Read Koonzime Twóm 8 Bible Online

Twóm 8 - Koonzime bible

Twóm 8

¹Nó Mâ Nteme á bʉ̂ sitâm nzaangbá. Jɔʼ nyé á pɛʼ yé yɨ́, bisá bíbyɛ̂h bi dí ɨ́ jʉ́o kʉ́ bí, byé ntɔ̂ʼ di ɨ́ puuu, tâŋ péh éwala.

²Píe tɨ̂, me ntɔ̂ʼ bee bééngeles nzaangbá bé á tityɛ̂b ɨ́ míh mé Nzyɛ̌m bá. Bé á si dweŋɔɔ osébe.

³Nyʉ́ʉ́ éngeles swîh á be ó e bélé gʉ̂l ɨ́ mbô, bélé bé dí edîʼ ótú ó dúu e tɨ̂ʼ jɔʼ yɨ́yɛ̂h yɨ́. Nye á si nze tyɛ̂b kúnókúno le alatâr á sáŋɔɔ ɨ́ gʉ̂l nyá. Nye á be ó, ɨ́ mpǒm mecwɨ́ɨ́ mé Nzyɛ̌m. Bé á si dwe nye béle le otú ɨ́ buo buo, ó nye díʼɨɨ wê. Nye nzě dîʼ wê. Jɔʼ ótú wé á dudúo yɨ́, dúluu, yé á pipyâl ó, duho ɨ́ bélé yé á be ɨ́ mbó wé yɨ́. Júluu, yé á bɨbére ó béráa, tô nkǒ Nzyɛ̌m á be ɨ́ mecwɨ́ɨ́ mé jwɨ́ɨ yɨ́, mpúhlá e minjɨʼla mi bʉ̂r bé bɨ́bɛ̂h.

⁵Nó ó éngeles á si nʉa béle yaá, nʉa ntémé siʼe duho lɨ́ alatâr waá, kɛl yé ɨ́ béle. Béle mû lwɨ́ŋlá e siʼe tʉ́ŋlʉ̌. Nye ntɔ̂ʼ guho yé kâʼ sí. Jɔʼ nyé á guho yé nó yɨ́, mindum mi mpíé, myé ntɔ̂ʼ ntíŋla. Me nzě jóʼo métwíí ntémé. Mindweh, myê nzě sâ. Sí nzě buú kubla ntémé.

⁶Nó ó, beéngeles nzaangbá bé á be le osébé nzaangbá bá, bê nzě di ɨ́ cǎr ó, bé lʉ́aa bê.

⁷Nó ó waá esôʼ á lʉ́o sébé wé. Metánaá mpúhlá e siʼe, ndu e metié, byé ntɔ̂ʼ swɨɨ ɨ́ sí yɨ́yɛ̂h. Ɨ́ sí yɨ́yɛ̂h, bisí ɨ́ buo buo, byé á si díʼe, jala e nkɔb mpwár ɨ́ menkɔb melɛ̂l. Bilɨ́ ɨ́ buo buo, byé á si díʼe ntémé, jala e nkɔb mpwár ɨ́ menkɔb melɛ̂l. Bwá bíká dí epâh sí e sí bá, bé á si síe lɨ́ edíʼe.

⁸Nó ó éngeles mbá á lʉ́o sébé wé. Bwaʼbwǎʼ sɔ̂ʼ mpʉ écwɨ̂ʼ, yé á be ó lɨ́ epyêl mínjʉl. Bé ntɔ̂ʼ guho yé ɨ́ mâŋ tʉ́ŋlʉ̌. Nó ó, medíbé mé mâŋ ɨ́ buo buo, mé á si liŋa metié, jala e nkɔb mpwár ɨ́ menkɔb melɛ̂l.

⁹Nó ó, bisâ ɨ́ buo buo, byé á títíʼe ɨ́ mâŋ bí, byé á si síe lɨ́ edwe, jala e nkɔb mpwár ɨ́ menkɔb melɛ̂l. Nó ntémé ó, bisitíma ɨ́ buo buo, byé á si twiʼlɨ, jala e nkɔb mpwár ɨ́ menkɔb melɛ̂l.

¹⁰Éngeles lɛ̂l nzě lʉ́o sébé wé. Bwaʼbwaʼ twítwén ntɔ̂ʼ tɨ̂l, duho ɨ́ jʉ́o kʉ́, nkaŋa sí. Nye á be lɨ́ edúo ɨ́ tuuu mpʉ éláma. Nye á duma ó, ɨ́ mentíbé le menó ɨ́ buo buo, jala e nkɔb mpwár ɨ́ menkɔb melɛ̂l.

¹¹Twítwén waá, díé lé, lé á be ó «Medwie». Nye á si liŋ mentíbé ɨ́ buo buo ɨ́ dwie dwie mpʉ édwie é mpʉ̌n, jala e nkɔb mpwár ɨ́ menkɔb melɛ̂l. Bʉr o b'á de medíbé maá bá ɨ́ buo buo, bé ntɔ̂ʼ síe lɨ́ edwe, lɨ́ edwie e médíbé maá.

¹²Nó ó éngeles nâ á nze lʉ́o sébé wé. Le nyé á lʉ́o, le ntɔ̂ʼ dʉ́o á dwira nyʉ̂l yɨ́. Péh nyʉ̂l nyé ntɔ̂ʼ dwíne, jala e nkɔb mpwár ɨ́ menkɔb melɛ̂l, jwɨʼ gwár e gwár e mpʉ álomó á dwíne yɨ́. Ocwícwén ntémé ntɔ̂ʼ dwíne, jala e nkɔb mpwár ɨ́ menkɔb melɛ̂l. Nó byé á bé agwá kǎ pan. Dʉ́o, bé le álomó, bé á jaa ka pɨpan ó, njɨ ɨ́ bwá bíjɔʼ. Píe tɨ̂, byé á lɨlɛŋ byúú bíjɔʼ ó, akǎ panɔɔ.

¹³Jɔʼ mé á dwɛ̂ʼ yɨ́, me á si bee mpele nʉ̌n lɨ́ epiilɨ lɨ́ ejwoo. Nye á lɛ́ɛ e twíí kʉ́kʉ́ ó: «Nkoó e bʉr o dí ɨ́ sí yɨ̂ʼ bá, ebě, yé e beéngeles olɛ̂l dínǎ apǎ lʉ́o ósébé bɔ́ɔ́ bá. Nkoó e bʉr, ɨ́ jɔʼ bé ólʉ́o bé yɨ́!»