Read Koonzime Twóm 14 Bible Online

Twóm 14 - Koonzime bible

Twóm 14

¹Mé ká bee nɛ́ɛ: bee Mâ Nteme lɨ́ etyɛ̂b lɨ́ ecwɨ́ʼ bé lɨ́ ejébe ó, Síon lɨ́. Yé á be ntémé ó e bʉr otɔ́ɔ́sin nter le mekám ménâ le onâ (144.000). Bé á boo cɛmɔɔ ó, díé mé Yésʉs, ndu e díé mé Nzyɛ̌m Sɔ́ŋ ɨ́ mempǒm.

²Nó ó, me á si jóʼo twíí lɨ́ eduho ɨ́ jʉ́o kʉ́. Nye á soʼo ó mpʉ ésʉ̌ʼ dí ebuú soʼo ɨ́ díbé nɨ́nɨ́ɨ́ lɨ́ yɨ́. Yé á jwɨ̂ʼ ntémé ó mpʉ nkɛ̂l jʉ́o ɨ́ sɨŋgɨɨm. Twíí nyaá á be ɨ́ mbɨa lɨ́ ejóʼo. Nye á jwɨ̂ʼ ɨ́ megwǎl ó, mpʉ̌ sá lɛ́ɛ́, bé á be ó lɨ́ ebomo mímpêr.

³Bipuŋa bi bʉ̂r byaá, byé á tityɛ̂b ó, ɨ́ mpǒm diá jwɨ́ɨ́ mé Nzyɛ̌m, le otɔ́má bʉ̂r, ndu e mikublakúbla mí ótír minâ. Bé á dyɛɛ ó, edwán é jɨ̂m. Jɨ̂m yaá, nyʉ́ʉ́ mʉ̂r swîh, nyé abe e nkul ejɨ̂ʼ yê, pɛ̌ʼ njɨ bipuŋa bi bʉ̂r byaá, bʉr otɔ́ɔ́sin nter le otɔ́ɔ́sin mekám ménâ le onâ (144.000). Nzyɛ̌m á si dwih bé ɨ́ mpila ébébe, pɛʼ bé ɨ́ sí yɨ̂.

⁴Bɨ́haá, bé á bé akúna e bʉbá, nkʉ̂ lœʼ ményʉ́l mɔ́ɔ́. Bé dína ó bibíŋ. Bé á be lɨ́ edû Mâ Nteme gúmó yɨ́yɛ̂h nyé á tʉtô yɨ́. Bé ó baá Nzyɛ̌m á dwih ɨ́ mpila ébébe bá. Bɨ́ɛ ó dí tôm á twámɔɔ Nzyɛ̌m, bé e Mâ Nteme wɨ́.

⁵Lwǐb míkóo, yé apyâl ɨ́ minum myɔ́ɔ́. Bé ntémé, abe e sá ébébe bé á gwa boʼlo bé e tɨ̂.

⁶Nó ó, me á si bee nyʉ́ʉ́ éngeles lɨ́ epiilɨ lɨ́ ejwoo kʉ́. Nye á nze ó, lɨ́ enzě túnǒ Mbɨambɨa Lɔ́ɔ. Wé ó lɔ́ɔ dí acéneceně kɔ́m ti e kɔ́m wɨ́. Nye ótúno wé ó, kwá bikûl bíbyɛ̂h, odil ó sí bɨ́bɛ̂h, ɨ́ mesí mɨ́mɛ̂h, e mempóʼo mɨ́mɛ̂h, le ɨ́ bilwǐb bíbyɛ̂h.

⁷Éngeles waá á lwilwib e bé ó e twíí kʉ́kʉ́. Nye ó: «Jwááwáá gá Nzyɛ̌m. Gúmláá gá nye, ebě, jɔ̌ʼ tíʼá mílɔ̌b mû ó sí pyâl. Bɨʼɨɨ gá mebóó mɨ́n sí ɨ́ waá á kuho kʉ́ le sí nyá. Waá á komlo mâŋ ti e mentíbé nyá, dwéʼ gá nye kûm.»

⁸Nó ó nyʉ́ʉ́ éngeles á si pyâl píe waá esôʼ. Nyɨɛ á tutúno ó: «Babilɔ̂n, nkanǎ nɨ́nɨ́ɨ́, yɨ́ duma! Yɨ́ duma ɨ́ kum! Yé á si myam ebébe lé ɨ́ bikúl bíbyɛ̂h. Bé ntɔ̂ʼ gbâ ményʉ̂l lɨ́ esâ bímolá e né, ntaa sʉ́ŋa.»

⁹Nyʉ́ʉ́ éngeles lɛ̂l nzě pyâl. Nye á si lwib kʉ́kʉ́. Nye e né ó: «Bʉ̂r sí gúmlo tír waá, nkʉ̂ kpɛʼkpɛ̂ʼ mveʼle yé, le ecɛma bíjwɨʼ byé ɨ́ mempǒm mɔ́ɔ́, nkʉ̂ ɨ́ koo ékœ̂h nó,

¹⁰bé ójaʼra e nkpaa mé Nzyɛ̌m. Nzyɛ̌m óntɨ̂ʼ bé, lɨ́ edû mpʉ nkpáa nyé dí yɨ́. Bé ójaʼra e nkpaa nyé nyaá mpʉ bʉ̂r dí ejaʼra e menyoʼ ɨ́ jɔʼ bé dí akɛl bá médíbé tɨ̂ʼ yɨ́. Nye óntɨ̂ʼ bʉ̂r baá ó e siʼe ndu e pir. Bé óntɨ́ʼɔɔ ó, ɨ́ míh bééngeles dí tí bá ndu e Mâ Nteme.

¹¹Nó ó, siʼe dí edîʼ bʉ̂r baá ɨ́ jɔʼ yɨ́yɛ̂h yɨ́, dúluu tɨ̂, yé óbɨbére kʉ́ kɔ́m ti e kɔ́m, ebě, bé á si dwe tír kûm, bé e kpɛʼkpɛ̂ʼ mveʼle yé. Bé á si cɛma díé lé ɨ́ menyʉ́l mɔ́ɔ́. Nó ó bé ákǎ be e gúmó égbála. Bé ójɨjaʼra e siʼe ó, móhó e pum.»

¹²(Wâʼ ɨ́ gúmó yɨ̂, yé lɛ́ʼlé ó, bʉr o dí egúmo e Nzyɛ̌m bá, yé mbɨa ɨ́ páʼ wɔ́ɔ́ ó, bé díʼee e bíhwó. Bé ɨ́ jala ntémé le ebaʼle métié mé Nzyɛ̌m, le edyêʼ koo e Yésʉs.)

¹³Me nzě jóʼo twíí lɨ́ eduho ɨ́ jʉ́o kʉ́. Nye e me ó: «Cɛmáa: “Táare ɨ́ jɔʼ yɨ̂, mʉ̂r á pa dyɛ̂ʼwo e Yésʉs nyá, sí dwe nó, lɛ́ɛ́, nye óswɨɨ métyɛʼ me mpóm.”» Sísǐm mé Nzyɛ̌m lɛ́ɛ́ ó: «Yé ó nó. Bé páa kǎ gbalǎ syɛ́ɛ́. Sá bé á sɨséa ɨ́ jɔʼ bé á títíʼe yɨ́, nyɔm tɨ̂ʼ, wé ónyɨ̂n ɨ́ gúmó bé dí edi yɨ́.»

¹⁴Mé ká bee nɛ́ɛ: beě dwiné ɨ́ pumo pumo. Nyʉ́ʉ́ mʉ̂r, nye á be ó ndîndǐl ɨ́ dwiné kʉ́, nwɨɨla e Mwân mé Mʉr. Nye á be ó e káráá dúu gʉ̂l ɨ́ lʉ̂, ti e pa ɨ́ mbô ɨ́ bábla bábla.

¹⁵Nó ó, nyʉ́ʉ́ éngeles swîh á si duho mpáh Nzyɛ̌m, tô kʉ̌l. Nye á lwib e waá á be ɨ́ dwiné kʉ́ nyá e twíí kʉ́kʉ́ ó: «Nʉaa pâ gǒ. Tóʼ ɨ́ pemé dí kâʼ sí yɨ̂. Go e tó kpɛm méde mɨ́mɛ̂h ɨ́ pé, ebě, swɨɨ ékpɛm mû ó sí pyâl.»

¹⁶Nó ó éngeles esôʼ waá á nze nʉa pa wé, nzě kpɛm méde mé á be ɨ́ pemé má.

¹⁷Me á si baʼa bee nyʉ́ʉ́ éngeles ɨ́ jʉ́o kʉ́. Nye á duho ntémé ó, ɨ́ mpáh Nzyɛ̌m. Nye ntémé e wé pâ ɨ́ mbô, ɨ́ bábla bábla.

¹⁸Nyʉ́ʉ́ éngeles nzě pyâl, duho lɨ́ empǒm lé alatâr mindwéá. Nyɨ́haá ó b'á be e nkul etirǎ siʼe tɨ̂. Nye nzě jébe nyʉ́ʉ́ éngeles á mɨmɛ̂r pa ɨ́ bábla bábla ɨ́ mbô nyá. Nye á lwib e né e twíí kʉ́kʉ́ ó: «Nʉaǎ njebá pâ gǒ. Tóʼ ɨ́ pemé dí ɨ́ sí yɨ́. Tó pɛʼ mpúmó gʉ̂, ebě, nye mû ó sí tɨ̂.»

¹⁹Nó ó éngeles waá á si nʉa pa wé, ntɔ̂ʼ tô sí, tó pɛʼ mpúmó, sʉ mpúmó nyaá nyɨnyɛ̂h ɨ́ pǎr. Pǎr waá, wé ó, ɨ́ nkanǎ kʉ̌l. Jɔʼ bé á mɨmân mpumó nyaá yɨ́, medíbé, mé á pyâl tɨ̂ʼ má, mé á be ó metié e metié. Mé á be lɨ́ egʉ̂ mpʉ̌ ngwǎŋ. Sʉ̌m ngwǎŋ waá, wé á si jaa tô, tó kumo ókíloméra minter milɛ̂l. Edíme lé, lé á be ó, bɛ̌m be méra ngwár e pêh. Ɨ́ mbi waá ó ósyɛ̂l o mísyóm, bé ójaʼra e nkpaa mé Nzyɛ̌m ɨ́ buo buo yɨ́.