Read Koonzime Twóm 18 Bible Online

Twóm 18 - Koonzime bible

Twóm 18

¹Píe tɨ̂, me nzě bee nyʉ́ʉ́ éngeles á duho ɨ́ jʉ́o kʉ́, á be e nkul jwɨ́ɨ ɨ́ buo buo nyá. Mentyɛnwa nyé á be e mé má, mé á si kʉn sí yɨ́yɛ̂h.

²Nye á si túno, lɨ́ elɛ́ɛ ó: Babilɔ̂n, nkanǎ nɨ́nɨ́ɨ́, yɨ́ duma ɔ́! Yɨ́ duma sí ɨ́ kûm! Yé mû ó súm méleme dí edi yɨ́, súm mímbɨ́a mísísǐm dí edi ɨ́ mbʉʼ yɨ́, le súm bínʉ̌n bi dí e mpir, byaá bi dí ɨ́ buú benɔɔ bí.

³Ebě, nye á si kwâb bʉr o bíkúl bíbyɛ̂h lɨ́ esâ ó, bé pûhlaa menyʉ̂l e né, tó pyâl ɨ́ jɔʼ bé á ka sia e mitúú duho tɨ̂ʼ mpʉ mʉ̂r jáʼrá e menyoʼ yɨ́. Ojwɨ́ɨ́ ó sí yɨ́yɛ̂h ntémé, bé á si pûhla menyʉ̂l e né. Obɛ́ma o bísɔ̂ʼ, bé á bu dira minyɔm ó, lɨ́ ebɨbɛ́ma nyé bisâ, nyɨɛ mʉr á kpɨkpɛl njɨ mpǎŋ bisâ nyá.

⁴Me á si jóʼo nyʉ́ʉ́ twíí lɨ́ eduho ɨ́ jʉ́o kʉ́, lɨ́ elɛ́ɛ ó: Bʉr bâm, duhaa gá náǎ. Adi gá páʼ bʉr ónɨ̌, lɨ́ ekpɛ́ɛ ó, bɨ̌n bé ámû jaá syɛŋa e bé lɨ́ esâ mísyóm jwɨʼ gwár, sia ntémé e bintɨ́ʼá bimpwár bé ósia e byé bí.

⁵Ebě, misyóm myé, myé mû ó, ɨ́ nkalá nkalá, tó kumo ɨ́ jʉ́o kʉ́. Nzyɛ̌m, nye lɨ́ ebee myé mímyɛ̂h.

⁶Bé dwêʼ nye bintɨ́ʼá lɨ́ edû mpʉ nyé á nzɨnzamra bʉr yɨ́. Mpʉ nyé á sɨ̂sa bʉr jɔʼ gwár yɨ́, nye sáŋɔɔ nzɔʼ bá. Yé bé nye á si dwe bʉr bébebébe menyoʼ nó, nye bɛ́blaa maá me dí ɨ́ buú bébe, laa mɨ́haá má!

⁷Ɨ́ mpʉ nyé á lɨlɛ́ɛ njɨ ó, nyě e kûm, ó nyě tíʼé ó, ɨ́ mepwaʼ yɨ́, bé dwêʼ nye bintɨ́ʼá, dû bím yaá, ebě, nye á lɨlɛ́ɛ ɨ́ lémé wé tʉ́ŋlʉ̌ ó: «Me ó wâʼ sí ndîndǐl ɨ́ ntuuu mpʉ njwɨ́ɨ. Mé abě kúhó mʉ́má. Me ákǎ jɨ éswie e nyʉ́ʉ́ mʉ̂r.»

⁸Sɨ́ǎ yaá ó bíntɨ́ʼá byé á boo be komá lɨ́ esú lé bí, byé óswɨɨ nyé ɨ́ nyʉ̂l ɨ́ jɔʼ gwár yɨ́. Nye ójaʼra e mekpaa, le mitúú mí éswie, ndu e nza. Siʼe, yé ódîʼ nkana yaá, ebě, Dâ Nzyɛ̌m, mʉr dí etíʼe bé milɔ̌b nyá, nye ɨ́ lele nkûl.

⁹Minjwɨ́ɨbʉr mí sí yɨ̂, bʉr o b'á pûhla menyʉ̂l e né bá, bé á tíʼe ɨ́ mepwaʼ mɔ́ɔ́ ó, ɨ́ nzɨ̌ nyé. Ɨ́ jɔʼ bé óbeě dúluu lɨ́ ebére kʉ́, duhǒ gúmó nyʉ̂l nyé óbe lɨ́ edíʼe yɨ́, bé óbuú jɨ médwê.

¹⁰Bé ótyɛ̂b lɨ́ ejaa ɨ́ bʉ́á, lɨ́ ebee mpúo mitúú myé, le elɨlɛ́ɛla ó: Nkoó, nyě e nkanǎ nɨ́nɨ́ɨ́ yɨ̂! Gua Babilɔ̂n, nkana yé á be ɨ́ lele nkûl yɨ́, nkoó, nyě e go, ebě, ebébe lô lɨ́lɛ̂h gó á sâ ɨ́ sí lɨ́, Nzyɛ̌m, nyɨ́ tíʼe mílɔ̌b myaá ɨ́ jɔʼ gwár.

¹¹Obɛ́ma o bísɔ̂ʼ bé mû ó lɨ́ ejɨ médwê ɨ́ lɔ̌b wé. Bé mû ntémé ó lɨ́ esâ éswie lé, ebě, mʉr, nye ákǎ bwâm bísá byɔ́ɔ́.

¹²Damá be ó gʉ̂l yɔ́ɔ́, mɔnɨ́, mekóʼ méntyɛnwa, mikán mi dí ɨ́ mbɨa mbɨa, mimbi mimbi mí. Mîʼ míkán, myé á be ó e nyʉ̂l kaá e kaá; myúú, e nyʉ̂l ɨ́ cʉʼ. Bilɨ́ bi dí le ojɔɔ́ bí, bisâ bi dí ekpaʼɔɔ ɨ́ bintóó bí ónzoʼ bí, bisâ bi dí ekpaʼɔɔ ɨ́ bilɨ́ bí, bisâ bi dí elúlɔɔ e nkóho bígbáá ndu e binkóho bimpâ bí, ndu e bisâ bi dí ekpaʼɔɔ e mekóʼ bí, byé ákǎ gúm bɛ́ma.

¹³Kanɛ̂l yɔ́ɔ́, mirrhe, le byúú bílɔbína byɔ́ɔ́, mimbi mí ótú myɔ́ɔ́ mímyɛ̂h, menyoʼ ndu e múló mɔ́ɔ́, mpiha nyɔ́ɔ́, ndu e pǔ blêr, bintœœ, binteme, bikablá, bikálîʼ, ndu e mikuó mi bʉ̂r, tótôʼ. Bisá byé bíbyɛ̂h, byé ákǎ bɛ́ma.

¹⁴Obɛ́ma o bísɔ̂ʼ baá, bé e né ó: «Bisá gó á bu kpɛl bí, byé akǎ be kwá nyǒ. Okúm le ogbaa gô wɨ́wɛ̂h ntémé, wɨ́ dîm gó ɨ́ mîh. Go ákǎ bee gúú swîh.»

¹⁵Bé á si dira nyɔm ɨ́ buo buo lɨ́ ebɛ́ma e nye. Bé ótyɛ̂b lɨ́ ejaa ɨ́ bʉ́á, lɨ́ ebene ébee mítúú myé. Bé ójɨ médwê le ekâm ékúhó lé.

¹⁶Bé ólɛ́ɛ ó: Nkoó e nkanǎ nɨ́nɨ́ɨ́ yɨ́h yɨ̂! Nyɨɛ mʉr á bûbwar mimbi míkán mi dí ɨ́ buú mbɨa mí nyá: mîʼ míkán e nyʉ̂l kaá e kaá; myúú e nyʉ̂l ɨ́ cʉʼ. Nyɨɛ mʉr á sâ nyaŋá ɨ́ nyʉ̂l nyé, bûbwar míndwé métwaʼlé mí gʉ̂l, ndu e mekóʼ méntyɛnwa, mekǎʼ mekǎʼ ɨ́ nyʉ̂l nyá.

¹⁷Okúm le ogbaa waá wɨ́wɛ̂h, wɨ́ bánǎ ndámɔɔ ɨ́ mâ jɔʼ! Odûʼ o bísitíma bá, le omása bɔ́ɔ́, ndu e bʉr o dí ekalwo ɨ́ bisitíma, ndu e bʉr bɨ́bɛ̂h o dí edira mínyɔm ɨ́ nzɨ̌ mâŋ bá, bɨ́ɛ á tityɛ̂b ó lɨ́ ejaa,

¹⁸lɨ́ ejɨŋɔɔ médwê ɨ́ jɔʼ bé á bee dúluu lɨ́ ebére kʉ́, duhǒ gúmó nkana yaá, yé á díʼe yɨ́. Bé ó: «Abe e nkana swîh á nwɨɨla e nkanǎ nɨ́nɨ́ɨ́ yɨ́h yɨ̂!»

¹⁹Nʉŋɔɔ pím, sʉŋɔɔ ɨ́ milʉ̂. Bʉ́ŋɔɔ bítím, jɨŋɔɔ médwé mé éswie, lɛ́ɔɔ ó: Nkoó e nkanǎ nɨ́nɨ́ɨ́ yɨ̂! Yé ó b'á sâ embɨa nko bʉ̂r o dí e bisitíma ɨ́ mâŋ bá. Bé á bi okúm le ogbaa ó, duho ɨ́ mpuo okúm wé. Nkoó e né, ebě, nyɨ́ lîʼ tʉ̂toʼó píe mâ jɔʼ.

²⁰Bʉr o kʉ́, doʼaa gá lɨ́ etɨʼla lé. Bʉr o dí egúmo e né bá, bʉr o mílʉ́mlʉ́ bé, ndu e l'ogwíha o mílɔ̌b bé, sohaa gâ, bɨ̌n óbɛ̂h, ebě, Nzyɛ̌m, nyɨ́ tíʼě lɔ̌b, dwe bɨ́n nkam, dwe bé mebě.

²¹Gúú njɨ́h éngeles nzě pyâl, bɨ̂n ékóʼ énɨ́nɨ́ɨ́, guho lé e nkul ɨ́ mâŋ. Nye e né ó: Babilɔ̂n, nkanǎ nɨ́nɨ́ɨ́, yé óguhɔɔ ntémé ó nó, e nkul. Yé ákǎ nyɨ̂n.

²²Obʉm o mímpêr, bé ákǎ báʼǎ bomo tɨ̂. Odyɛa o méjéme, bé ákǎ dyɛɛ ntémé. Mindie le osébe, byé ákǎ lʉ́ŋɔɔ. Ocwóó ó bʉ̂r o dí ekûhlo bísɔ̂ʼ e mebô bá, bé ákǎ be tɨ̂. Duú mîn e boʼo akǎ jwɨ̂ʼ.

²³Meláma, mé ákǎ tumɔɔ ɨ́ gúmó yô. Mʉr, nye ákǎ jóʼo métwíí mé mʉ́má e njʉ̂m wé tɨ̂. Nkoó e go, ebě, ɨ́ jɔʼ ésôʼ, obɛ́ma o bísɔ̂ʼ bô, bé á lɨlɛ́ɛ ó, bé ó dí le okúm, laa bʉ́ʉ́ óbɛ́ma bɨ́bɛ̂h. Nkoó e go, ebě, go á si dímle bʉr o bíkúl bíbyɛ̂h ɨ́ nzɨ̌ mimǐr mí éleme myô.

²⁴Ebě, ntémé, Nzyɛ̌m á bee ó, gó e mpono metié me bʉ̂r ɨ́ nyʉ̂l. Gʉ́ jʉ̂ ógwíha o mílɔ̌b ndu e bʉr ó Nzyɛ̌m á twâr bá. Go ó b'á jʉ̂ bʉr ó sí yɨ̂ʼ bɨ́bɛ̂h, bé á dwe ɨ́ cére bá.