Read Koonzime Twóm 15 Bible Online

Twóm 15 - Koonzime bible

Twóm 15

¹Píe tɨ̂, me á si bee yʉ́ʉ́ sá ékâm nɨ́nɨ́ɨ́ ɨ́ jʉ́o. Me á bee ó, beéngeles nzaangbá lɨ́ ebi bíntɨ́ʼá nzaangbá ɨ́ mebô. Bintɨ́ʼá byaá, byé ódweŋɔɔ ó, ɨ́ melú mé épíhe, ebě, Nzyɛ̌m ósîl ékpaa ébúʼ lé ó, lɨ́ edwe bʉ̂r byǎ.

²Me ntɔ̂ʼ beě sá yé á nwɨɨla e mâŋ yɨ́. Mâŋ maá, mé á be ó, sɛ́á e lá ndu e siʼe, mpúhlá. Me ntɔ̂ʼ bee ntémé binkɔ́ɔ́ bí bʉ̂r. Byé ó b'á ntaa tír menyan waá, bé e kpɛʼkpɛ̂ʼ mveʼle yé. Byé á ntaa ntémé ó, ɨ́ lɔ̌b acɛmɔɔ bíkaŋá métɔ́ɔ byé ɨ́ menyʉ̂l. Bikaŋá byaá ó dí elɛ̂ʼle díé é tír waá. Bé á bɨbe lɨ́ ebomo mímpêr Nzyɛ̌m á pa dwe bé mí,

³dyɛɔɔ̌ jɨ́m mé Moyɨ̂z, syɛ̂l mesâ mé Nzyɛ̌m. Jɨ̂m yaá ntémé, yé ó yaá me Mâ Nteme. Bé á dyɛɛ ó: «Dâ Nzyɛ̌m, Nzyɛ̌m nkul nyɨnyɛ̂h, bisyɛ́ɛla byô, byé ɨ́ buú bwaʼ. Byé ntémé, byé ó, bisá bí ékâm. Menzɨ̌ mô mɨ́mɛ̂h, mé ó otîtyěl le otyeetye. Go ntémé, go ó njwɨ́ɨ bikûl bíbyɛ̂h.

⁴Dâ ɛ̌, mʉr dí akpɛ́ɛ gó nyá, nye nzé? Nzé dí ebene édwe gó kûm? Go omér ó dí mʉr dí tí nyá. Bʉr o bíkúl bíbyɛ̂h, bé ódua ɨ́ bigúmó byɔ́ɔ́, nzeŋɔɔ kwá nyǒ. Bé óbɨʼ mébóó mɔ́ɔ́ sí lɨ́ edwe gó kûm. Ebě, bɨ́ bee ɨ́ sʉ́lʉ́lʉ́ ó, gó e nkam ɨ́ bisyɛ́ɛla gó dí esâ bʉ̂r bí.»

⁵Mé ká bee nɛ́ɛ: bee mpáh Nzyɛ̌m ɨ́ jʉ́o kʉ́, nye mû mběʼ. Nye á be ó lɛrá e kán, mbɛ̌r kán sáá.

⁶Beéngeles ntɔ̂ʼ duho mpáh Nzyɛ̌m. (Bé ó b'á ŋmɛ̂h bʉr ó sí e bintɨ́ʼá nzaangbá byaá.) Bé á bwâr ó, mikán ɨ́ pumo pumo, ɨ́ ntyɛ̌n ntɨ̂ ntyɛ̌n. Bé á be ntémé ó, le okaná ó gʉ̂l ɨ́ mikuó mityeelá.

⁷Gúú kublakúbla tír, wé á si dwe beéngeles baá mempéle nzaangbá, maá mé gʉ̂l. Mempéle maá, mé á be ó milwɨ́ŋlá, lɨ́ elɛ̂ʼlě mpʉ̌ lémé mé Nzyɛ̌m, mʉr dí e twǐʼ njʉ̌m dǐ nyá, wé á lóno ɨ́ nkpaa yɨ́.

⁸Mpáh Nzyɛ̌m, nye á be ó lwɨ́ŋlá e dúluu, dúluu yaá lɨ́ elɛ̂ʼle méntyɛnwa ndu e nkul mé Nzyɛ̌m. Abe e mʉr á dûhwo enî tɨ̂ʼ ɨ́ lɔ̌b dúluu yaá. Nó bé á si bóno, tó pyâl ɨ́ jɔʼ bʉ̂r ó sí bé á sia e bintɨ́ʼá nzaangbá bíbyɛ̂h yɨ́.