Read Koonzime Twóm 11 Bible Online

Twóm 11 - Koonzime bible

Twóm 11

¹Nó ó mé á dweŋɔɔ mâ lɨ́ bé á jwɨjwɨʼ bisɔ̂ʼ e tɨ̂ʼ nyá. Bé e me ó: «Gbɔlwaa sí. Go e tó jwɨ̌ʼ mpáh Nzyɛ̌m. Go e jwɨ́ʼ ntémé alatâr mindwéá. Go e láá ntémé bím bʉ̂r o dí edwě Nzyɛ̌m kûm tɨ̂ʼ bá.

²Go e bír ébɛhɛɛ. Sá ajwɨʼ lê, ebě, Nzyɛ̌m á pɛʼ lé ó, dwe bʉ̂r o dí abe óYúden bá. Mekʉ̌ mɔ́ɔ́, mé ónyǎl nkana dí tí yɨ́ ó, tâŋ ongɔn mekám ménâ le obá.

³Nó ó, me óntɨh bʉ́ʉ́ óboʼlo bâm obá. Bé ónzě lwib ɨ́ díé lâm. Bé ókʉ́ba mínkura. Bé ógwîh lɔ́ɔ́ wâm tâŋ melû tɔ́ɔ́sin e minter mimbá e mekám mésaman (1.260).»

⁴Oboʼlo obá baá, bé lɨ́ etyɛ̂b ó, ɨ́ mpǒm me Njwɨ́ɨ sí yɨ̂ʼ yɨ́yɛ̂h. Bé ó mpʉ bílɨ́ bí ólivier bibá ndu e bityélátyéla méláma bibá.

⁵Bʉ̂r o dɔ̂m bɔ́ɔ́ sí gwɨ̂m ó, gwɨ́mɨ́ɨ esâ bé ebébe nó, oboʼlo bâm, bé ójʉ̂ bé e siʼe yé óduho bé ɨ́ minum yɨ́. Nó ntémé ó, óntɨ̂m le obɨn bɔ́ɔ́, bé ódwe yɨ́.

⁶Jɔʼ bé dí egwîh mílɔ̌b yɨ́, bé e nkul ediblě jʉ́o ó, ompíé ayɨ́ kǎ nwɨ́ɨ. Bé ntémé, bé e nkul esâ ó, medíbé, mé líŋaa metié. Bé ntémé, bé e nkul entɨh bʉ̂r ó sí yɨ̂ʼ bɨ́bɛ̂h bibébebébe bísɔ̂ʼ mimbi mimbi, ɨ́ jɔʼ yɨ́yɛ̂h bé kpɛ̂l yɨ́.

⁷Nó ɨ́ jɔʼ bé ósîl édwe bʉ̂r mboʼlá wɔ́ɔ́ yɨ́, tír menyan óduho ɨ́ bɨ́ dí sí ɨ́ kœ́ʼlɛ́ yɨ́. Tír waá ólwímla e bê. Nye ónʉa bê, jʉ̂.

⁸Nó ó, mimúú myɔ́ɔ́, myé ódyéʼɔɔ ó, témé ebɛhɛɛ ɨ́ kpɛŋlɛm ɨ́ nkana ɨ́ bwaʼ bwaʼ yaá. Ɨ́ nkana yaá ó Tî wɔ́ɔ́ á jʉ́ŋɔɔ ɨ́ jɔʼ bé á bomlo nye e binzâŋ, le ebɨ̂n nyé ɨ́ kolôs kʉ́ yɨ́. Díé é nkana yaá, bé jébé lé ɨ́ lwǐb ódîm ó: «Sodôm», nkʉ̂ «Egɨ̂ptɛn.»

⁹Bʉr ɨ́ buo buo, bé ónzě siŋle mímúú myɔ́ɔ́ ó, tâŋ melú mélɛ̂l e pêh. Bé óbe ó bʉr o bíkúl bíbyɛ̂h, e mempóʼo mɨ́mɛ̂h. Bé óbe ó bʉr o bílwǐb bíbyɛ̂h, le eduho ɨ́ mesí mɨ́mɛ̂h. Bé ákam ó, bé débaa ɨ́ mesoo.

¹⁰Bʉr ó sí yɨ̂ʼ bɨ́bɛ̂h, bé óbuú soho, ebě, bʉr obá baá, bé á si jʉ́ŋɔɔ. Bé ótyêl nzɔ́ɔ bisʉhʉʉ, ebě, ogwíha o mílɔ̌b obá baá, bé á si gwa ntɨ̂ʼ bʉr ó sí yɨ̂ʼ ɨ́ buo buo. Bʉr, bé ódweela bísɔ̂ʼ ɨ́ bisʉhʉʉ byɔ́ɔ́.

¹¹Nó ɨ́ jɔʼ mélú mélɛ̂l e pêh maá, mé á be, mé mû sí laa yɨ́, Nzyɛ̌m á si gúmlo ngúl twiʼ wé ɨ́ sɔ́má bʉ̂r obá baá. Ngúl wé nzě nî bé ɨ́ menyʉ̂l, bé ntɔ̂ʼ pah, tyɛ̂b mítîtyěl. Bʉr bɨ́bɛ̂h o b'á bee bé bá, bé ntɔ̂ʼ buú jóʼo bʉ́á.

¹²Jɔʼ bé á tyɛ̂b mitîtyěl yɨ́, bê nzě jóʼo twíí duho ɨ́ jʉ́o kʉ́, lɨ́ elɛ́ɛ e bé kʉ́kʉ́ ó: «Béráá gâ. Ntá gá kâʼ kʉ́.» Nó ó bé á nze bére kʉ́ ɨ́ dwiné tʉ́ŋlʉ̌, ontɨ̂m le obɨn bɔ́ɔ́ lɨ́ ebee.

¹³Sí, yé á si bu pɨ̂ʼla ɨ́ jɔʼ yaá. Nó ó, mimbɛ̌r mí nkana yaá, myé á si duma sí. Nkɔb mimbɛ̌r mpwár ɨ́ menkɔb kám, nye á si duma sí. Jɔʼ sí, yé á pɨ̂ʼla yɨ́, bʉr, bé á si dwe, tâŋ otɔ́ɔ́sin nzaangbá. Baá bé á ka lîʼ mikublakúbla bá, bé á si bu jóʼo bʉ́á. Bé ntɔ̂ʼ gúmlǒ Nzyɛ̌m dí ɨ́ jʉ́o kʉ́ nyá.

¹⁴Túú mbá, wɨ́ laa. Waá lɛ̂l mû ó kúno epyâl.

¹⁵Píe tɨ̂, éngeles nzaangbá á si lʉ́o sébé wé. Me ntɔ̂ʼ jóʼo métwíí ménɨ́nɨ́ɨ́, duho ɨ́ jʉ́o kʉ́. Mé ó: «Dâ Nzyɛ̌m wɨ́h, bé e mʉr nyé á lœm múló mé jwɨ́ɨ nyá, bé ó dí e jwɨ́ɨ ɨ́ páʼ bʉ̂r ó sí yɨ̂ʼ bɨ́bɛ̂h. Jwɨ́ɨ́ yé, yé ódǐ njʉ̌m dǐ e njʉ̌m dǐ.»

¹⁶Otɔ́má bʉ̂r mekám mébá le onâ bé á be mindîndǐl ɨ́ bidiá bí ójwɨ́ɨ ɨ́ míh mé Nzyɛ̌m bá, ntɔ̂ʼ búrwɔɔ sí, mempǒm mipíʼá ɨ́ bibwǎh, lɨ́ edweŋɔɔ nyé kûm.

¹⁷Bé ó: «Dâ Nzyɛ̌m, Nzyɛ̌m nkul nyɨnyɛ̂h, Go ó b'á boo be. Go ntémé ó dína. Bɨ̌h bé lɨ́ edwe gó nzyǒo ɨ́ lɔ̌b nkûl nɨ́nɨ́ɨ́ nyǒ, gó dí e né nyɨ́. Go ó dí njwɨ́ɨ.

¹⁸Bikûl bi dí agʉ́a gó bí, byé á si lɛ̂ʼle go nkpaa nyɔ́ɔ́. Nó ó, ɨ́ báánâ, yé mû ó jɔʼ gúa jálá le elɛ̂ʼle bé nkpaa yɨ́. Yé ntémé mû ó jɔʼ ékǎ tíʼe ódwe milɔ̌b yɨ́. Go ójána ósyɛ̂l o mésâ bô bɨ́bɛ̂h: le ogwíha o mílɔ̌b, le bʉr o dí egúmo e go bá, le bʉr bɨ́bɛ̂h o dí edwe díé lô kûm bá, damá jóʼo míndyêbndyéb mi bʉ̂r, nkʉ̂ ntɔ̂ʼ minjwɨ́ʼ mí bʉ̂r. Sâ gwár, bʉr o dí etíblě sí yɨ̂ʼ bá, go ósîl éjʉ̂ bé ɨ́ pé.»

¹⁹Jɔʼ bé á sil elwib nó yɨ́, mpáh Nzyɛ̌m ɨ́ jʉ́o kʉ́, nye á si diba. Nó ó, Mpɔra Sáá yé á be tɨ̂ʼ yɨ́, yé á si nyɨ̂n ɨ́ kpɛŋlɛm. Me á si bee mindweh ɨ́ keleb keleb, jóʼo métwíí, ndu e nkɛ̂l jʉ́o ɨ́ sɨŋgɨɨm. Sí nzě kubla. Metánaá ntémé, mê nzě gɔ́na le ekur ɨ́ buo buo.