Read Koonzime Twóm 7 Bible Online

Twóm 7 - Koonzime bible

Twóm 7

¹Píe tɨ̂, me á si bee beéngeles onâ. Bé á tityɛ̂b ó, ɨ́ medumo mé sí ménâ, lɨ́ ekamle ónkúo onâ lɨ́ ekwoolo, lɨ́ ebene ó, onkúo baá, bé ámû jaá ndámǎ sí, le mâŋ ti e bilɨ́.

²Me á si bee ntémé nyʉ́ʉ́ éngeles á duhǒ nko dʉ́o dí ejɨma yɨ́ nyá. Nzyɛ̌m dí kublakúbla nyá, á ntɨh nye ó e sitâm yé ɨ́ mbô. Nó nyé á bee beéngeles onâ baá, baá Nzyɛ̌m á dwe nkul ó, bé ndámaa sí ndu e mâŋ bá. Nye ntɔ̂ʼ nyémle twíí, le elɛ́ɛ ó:

³«Ayɨ́ ndáma gá sí, nkʉ̂ mâŋ, nkʉ̂ bilɨ́. Mɨná páa sîl égbâ gá bʉr o mé Nzyɛ̌m bisitâm ɨ́ mempǒm.»

⁴Píe tɨ̂, me á si bee bím bʉ̂r o b'á gbáŋɔɔ bijwɨʼ byaá bá. Bé á be ó otɔ́ɔ́sin nter le otɔ́ɔ́sin mekám ménâ le otɔ́ɔ́sin onâ (144.000). Bʉr o b'á gbáŋɔɔ bijwɨʼ byaá bá, bé á duho ó, ɨ́ mempóʼo mé Ɨ́zraɛ̂l mɨ́mɛ̂h:

⁵Bʉr o bó ónzweh mé Yʉ́da bé á gbáŋɔɔ bijwɨʼ bá: otɔ́ɔ́sin kám le obá; baá bó ónzweh mé Ruben: otɔ́ɔ́sin kám le obá; baá bó ónzweh mé Gâd: otɔ́ɔ́sin kám le obá;

⁶baá bó ónzweh mé Áser: otɔ́ɔ́sin kám le obá; baá bó ónzweh mé Nɛftalî: otɔ́ɔ́sin kám le obá; baá bó ónzweh mé Manasê: otɔ́ɔ́sin kám le obá;

⁷baá bó ónzweh mé Siméon: otɔ́ɔ́sin kám le obá; baá bó ónzweh mé Levî: otɔ́ɔ́sin kám le obá; baá bó ónzweh mé Isakâr: otɔ́ɔ́sin kám le obá;

⁸baá bó ónzweh mé Zabulôn: otɔ́ɔ́sin kám le obá; baá bó ónzweh mé Yóseb: otɔ́ɔ́sin kám le obá; baá bó ónzweh mé Benjamin bé á gbáŋɔɔ bijwɨʼ bá: otɔ́ɔ́sin kám le obá.

⁹Píe tɨ̂, mé ká bee nɛ́ɛ: bee bʉ̂r mebɨ̂ʼ mepǎm, abe e tólɔ́ɔ. Bé á be ó bʉr o bíkûl e biloo e mpum bʉ̂r. Bé ntémé bé á si lwib bilwǐb bíbyɛ̂h. Bé á be ó tɨ̂ʼ bɨ́bɛ̂h ɨ́ mpǒm mecwɨ́ɨ́ mé jwɨ́ɨ ndu e Mâ Nteme. Bé á bě e bidur ɨ́ pumo pumo ɨ́ menyʉ̂l le mpúho melén ɨ́ mebô.

¹⁰Bé á lɨlɛ́ɛ kʉ́kʉ́ ó: «Nzyɛ̌m dí ɨ́ mecwɨ́ɨ́ mé jwɨ́ɨ nyá, bé e Mâ Nteme, twiʼ, yé duho ó e bê.»

¹¹Beéngeles bɨ́bɛ̂h, bé á tyɛ̂b ó, mitîtyěl, bɔma mécwɨ́ɨ́ mé jwɨ́ɨ ɨ́ nká, le otɔ́má bʉ̂r, ndu e mikublakúbla mí ótír minâ. Jɔʼ bé á jóʼo mekǎn maá yɨ́, bɨ́bɛ̂h ntɔ̂ʼ píʼe mémpǒm mɔ́ɔ́ sí lɨ́ empǒm e mécwɨ́ɨ́ mé Nzyɛ̌m, bɨ́bɛ̂h lɨ́ edweŋɔɔ nyé kûm.

¹²Bé á lɨlɛ́ɛ ó: «Amɛn! Yé ó nó. Nzyɛ̌m gá wɨ́ná, nyě e meswɨ̂ʼlʉ, le kûm, le ocwóó, le nzyǒo, le dúu, le nkul le onjɨ̂h, njʉ̌m dǐ e njʉ̌m dǐ. Amɛn.»

¹³Nó ó nyʉ́ʉ́ tɔ́má mʉr á nze dî e me ó: «Nzê go lɨ́ egʉ́a bʉ̂r bâ, baá o dí e bidur ɨ́ pumo pumo bâʼ ɛ̌? Bê duhǒ nkoó?»

¹⁴Me e né ó: «Dâ ɛ̌, gua ó dí egʉ́a.» Nó nyé á lɛ́ɛ e me ó: «Bʉr bâ, bé ó baá bé á sia e bintɨ́ʼá bínɨ́nɨ́ɨ́ bá. Bɨ́ sohlo bídur byɔ́ɔ́ e metié me Mâ Nteme. Nó ó míkán myɔ́ɔ́ dí ɨ́ pumo pumo yɨ́.

¹⁵Sá tɨ̂ʼ ó bé dí etyɛ̂b ɨ́ mpǒm mecwɨ́ɨ́ mé Nzyɛ̌m yɨ́. Bé gúmló nyé ɨ́ mbɛ̌r wé ó móhó e pum. Waá dí edi ɨ́ mecwɨ́ɨ́ mé jwɨ́ɨ nyá ó ngá baʼle bê.

¹⁶Bé ákǎ jóʼo nzâ. Bé ákǎ jóʼo ntémé dwéh médíbé. Dwéhé, yé ákǎ ŋmɛ́ha bé ɨ́ menyʉ̂l. Yé ákǎ kǎh gúmó bé ódi yɨ́.

¹⁷Ebě, Mâ Nteme dí témé mecwɨ́ɨ́ mé jwɨ́ɨ nyá ó dí mbɔʼlʉ wɔ́ɔ́. Nye ótô e bé, tó pyâl lɨ́ enó e dí tɨ̂ʼ lɨ́, gúmó médíbé mé twiʼ dí eduho yɨ́. Nzyɛ̌m ótin bé myɛ́ɛlé mɨ́mɛ̂h ɨ́ mîh.»