Read Koonzime Twóm 13 Bible Online

Twóm 13 - Koonzime bible

Twóm 13

¹Myɔ́ɔ́ waá ntɔ̂ʼ tó tyɛ̂b ɨ́ pɨ̌n mâŋ. Nó ó, me á si bee tír lɨ́ epâm ɨ́ medíbé mé mâŋ. Nye á be ó e milʉ̂ nzaangbá ndu e bintóo kám. Bikáráá bí dúu, byé á be ó mipɛná ɨ́ bintóó bíbyɛ̂h. Ɨ́ lʉ́ wɨ́wɛ̂h, bé á si cɛma yʉ́ʉ́ bɨ́bla díe, lé á sâ Nzyɛ̌m nkěh lɨ́.

²Tír waá á be ó mpʉ nkœ́œ. Nye á be ó tír metɔrʉ, mpʉ̌ ûrs. Num wé, wé á be ó mpʉ̌ nǔm ngbampɨɨ. Njʉ̌m myɔ́ɔ́, wé á si dwe tír waá nkul nyé, ndu e diá jwɨ́ɨ́ yé, ndu e nkul jwɨ́ɨ̌ nɨ́nɨ́ɨ́ nyé.

³Gúú lʉ̂ ɨ́ milʉ́ mí tír waá, wé á be ó e boʼo pɨ́ɨ́. Tó kœb ó pɨ́ɨ́ nyaá á si dwéele. Bʉr ó sí bɨ́bɛ̂h, bé á si kâm nye, nzě kǎ dudúŋɔɔ nyê.

⁴Bʉr bɨ́bɛ̂h, bé á si dwe njʉ̌m myɔ́ɔ́ kûm, ebě, wé ó b'á dwe tír waá jwɨ́ɨ́ yé. Bé ntémé, bé á be lɨ́ edwe tír waá nye mʉr tɨ̂ʼ kûm. Bé ó: «Nzé dí enwɨɨla e tír nyâ? Nzé ntémé dí e nkul elwímla e né, ntaa nyé ɨ́ dɔm?»

⁵Tír waá á si dweŋɔɔ nkul ó, nye dwêʼ nye mʉr tɨ̂ʼ mesʉ̂m le esâ Nzyɛ̌m nkěh. Nye á dweŋɔɔ nkul esâ nó ó, ongɔn mekám ménâ le obá.

⁶Nó nyé á ka nyɛl epyêh kuó mé Nzyɛ̌m, le díé lé, ndu e jʉ́o, gúmó Nzyɛ̌m dí edi yɨ́, ndu e bʉr bɨ́bɛ̂h o dí edi tɨ̂ʼ bá.

⁷Nye nzě dweŋɔɔ nkûl elwímla dɔ̂m e bʉr o mé Nzyɛ̌m le entaa bé ɨ́ nkul. Nye á dweŋɔɔ ntémé ó, nkul jwɨ́ɨ ɨ́ bʉr o bíkûl e biloo e mpum bʉ̂r, le bʉr o bílwǐb bíbyɛ̂h.

⁸Nó ó, bʉr ó sí yɨ̂ʼ bɨ́bɛ̂h, bé ódwe nyé kûm, pɛ̌ʼ njɨ baá Nzyɛ̌m á boo cɛma míé mɔ́ɔ́ ɨ́ mekaná mé twiʼ bá. Mekaná maá, mé á boo be cɛmá ó, táare ɨ́ jɔ̌ʼ kʉ́ e sí, byé á be apǎ bě kuhá yɨ́. Mé gúmó ó e Mâ Nteme bé á boo jʉ̂ nyá.

⁹«Mʉ̂r óbe e megwǎl mé éjóʼo nó, nye jóʼaa sá mé múo nzě lɛ́ɛ yɨ̂:

¹⁰Nzyɛ̌m, nyě lɛ́ɛ́ ó: Yé bé kɛl swîh, kɛl kɛl ó jálá le etô lɨ́ okómó nó, nye óbánǎ tô. Yé bé kɛl swîh, kɛl kɛl ó jálá le ejʉ́ŋɔɔ e pasoŋ nó, nye óbánǎ dwe nó.» (Wâʼ ɨ́ gúmó yɨ̂, yé lɛ́ʼlé ó, yé mbɨa ɨ́ páʼ bʉ̂r o dí egúmo e Nzyɛ̌m bá ó, bé díʼee ntémé e bíhwó. Bé dyéʼee koo e Nzyɛ̌m.)

¹¹Me nzě bee nyʉ́ʉ́ tír menyan swîh lɨ́ epâm ɨ́ bibwǎh. Nye á be ó e bintóó bíbá. Bintóó byé, byé á nwɨɨla ó e byaá bi Mâ Nteme. Nye á lwilwib ó, mpʉ̌ njʉ̌m myɔ́ɔ́.

¹²Nye á be ntémé ó e nkul mpʉ tír esôʼ. Nye á sɨséa syɛ́ɛ́ yé ó, ɨ́ mpǒm tír esôʼ waá. Nye ó b'á sâ ó, bʉr ó sí yɨ́yɛ̂h, bé dwêʼ tír esôʼ kûm. Tír waá ó b'á be e boʼo pɨ́ɨ́ ɨ́ lʉ̂, á bě sí dwéele nyɨ́.

¹³Nye nzě sâ bísyɛ́ɛla bí ékâm, le esâ ntémé ó, siʼe, yé dúhaa ɨ́ jʉ́o kʉ́, njʉl tɨ̂ʼ nzě buma ɨ́ sí yɨ̂, bʉr bɨ́bɛ̂h lɨ́ ebee.

¹⁴Ebě, nye á si dweŋɔɔ nkul esâ mésimá nó ɨ́ míh mé tír esôʼ waá. Nye á si bana dímle bʉr ó sí yɨ̂ʼ bɨ́bɛ̂h, lɨ́ elɛ́ɛ e bé ó, bé kpáʼaa mveʼle ngá nwɨɨla e tír esôʼ, waá á pa kparɔɔ e pasoŋ, adwe nyá.

¹⁵Tír waá á be ó sí dweʼɔɔ nkûl egúmlǒ ngúl wé ɨ́ kpɛʼkpɛ̂ʼ mveʼle yaá, ó yé lwíbɨɨ. Ndu e ntémé ó, yé jʉ́ʼoo bʉr bɨ́bɛ̂h á be adwe nye kûm bá.

¹⁶Nó nyé á lɛ́ɛ mekǎʼ me bʉ̂r bɨ́bɛ̂h ó, bé twɛ́laa bijwɨʼ byé lɨ́ koo ékœ̂h ɨ́ mbó éjʉ́m, nkʉ̂ ɨ́ mpǒm. Nye á lɛ́ɛ ó, táare e baántéʼenteʼe o bʉ̂r, kumo e minjɨ́h mí bʉ̂r, okúmá ti e mindyêbndyéb, bitúʼǎ le otî.

¹⁷Mʉr nyɨnyɛ̂h á be atwɛlɔɔ mpɔɔ́ nyaá nyá, á bé abe e nkul ekǎ bwâm, nkʉ̂ bɛ́ma yʉ́ʉ́ sɔ̂ʼ pátele. Mpɔɔ́ nyaá, nye ó bikaŋá métɔ́ɔ. Nye lɨ́ elɛ̂ʼle díé é tír esôʼ.

¹⁸Wâʼ ɨ́ gúmó yɨ̂, yé jɨ ó, mʉr díʼee e mpǎŋ ocwóó. Twóó mʉr nye omér ó ngá gʉ́ǎ sá bíkaŋá byaá dí elɛ̂ʼle yɨ́. Byé kʉ́ lɛ̂ʼle ó, mbi tír waá dí yɨ́. Byé ó dí: minter mísaman, e mekám mésaman, le ɨ́ saman (666).