Read Koonzime Twóm 12 Bible Online

Twóm 12 - Koonzime bible

Twóm 12

¹Píe tɨ̂, sá ékâm, yé á si pyâl ɨ́ jʉ́o kʉ́. Me á si bee mʉmá. Nye á bwâr ó dʉ́o mpʉ̌ kán wé. Álomó á be ó sí mebo mé. Lɨ́ ebɔmǎ lʉ́ wé ɨ́ nká, nye á be ó, le ocwícwén kám le obá, bɨ́ɛ lɨ́ edi tâŋ káráá dúu.

²Mʉmá waá á be ó le ebum. Nye á be ó lɨ́ ejaʼra e mǐn, lɨ́ edǐ byâ. Nó nyé á ka títíme yɨ́.

³Yʉ́ʉ́ sá ékâm, yé ntɔ̂ʼ nyɨ̂n ntémé ɨ́ jʉ́o kʉ́. Me á si bee myɔ́ɔ́ ɨ́ bwaʼ bwaʼ, wɨ́ɛ e nyʉ̂l kaá e kaá. Wé á be ó e milʉ̂ nzaangbá, ndu e bikáráá bí gʉ̂l ɨ́ milʉ́ myé, ndu e bintóo kám.

⁴Wé á si syɛ̂m kʉ̌n wé, píle ócwícwén le kʉ̌n wé waá. Ocwícwén baá ɨ́ buo buo, bé á si pílɔɔ ɨ́ kʉ̌n wé, jala e nkɔb mpwár ɨ́ menkɔb melɛ̂l. Wê nzě syɛŋ bê, guho bé kâʼ ɨ́ sí yɨ̂. Wé á tityɛ̂b ó, ɨ́ mpǒm me mʉ́má á be lɨ́ edǐ byâ nyá. Wé á bě e jwɨʼ ó, mʉ́má sí byâ mwân waá nɛ́ɛ: wé onʉa mwân waá, mine nyê.

⁵Mʉmá waá nzě kǎ byâ mwân, mâ mʉrʉ̂m. Le nyé á byâ nye, le ntɔ̂ʼ bé á nʉa nye, tóŋɔɔ e né ɨ́ míh mé Nzyɛ̌m, gúmó nyé dí ɨ́ mecwɨ́ɨ́ mé jwɨ́ɨ́ yé yɨ́. Mwân waá óbe ó njwɨ́ɨ̌ nɨ́nɨ́ɨ́ ngá pɨpála bíkúl bí sí yɨ̂ʼ bíbyɛ̂h e nkul jwɨ́ɨ ɨ́ lele lele mpʉ̌ súmǔ nkóho nyá.

⁶Nó ó, mʉmá nyɨɛ á si kpɛ́ɛ, tô ɨ́ lʉá, tó dǐ súm Nzyɛ̌m á boo komlo nye odiá yɨ́. Nzyɛ̌m ó b'á baʼle nye gʉ̂, lɨ́ edwe nyé mede. Nye á didi gʉ̂ʼ ó, tâŋ melû tɔ́ɔ́sin e minter mimbá e mekám mésaman (1.260).

⁷Nó ó dɔ̂m lé á nze bʉ̂l ɨ́ jʉ́o kʉ́. Michel, bé e beéngeles bé, bé á si lwímla e myɔ́ɔ́ waá. Nó ó, myɔ́ɔ́ waá ntémé, wé á si nʉa bé bééngeles, lwímlɔɔ e bê.

⁸Nó ó, Michel, bé e beéngeles bé, bé á si so myɔ́ɔ́ ɨ́ bwaʼ bwaʼ waá, bé e beéngeles bé bɨ́bɛ̂h ntɔ̂ʼ duho kʉ́, nkaŋa sí ɨ́ sɨŋ, ebě, bé á bé akǎ be e mediá ɨ́ jʉ́o kʉ́. Njʉ̌m nyʉ́a wé á boo be tɨ̂ʼ wɨ́, wé ó mʉr dí edímle bʉ̂r ó sí yɨ̂ʼ bɨ́bɛ̂h nyá. Bé lɨ́ ejébe nyʉ́a waá ó: «Sɔ́ŋ meleme», nkʉ̂ «Sátan».

¹⁰Píe tɨ̂, me á si jóʼo twíí ɨ́ jʉ́o kʉ́. Twíí nyaá á lɨlɛ́ɛ kʉ́kʉ́ ó: «Ɨ́ báánâ, Nzyɛ̌m, nyɨ́ kʉ́ tíʼ mɨ́ná gá mpǎŋ tíʼá! Nyɨ́ lɛ̂ʼle ó, nyě e nkul. Nye ó dí njwɨ́ɨ. Ɨ́ báánâ, mʉr nyé á lœm múló mé jwɨ́ɨ nyá, nyɨ́ lɛ̂ʼle ó, nye ó dí e nkul, ebě, bɨ́ so waá á nwâhle bɨ́ɔɔ́ gá bɨ́ná jɔʼ yɨ́yɛ̂h ɨ́ míh mé Nzyɛ̌m móhó e pum nyá. Bɨ́ guho nyé sí.

¹¹Bɨ́ɔɔ́ gá bɨ́ná ntémé, bɨ́ ntaa nyé ɨ́ nkul ɨ́ nzɨ̌ metié mé Mâ Nteme, ti e mboʼlá bé á boʼlo, dumo e Yésʉs wɨ́. Bé á bé alíʼa lɨ́ ebîr bícwiʼ byɔ́ɔ́. Bé á si jʉ́ŋɔɔ ɨ́ lɔ̌b mboʼlá wɔ́ɔ́ waá.

¹²Ebe nó, bɨ̌n, bʉr o dí ɨ́ jʉ́o bá, sohaa gâ. Nkoó, nye ó e sí ndu e mâŋ! Bé óbuú tíble bɨ́n, ebě, sɔ́ŋ meleme, nyɨ́ tô gʉ̂, nko bɨ́n dí yɨ́. Wé lɨ́ ebuú kpaa ébúʼ, ebě, nyɨ́ kǎ gʉ́a ó, jɔʼ yé, yɨ́ lîʼ njɨ bá tîtííǎ.»

¹³Nó ɨ́ jɔ̌ʼ njʉ̌m myɔ́ɔ́, wé á guhɔɔ kâʼ ɨ́ sí yɨ́, nó ó wé á taare etô le etíble mʉ́má á byâ mâ mʉrʉ̂m waá nyá.

¹⁴Bé ntɔ̂ʼ dwe mʉ́má waá mempabaá mebá mpʉ maá me mpéle ɨ́ bwaʼ bwaʼ. Nye á dweŋɔɔ mempabaá maá ó, nye píilɨɨ e mé, tô ɨ́ lʉá, tó dǐ súm Nzyɛ̌m óbaʼle nyé yɨ́. Nye á si to di gʉ̂ mimbú mílɛ̂l e pêh, lɨ́ eswǎb njʉ̌m nyʉ́ǎ nɨ̌.

¹⁵Nyʉ́a nzě pyêl médíbé ɨ́ buo buo ɨ́ num wé, yé mû mpʉ̌ mpǎŋ sʉ̌m díbé. Nye á sâ nó ó, medíbé maá, mé dúʼoo mʉmá waá nko nyé á tô yɨ́. Mé kœ́b nyé nɛ́ɛ: mé e jʉ́ nyê.

¹⁶Sâ gwár, sí, yé á si kɛm nye. Yé á si bɛ́ɛ num, ntɔ̂ʼ mině díbé yé á duduho ɨ́ nǔm myɔ́ɔ́ yɨ́.

¹⁷Jɔ̌ʼ myɔ́ɔ́ á bee nó yɨ́, wé ntɔ̂ʼ lɛ̂ʼle mʉ́má waá nkpaa nyé ɨ́ buo buo. Nó ó, wé ntɔ̂ʼ búla, tó sâ dɔ̂m e bwán mé mʉmá waá. Bwán bé baá, bé lɨ́ elóŋlo métié mé Nzyɛ̌m, le ebaʼle mílɔ́ɔ́ mé Yésʉs.