Read Koonzime Twóm 5 Bible Online

Twóm 5 - Koonzime bible

Twóm 5

¹Nó ó, me á si bee mʉr ndîndǐl ɨ́ mecwɨ́ɨ́ mé jwɨ́ɨ le mekaná ɨ́ mbô. Nye á mɨmɛ̂r nye ó, ɨ́ mbó éjʉ̂m. Bé á cɛma mekaná maá ó, lɨ́ ecɛma lɨ́ epéb ɨ́ mipáʼ mímbá, ntɔ̂ʼ píle lê. Bê nzě nɛ̌r luʼ tɨ̂ʼ ɨ́ bigúmo nzaangbá, ntɔ̂ʼ kǎ gbáŋɔɔ ntémé sitâm ɨ́ bigúmo nzaangbá byaá, ó mʉr swîh ámû jaá dib.

²Me nzě beě njɨ́h éngeles. Yê nzě dî tíá le etyêl kʉ́ ó: «Nzé dí tyé mʉ̂r dí ó, nye pɛ́ʼɛɛ luʼ, bɛ́ɛ mekaná mâʼ nyá?»

³Nó ó, yé á bé abe e mʉr. Táare ɨ́ jʉ́o kʉ́ ndu e sí, le tʉ́ŋlʉ̌ bibwǎh sí, abe e waá á dweŋɔɔ nkul dí ó, nye bɛ́yɨɨ mekaná maá, dwɛ̂ʼ mé tʉ́ŋlʉ̌.

⁴Me á si bu jɨ, ebě, yé á bé abe e mbi mʉ̂r dí ó, nye bɛ́yɨɨ nye, dwɛ̂ʼ tʉ́ŋlʉ̌.

⁵Nó ó, nyʉ́ʉ́ tɔ́má mʉr lɨ́ otɔ́má bʉ̂r baá á lɛ́ɛ e me ó: «Sá akǎ jɨ. Jwɛ́ʼɛ́ɛ, ngbampɨɨ, wɨ́ pyâl, duho lɨ́ onzweh mé Yʉ́da! Wé ó mâ nta mé David, waá á byɛ̂l mpʉ̌ ntoʼdu á pâh ɨ́ kǔm lɨ́ yé á twɛlɔɔ twɛlɨ́ɨ yɨ́ nyá. Wɨ́ɛ, wé á si ntaa sá yɨ́yɛ̂h. Wé ó b'á dweŋɔɔ nkul dí ó, wé pɛ́ʼɛɛ bisitâm nzaangbá byaá, bɛ́ɛ mékaná dí pílá má.»

⁶Nó ó mé á dwɛ̂ʼ, bee ó, nkúná yé á be ó Mâ Nteme. Nye á si tyɛ̂b páʼ mecwɨ́ɨ́ mé jwɨ́ɨ le mikublakúbla mí ótír minâ, le otɔ́má bʉ̂r baá. Yé á kʉ be ó, kwahaá mpʉ sá lɛ́ɛ́, bé á si jʉ̂ nye. Nye á be ó e bintóo nzaangbá ɨ́ lʉ̂. Nye á be ntémé ó e mîh nzaangbá. Míh mé, mé ó misísǐm nzaangbá myé á lómɔɔ ɨ́ sí yɨ́yɛ̂h mí.

⁷Mâ Nteme waá nzě sîhle, tô nko mʉ̂r á be ɨ́ mecwɨ́ɨ́ mé jwɨ́ɨ nyá, ntɔ̂ʼ nʉa mékaná maá e mbó éjʉ́m wé.

⁸Jɔʼ nyé á nʉa nye yɨ́, mikublakúbla mí ótír minâ myaá, le otɔ́má bʉ̂r mekám mébá le onâ baá, nzě bɨʼ mébóó sí ɨ́ mpǒm nyé. Mʉr nyɨnyɛ̂h ɨ́ sɔ́má yɔ́ɔ́ á be ó e mpêr ɨ́ mebô, ndu e mempélé mé gʉ̂l, mɨ́mɛ̂h milwɨ́ŋlá le otú ó dúu lɨ́ edúo. (Otú waá, wé ó mveʼle, sá dí elɛ̂ʼle mínjɨʼla bʉ̂r o mé Nzyɛ̌m dí esâ nyé mí.)

⁹Bé á didyɛɛ ó, edwán é jɨ̂m. Bé ó: «Go ó jálá le enʉa mékaná mâ, gbɛ́ɛ bísitâm, ebě, go á si jʉ́ŋɔɔ. Go á si dwih bʉr ɨ́ mpila ébébe, tô e bé kwá mé Nzyɛ̌m. Go á si syɛ́ɛla metié mô lɨ́ esú é bʉ̂r baá. Bé ó bʉr o bíkúl bíbyɛ̂h, ndu e bilwǐb bíbyɛ̂h, bʉr o mémpóʼo mɨ́mɛ̂h, ndu e mesí mɨ́mɛ̂h.

¹⁰Go á si dwir kúl bʉ̂r yô ntinɨ̂ opara, lɨ́ esú lé éséǎ Nzyɛ̌m wɨ́h syɛ́ɛ́. Bé ntémé ó ngá jwɨ́ɨ ɨ́ sí yɨ́yɛ̂h.»

¹¹Me á si bee ntémé beéngeles otɔ́ɔ́sin otɔ́ɔ́sin, abe e tólɔ́ɔ. Bé á be ó lɨ́ ebɔma mécwɨ́ɨ́ mé jwɨ́ɨ, ndu e mikublakúbla mí ótír minâ, le otɔ́má bʉ̂r baá ɨ́ nká. Me á si jóʼo jɨ́m yɔ́ɔ́ bé á dyɛɛ yɨ́.

¹²Bé á dyɛɛ kʉ́kʉ́ ó e nkul, lɨ́ elɛ́ɔɔ ó: «Mâ Nteme bé á jʉ̂ nyá, nye ɨ́ jala le enʉa nkûl nyɨnyɛ̂h, le okúm, le ocwóó, le onjɨ̂h, le dúu, e kûm ndu e meswɨ̂ʼlʉ.»

¹³Nó ó, me nzě jóʼo bísá bíbyɛ̂h Nzyɛ̌m á komlo bí lɨ́ elwib, le byaá bi dí ɨ́ jʉ́o kʉ́ bí, le byaá bi dí ɨ́ sí yɨ̂ʼ bí, le byaá bi dí tʉ́ŋlʉ̌ bibwǎh bí, ndu e byaá bi dí ɨ́ mâŋ bí. Bíbyɛ̂h, byê nzě dyɛɛ́ jɨ̂m. Bé ó: «Kûm, le dúu le nkul, byé ó, ɨ́ waá dí ndîndǐl ɨ́ mecwɨ́ɨ́ mé jwɨ́ɨ nyá, bé e Mâ Nteme, njʉ̌m dǐ e njʉ̌m dǐ!»

¹⁴Jɔʼ bé á didyɛɛ nó yɨ́, mikublakúbla mí ótír minâ myaá, myé á yɨyala ó: «Amɛn!» Otɔ́má bʉ̂r ónɨ̌, bé ntɔ̂ʼ kúrwo sí, píʼe mémpǒm sí ɨ́ míh mɔ́ɔ́, lɨ́ edwe bé kûm.