Read Koonzime Twóm 19 Bible Online

Twóm 19 - Koonzime bible

Twóm 19

¹Píe tɨ̂, me á si jóʼo nyʉ́ʉ́ twíí ɨ́ bwaʼ bwaʼ lɨ́ elwib ɨ́ jʉ́o kʉ́. Yé á jwɨ̂ʼ ó, mpʉ̌ sá lɛ́ɛ́, yé á be ó mecwíí méntumo me bʉ̂r ɨ́ buo buo. Nye á lɨlɛ́ɛ ó: Alelúyah! Dwéʼ gá Nzyɛ̌m kûm. Nzyɛ̌m gá wɨ́ná, nyɨ́ tíʼ bʉ̂r. Nyě e kûm ndu e nkul nyɨnyɛ̂h.

²Nye ó mʉr otyeetye. Nyě tíʼé bʉ̂r milɔ̌b jɔʼ yɨ́yɛ̂h ó, lɨ́ otîtyěl. Nye á si dwe mʉmá dí ebɛ́ma nyʉ̂l ɨ́ nzɨ̌ bijoó ɨ́ nwérédé nyá mebě, ebě nye ó b'á sam bʉr ó sí yɨ̂ʼ bɨ́bɛ̂h ɨ́ nzɨ̌ bimolá. Nó ó, Nzyɛ̌m, nyɨ́ kǎ dwe nyé ntɨ́ʼá, ebě ntémé nye á si jʉ̂ osyɛ̂l o mésá bé.

³Bé á si tô le elɨlɛ́ɛ dóló ó: Alelúyah! Dwéʼ gá Nzyɛ̌m kûm. Júluu dí ebére, duhǒ nkana yaá yɨ́, yé ásíesie. Yé óbɨbére nó jɔʼ yɨ́yɛ̂h.

⁴Nó ó otɔ́má bʉ̂r mekám mébá le onâ, ndu e mikublakúbla mí ótír minâ myaá, mímyɛ̂h, myé ntɔ̂ʼ kúrwo sí, le epíʼe mémpǒm sí ɨ́ mpǒm mé Nzyɛ̌m, lɨ́ edwe nyé kûm, nyɨɛ mʉr á be ndîndǐl ɨ́ mecwɨ́ɨ́ mé jwɨ́ɨ nyá. Bê nzě gúmlo nyê. Bé ó: «Amɛn! Dwéʼ gá Nzyɛ̌m kûm.»

⁵Nó ó nyʉ́ʉ́ twíí á duho ɨ́ mecwɨ́ɨ́ mé jwɨ́ɨ yɨ́. Nye ó: «Dwéʼ gá Nzyɛ̌m gá wɨ́ná kûm, bɨ̌n osyɛ̂l o mésá bé bɨ́bɛ̂h, bʉr o dí edwáawo nyé bá, táare e baántéʼenteʼe o bʉ̂r, kumo e minjɨ́h mí bʉ̂r mímyɛ̂h.»

⁶Píe tɨ̂, me á si baʼa jóʼo nyʉ́ʉ́ twíí. Nyɨ́haá twíí, nye á jwɨjwɨ̂ʼ ó, mpʉ̌ sá lɛ́ɛ́, yé á be ó puŋa bʉ̂r. Nye á lwib ntémé ó, mpʉ̌ sá lɛ́ɛ́, yé á be ó esʉ̌ʼ é díbé énɨ́nɨ́ɨ́, nkʉ̂ ntɔ̂ʼ mpʉ míndum mi mpíé mi dí edumo ɨ́ sɨŋ mí. Nye ó: Dwéʼ gá Dâ Nzyɛ̌m kûm, ebě, Nzyɛ̌m nkul nyɨnyɛ̂h, nye mû ó sí tyêl Mpóʼo nyé!

⁷Mɨná sóhaa gá ɨ́ buo buo. Mɨná gúmlaa gá nye, ebě, jɔʼ yé, yɨ́ pyâl! Mâ Nteme múo nzě bâ mʉ́má wé! Mʉmá waá mû ó kʉmsá!

⁸Nzyɛ̌m á si dwe nye nkul ebwâr kán ɨ́ nyʉ̂l ɨ́ nkaaá. (Mbɨambɨa kán waá, wé lɛ́ʼlé ó, otîtyěl o bísyɛ́ɛla. Bʉr o dí egúmo e Nzyɛ̌m bá ó dí esâ byê.)

⁹Nó ó éngeles á lɛ́ɛ e me ó: «Cɛmáa. Nzyɛ̌m sʉ́ʼoo metyɛʼ me mpóm ɨ́ bʉr o b'á báŋlɔɔ ó, bé tô de méde ɨ́ nzɔɔ ebá mé Mâ Nteme bá.» Nye nzě báʼǎ lɛ́ɛ e me ó: «Mekǎn mâ, mé kʉ́ be ó tyeetye. Mé duho ó, ɨ́ num mé Nzyɛ̌m.»

¹⁰Ejóʼo mé á kʉ jóʼo nó yɨ́, me ntɔ̂ʼ kúrwo sí, píʼe mpóm ɨ́ bibwǎh ɨ́ mpǒm nyé, lɨ́ edwe nyé kûm. Nye nzě lɛ́ɛ e me ó: «Sá asâ nó. Me ntémé, me ó syɛ̂l mesâ mé Nzyɛ̌m mpʉ bɨ́n e bɨ́ɔɔ́ bô dí nɨ̌. Mɨná bɨ́bɛ̂h, bé lɨ́ ebúʼla gá lɔ́ɔ́ Yésʉs á túno wɨ́. Gúmláá sɔ̂ʼ njɨ Nzyɛ̌m.» Lɔ́ɔ́ Yésʉs á túno wɨ́, wé ó b'á dwe ogwíha o mílɔ̌b nkul Sísǐm ó, bé lwíbɨɨ.

¹¹Nó ó, me á si bee jʉ́o mû mběʼ. Mpáŋá kablá, yé á si pyâl tɨ̂. Mʉr á kalwo ɨ́ yé kʉ́ nyá, bé lɨ́ ejébe nyé ó: «Waá Ebûʼlɔɔ.» Nye lɨ́ ejébɔɔ ntémé ó: «Mʉr Otyeetye.» Nyě títíʼé mílɔ̌b le elwímla dɔ̂m ó, lɨ́ otîtyěl.

¹²Míh mé, mé ó mpʉ̌ njʉ̌l siʼe. Nye á be ó sí bwâr bíkáráá bí dúu ɨ́ buo buo ɨ́ lʉ́ wé. Bé á si cɛma díe ɨ́ nyʉ̂l nyé. Díe laá, abe e mʉr á gʉ́a lê, njɨ nye omér.

¹³Nye á bubwâr ó, kán wé á pa dubɔɔ ɨ́ metié wɨ́. Bé lɨ́ ejébe nyé díe ó, «Lwǐb mé Nzyɛ̌m.»

¹⁴Beéngeles o dɔ̂m ɨ́ jʉ́o kʉ́, bé á be ó lɨ́ edû nyé ɨ́ koo píhe ɨ́ bikablá kʉ́, bikablá bíbyɛ̂h njɨ bimpáŋá. Bé ntémé, bé á be ó e mikán ɨ́ pumo pumo ɨ́ menyʉ̂l ɨ́ ncwé ncwi ncwé.

¹⁵Pasoŋ dí njebá ɨ́ bábla bábla ɨ́ lya lyá lyá yɨ́, nye á duho nye ó, ɨ́ num, ebě, nye óŋmɛ̂h bíkúl bíbyɛ̂h e tɨ̂. Nye ópɨpála bé ó e nkul jwɨ́ɨ ɨ́ lele lele mpʉ̌ súmǔ nkóho. Nye ómân bé mpʉ bé dí emân mpúmó ɨ́ pǎr yɨ́. Nó yé dí elɛ̂ʼle ó, mpʉ̌ lémé mé Nzyɛ̌m, Nzyɛ̌m nkul nyɨnyɛ̂h, wé á ka lóno ɨ́ nkpaa yɨ́.

¹⁶Bé á si cɛma díé lé ɨ́ kán wé, le kʉ̌ wé. Bé á cɛma ó: Njwɨ́ɨ ojwɨ́ɨ, le Tî otî.

¹⁷Nó ó, me á si bee nyʉ́ʉ́ éngeles lɨ́ etyɛ̂b ɨ́ mpǒm dʉ́o. Nye á lwilwib ó, kʉ́kʉ́, lɨ́ ejébe bínʉ̌n bíbyɛ̂h byé á be lɨ́ ejwoo kʉ́ bí. Nye e byé ó: «Ntáʼ gâ! Swáláá gâ. Ntaá nzě de gá medě Nzyɛ̌m ntɨ́h bɨ́n má.

¹⁸Ntaá nzě de gá bipúnó bí ójwɨ́ɨ le byaá bínkáatir bísója bɔ́ɔ́. Ntaá nzě de gá bipúno bí ónkɔ́ɔ́ bí bʉ̂r, ti e byaá bíkablá, ndu e byaá bi bʉ̂r o b'á kalwo ɨ́ byé kʉ́ bá. Ntaá nzě de gá bipúnó bí bʉ̂r bɨ́bɛ̂h: damá be bítúʼǎ, damá be ónzyɛh o bʉ̂r; minjwɨ́ʼ mí bʉ̂r ti e minzɨnzɨ mi bʉ̂r.»

¹⁹Nó ó, me á si bee tír waá, bé le ojwɨ́ɨ ó sí bɨ́bɛ̂h. Bisɔ́má bí mɔ̂m byɔ́ɔ́, byé á be ó sí swâl. Bé á be ó, bé sá ó dɔm e mʉr á be ɨ́ kablá kʉ́ nyá, bé e yé sɔ́má dɔ̂m.

²⁰Tír waá ndu e ngwíha milɔ̌b bibɛr wé, bé ntɔ̂ʼ mɛ́rɔɔ. Ngwíha milɔ̌b bibɛr wé ó b'á sɨsâ mesimá ɨ́ mpǒm me tír waá. Nó nyé á didímle bʉr. Sâ yaá ó bé á cɨcɛma jwɨʼ yé ɨ́ menyʉ́l mɔ́ɔ́ yɨ́. Bé á be ó sí dwě kpɛʼkpɛ̂ʼ mveʼle yé kûm. Jɔʼ tír waá, bé e ngwíha milɔ̌b bibɛr wé bé á mɛ́rɔɔ yɨ́, bé á si guhɔɔ ntémé ɨ́ bɨ́ siʼe, mikublakúbla. Siʼe e pir ó dí edúo tɨ̂ jɔʼ yɨ́yɛ̂h yɨ́.

²¹Nó ó, mʉr á be ɨ́ kablá kʉ́ nyá, nzě jʉ̂ bísója me tír waá e pasoŋ wé á duho nye ɨ́ num nyá. Binʉ̌n bíbyɛ̂h, byé á si nze, de mímúú myɔ́ɔ́, dílɔɔ.