Read Koonzime Twóm 16 Bible Online

Twóm 16 - Koonzime bible

Twóm 16

¹Píe tɨ̂, me á si jóʼo twíí lɨ́ eduho mpáh Nzyɛ̌m. Twíí nyaá, nye á lɛ́ɛ e beéngeles nzaangbá kʉ́kʉ́ ó: «Nʉaa gá mempélé mɨ́n, maá me dí milwɨ́ŋlá e nkpaa mé Nzyɛ̌m má. Tó sʉ gá mé sí.»

²Nó ó, waá esôʼ á nze tô, tó sʉ ébúʼ mé Nzyɛ̌m sí. Bibɨ́bla mépɨ́ɨ́ ɨ́ kpaa kpaa, byé ntɔ̂ʼ pyâl bʉ̂r ɨ́ menyʉ̂l. Mepɨ́ɨ́, mé á bu pipyâl ó, baá bé á cɛma bijwɨʼ mé tír waá bá. Bé ó b'á dwe kpɛʼkpɛ̂ʼ mveʼle yé kûm.

³Píe tɨ̂, éngeles mbá nzě tó sʉ ébúʼ mé Nzyɛ̌m ɨ́ mâŋ. Medíbé mé mâŋ, mé ntɔ̂ʼ liŋa bíbúʼ métié mpʉ métié mé múu. Bím bísɔ̂ʼ byé á be mikublakúbla ɨ́ mâŋ bí, byé ntɔ̂ʼ síe lɨ́ edwe.

⁴Jwɨʼ gwár yaá, éngeles lɛ̂l, nzě tó sʉ ébúʼ mé Nzyɛ̌m ɨ́ misʉm méntíbé ndu e menó. Medíbé maá mɨ́mɛ̂h, mé ntɔ̂ʼ liŋa métié.

⁵Me nzě jóʼo éngeles dí ejwɨ́ɨ méntíbé ndu e mâŋ nyá. Nye e né ó: «Dâ ɛ̌, go á boo be ó tɨ̂. Go ntémé ó dína. Go ó mʉr dí tí nyá. Go ó tîtyěl mʉr, ebě, go á si tíʼe milɔ̌b myɔ́ɔ́ mbǐ tíʼá wɨ̂,

⁶ebě, bé á si kʉ jʉ̂ bʉr o gó á twâr bá, bé le ogwíha o mílɔ̌b bô. Metié mɔ́ɔ́, mɨ́ buú swɨɨ sí. Nó ntémé ó gó á lɛ́ɛ ojʉ̂l o bʉ̂r baá ó, bé bɛ́blaa metié yɨ́. Sá dí ejala e bé yɨ́ ó nɨ̌!»

⁷Me nzě jóʼo nyʉ́ʉ́ twíí á duho lɨ́ alatâr mindwéá nyɨ́. Nye e né ó: «Yé ó nó, Dâ Nzyɛ̌m, Nzyɛ̌m nkul nyɨnyɛ̂h, gǒ le otyeetye. Go lɨ́ etíʼe mílɔ̌b lɨ́ otîtyěl.»

⁸Éngeles nâ tô e yé béle, tó sʉ ébúʼ mé Nzyɛ̌m ɨ́ dʉ́o. Dʉ́o, lé ntɔ̂ʼ dweŋɔɔ nkûl ó, lé díʼɨɨ bʉr e siʼe yé.

⁹Jɔʼ bʉ̂r, bé á díʼe nó yɨ́, bé á si tô dóló le epyaŋɔɔ̌ Nzyɛ̌m, nyɨɛ mʉr á dwe bé bintɨ́ʼá byaá nyá. Bé á bé akam étúmo míkoo e mebébe mɔ́ɔ́, nkʉ̂ dwira míléme, le edwe nyé kûm.

¹⁰Éngeles tɛ̂n tô e yé béle, tô ɨ́ diá jwɨ́ɨ me tír waá, tó sʉ ébúʼ mé Nzyɛ̌m tɨ̂. Edúrúú ntɔ̂ʼ sula ɨ́ sí tír á jwɨ́ɨ yɨ́. Bʉr ntɔ̂ʼ kʉkoʼlo bíjɨ́m byɔ́ɔ́ ɨ́ lɔ̌b mítúú myɔ́ɔ́.

¹¹Damá jóʼo nó, bé á bé atúmo míkoo e bisyɛ́ɛla bí ébébe byɔ́ɔ́, nkʉ̂ pʉgʉ́ bá dwira míléme. Bé á si tô dóló le elwɨ́ɔɔ̌ Nzyɛ̌m, dí ɨ́ jʉ́o kʉ́ nyá. Bé á sâ nó ó, ɨ́ lɔ̌b mékpaa ndu e mepɨ́ɨ́ mɔ́ɔ́.

¹²Éngeles saman nzě tô e yé béle ɨ́ ngwǎŋ bé jɨ́jébé ó, Efrât wɨ́. Nye nzě tó sʉ ébúʼ mé Nzyɛ̌m tɨ̂. Jɔʼ nyé á sʉ lé yɨ́, ngwǎŋ waá ntɔ̂ʼ jwɨ̂l wɨ́wɛ̂h. Ngwǎŋ waá, wé á jwɨ̂l nó ó, lɨ́ entɛŋ ójwɨ́ɨ. Bé óduhǒ nko dʉ́o dí ejɨma yɨ́, nzě pyâl ɨ́ ngwǎŋ waá, wé osí swâh.

¹³Me á si bee ntémé mimbɨ́a mísísǐm milɛ̂l. Myé á nwɨɨla ó e baádwam. Wɨ̂ʼ mbɨ́ǎ sísǐm, wé á duho ó ɨ́ nǔm njʉ̌m myɔ́ɔ́. Gúú, wé á duho ó ɨ́ num tír menyan waá. Gúú ntémé ɨ́ num ngwíha milɔ̌b bibɛr wé.

¹⁴Meleme maá, mé lɨ́ etô le esâ mésimá. Mé lɨ́ etô kwá ojwɨ́ɨ́ ó sí bɨ́bɛ̂h, lɨ́ ebáŋle bé ó, bé syɛ́ŋɨɨ menkul mɔ́ɔ́, lwímla dɔ̂m e Nzyɛ̌m nkul nyɨnyɛ̂h ɨ́ móhó nɨ́nɨ́ɨ́ wé.

¹⁵Bê nzě syɛŋa ntémé nó. Bé á syɛŋa ó, lɨ́ ebɨ̌m e dɔ̂m bé jɨ́jébé ɨ́ lwǐb ébrœ̂ «Armagedɔ̂n» yɨ́. Tî gá wɨ́ná, nyě lɛ́ɛ́ ó: «Paá bee gâ: me lɨ́ enze métwɨrâ, mpʉ̌ ndíblʉ̌. Mʉr dí ɨ́ mpʉ̂n, mikán mimbɔ́rá ɨ́ nyʉ̂l nyá, nye ó waá mé ósʉ métyɛʼ me mpóm nyá. Nyɨɛ, nye ábě suswáh. Nye ábeɔɔ ɨ́ nkɛŋlɛ̂m. Nye ásɔ́ma.»

¹⁷Me nzě kǎ bee éngeles nzaangbá. Nye nzě mɔa, ntɔ̂ʼ tô e bélé yé, tó sʉ ébúʼ mé Nzyɛ̌m ɨ́ pubó. Twíí nɨ̂nɨ̂n nzě duho ɨ́ mecwɨ́ɨ́ mé jwɨ́ɨ dí ɨ́ mpáh Nzyɛ̌m má. Nye e né ó: «Yɨ́ síe!»

¹⁸Mindweh mi mpíé, myê nzě pyâl ɨ́ keleb keleb. Nkɛ̂l jʉ́o dumo ɨ́ sɨŋgɨɨm. Sí kʉ́ nzě kubla. Táare ɨ́ jɔ̌ʼ Nzyɛ̌m á tyêl bʉr ɨ́ sí yɨ̂ʼ yɨ́, kumo ɨ́ jɔʼ yɨ̂, bé apǎ beě sí lɨ́ ekublǎ mbi waá.

¹⁹Nkanǎ nɨ́nɨ́ɨ́ yaá, yé ntɔ̂ʼ bîʼ, nzě bʉ̂l mímyál mílɛ̂l. Binkana biswîh ɨ́ mʉ́ʉ́ mésí ntémé, mé á si duma sí. Nzyɛ̌m á si símsa bisyɛ́ɛla bí Babilɔ̂n, nkanǎ nɨ́nɨ́ɨ́. Nye nzě lɛ̂ʼle bʉ̂r ó nkana yaá bím nkpáa nyé dí yɨ́, le esâ ntémé ó, bé jâʼraa le ebúʼ lé le nkpaa nyé. Bê nzě puro tɨ̂ʼ mpʉ mʉ̂r dí ejaʼra e mpur menyoʼ yɨ́.

²⁰Mitíhé, myé á si dîm ɨ́ mîh, myáa ɨ́ medíbé. Mecwɨ̂ʼ, mé á bé akǎ kœbɔɔ.

²¹Metánaá ɨ́ bwaʼ bwaʼ nzě duho ɨ́ jʉ́o kʉ́, nkaŋa bʉ̂r ɨ́ menyʉ̂l. Mé á be ɨ́ dile dile, etánaá egwár lɨ́ epyâl ókílo mekám ménâ e metɛ̂n. Bʉr ntɔ̂ʼ báʼǎ nzě pyǎ Nzyɛ̌m ɨ́ lɔ̌b ntɨ́ʼá yaá. Ebě, metánaá mé ábwaʼbwâʼ maá, mé ó b'á bu ntɨ̂ʼ bʉr, laa byúú bíntɨ́ʼá bíbyɛ̂h.