbe gó ɨ́ num ó, ɨ́ sweh sweh mpʉ̌ kwan. Sâ gwár, ɨ́ jɔʼ gó ómine nyé yɨ́, nye óbe ɨ́ gwǐh ó, ɨ́ dwie dwie.»

¹⁰Me á si nʉa mekaná maá ɨ́ mbó mé éngeles, nzě de nyê. Nye á kʉ be ɨ́ num wâm ó, ɨ́ sweh sweh mpʉ̌ kwan. Tó kœb ó, ɨ́ jɔʼ mé á mine nye yɨ́, nye á be ɨ́ gwǐh ó, ɨ́ dwie dwie.

¹¹Nó ó bé á baʼa lɛ́ɛ e me ó: «Yé jɨ ó, go tôʼ dóló le egwîh mílɔ́ɔ́ Nzyɛ̌m á lɛ́ɛ mí, táare e bikûl bíbyɛ̂h, kala e bʉr o mésí mɨ́mɛ̂h, dumlo e bʉr o bílwǐb bíbyɛ̂h, bé le ojwɨ́ɨ́ bɔ́ɔ́.»