Read Koonzime Twóm 21 Bible Online

Twóm 21 - Koonzime bible

Twóm 21

¹Me á si bee edwán é jʉ́o le edwán é sí, ebě, jʉ́ó ésôʼ bé e sí ésôʼ, byé á be ó sí laa. Mâŋ, mé á bé akǎ be.

²Me á si bee ntémé nkana dí tí yɨ́: edwán é Yerʉ́zalɛm. Me á bee yé ó, ɨ́ jɔʼ yé á be, yé mû sí duho kwá mé Nzyɛ̌m ɨ́ jʉ́o kʉ́, sulo sí yɨ́. Yé á be ó kʉmsá mpʉ̌ bíŋ mʉ́má dí edweŋɔɔ bísá bí nyaŋá ó, yé óbwâm, tô nko njʉ̂m wé dí yɨ́.

³Me nzě jóʼo twíí á duho ɨ́ mecwɨ́ɨ́ mé jwɨ́ɨ nyɨ́. Nye á lwib kʉ́kʉ́ ó: «Bɛɛngɛ́ɛ! Nzyɛ̌m, nyɨ́ komlo ódiá wé páʼ bʉ̂r e bʉr. Nye ódi ó ɨ́ bê. Bé óbe ó bʉr o Mpóʼo nyé. Nzyɛ̌m mʉr tɨ̂ʼ ódi páʼ nyɔ́ɔ́.

⁴Nye ótin myɛ́ɛlé mɨ́mɛ̂h ɨ́ míh mɔ́ɔ́. Bé ákǎ jóʼo mégunwa. Bé ákǎ dwe. Eswie akǎ be. Bé ákǎ jɨ médwê. Bisá bí myâ byaá, byé ódîm.»

⁵Nó ó, waá á be ɨ́ mecwɨ́ɨ́ mé jwɨ́ɨ nyá, á nze lɛ́ɛ ó: «Beyɨɨ gá, me mû ó lɨ́ esâ bísá bíbyɛ̂h medwán e medwán!» Nye nzě lɛ́ɛ e me ó: «Cɛmaa bílwǐb bî. Byé ó milɔ̌b mimpâ le otyeetye.»

⁶Nye e me ó: «Yɨ́ síe! Me ó mʉr esôʼ ndu e waá epíhe. Me ntémé, me ó menyɛ̌l mé sá yɨ́yɛ̂h ti e meswéhlɨ́ mé tɨ̂. Mʉr dí ejóʼǒ dwéh médíbé nyá, mɛm ódwe nyé mǎ edwɛ́na. Medíbé maá, mé ó maá me dí egʉ̂, duho lɨ́ enó é twiʼ má.

⁷Waá óntaa, búla le onkɔ́ɔ́ nyá, ónʉa médíbé maá, jala e nkɔb líʼe nyé. Me óbe ó Nzyɛ̌m wé. Nye óbe mé ó mwân.

⁸Baábʉ́bʉ́á bɨ́ɛ, bé le ohááden, bʉr o dí e milémé mébomo, ojʉ̂l o bʉ̂r, osyɛ̂l o bímolá, oleme ti e baá o dí edwe bíkpɛʼkpɛ̂ʼ bí ónzyɛ̌m kûm bá, ndu e baányâ-mikóo bɨ́bɛ̂h, bɨ́ɛ, bé ójaá kœb ódiá wɔ́ɔ́ ó, njɨ ɨ́ bɨ́ siʼe. Yé ó lwɨ́ŋlá e siʼe ti e pir. Yé ɨ́ buú díʼa. Tɨ̂ʼ ó bʉ̂r dí edwe éswie embá yɨ́.»

⁹Nyʉ́ʉ́ éngeles á si nze kwá nyǎm. Nye á be ó mʉr ngwár ɨ́ beéngeles nzaangbá bé á nkɨnkɛ́ɛ mempéle nzaangbá ɨ́ mebô má. Mempéle maá ó b'á be milwɨ́ŋlá e mitúú mí épíhe. Nye e me ó: «Ntáʼ! Me múo nzě lɛ̂ʼle gó eséhe Mâ Nteme ngá bâ lɨ́.»

¹⁰Tyé e tyé yaá, me á be ó, ɨ́ nkul Sísǐm mé Nzyɛ̌m. Éngeles waá nzě tô e me lɨ́ ecwɨ́ʼ énɨ́nɨ́ɨ́ kʉ́. Lé á be ó, ɨ́ buú jaa kʉ́. Bɨ̌h mû gʉ̂ʼ nɛ́ɛ: nye á si lɛ̂ʼle me Yerʉ́zalɛm, nkana dí tí yɨ́. Yé á be lɨ́ esulo sí ɨ́ nteeen, duho ɨ́ jʉ́o kʉ́, nkǒ Nzyɛ̌m dí yɨ́.

¹¹Yé á ntíntyɛnwa ó, mentyɛnwa mé Nzyɛ̌m, ɨ́ mpʉ ékóʼ é diamant. Yé á ntíntyɛnwa ó, mpʉ̌ jaspe ɨ́ ncwɛ̌n ntɨ̂ ncwɛ̌n.

¹²Bé á si kɛb nkana e kôʼ ɨ́ pibe pibe ɨ́ nká. Kôʼ waá, wé á be ntémé ó, kʉ́ ɨ́ jaa jaa. Mebê mé énî ɨ́ nkana, mé á be ó kám e mebá. Beéngeles kám le obá, bé á be ó tɨ̂ʼ ɨ́ mebê maá. Tɨ̂ʼ ɨ́ mebê maá kʉ́, bé á si cɛma míé ménzweh kám e mebá mé bʉ̂r o b'Ɨ́zraɛ̂l.

¹³Ɨ́ mempah mé nkana mɨ́mɛ̂h menâ, yé á be ó e mebé mélɛ̂l. Mâʼ mébé mélɛ̂l, mé á be ó, ɨ́ nko méjɨma me dʉ́o. Mâʼ mélɛ̂l, ɨ́ nko méjá mé dʉ́o. Mʉ́ʉ́ mélɛ̂l, ɨ́ tín, mâʼ melɛ̂l ɨ́ nko tie.

¹⁴Bé á si gbâ mekóʼ kám e mebá tʉ́ŋlʉ̌ kôʼ waá. Bé á be ó sí cɛma míé mé bʉ̂r o mílʉ́mlʉ́ kám le obá Mâ Nteme á títye e bé bá, ɨ́ mekóʼ maá.

¹⁵Éngeles á lwilwib e me nyá, á be ó e lɨ́ nyé á jwɨjwɨʼ bisɔ̂ʼ e tɨ̂ʼ yɨ́ ɨ́ mbô. Yé á be ó lúlá e gʉ̂l. Nye á be ó lɨ́ etó jwɨ̌ʼ nkana, ndu e mebê, le kóʼ wé.

¹⁶Nkana, yé á be sumá ó, mipáʼ mínâ; mipáʼ mímyɛ̂h mityé. Éngeles waá á si jwɨʼ nkana e jwɨʼ nyé á be e tɨ̂ʼ yɨ́. Ejaa é nkana, lé á be ó tâŋ okíloméra otɔ́ɔ́sin obá e minter mimbá (2.200). Mpwaʼ mo le etô e kʉ́, byé á be ntémé ó, jwɨʼ gwár yaá.

¹⁷Nó ó éngeles á si jwɨʼ kôʼ. Wé á be ɨ́ jaa kʉ́. Bé á jwɨʼ wé ó e meniʼra mé mbô nter e mekám ménâ e menâ. (Jwɨʼ yaá, yé ó mpʉ bʉ̂r dí eboó jwɨjwɨʼ bísɔ̂ʼ yɨ́.)

¹⁸Bé á sâ kôʼ waá ó, le ekóʼ é jaspe lɨ́. Nó ó, kuó nkana wɨ́ɛ, wé á be sumá ó e gʉ̂l. Yé á ntíntyɛnwa ó, mpʉ̌ lá.

¹⁹Pâʼ kóʼ wé á duho sí wɨ́, wé á tityɛ̂b ó, ɨ́ mimbi mékóʼ me dí ɨ́ buú mbɨa lɨ́ ebee mí. Mé á be ó menyʉ̂l menyʉ̂l. Mekóʼ bé á sumo kôʼ e tɨ̂ʼ má ó dí: laá lé ésôʼ jaspe; laá émbá: saphir; laá élɛ̂l: agate; laá énâ: émeraude;

²⁰laá étɛ̂n: onyx; laá ésaman: sardoine; laá e nzaangbá: chrysolithe; laá e mwôm: béryl; laá lé ébǔ: topaze; laá e kám: chrysoprase; laá e kám le egwár: turquoise; laá e kám e mbá: améthyste.

²¹Bidibla mébé mé nkana kám e mebá, byé á be ó misɛ́á le ekóʼ é pérel. Minkpǎʼ mí nkana mímyɛ̂h, myé á be ó e gʉ̂l. Yé á be lɨ́ entyɛnwǎ mpʉ̌ lá.

²²Me á bé abee mpáh Nzyɛ̌m tɨ̂ʼ ɨ́ nkana yaá, ebě, Dâ Nzyɛ̌m, Nzyɛ̌m nkul nyɨnyɛ̂h mʉr tɨ̂ʼ ó dí edila mpáh nyaá, bé e Mâ Nteme.

²³Bʉr ó nkana yaá, bé ajɨ mímbah, nkʉ̂ myaá mi dʉ́o, nkʉ̂ myaá mí álomó, ebě, mentyɛnwa mé Nzyɛ̌m, mé lɨ́ epan gʉ̂. Mâ Nteme ó dí eláma ɨ́ nkana yaá.

²⁴Bʉr o bíkúl bíbyɛ̂h, bé ótye mbɨ̂mbɨá ɨ́ lɔ̌b myɛ́n njʉl waá ngá pan wɨ́. Ojwɨ́ɨ́ ó sí yɨ̂ʼ bɨ́bɛ̂h, bé ónze le okúm le ogbaa wɔ́ɔ́, nî ɨ́ nkana yaá.

²⁵Mebé mé nkana, mé ádiblɔɔ ɨ́ yʉ́ʉ́ jɔʼ, ebě, pum, wé ákǎ dwíne gʉ̂.

²⁶Bé ónze le okúm le ogbaa wɔ́ɔ́, sá bʉ̂r ó sí yɨ̂ʼ dí egúmlo yɨ́. Bé ótó níŋle byé ɨ́ nkana yaá.

²⁷Nó ó, bisá mélwaʼwo bíɛ, byé ákóʼó nî gʉ̂. Bʉr o dí esâ bísyɛ́ɛlǎ Nzyɛ̌m dí ɨ́ buú bene bí bá, bé e baányâ-bibɛr, bé ákóʼó nî ntémé gʉ̂. Bʉr o ngá nî gʉ̂ʼ bá, bé óbe ó njɨ baá bé á boo be e míe micɛmá ɨ́ mekaná mé twiʼ mé Mâ Nteme bá.