Read Koonzime Twóm 17 Bible Online

Twóm 17 - Koonzime bible

Twóm 17

¹Píe tɨ̂, nyʉ́ʉ́ éngeles ɨ́ sɔ́má bééngeles nzaangbá bé á be e mempéle bá, nzě mɔa, nzě pyâl kwá nyǎm. Nye e me ó: «Ntáʼ! Me múo lɛ̂ʼle gó mpʉ̌ Nzyɛ̌m ngá ntɨ̂ʼ sadága mʉ́má dí ebɛ́ma nyʉ̂l ɨ́ nzɨ̌ bijoó ɨ́ nwérédé yɨ́. Nye ó waá á bě sí komlo ódiá wé ɨ́ mipɨ̌n méntíbé ɨ́ buo buo nyá.

²Nye ntémé á be lɨ́ epûhla nyʉ̂l nyé le ojwɨ́ɨ́ ó sí yɨ̂, le odil ó sí yɨ̂, tó pyâl ɨ́ jɔʼ bé á ka sia e mitúú duho tɨ̂ʼ mpʉ mʉ̂r jáʼrá e menyoʼ yɨ́.»

³Tyé e tyé yaá, me á be ó ɨ́ nkul Sísǐm mé Nzyɛ̌m. Éngeles nzě tô e me ɨ́ lʉá. Me nzě bee mʉ́má tɨ̂, ndîndǐl ɨ́ tír kʉ́. Tír waá á be ó e nyʉ̂l ɨ́ cʉʼ. Nye ntémé e míe micɛmá ɨ́ nyʉ̂l e nyʉ̂l, maá mé á pya Nzyɛ̌m má. Tír waá ntémé e milʉ̂ nzaangbá ndu e bintóo kám.

⁴Mikán mʉ́má waá á be e myé ɨ́ nyʉ̂l mí, myé á be ó menyʉ̂l ɨ́ buo buo. Mîʼ e nyʉ̂l kaá e kaá; myúú, e nyʉ̂l ɨ́ cʉʼ. Nye á be ɨ́ bwâr ntémé mindwé mímpuma. Ndwê waá, wé á be ó gʉ̂l, ndu e mekóʼ ɨ́ ntyɛ̌n ntɨ̂ ntyɛ̌n, mimbi mimbi. Bélé nyé á mɨmɛ̂r ɨ́ mbó wé yɨ́, yé á be ó yaá gʉ̂l, lóŋlá e mebébe, mpir le bisyɛ́ɛla bímolá.

⁵Nye ntémé á be ó e díé lé nye mʉr tɨ̂ʼ cɛmá ɨ́ mpǒm nyé. Díe laá, lé á be ó ɨ́ lwǐb ódîm. Lé á be ó: Babilɔ̂n, nkana ébeɔɔ ó nyâ, nyɔ̌ŋ á byâ bisadága bi bʉ́bá bíbyɛ̂h nyá, mʉmá á kûhlo sá yɨ́yɛ̂h Nzyɛ̌m dí ebene mpéne-numó yɨ́ nyá.

⁶Me nzě bee ó, mʉmá waá á be ó, ɨ́ mpur metié. Nye á be ɨ́ buú bɛble métié me bʉ̂r o mé Nzyɛ̌m, baá bé á bʉboʼlo lɔ̌b dí edumo e Yésʉs wɨ́ bá. Mbeá mé á bee nye yɨ́, me nzě kǎ buú kâm.

⁷Nó yaá ó éngeles á dî e me ó: «Gǒ kám ɨ́ yé? Me ópâʼla gó lwǐb ódîm dí edumo e mʉmá nɨ̌ yɨ́. Me ópâʼla ntémé ó, lwǐb ódîm dí edumo e tír nyé dí ekalwo kʉ́ tɨ̂ʼ nɨ̌ yɨ́. Tír waá, nyě e milʉ̂ nzaangbá ndu e bintóo kám.

⁸Tír gó á bee nyá, á boo be ó tɨ̂, jɔ̌ʼ myâ. Tó kœb ó, nyé akǎ be. Yɨ́ kǎ lîʼ tîtííǎ, nyé opah, duho ɨ́ bɨ́ dí sí ɨ́ kœ́ʼlɛ́ yɨ́. Nyé óduho tɨ̂ʼ nó, nyé odwe. Nzyɛ̌m á si cɛma míé mé bʉ̂r o nyé ngá tíʼ bá, táare ɨ́ jɔ̌ʼ kʉ́ e sí, byé á be apǎ bě kuhá yɨ́. Sâ gwár, bʉr o míe dí anyɨ̂n ɨ́ mekaná mé twiʼ maá bá, bé óbuú kâm tír waá, ebě, bé óbee ó, nye á be ɨ́ nyɛɛ́ tíʼe, nye nzě dwe. Bé óbee nyé ntémé lɨ́ ebáʼǎ pah.

⁹«Wâʼ ɨ́ gúmó yɨ̂, yé jɨ ó, mʉr díʼee e mpǎŋ ocwóó! Milʉ̂ nzaangbá me tír waá, myé lɛ́ʼlé ó, mecwɨ̂ʼ nzaangbá. Mʉmá waá didi ó, ɨ́ mecwɨ̂ʼ maá kʉ́. Myé ntémé, myé ó ojwɨ́ɨ nzaangbá.

¹⁰Ojwɨ́ɨ otɛ̂n, bɨ́ boó dwe. Njwɨ́ɨ saman ó dína. Yé ká be, ɨ́ páʼ njwɨ́ɨ nzaangbá nɛ́ɛ: jɔʼ yé, yé ósûʼlǎ pyâl. Jɔʼ yé ópyâl nó yɨ́, nye ójaá di ó, njɨ mâ péh éwala, nyé olaa.

¹¹Nó ó tír waá, waá á boo be tɨ̂, waá mû akǎ be nyá nyɨɛ, nye ó njwɨ́ɨ mwom. Bé le ojwɨ́ɨ nzaangbá, bé ó sɔ́má gwár. Nyě tó ó, tó dwě dwêʼ.

¹²«Bintóo kám mé tír gô bee nyá, byé lɨ́ elɛ̂ʼle ójwɨ́ɨ kám. Bé apǎ nze, apǎ bi ntémé nkul jwɨ́ɨ yɔ́ɔ́. Bé ónʉa nkûl jwɨ́ɨ, bé e tír waá nó, bé onzě jwɨ́ɨ bʉ̂r péh éwala.

¹³Ojwɨ́ɨ kám baá, bé ó e mipahlá mimpwár. Bé ósyɛŋ ménkul mɔ́ɔ́ le mejwɨʼá mɔ́ɔ́ mɨ́mɛ̂h, nzě dwe tír waá mǎ.

¹⁴Bé ólwímla dɔ̂m e Mâ Nteme. Mâ Nteme ónzě kǎ ntaa bê, ebě, nyɨɛ ó dí Njwɨ́ɨ Ojwɨ́ɨ, le Tî Otî. Bʉr o bé e boo nɔ́ɔ́ dí entaa bá, bé ó baá nyé á jébe, le etwâr ɨ́ sɔ́má bʉ̂r bɨ́bɛ̂h bá. Bé ó b'á dyɛ̂ʼwo e Yésʉs.»

¹⁵Éngeles nzě báʼǎ lɛ́ɛ mé ó: «Mentíbé gô bee má, gúmó mʉ́má dí ebɛ́ma nyʉ̂l ɨ́ nzɨ̌ bijoó nyá dí edi yɨ́, mé ó dí bikûl e biloo e mpum bʉ̂r le bʉr o bílwǐb bíbyɛ̂h.

¹⁶Bintóo kám gô bee bí, bé e tír waá, bé ónwǐm sadága mʉ́má, dɛn mébi mé, líʼe yé tʉ̂toʼó ɨ́ ŋmáh. Bé ójʉ̂ yê, de bípúnó byé. Sá yé óbuʼo tɨ̂ʼ l'adeŋɔɔ yɨ́, yé ójaá díʼɔɔ ó, njɨ ɨ́ siʼe.

¹⁷Nzyɛ̌m ó b'á sâ ó, bé díʼee e bigwɨ́má bí ésâ gwɨ́má yé. Bé óbě e léme ngwár, lɨ́ etímle tír waá jwɨ́ɨ yɔ́ɔ́, tó pyâl ɨ́ jɔʼ mílɛ́á mé Nzyɛ̌m myé ódira yɨ́.

¹⁸Mʉmá gô bee nyá, nye ó nkanǎ nɨ́nɨ́ɨ́ dí ejwɨ́ɨ le ojwɨ́ɨ ó sí yɨ̂ʼ yɨ́.»