Read Koonzime Twóm 20 Bible Online

Twóm 20 - Koonzime bible

Twóm 20

¹Nó ó, me á si bee nyʉ́ʉ́ éngeles lɨ́ eduho ɨ́ jʉ́o kʉ́, sulo sí. Nye á be ó e sab ɨ́ mbô, lɨ́ etó dǐb bɨ́ dí sí ɨ́ kœ́ʼlɛ́ yɨ́. Nye ntémé á be ó e kʉ̂kɔ̌b ɨ́ mebô ɨ́ dile dile.

²Nye á si to mɛ̂r njʉ̌m myɔ́ɔ́ dí e díe ó, «Sɔ́ŋ meleme», nkʉ̂ «Sátan» wɨ́. Éngeles waá á si mɛ̂r nye, kâʼ nyé e kʉ̂kɔ̌b. Nye ódǐ kɛ́ʼá tɔ́ɔ́sin mimbû.

³Jɔʼ éngeles á kâʼ nye, ntɔ̂ʼ guho nyé ɨ́ bɨ́ dí sí ɨ́ kœ́ʼlɛ́ yɨ́, bê nzě diblě nǔm bɨ́ yaá, pɨr méngʉŋ me tɨ̂ʼ e sab. Nye nzě gbâ sitâm ɨ́ dibla ébê, lɨ́ ekamle nyé lɨ́ epyâl tɨ̂. Nye ámû jaá báʼǎ tô le edímle bʉ̂r ó sí yɨ̂ʼ bɨ́bɛ̂h ɨ́ nzɨ̌ mikóo. Píe mimbû tɔ́ɔ́sin, bé obáʼǎ bîr nyé mâ péh éwala, ó nye pyálaa kʉ̌l.

⁴Píe tɨ̂, me á si bee mecwɨ́ɨ́ mé ójwɨ́ɨ, le bʉr o b'á be tɨ̂ʼ mindîndǐl bá. Nzyɛ̌m á si dwe bé nkul etíʼe bʉ̂r milɔ̌b. Me á si bee ntémé misísǐm mi bʉ̂r. Bé á tíʼɔɔ milʉ̂ ó, ɨ́ lɔ̌b mboʼlá dí edumo e Yésʉs wɨ́, ti e lɔ́ɔ́ mé Nzyɛ̌m. Bɨ́ɛ á bé adwe tír waá, bé e kpɛʼkpɛ̂ʼ mveʼle yé bɨ́bɛ̂h kûm. Bé á bé acɛmǎ jwɨʼ yé ɨ́ mempǒm mɔ́ɔ́ ti e lɨ́ koo ékœ̂h. Me á bee bé ó, bé osí pah. Bé e Yésʉs-Krîst, bé á si njwɨ́ɨbʉr ó sí tɔ́ɔ́sin mimbû.

⁵Bʉr o bé ésôʼ lɨ́ etáare épah ó bâ. Bʉ́ʉ́, bé ókǎ pah ó, mimbû tɔ́ɔ́sin, myé osí laa.

⁶Metyɛʼ me mpóm, mé óbuú buo ó e bʉr o ngá nyɛɛ́ pah bá. Bé gúmó ó e Nzyɛ̌m nye omér. Bé ádwe éswie embá. Bé óbe ó opara o dí eséa ɨ́ míh mé Nzyɛ̌m, bé e Yésʉs-Krîst bá. Bé e Yésʉs-Krîst, bé ójwɨ́ɨ tâŋ mimbû tɔ́ɔ́sin.

⁷Jɔʼ mímbû tɔ́ɔ́sin ngá be, myé mû sí laa yɨ́, bé otiǐ Sátan menkara, pɛʼɔɔ nyé lɨ́ okómó.

⁸Nye ótô kʉ̌l, nyé obáʼǎ nyɛl édímle bíkûl e biloo ɨ́ mesí mɨ́mɛ̂h. Mesí maá, mé jɨ́jébɔ́ɔ́ ó, «Gôg» ti e «Magôg». Nye ójébe bʉ̂r o bíkûl baá, syɛŋ bé gúmo gwár lɨ́ esú ó, bé tôʼ le elwímla dɔ̂m e Nzyɛ̌m. Bʉr o ngá tô ó, bé lwímlá ó dɔm laá bá, bé óbuo. Bé ó mpʉ ósɨ́ǎ o mâŋ, abe e tólɔ́ɔ.

⁹Bé á duho ó, lɨ́ ejaa, pyálɔɔ̌ nko bʉ̂r o mé Nzyɛ̌m bé á komlo ebɨ̌m e dɔ̂m lɔ́ɔ́ yɨ́, bɔmɔɔ bé ɨ́ nká. Bɔmɔɔ ntémé nkanǎ Nzyɛ̌m dí ɨ́ buú kpɛl yɨ́ ɨ́ nká. Le bé á kʉ bɔma bé ɨ́ nká, lě siʼe ntɔ̂ʼ á duho ɨ́ jʉ́o kʉ́, dîʼ bɨ́bɛ̂h.

¹⁰Nó ó, sɔ́ŋ meleme, mʉr á kʉ dímle bɨ́bɛ̂h nyá, á si mɛ́rɔɔ, guhɔɔ ɨ́ bɨ́ siʼe. Tɨ̂ʼ ó pir dí edúo jɔʼ yɨ́yɛ̂h, adímedime yɨ́. Bé á guho nye ó, ɨ́ gúmó bé á nyɛɛ guho tír, bé e ngwíha milɔ̌b bibɛr yɨ́. Bé ójaʼra e siʼe yaá tɨ̂ʼ ó, móhó ndu e pum, kɔ́m ti e kɔ́m.

¹¹Nó ó, me nzě bee mécwɨ́ɨ́ mé jwɨ́ɨ ménɨ́nɨ́ɨ́, mé á be ɨ́ pumo pumo má. Me á si bee ntémé waá á be tɨ̂ʼ ndîndǐl nyá. Sí yɨ̂ ndu e jʉ́o, byé á si dîm ɨ́ míh mé.

¹²Me ntɔ̂ʼ bee ódwe. Ɨ́ bʉr baá, yé á be ó, le minjwɨ́ʼ mí bʉ̂r ndu e baántéʼenteʼe o bʉ̂r. Bé á be ó sí tyɛ̂b ɨ́ mpǒm mecwɨ́ɨ́ mé jwɨ́ɨ. Mekaná, mé ntɔ̂ʼ bɛ́ɔɔ ɨ́ buo buo. Mʉ́ʉ́ mékaná meswîh ntɔ̂ʼ bɛ́ɔɔ ntémé, mɨ́haá e míé mé bʉ̂r o ngá bǐ twǐʼ njʉ̌m dǐ bá. Nzyɛ̌m nzě pahle bʉ̂r o b'á dwe bá. Nye á tíʼe milɔ̌b myɔ́ɔ́ ó, lɨ́ edû mpʉ bísyɛ́ɛla byɔ́ɔ́ byé á be yɨ́. Bibaa bísyɛ́ɛla byɔ́ɔ́ byaá, byé á be ó micɛmá lɨ́ ebɨ́ʼ é mékaná mé ésôʼ maá.

¹³Mâŋ, mé á si bwóolo bím bʉ̂r o mé á jʉ̂ bá. Bʉr o b'á nyɛɛ be kwár odwe bá, pyálɔɔ tɨ̂ʼ ɨ́ mpululu. Mʉr nyɨnyɛ̂h ɨ́ sɔ́má bʉ̂r baá á pahlɔɔ ó, dû mpʉ bísyɛ́ɛla byé nyé á sɨ̂sa bí, byé á be yɨ́.

¹⁴Píe tɨ̂, eswie bé e kwár odwe, byé ntɔ̂ʼ guhɔɔ ɨ́ bɨ́ siʼe. Bɨ́ siʼe yaá ó dí gúmó bʉ̂r dí edwe éswie embá yɨ́.

¹⁵Bʉr o b'á be abe e míe micɛmá ɨ́ mekaná mé twiʼ bá, bé ntémé, bé á si guhɔɔ ɨ́ bɨ́ siʼe yaá.