Read Koonzime Twóm 6 Bible Online

Twóm 6 - Koonzime bible

Twóm 6

¹Mé ká dwɛ̂ʼ nɛ́ɛ: bee Mâ Nteme lɨ́ egbɛ́ɛ̌ sitâm esôʼ. Jɔʼ yaá ó gúú kublakúbla tír lɨ́ otír onâ baá, á lwib kʉ́kʉ́. Twíí nyé á jwɨjwɨ̂ʼ ó mpʉ míndum mi mpíé. Nye ó: «Ntáʼ!»

²Mé ká bee nɛ́ɛ: beě mpáŋá kablá, bee ntémé mʉr ɨ́ koo wé kʉ́ ɨ́ kɛlɨ̂. Mʉr waá á be ó e lá dɔ̂m ɨ́ mebô. Bé á si bôr nye káráá dúu gʉ̂l. Nye ntɔ̂ʼ tô le entaa bʉ̂r ɨ́ dɔm. Nye á be ó, lɨ́ ebáʼǎ tô le entaa bʉ̂r.

³Píe tɨ̂ʼ nɛ́ɛ: Mâ Nteme nzě bʉ̂ sitâm mbá. Gúú kublakúbla tír, wé ntɔ̂ʼ lɛ́ɛ ó: «Ntáʼ!»

⁴Yʉ́ʉ́ kablá, yé ntɔ̂ʼ pyâl. Yɨ́haá, yé ó be ó e nyʉ̂l kaá e kaá. Mʉr á be tɨ̂ʼ kʉ́ nyá, á si dweŋɔɔ nkul ekaʼ dɔ̂m ɨ́ sí yɨ́yɛ̂h ó, bʉr, bé jwɨ́ɨla páʼ nyɔ́ɔ́. Bé á si dwe nye pasoŋ ɨ́ jaa jaa.

⁵Jɔʼ nyé á bʉ̂ sitâm lɛ̂l yɨ́, gúú kublakúbla tír, wé ntɔ̂ʼ lɛ́ɛ ó: «Ntáʼ!» Mé ká bee nɛ́ɛ: beě kablá dwínɨ́ɨ́. Mʉr á be tɨ̂ʼ kʉ́ nyá, á si bi kílo ɨ́ gúú mbô.

⁶Me ntɔ̂ʼ jóʼǒ lwǐb, lwǐb yaá lɨ́ eduho témé mikublakúbla mí ótír minâ myaá. Yé á nwɨɨla ó e lwǐb mʉ̂r, lɨ́ elɛ́ɛ ó: «Líra pǔ blê gwár, yé mû ó tâŋ nzǎŋ mɔnɨ́ ngwár. Olíra bé orge olɛ̂l, bé ó tâŋ nzǎŋ mɔnɨ́ ngwár. Sâ gwár, andáma múlo ti e menyoʼ.»

⁷Jɔʼ nyé á bʉ̂ sitâm nâ yɨ́, kublakúbla tír epíhe nzě lɛ́ɛ ó: «Ntáʼ!»

⁸Mé ká bee nɛ́ɛ: beě kablá nyʉ̂l biká. Mʉr á be tɨ̂ʼ kʉ́ nyá, á be e díe ó, «Eswie.» Bʉr o bé á be kwár odwe bá, bê nzě dudû nyé ɨ́ koo píhe. Ɨ́ bʉr ó sí bɨ́bɛ̂h, bé á si dwe bé nkul ejʉ̂ bʉ̂r ɨ́ buo buo, jala e nkɔb mpwár ɨ́ menkɔb menâ. Nye ójʉ̂ bé ó, le opasoŋ, ndu e nza, ndu e binumo mékpaa. Otír ó méntwǐʼ ntémé, bé ójʉ̂ bʉ́ʉ́ bʉ̂r.

⁹Jɔʼ Mâ Nteme á gbɛ́ɛ sitâm tɛ̂n yɨ́, me ntɔ̂ʼ dwɛ̂ʼ lɨ́ empah lé alatâr, nzě bee tɨ̂ʼ ó, misísǐm mi bʉ̂r. Bé á jʉ́ŋɔɔ ó, ɨ́ lɔ̌b lɔ́ɔ́ mé Nzyɛ̌m, ti e mboʼlá bé á boʼlo wɨ́.

¹⁰Bê nzě bʉ̂ bítím. Bé ó: «Dâ ɛ̌, go ó mʉr dí tí nyá. Go ó dí Nzyɛ̌m otyeetye. Bʉr ó sí, baá bé á jʉ̂ bɨ̌h bá, go ókǎ tíʼe bé milɔ̌b ɨ́ yáǎ jɔʼ? Go ókǎ kuna bɨ́h metié mɨ́h dɨ́n?»

¹¹Nó nyé á nʉa bidur ɨ́ pumo pumo, bôr bɨ́bɛ̂h, le elɛ́ɛ bé ó, bé gbálaa bá tîtííǎ. Nye ó: «Bónáá gâ. Yé jala ó, bʉ́ʉ́ bʉ̂r ó njoo yɨ́n ti e bɨ́ɔɔ́ bɨ́n, bé páa nyɛɛ́ jʉ́ŋɔɔ ntémé mpʉ bɨ́n. Sá tɨ̂ʼ ó bɨ́n le onɔ́ɔ́, bé ósâ sɔ́má ntinɨ̂ yɨ́.»

¹²Nó ó, me á si dwɛ̂ʼ, bee Mâ Nteme lɨ́ egbɛ́ɛ̌ sitâm saman. Sí, yé ntɔ̂ʼ kubla ɨ́ buo buo. Dʉ́o, lé á be ó, lé mû dwîdwîn ɨ́ viʉ́t. Álomó ntinɨ̂ á be ó, nye mû ɨ́ cʉʼ mpʉ nyʉ̂l metié.

¹³Ocwícwén, bé á si duho ɨ́ jʉ́o kʉ́, duma sí mpʉ bíbyɔ́ɔ bi mpúmó dí eduho ɨ́ lɨ́ figyê, kur sí ɨ́ jɔʼ nkúo dí ekwoolo e nkul yɨ́.

¹⁴Jʉ́o, yé á si dîm ɨ́ mîh ɨ́ sɔ̌s, ɨ́ mpʉ mícɛmá dí edîm ɨ́ jɔʼ bé dí epíle mékaná yɨ́. Mecwɨ́ʼ mɨ́mɛ̂h ndu e mitíhé mímyɛ̂h, byé á si pʉʼa ɨ́ bigúmó byɔ́ɔ́, tóŋɔɔ ɨ́ bigúmo biswîh.

¹⁵Bʉr ó sí yɨ̂ʼ bɨ́bɛ̂h, bé á si swab. Bé á to swab ó, ɨ́ bibáh mékóʼ, ndu e mecwɨ̂ʼ dí páʼ mekóʼ má. Bɨ́bɛ̂h, bé á si swim mikám, lɨ́ etó swabɔɔ. Damá jóʼo ójwɨ́ɨ́ ó sí yɨ̂, otɔ́má bʉ̂r, okúmá; okapitɛ̂n ti e minjɨ́h mí bʉ̂r; bitúʼǎ le onzyɛh o bʉ̂r; bɨ́bɛ̂h, bé á si to swab.

¹⁶Bé á lɨlɛ́ɛ e mecwɨ̂ʼ ndu e mekóʼ ó: «Dumaa gá bɨ̌h ɨ́ menyʉ̂l. Bɨ̌n e sól bɨ́h, ebě, waá dí ɨ́ mecwɨ́ɨ́ mé jwɨ́ɨ nyá, ámû jaá kǎ báʼǎ bee bɨ́h. Ndu e ntémé ó, Mâ Nteme ámû jaá lɛ̂ʼle bɨ́h nkpaa nyé.

¹⁷Ebě, móhó nɨ́nɨ́ɨ́, wɨ́ pyâl: móhó bé ólɛ̂ʼle nkpáa nyɔ́ɔ́ ó wɨ̂. Nzé ókǎ tyɛ̂b ɨ́ mpǒm nyɔ́ɔ́ ɛ̌?»