Read Kosena Mátíyu 10 Bible Online

Mátíyu 10 - Kosena bible

Mátíyu 10

¹Ísu kwená kwayó-kwáásí sísamaivakemba kaeꞌá kumbaimái-kwaasi tááyowasa tuwaná kwaási tirumpinkémbá taraváá-kwámbá maitíyuꞌmaeꞌa nááóro-asirayamba tiména óꞌon-oꞌon-tiꞌo ún-kwaasi asóvamatinkai-asirayamba tímakaiye.

²asirayámbá tiména kwená mayáíráꞌá tiꞌmaréna séna kesí aantá-kwaasin-owe súwai túwíꞌa moóráwai áwíꞌa Sáímoniye séna aúná-kwiꞌa tamámena Pítaawe séna moóráwai Pítaa áváko áwíꞌa Éndaru moóráwai Sépéti ááninko áwíꞌa Yémési moóráwai Yémési áváko áwíꞌa Yóni moóráwai

³Vírípi moóráwai áwíꞌa Pátóromu moóráwai áwíꞌa Tómáasi moóráwai áwíꞌa Mátíyu kwemá táákísi mayówai moóráwai Árávíási ááninko áwíꞌa Yémési moóráwai áwíꞌa Tátiyasi

⁴moóráwai áwíꞌa Sáímoni kwemá Árómáani-kamaani-kwaasi tiꞌmátuwanae siráiwai moóráwai áwíꞌa Yútási Isakéríóti kwemá naaénba Ísumba kwená namuro-kwáásíráꞌá agaráátínkaraiwai miráumai-kwaasi Ísuna kwayó-kwáásímán-owe.

⁵Ísu minkwáásí sísamaivakemba kaeꞌá kumbaimái-kwaasi tiꞌmaréna séna kosimátímaꞌmae nááóro. óꞌonkaa-kwaasiti naaópimpare Sámériyaa-kwaasiti naaópimpare íma naaéꞌa

⁶kentí kwaási Ísareri-kwaasiti naaópimpaꞌa nááóro. sipisípiraꞌo ímo kárákwiraiwaimo ímo máyáísasamo sipisípimo sáwíꞌo umáímo nááóntemba Ísareri-kwaasi mirámó kwéomba

⁷kosimátimeꞌa séꞌa Áánútu kwená kwaásimo kawááimba ááimba kwéasaiye kosimátíꞌmae nááóro.

⁸tíꞌo in-kwáásí asóvamatinkeꞌa púwón-kwaasi usásintinkeꞌa túmo karáin-kwaasi túma kaweꞌá umátinkeꞌa taraváá-kwámbá tirumpimbá máyáan-kwaasi maitiyúwáanasa kónááowe. mimbáyáígóná asirayámbá úwoi timúnaꞌa íma óntamba meéyámbakaavo úwoi kaweꞌá umátínkáaro.

⁹aampaꞌó kwíyamba íma moórá-yantaaꞌa maimaéꞌa koró. óntamba íma unáámpímbá áítumaeꞌa kwéꞌa

¹⁰toón-únámbá íma maimaéꞌa kwéꞌa tísamai-anaamba íma maimaéꞌa kwéꞌa tááúmba íma maimaéꞌa koró. moórá-mora-umai unáánkwátói timantenká umái kuvéꞌmaeꞌa koró. túwaꞌnaa ónááowai kárákwiyonaaovo évaka-tantaaꞌo íma maimaéꞌa úwoi koró.

¹¹Áánútun-aai simátimenaaontaveꞌa moórá-naopaꞌo kwíyamba keinárawaꞌo naambó timíndawaimba avakáá éꞌa mindáúmpáré suꞌmai méꞌa kentí mayáí maimái ánáseꞌa mindámbá tuwéꞌa óꞌon-daopaꞌa koró.

¹²moórá-naumpaꞌa iyíyamba máyaiyan-kwaasiyaveꞌa séꞌa kaweꞌá umái máéro síyasa

¹³keinárawaꞌo kárákwiyiyanamo éna Áánútu kaweꞌá umátinkanivo ímo kárákwiyiyanamo éna Áánútu keináraware suꞌmai kaweꞌá umátinkaniye.

¹⁴moórá-naopaꞌo kwíyamba naambó ímo timésamo kentááimo ímo isáíyanamo éna Áánútu mindáópaken-kwaasi íma aamoí umátinkanivo umásítaiꞌa éꞌa tísamaivakem-baramo uwáéntenkaaniꞌa oró. mindáúmpáráꞌi. mindáóparaꞌiyo. tuwéꞌa koró.

¹⁵simátíménda ísáaro. Áánútu kwaási máyáawaina ááintavena tísaa ínín-kanaa tínímba naaóváꞌó Sótómu-naopare Kómóraa-naopare méraan-kwaasi sáwíꞌo uráantavena sáwí-meyamba timíníye. keinárawaꞌo tínaaembo umátimenaaon-kwaasi sáwí-meyamba timíníye. minkwáásíyóntí sáwí-meyanko Sótómu-naopakewaiye Kómóraa-naopakewaiyeti sáwí-meyankomba usáyaaitaniye Ísu siráiye. sáwíꞌa umátinkanaaon-kwasai.

¹⁶Ísu mináímbá simásuwena séna simátíménda ísáaro. sipisípimo kwisanamó áwááisaantemo in-íyánkómó intenkáámbó on-kwáásívímbá tiꞌmaránaumne. kawer-ímáyáágwárá-kwáásíráámbá umái méꞌa sáwíꞌo umátinkanaaombo éꞌa íma anondá sáwíꞌa éꞌa paru umái máéro.

¹⁷kárákwiyoro. mono-káwáá-kwáásí keinárawaꞌa tíꞌmaesa anón-kwaasitopaꞌa mótinkesa aaivimbá maitinkésa monoꞌ-náúmpáꞌá mótinkesa túwírukuꞌ-nesa

¹⁸kentávéꞌo asiramáímo máyáantavesa tátoꞌmai tíꞌmaesa kámááni-anon-kwaasitopare kawááon-kwaasitopare mátinkesa aaivimbá maitinkáíyaꞌa miwí kesáái simátimeꞌa óꞌonkaa-kwaasiyonte kesáái simátimenaaowe.

¹⁹aaimó simátínkénkaꞌa nóran-aina sénaumno-imayaa íma anómba éꞌa íma kentí imáyáavinken-aimba sénááovo kentivon-amankó sénááon-aimba úwoi tááka tinkáínaꞌa sénááowe.

²¹évakarawai tíváꞌawaawi tíꞌmai óꞌowiraꞌa timíyasa tínkamiyasa puwónááowe. tivoísáímo ésa tíráámaaꞌa tíꞌmai óꞌowiraꞌa timíyasa tínkamiyasa puwónááowe. iyámpóíyombo ésa tinóvowima tíꞌmai óꞌowiraꞌa timíyasa tínkamiyasa puwónááowe.

²²kentávéꞌo asiramáímo máyáantavesa tíyámba umátinkesa mirámó kwéomba ímo ivátuwesamo kentávésamo asiramáímo méwai Áánútu kawepáꞌá métinkaniye.

²³moórá-naopaꞌo méwasamo sáwíꞌo umátinkewaꞌo éꞌa tiyuwéꞌa isaaiséꞌa óꞌon-daopaꞌa koró. simátíménda ísáaro. Ísareri-kwaasiti naaóꞌ-naoꞌa simátímaꞌmae kwénaaiyana mimbáyáí íma ánásaraindaraꞌa kemá kwaási úrandaꞌa kumpaáruraundawai moórágwaraꞌa kumónaumne.

²⁴ívé-kwaasigo kwéagaraarankaiwaimba íma kwéusayaaitaiye. mayáí-kwáásígó kwená anón-kwaasi íma kwéusayaaitaiye.

²⁵ívé-kwaasigo agaráárankainda-kwaasigomo índantemba íníye. mayáí-kwáásígó kwená anón-kwaasigomo índantemba íníye. miráumai kemá anóndako únasa simái sáwíꞌa umásinkesa sésa taraváá-kwántóntí kawáánákó áwíꞌa Píyésepu iyémá kwésewe. mirá kwésemba pósa kesí kwaási simái ávááraumai sáwíꞌa umátinkanaaowe Ísu siráiye.

²⁶Ísu simásuwena séna mináímbá imáyáa éꞌa kwaási-taaroi íma inkaiséꞌa máéro. aúpáꞌó kwáyáin-tantaaꞌa amápaꞌa avoraꞌá paárínasa awánanaaowe. túnkaipaꞌa kwáyáin-tantaaꞌa avoraꞌá paárínasa awánanaaowe. mindáyaveꞌa kwaási-taaroi íma inkáíséro.

²⁷aúpáꞌó simátíménda avoraꞌá simátíméro. keinárawaꞌo simátíménda-aimba sáwíva-kwaasimo torupenkáꞌá simátíméro.

²⁸tínkamiyaꞌo puwónááon-kwaasi-taaroi íma inkáíséro. miwí kentimambá íma tínkambai ánásanaaovo Áánútun-aaroiye suꞌmai inkáíséro. kwemó éna sáwí-marupaꞌo iramó kwégaindavaꞌa túgwarare timankwáráré tuwáinasa ménaaowe.

²⁹maarán-áímbá imáyáa oro. sáwíyan-dumama téntékaan-dumama kaeꞌ-númámá sáwíyan-ontankakemba siyáánkai-toyaaraamba kwémeyan-ovo Áánútu kíraan-dumama kárákwirena ímo kanaán-iye sínanamo éna íma puwéna marapáꞌá kumínívo

³⁰sáwívaꞌ-numama Áánútu aúrankaꞌa íma anón-tantaaꞌan-ivo kwaási anón-tantaaꞌa owaná póna kárákwirena amápa-tantaaꞌa kwéawanena kentiꞌnótáugwaraꞌa kwétaampamai kwéawanaivo íma tááꞌa kaíno Ísu siráiye. Ísu áwíꞌa avoratá sénaunda-kwasai.

³²Ísu mináímbá simásuwena séna amáparawai túrankaꞌa kentávésa sésa kesí anóndakoman-iye síyawaiyaveꞌa kesivo kwíyómpakewai aúrankaꞌa séꞌa kesí kwaásiman-owe sénaumne.

³³ánivo kwaási túrankaꞌa kembá tínaaemba umásimiyawaiyaveꞌa kesivo kwíyómpakewai aúrankaꞌa sínaaemba umátimenaumne Ísu siráiye.

³⁴Ísu mináímbá simásuwena séna kentávéꞌa maarán-ímáyáá íma oró. kwaási amápaꞌa paru umái máyáantavena marapáꞌá kunkáiye. ímanivo marapáꞌá kunkáunda kwaási taaínkaꞌa ésa évakarawai kesáái isáíyasa évakarawai aaisambá sénááowe.

³⁵ívékwara aánogwaraꞌa kesááiyavesa maará ónááowe. avowámá moórá-imayaa ínana ááninko óꞌon-imayaa íníye. anówama moórá-imayaa ínana ayáámúnko óꞌon-imayaa íníye. anáávúkowe óꞌon-oꞌon-imayaa óyááoiye.

³⁶moóráwai kwenamáárawi kwená namuro-kwáásíráámbá umái ónááowe. kesááiyavesa miráumai miwítí imáyáa taaínkaꞌa ónááowe Ísu siráiye.

³⁷Ísu mináímbá simásuwena séna kesí kwaási-iꞌa ónáe síyawai aivaꞌá tinóvowiye táánimbaare tiyáámúmbaare tirumbá timésa naaémba kembá tirumbá símémba uwóvíꞌan-owe.

³⁸kemá puwónaunda-taima súgwaataꞌmaeꞌa kondantembá kesí kwaási-iꞌa íyawaima umbai-yántááꞌá timíyasa minúmbáí-yántááꞌá íma maimaésa sínaaemba kwaránááomba uwóvíꞌa ónááowe.

³⁹tirááímo táíndaiꞌo ésa íma kaweꞌá umái ménaaovo kentávésa imáyáa ésa tirááímo táínda-yantaaꞌa tuwésa puwésa aúnáiꞌa umái kwíyómpaꞌa maíꞌmaiꞌa ónááowe Ísu siráiye.

⁴⁰Ísu mináímbá simásuwena séna tiꞌmáráandawai kentáái isáíyawai kesááigwaraꞌa isánááowe. kesáái isáiyawai siꞌmákaiwain-aaigwaraꞌa isánááowe.

⁴¹Áánútun-aai simátimindawai évakarawaitopaꞌa kwínasa sésa Áánútun-aai kwésimatimendawai ónda póꞌa enáái isánaumne síyawaima kwésimatimiwaimba Áánútu kaweꞌ-méyámbá aména kwéisaiyawaigwaraꞌa mirám-béyámbá timíníye. arupí umái máyáiwai évakarawaitopaꞌa kwínasa sésa arupí umái máyaandawai ónda póꞌa enáái isánaumne síyawaima arupí umái máyainda-kwaasigomba Áánútu kaweꞌ-méyámbá aména kwéisaiyawaigwaraꞌa mirám-béyámbá timíníye.

⁴²kesí kwaási awánésa sésa úwoisan-kwaasi imbánivo Ísuna kwaási-iꞌa uráimba póꞌa áwaꞌnaa ónáe sésa sáwíyan-tantaaꞌa nombá amíyana Áánútu kaweꞌ-méyámbá timíníye Ísu siráiye.