Read Koonzime Twóm 9 Bible Online

Twóm 9 - Koonzime bible

Twóm 9

¹Éngeles tɛ̂n ntɔ̂ʼ lʉ́o sébé wé. Me ntɔ̂ʼ bee twítwén lɨ́ etɨ̂l, duho ɨ́ jʉ́o kʉ́, duma sí. Twítwén waá á si dweŋɔɔ osab, ó nye díbɨɨ mengʉŋ me dí epɨ̌r nǔm bɨ́ dí sí ɨ́ kœ́ʼlɛ́ yɨ́ má.

²Nye ntɔ̂ʼ dib mê. Jɔ̌ʼ bɨ́ yaá, yé á be mběʼ yɨ́, me ntɔ̂ʼ beě dúluu lɨ́ epyâl tɨ̂, dúluu yaá mpʉ̌ dúluu dí epyâl ɨ́ duró lé ólûl yɨ́. Yé ntɔ̂ʼ dwíŋle dʉ́o le ejwoo.

³Mpʉ yé á pyâl tɨ̂ʼ yɨ́, byúú bísɔ̂ʼ ntémé nzě pyâl, bisɔ̂ʼ mpʉ ócémebiká. Océmebiká baá, nzeŋɔɔ kâʼ sí. Bé á be ó si dweŋɔɔ nkûl elʉ̂ bʉ̂r mpʉ bíbámlwál dí elʉ̂ yɨ́.

⁴Sâ gwár, bé á bé adweŋɔɔ nkûl epɨ̂ʼ bíká, nkʉ̂ bilɨ́, nkʉ̂ mempeʼ. Bé á jaa lʉlʉ̂ ó, njɨ bʉr. Abe ntémé bʉr bɨ́bɛ̂h, njɨ baá bé á be abe e bijwɨʼ mé Nzyɛ̌m ɨ́ mempǒm bá.

⁵Etié, lé á be tɨ̂ʼ ó, mʉr bé ólʉ̂ nyá, nye l'adwe. Bé ólʉ̂ bé nó ó, tâŋ ongɔn otɛ̂n. Bé ójaʼra ɨ́ mpʉ bʉ̂r dí ejaʼra e mekpaa ɨ́ jɔʼ bíbámlwál dí elʉ̂ bé yɨ́.

⁶Ɨ́ melû maá, bʉr, bé ósáa éswie. Sâ gwár, yé ábána. Bé ógwɨ̂m ó, bé dwêʼ, eswie lɨ́ɛ kpɨ̂kpɛɛ bé kpɛ́yɨ́ɨ.

⁷Nó ó, océmebiká baá, bé á nwɨɨla ó e bikablá bi dɔ̂m. Ɨ́ milʉ́ myɔ́ɔ́, bé á be lɨ́ ebubwâr byúú bísɔ̂ʼ, nwɨɨla e bikáráá bí gʉ̂l. Mempǒm mɔ́ɔ́, mé á nwɨɨla ó e maá me bʉ̂r.

⁸Ɨ́ milʉ́ myɔ́ɔ́, bé á be ó e mpuo mpʉ mpúo bʉbá. Medye mɔ́ɔ́, mé á be ó mpʉ maá míngbampɨɨ.

⁹Bé á bě e byúú bísɔ̂ʼ ó, ɨ́ mempɨr mpʉ mímbór mí nkóho mi dɔ̂m. Mempabaá mɔ́ɔ́, mé á duduo ó, ɨ́ mpʉ̌ duú bíkálîʼ bi dɔ̂m bi dí edâʼrɔɔ e bikablá ɨ́ buo buo bí.

¹⁰Bé á be ó e mikʉ̌n ɨ́ mpʉ bíbámlwál. Bé ntémé, bé lʉ́ ó mpʉ byê. Mikʉ̌n myɔ́ɔ́ myaá, myé ó dí edwe bé nkul elʉ̂ bʉ̂r, tâŋ ongɔn otɛ̂n.

¹¹Njwɨ́ɨ wɔ́ɔ́, nye ó éngeles dí e nkul jwɨ́ɨ ɨ́ bɨ́ dí sí ɨ́ kœ́ʼlɛ́ yɨ́. Bé lɨ́ ejébe nyé ɨ́ lwǐb ébrœ̂ ó «Abadɔ̂n». Yé bé ɨ́ lwǐb grɛ̂k yɨ́ɛ nó, lɛ́ɛ́, yé ó «Apoliôn»: «Ángbɛ̌h».

¹²Sá túú ésôʼ, yé mû ó sí laa. Byúú bísá bí nkóó bíbá, byé dína ó dóló.

¹³Éngeles saman á nze lʉ́o sébé wé. Nó ó, me ntɔ̂ʼ jóʼo twíí lɨ́ eduho ɨ́ bintóó bínâ bí alatâr mindwéá. Gúmo yaá, yé á sáŋɔɔ ó e gʉ̂l. Yé á be ó, ɨ́ míh mé Nzyɛ̌m.

¹⁴Twíí nyaá á lɛ́ɛ éngeles saman ó: «Tó tii bééngeles onâ bé á káʼɔɔ ɨ́ pɨ̌n díbé nɨ́nɨ́ɨ́ bé jɨ́jébé Efrât yɨ́.»

¹⁵Beéngeles onâ baá, bé ó Nzyɛ̌m á boo komlo ó, bé séaa syɛ́ɛ́ ɨ́ mbû waá, le ngɔn waá, ɨ́ móhó ngwár waá ntémé, lɨ́ ewala egwár le egwár laá ntémé. Nye á komlo bé ó, bé tô jʉ̂ bʉ̂r. Nkɔb bʉr mpwár ɨ́ menkɔb melɛ̂l, bé ójʉ́ŋɔɔ. Nó ɨ́ jɔʼ éngeles á jóʼo lɔ́ɔ waá yɨ́, nye ntɔ̂ʼ tó tii bê.

¹⁶Me á si bee bisója ɨ́ buo buo ɨ́ bikablá kʉ́. Bé á si lɛ́ɛ me bím bísója byé á be yɨ́. Byé á be ó bʉr omilyɔ̂ŋ minter mimbá.

¹⁷Ɨ́ mpʉʼ ó mé á bee esimá laá yɨ́: me á si bee bikablá, ndu e bʉr o b'á be ɨ́ mikoo myɔ́ɔ́ kʉ́ bá. Bé á bubwâr ó mimbór mí dɔ̂m, wɨ̂ʼ pâʼ ɨ́ cʉʼ mpʉ̌ siʼe, gúú pâʼ ɨ́ mpʉ nyʉ̂l jʉ́o. Gúú pâʼ ntémé, pɨé e pɨé. Milʉ́ bíkablá, myé á be ó mpʉ mílʉ́ míngbampɨɨ. Júluu le siʼe ndu e pir, byé á be lɨ́ eduduho ɨ́ minum bíkablá byaá.

¹⁸Bintɨ́ʼá bílɛ̂l byaá, byé á si jʉ̂ bʉr ɨ́ buo buo, jala e nkɔb mpwár ɨ́ menkɔb melɛ̂l. Byé ó dí: siʼe, dúluu, ndu e pir, bisá byé á duduho ɨ́ minum bíkablá bí. Byé ó b'á jʉ̂ bʉr.

¹⁹Bikablá, byé á jʉ̂ bé ó, ebě, byé á be ɨ́ lele nkûl ɨ́ bitíl bí nyʉ̂l bibá: ɨ́ minum ndu e mikʉ̌n myɔ́ɔ́. Mikʉ̌n myɔ́ɔ́, myé á nwɨɨla ó, le onyʉ́a. Mikʉ̌n ntémé, e milʉ̂. Bé á be lɨ́ elʉlʉ̂ bʉ̂r e myê.

²⁰Bʉ́ʉ́ bʉ̂r o bé á be apǎ dwe ɨ́ bintɨ́ʼá byaá bá, bé á bé akam étúmo míkoo e bisá bé á sɨsâ e mebó mɔ́ɔ́ bí, nkʉ̂ dwira míléme. Bé á si tô dóló le edwe méleme kûm, bé e bikpɛʼkpɛ̂ʼ bí ónzyɛ̌m bé dí ekpaʼ e mebó mɔ́ɔ́ bí. Bé sɨ́sá bîʼ ó e gʉ̂l, byúú e mɔnɨ́ nkóho, ndu e binkóhó bígbáá, byúú e mekóʼ. Byúú, byé lɨ́ ekpaʼɔɔ ɨ́ bilɨ́. Bisâ byaá, byé abee, byé ajóʼo, lúʼo bá sɔ̂ʼ. Byé atyě tyen. Sâ gwár, bɨ́ɛ l'agwâʼ édwe byé kûm.

²¹Bé á bé adwira míléme, bírɔɔ éjwɨ́ɨ́ é bʉ̂r, sɛ́á mímǐr mí éleme, bimolá ndu e díbe.