Read Koonzime Twóm 2 Bible Online

Twóm 2 - Koonzime bible

Twóm 2

¹«Cɛmaa mékaná. Go e tyén éngeles dí edwéelě Mbɛ̌r-Nzyɛ̌m, waá dí Éfɛsɔs wɨ́ nyá. Lɛ́yɨ́ɨ́ nyé ó: Waá dí emɛ̂r ócwícwén nzaangbá lɨ́ ekœ́h lé éjʉ́m lé nyá, nye lɨ́ etye páʼ bityélátyéla méláma bí gʉ̂l nzaangbá. Nyě lɛ́ɛ́ ó:

²“Me lɨ́ egʉ́ǎ lelelelě syɛ́ɛ́ bɨ́n dí eséa yɨ́, ndu e mbi bɨ́n dí edûhwo mítúú wɨ́. Me lɨ́ egʉ́a ntémé ó, bɨ̌n bé adûhwo ósyɛ̂l bé ébébe. Bɨ̌n bɨ́ pahle bʉ̂r o dí elɛ́ɛ ó, bé ó bʉr o mílʉ́mlʉ́ mé Yésʉs bá, bɨ́ɛ yɨ́ɛ abe bê. Bɨ̌n bɨ́ kʉ́ bee ó, bé ó baányâ-bibɛr.

³Bɨ̌n bé lɨ́ esâ bíhwó. Bɨ̌n bé lɨ́ edûhwo mítúú ɨ́ lɔ̌b díé lâm, atyɛʼ míléme.

⁴“Yé e sâ gwár mé dí ebene e bɨ̌n yɨ́. Yé ó: bɨ̌n mû ó agwá kǎ kpɛl mé mpʉ bɨ́n á nyɛɛ kpɨkpɛl me yɨ́. Syɛ́ɛla yaá ó mé dí ebene bɨ́n yɨ́.

⁵Ebe nó, símsáá gá gúmó bɨ́n á sele ɨ́ jɔʼ bɨ́n á twe yɨ́. Túmáá gá mikoo le mebébe mɨ́n. Bɨ̌n e dwírá míléme. Lóŋláá gá bisyɛ́ɛla bí ésôʼ mpʉ bɨ́n á boo sɨ̂sa yɨ́. Bɨ́n bé adwira míléme nó wá, me ónze kwá nyɨ́n, nzě pɛ̌ʼ tyélátyéla éláma yɨ́n ɨ́ tyé yé.

⁶Damá jóʼo nó, bɨ̌n bé e nkam lɨ́ ebene bísyɛ́ɛla bi bʉ̂r o dí edû Nikolâ bá. Mɛm ntémé, me lɨ́ ebene byê.

⁷Mekǎn Sísǐm mé Nzyɛ̌m dí elɛ́ɛ̌ Mbɛ̌r-Nzyɛ̌m má, mé ó ménɨ̌. Mʉr nyɨnyɛ̂h dí e megwǎl mé éjóʼo nyá, nye jóʼaa náǎ. Mʉr nyɨnyɛ̂h óntaa, búla le onkɔ́ɔ́ nyá, me ódwe nyé nkul epyâl ɨ́ Paradîs. Nyé odě bumó lɨ́ twiʼ.»

⁸«Cɛmaa mékaná ntémé éngeles dí edwéelě Mbɛ̌r-Nzyɛ̌m, waá dí ɨ́ Smírna wɨ́ nyá. Lɛ́yɨ́ɨ́ nyé ó: Waá dí mʉr esôʼ ndu e waá epíhe, waá á dwe, báʼǎ pah nyá, nye lɨ́ elɛ́ɛ bɨ́n ó:

⁹me lɨ́ egʉ́a mítúú mín, le edyêb lɨ́n. Lɨ́ otyeetye, bɨ̌n bé ó, misʉ́sʉ́ mí bʉ̂r. Me lɨ́ egʉ́a ntémé melwɨ́ɨ bʉ̂r dí elwɨ́ɨ bɨ́n má. Baányâ-melwɨ́ɨ baá, bé lɛ́ɛ́ ó, bé ó bʉr ó kúl óYúden. Sâ gwár, bé abe óYúden ompâ. Bé ó bʉr o mpáh minjɨʼla mé Sátan.

¹⁰Ayɨ́ jóʼo gá bʉ́á ɨ́ lɔ̌b bíntɨ́ʼá bé ngá dwe bɨ́n bí. Paá bee gâ: Sɔ́ŋ meleme ómɛ̂r bɨ́n bʉ́ʉ́ bʉ̂r, gbâ bé ɨ́ mbʉʼ, lɨ́ edǐ bóblo bɨ́n. Bɨ̌n bé ósia e mitúú, tó kumo ɨ́ melû kám. Gwá baʼle gá búʼó, tó kumo lɨ́ eswie. Sá tɨ̂ʼ ó mé ódwe bɨ́n twǐʼ njʉ̌m dǐ yɨ́. Bɨ̌n bé óbi myɛ́na maá, mpʉ̌ nkɔ́ɔ́ dí ebórɔɔ̌ káráá yɨ́.

¹¹Mekǎn Sísǐm mé Nzyɛ̌m dí elɛ́ɛ̌ Mbɛ̌r-Nzyɛ̌m má, mé ó ménɨ̌. Mʉr nyɨnyɛ̂h dí e megwǎl mé éjóʼo nyá, nye jóʼaa náǎ. Mʉr nyɨnyɛ̂h óntaa, búla le onkɔ́ɔ́ nyá, nye ádwe éswie embá.»

¹²«Cɛmaa mékaná. Go e tyén éngeles dí edwéelě Mbɛ̌r-Nzyɛ̌m, waá dí ɨ́ Pɛ́rgamos wɨ́ nyá. Lɛ́yɨ́ɨ́ nyé ó: Waá dí e pasoŋ njebá myoo mipáʼ mímbá nyá, nyě lɛ́ɛ́ ó:

¹³“Me lɨ́ egʉ́ǎ gúmó bɨ́n dí edi yɨ́. Tɨ̂ʼ ó dí diá jwɨ́ɨ́ mé Sátan. Bɨ̌n bé lɨ́ edyɛ̂ʼwo e me. Damá jóʼo ɨ́ jɔʼ bé á jʉ̂ Antipâs yɨ́, bɨ̌n bé á bé agwâʼ ésâ nó. Antipâs ó dí egwá boʼlo mílɔ̌b myâm. Nye ntémé, nye á be ó mʉr ebúʼlɔɔ. Sá tɨ̂ʼ ó bé á mɛ̂r nye ɨ́ sɔ́má yɨ́n, jʉ́ŋɔɔ nyé yɨ́. Tɨ̂ʼ ntémé ó dí odiá mé Sátan.

¹⁴Yé e sâ gwár mé dí ebene e bɨ̌n. Yé ó metwɨ́ɨ́ bʉ́ʉ́ bʉ̂r ó sɔ́má yɨ́n dí edû má. Syɛ́ɛla yaá ó mé dí ebene bɨ́n yɨ́. Bé lɨ́ edû mílɛ́ʼlá mé Balâm. Nye ó waá á dulo Bálak lɨ́ ebébe, tɨ́e nyé egbâ mébɔ̌ʼ mé óbɨma bʉ̂r o b'Ɨ́zraɛ̂l ɨ́ miléme ó, bé sâʼ ebébe má, ebě, nyɨɛ Bálak á sâ ó: nʉa tír á pa baŋɔɔ ɨ́ nzaá bikpɛʼkpɛ̂ʼ bí ónzyɛ̌m nyá, nzě tímle nyé bʉr o b'Ɨ́zraɛ̂l. Bɨ́ɛ ntɔ̂ʼ de nyê, nzě sáŋɔɔ ntémé bimolá.

¹⁵Yê tyeetye ó, bʉ́ʉ́ bʉ̂r ɨ́ sɔ́má yɨ́n, bé lɨ́ esâ mpʉ̌ Nikolâ dí elɛ̂ʼle yɨ́.

¹⁶Ebe nó, túmáá gá mikoo e mebébe mɨ́n. Bɨ̌n e dwírá míléme. Bɨ́n bé asâ nó wá, mé okpâhwǎ nze kwá nyɨ́n. Mé olwímla e bʉr baá e pasoŋ dí eduho ɨ́ num wâm nyá.»

¹⁷Mekǎn Sísǐm dí elɛ́ɛ bʉ̂r ó Mbɛ̌r-Nzyɛ̌m má, mé ó ménɨ̌. Mʉr nyɨnyɛ̂h dí e megwǎl mé éjóʼo nyá, nye jóʼaa náǎ. Mʉr nyɨnyɛ̂h óntaa, búla le onkɔ́ɔ́ nyá, me ódwe nyé mede dí eduho ɨ́ jʉ́o kʉ́ má. Mede maá, mé ó lɨ́ esǒ. Me ntémé ódwe nyé ekóʼ épúmó. Díé lé, lé óbe ó tɨ̂ʼ cɛmá. Díe laá, lé ó edwán é díé lé. Nyʉ́ʉ́ mʉ̂r swîh, nyé abe e nkul egʉ́a lê, njɨ waá dí ebi lé nyá.

¹⁸«Cɛmaa mékaná. Go e tyén éngeles dí edwéelě Mbɛ̌r-Nzyɛ̌m, waá dí ɨ́ Teatîr wɨ́ nyá. Lɛ́yɨ́ɨ́ nyé ó: Lɔ́ɔ́ wɨ̂, wé duho ó, ɨ́ num Mwân mé Nzyɛ̌m. Míh mé, mé ó mpʉ̌ njʉ̌l siʼe. Mekʉ̌ mé, mé ó mpʉ̌ nkóhó dí ɨ́ buú pan yɨ́.

¹⁹Me lɨ́ egʉ́ǎ syɛ́ɛ́ yɨ́yɛ̂h bɨ́n dí eséa yɨ́, le kpɛ̌l yɨ́n, syɛ́ɛ́ ménkɔ̌m bɨ́n dí esâ má. Me lɨ́ egʉ́ǎ búʼó yɨ́n ti e bíhwó nyɨ́n. Bisyɛ́ɛla bín byaá, byé mû ó sí buo, laa byaá bɨ́n á nyɛɛ sɨsâ bí.

²⁰Yé e sâ gwár mé dí ebene e bɨ̌n yɨ́. Yé ó: Yezábɛl, waá bɨ́n á bana dûhwo ó, nye díʼee ɨ́ sɔ́má yɨ́n nyá. Sá tɨ̂ʼ ó mé dí ebene bɨ́n yɨ́. Mʉmá nɨ̌ dímlé bɨ́n ó, ɨ́ jɔʼ nyé dí elɛ́ɛ ó, nye ó ngwíha milɔ̌b yɨ́. Nye lɨ́ edwe ósyɛ̂l o mésâ bâm milɛ́ʼlá míkóo, ó bé sâʼ bimolá. Nyě títíné bé ntémé ó, bé dêʼ tír á pa baŋɔɔ ɨ́ nzaá bikpɛʼkpɛ̂ʼ bí ónzyɛ̌m nyá.

²¹Me á si dwe nye jɔʼ ó, nye túmaa koo le bimolá nyé dí esɨ̂sa bí. Nó ó, nyé akpɛl édwirǎ léme.

²²Sá tɨ̂ʼ ó mé ódyêʼ nyé ɨ́ joó ékpaa yɨ́. Me ntémé, me ósâ ó, bʉrʉ̂m o dí esâ médyɛ̂n e né bá, bé bɔ́maa e mitúú ɨ́ buo buo. Alaa ó, bé ódwira míléme, bírɔɔ bísyɛ́ɛla bí ébébe byɔ́ɔ́ byaá.

²³Me ntémé, me ójʉ̂ bwán bé. Ɨ́ nzɨ̌ nyaá ó bʉ̂r ó Mbɛ̌r-Nzyɛ̌m bɨ́bɛ̂h ngá gʉ́a ó, mɛm ó dí egʉ́a bíjwɨʼ ndu e bigwɨ́má bí bʉ̂r yɨ́. Me ójána mʉ̂r nyɨnyɛ̂h ɨ́ sɔ́má yɨ́n ó, dû mpʉ bísyɛ́ɛla byé dí yɨ́.

²⁴Nó ó, bɨ̌n, bʉr o dí adû bébebébe lɛ́ʼlá wɨ̂ʼ bá, bɨ̌n bé adû mísolá mílɛ́ʼlá Sátan dí edwe, myaá bʉ́ʉ́ bʉ̂r dí elɛ́ɛ ó, myé ó tyeetye mí. Mé akɛl bɨ́n gúú mběʼ swîh.

²⁵Mě lɛ́ɛ́ bɨ́n ó, sâ gwár yɨ̂: sá bɨ́n dí e yé yɨ́, baʼlaa gá yê, tó kumo ɨ́ jɔʼ mé óbáʼǎ nze yɨ́.

²⁶Bʉr o ngá ntaa, búla le onkɔ́ɔ́, baá ngá séǎ syɛ́ɛ́ yâm, tó pyâl lɨ́ esíé bá, me ódil bé ɨ́ bidǐ bí ójwɨ́ɨ. Bé ojwɨ́ɨ bʉ̂r o bíkúl bíbyɛ̂h.

²⁷Bé ópɨpála bé ó e nkul jwɨ́ɨ ɨ́ lele lele mpʉ̌ súmǔ nkóho. Bé óbʉ̂ bé ɨ́ mpʉ mʉ̂r dí ebʉ̂ míkáʼ mí déʼé bipêh bipêh yɨ́. Bé óbi nkûl e me mpʉ mé á nʉa nkul kwá mé Sɔ́ŋ wǎm yɨ́.

²⁸Me ódwe bé ntémé twítwén dí epan ɨ́ melɔ́ma mé mɛ́n nyá.

²⁹Mekǎn Sísǐm dí elɛ́ɛ̌ Mbɛ̌r-Nzyɛ̌m má, mé ó ménɨ̌. Mʉr nyɨnyɛ̂h dí e megwǎl mé éjóʼo nyá, nye jóʼaa náǎ.»