Read Koonzime Twóm 4 Bible Online

Twóm 4 - Koonzime bible

Twóm 4

¹Píe tɨ̂, mé ká bee nɛ́ɛ: bee ébê mběʼ ɨ́ jʉ́o kʉ́. Me ntɔ̂ʼ báʼǎ jóʼo twíí esôʼ. Twíí nyaá ó b'á lwib ɨ́ mpʉ sébé. Nye á lɛ́ɛ e me ó: «Ntáʼ kâʼ kʉ́, me lɛ̂ʼlaa go bisyɛ́ɛla bi dí ejala le esyɛ́ɛ bí.»

²Tyé e tyé yaá, me á be ó ɨ́ nkul Sísǐm mé Nzyɛ̌m. Nó ó, me á si bee mecwɨ́ɨ́ mé jwɨ́ɨ ɨ́ jʉ́o kʉ́. Nyʉ́ʉ́ mʉ̂r á be ó tɨ̂ʼ ndîndǐl.

³Nye á be ɨ́ buú ntyɛnwa. Mentyɛnwa mé, mé á nwɨɨla ó e jaspe nkʉ̂ sardoine. Nkulyɛ̂n á be ó lɨ́ ebɔma mécwɨ́ɨ́ mé jwɨ́ɨ́ yé ɨ́ nká. Nkulyɛ̂n waá á be ó lɨ́ epan ɨ́ mpʉ émeraude.

⁴Bidiá bí ójwɨ́ɨ mekám mébá e binâ, byé á be ó lɨ́ ebɔma mécwɨ́ɨ́ mé jwɨ́ɨ yaá ɨ́ nká. Otɔ́má bʉ̂r mekám mébá le onâ, bé á be ó tɨ̂, mindîndǐl, e mikán ɨ́ pumo pumo ɨ́ menyʉ̂l ndu e bikáráá bí gʉ̂l ɨ́ milʉ̂.

⁵Nó ó, mecwɨ́ɨ́ mé jwɨ́ɨ yaá, mé á be lɨ́ esâ míndweh. Me á be lɨ́ ejóʼo métwíí ntémé, duho tɨ̂. Mindum mi mpíé, myé á be ó lɨ́ entíŋla ntémé. Yé á be tɨ̂ʼ ntémé ó e meláma nzaangbá lɨ́ edúo ɨ́ pan pan. Mɨ́ɛ, mé ó misísǐm nzaangbá mi dí etyɛ̂b ɨ́ míh mé Nzyɛ̌m mí.

⁶Yʉ́ʉ́ sɔ̂ʼ ɨ́ bɛl bɛl, yé á be ó, lɨ́ empǒm e mécwɨ́ɨ́ mé jwɨ́ɨ yaá, ɨ́ mpʉ mâŋ dí epan ɨ́ ngé ngɨ ngé mpʉ «cristal» má. Yé á be ó e mikublakúbla mí ótír ónâ, bɨ́ɛ lɨ́ etyɛ̂b ɨ́ mempah mécwɨ́ɨ́ mé jwɨ́ɨ. Mimo ndu e mikoo myɔ́ɔ́, myé á be ó e mîh lwɨ́ŋlá.

⁷Tír esôʼ, nye á nwɨɨla ó e ngbampɨɨ. Waá mbá nwɨɨla e njɨ́h ntœœ. Waá lɛ̂l, nye á be ó e mpǒm nwɨɨla e mpǒm mʉr. Nó ó, waá nâ, nye á nwɨɨla ó e mpele nʉ̌n nɨ́nɨ́ɨ́ lɨ́ epiilɨ.

⁸Otír baá bɨ́bɛ̂h onâ, bé á be ó e mempabaá mésaman. Mempabaá mɔ́ɔ́, mé á be ó lwɨ́ŋlá e mîh, damá jóʼo sí mempabaá, damá jóʼo ntémé kʉ́. Bé á be ó lɨ́ edyɛɛ méjéme móhó e pum. Bé á didyɛɛ, le enzě lɛ́ɔɔ ó: «Ti, ti, Dâ, dí Nzyɛ̌m nkul nyɨnyɛ̂h nyá, nye ó waá dí ti nyá. Go ó b'á boo be. Go ó dína. Go ntémé, go óbáʼǎ nze.»

⁹Nó ó míkublakúbla mí ótír myé á dyɛɛ nye jɨ̂m le egúmlo mʉ̂r á be ɨ́ mecwɨ́ɨ́ mé jwɨ́ɨ, waá dí e twǐʼ njʉ̌m dǐ nyá. Bé á si dwe nye nzyǒo ɨ́ mejéme mɔ́ɔ́.

¹⁰Jɔʼ yɨ́yɛ̂h bé á sɨsâ nó yɨ́, otɔ́má bʉ̂r mekám mébá le onâ baá, bé á si pipíʼa sí ɨ́ mpǒm mʉr á be ɨ́ mecwɨ́ɨ́ mé jwɨ́ɨ nyá, lɨ́ edwe mʉ̂r dí e twǐʼ njʉ̌m dǐ nyá kûm. Bé á be lɨ́ epɨpɛʼ bíkáráá bí gʉ̂l byɔ́ɔ́ ɨ́ milʉ̂, didyɛ́ʼɔɔ byé sí ɨ́ míh mé. Bé ó:

¹¹«Dâ Nzyɛ̌m wɨ́h! Yé jala ó, bʉr gúmlaa go, ebě, go ó tîtyěl mʉr. Go lɨ́ ejala ntémé ó, bé sêʼlaa go, le edwe gó nkul nyɨnyɛ̂h. Ebě, go ó b'á komlo bisá bíbyɛ̂h. Ɨ́ gwɨ́má yô ó, gó á komlo byé yɨ́. Sá tɨ̂ʼ ó byé dí tɨ̂ʼ yɨ́.»