Read Koonzime Twóm 22 Bible Online

Twóm 22 - Koonzime bible

Twóm 22

¹Nó ó, éngeles waá á si lɛ̂ʼle me díbé ɨ́ ntyɛ́h ntyɛ́h, mpʉ̌ lá. Yé ó dí e medíbé me dí etíʼ bʉ̂r má. Yé á duduho ó, ɨ́ mecwɨ́ɨ́ mé jwɨ́ɨ́ mé Nzyɛ̌m, bé e Mâ Nteme.

²Ɨ́ nkana yaá témé, yé á be ó e lɨ́ twiʼ. Yé á be ó, ɨ́ mipɨ̌n mí díbé yaá mímyɛ̂h mimbá. Lɨ́ yaá, yé gúmó mpúmó ɨ́ mbû ó, bijɔʼ kám e bibá, jɔʼ gwár ɨ́ ngɔn. Bʉr o bíkúl bíbyɛ̂h jʉ́jómó mékpaa mɔ́ɔ́ ó e biká bí lɨ́ yaá.

³Abe e mʉr lɨ́ elîʼ e meswomlʉ mé Nzyɛ̌m tɨ̂. Sá yé óbe tɨ̂ʼ yɨ́, yé ó mecwɨ́ɨ́ mé jwɨ́ɨ́ mé Nzyɛ̌m, bé e Mâ Nteme. Osyɛ̂l o mésá bé, bé ódwidwe nyé kûm.

⁴Bé óbee mpóm nyé. Díé lé ntémé, lé ócɛmɔɔ ɨ́ mempǒm mɔ́ɔ́.

⁵Pum, wé ákǎ dwíne gʉ̂. Nó ntémé, meláma ndu e dʉ́o, byé ákǎ jɨŋɔɔ gʉ̂, ebě, Dâ Nzyɛ̌m mʉr tɨ̂ʼ ópǎn myɛ́n. Bé e boo Nzyɛ̌m, bé ójwɨ́ɨ̌ njʉ̌m dǐ e njʉ̌m dǐ.

⁶Nye e me ó: «Milɔ̌b mî, myé ó milɔ̌b mimpâ le otyeetye. Dâ Nzyɛ̌m, nye lɨ́ entɨh ógwíha o mílɔ̌b bé Sísǐm wé ó, bé lɛ́yɨɨ lɔ́ɔ́ wé. Nye ó b'á lómlo osyɛ̂l o mésá bé éngeles wé ó, nye ntáa nzě lɛ́ɛ bé sá mû kúno esyɛ́ɛ yɨ́.»

⁷Yésʉs, nye lɨ́ elɛ́ɛ ó: «Paá bee gâ: me lɨ́ enze ɨ́ báánâ. Metyɛʼ me mpóm, mé díʼee e baá bé óbaʼle mísolá mílɔ̌b mi dí micɛmá ɨ́ mekaná mâʼ tʉ́ŋlʉ̌ mí bá.»

⁸Mɛm Yʉánɛs, me ó b'á jóʼo bisâ bîʼ e megwǎl, bee ntémé e míh mâm. Jɔʼ mé á jóʼo le ebee byé bíbyɛ̂h yɨ́, me ntɔ̂ʼ kúrwo sí, píʼe mpóm sí ɨ́ mpǒm éngeles á lɛ̂ʼle me byǎ nyá, lɨ́ esâ ó, mě dwé ó nye kûm.

⁹Nye e me ó: «Sá asâ nó. Me ntémé, me ó syɛ̂l mesâ mé Nzyɛ̌m jwɨʼ gwár e gwár e bɨ̌n e bɨ́ɔɔ́ bô, ogwíha o mílɔ̌b, bé e baá bɨ́bɛ̂h o dí ebaʼle mílɔ̌b mékaná mâʼ bá. Dwéʼ Nzyɛ̌m kûm.»

¹⁰Nye á si baʼa lɛ́ɛ e me ó: «Sá Nzyɛ̌m gwíh gó, yaá dí cɛmá ɨ́ mekaná mâʼ yɨ́, asol yé ɨ́ mekaná tʉ́ŋlʉ̌, ebě, bisâ byaá, byé ókpâhwǎ syɛ́ɛ.

¹¹Mʉr dí ekpɛl ésâ ébébe nyá, nye e tó dóló le esâ lê. Waá dí ekpɛl éswêʼ nyʉ̂l nyé nyá, nye tôʼ dóló le esâ nó. Nó ó, waá dí tîtyěl nyá, nye tôʼ dóló le esâ bísyɛ́ɛla bi dí otîtyěl bí. Mʉr dí tí nyá, nye tôʼ dóló le edi mʉ̂r dí tí nyá.»

¹²Yésʉs, nye lɨ́ elɛ́ɛ ó: «Paá bee gâ: me lɨ́ enze ɨ́ báánâ! Me mû ó lɨ́ enze e myɛ́na ɨ́ mebô, ó me jánaa e mʉr nyɨnyɛ̂h syɛ́ɛ́ nyé á séa yɨ́.

¹³Me ó dí waá esôʼ ndu e waá epíhe, metááré le eswéhlɨ́, menyɛ̌l le mesíé.

¹⁴«Metyɛʼ me mpóm, mé díʼee e bʉr o dí ejwɨɨ míkán myɔ́ɔ́, myé mû ɨ́ púúm bá. Bɨ́haá ó dí e nkul enî ɨ́ nkana yaá. Bé ónî ó, cɨɔɔ ɨ́ mebé mé. Bé ntémé, bé ó jálá le ede mpúmó dí egúmo ɨ́ lɨ́ twiʼ nyɨ́.

¹⁵Nó ó, ompyê, oleme, osyɛ̂l o bímolá, ojʉ̂l o bʉ̂r, baá o dí edwe bíkpɛʼkpɛ̂ʼ bí ónzyɛ̌m kûm bá, le baányâ-bibɛr bɨ́ɛ, bé ódwoowǒ kʉ̌l.

¹⁶«Mɛm Yésʉs, me á si lómlo bɨ̌n éngeles wǎm ó, nye ntáa nzě boʼlo gó milɔ̌b mi dí edwɛ̂ʼ Mbɛ̌r-Nzyɛ̌m mí. Mɛm, me ó mâ nta mé David, waá á byɛ̂l mpʉ̌ ntoʼdu á pâh ɨ́ kǔm lɨ́ yé á twɛlɔɔ twɛlɨ́ɨ yɨ́ ny. Me ntémé ó dí twítwén dí ɨ́ buú pan ɨ́ melɔ́ma mé mɛ́n nyá.»

¹⁷Nó ó Sísǐm mé Nzyɛ̌m, bé e mʉmá mé Mâ Nteme, bé lɨ́ elɛ́ɛ ó: «Ntáʼ!» Nó ntémé ó, mʉr dí ejóʼo nyá, nye lɛ́yɨɨ ntémé ó: «Ntáʼ!» Mʉr dí ejóʼǒ dwéh médíbé nyá, nye ntâʼ. Waá kpɛ́l nyá, nye dáalaa medíbé mé twiʼ, abwâm.

¹⁸Mɛm Yʉánɛs, me lɨ́ ecɨ̂l mʉ̂r nyɨnyɛ̂h dí ejóʼo míngwíhá mékǎn me dí ɨ́ mekaná mâʼ má ó: Mʉ̂r ókɛl lʉ́ʉ́ ékǎn tɨ̂ʼ nó, Nzyɛ̌m ntémé ódwe nyé bintɨ́ʼá, le ekɛl ntémé byúú bínumo bi dí micɛmá ɨ́ mekaná mâʼ bí.

¹⁹Mʉ̂r ópɛʼ lʉ́ʉ́ ékǎn dí egwíhɔɔ ɨ́ mekaná mâʼ lɨ́ nó, Nzyɛ̌m ntémé ópɛʼ nkɔ̂b mpumó nyé á gwa bi, duho ɨ́ lɨ́ twiʼ nyɨ́. Nzyɛ̌m ópɛ̌ʼ diá nyé á gwa di tɨ̂ʼ ɨ́ nkana dí tí yɨ́. Lɨ́ twiʼ le nkana yaá, byé ntémé, byé ó byaá dí micɛmá ɨ́ mekaná mâʼ bí.

²⁰Waá dí eboʼlo mílɔ̌b mîʼ nyá, nye lɨ́ elɛ́ɛ ntémé ó: «Yé ó nó. Me lɨ́ ekpâhwǎ báʼǎ nze.» Yé díʼee nó. Dâ Yésʉs, ntáʼ!

²¹Tî Yésʉs sʉ́ʼoo bʉr bɨ́bɛ̂h metyɛʼ me mpóm. Amɛn.