Read Kosena Mátíyu 12 Bible Online

Mátíyu 12 - Kosena bible

Mátíyu 12

¹minkánáávímbá Yútaa-kwaasi agándaan-kanaaraꞌa Ísuwe kwená kwayó-kwáásíyé kígauvimba úwíti-ton-kigauvimba kwéguwana kwená kwayó-kwáásí táái tinkówasa úwíti-aramba kútúmai ásima pítuwesa kwénowasa

²ámáán-kawaa-kwaasi tuwánésa Ísuntavesa sésa tuwánaao. agándaan-kanaama aambá áúmbakaawasa mirá kwéowe suwaná

³Ísu séna naaóváꞌó Tévítimo urómba aúváívimba agaimarón-ainkona ááimba íma ísaraawe. Tévítiye kwená kwaásiye táái kwétinkowana

⁴Tévíti Áánútuna monoꞌ-náúmpáꞌá iyéna Áánútu aúrankaꞌo makón-tomba umairéna kwénena kwená kwaási timúwasa naráawe. mintómbá úwoi-kwaasi íma némáembanivo monoꞌ-máyáí máyón-kwaasi némáembani. Tévíti mintómbá umairéna timúwasa nonkáꞌá Áánútu íma áwááꞌa siráimbanivo kesí kwaási mirá kwéowaꞌa áwááꞌa ímo seráámbá áwááꞌa kwésewe.

⁵naaóváꞌá Mósesi simátímakain-aimba aúváívinkemba awánaraawe. Áánútuntavesamo ísámaimo póímo tuvúꞌmáímo kwéagayaan-kwaasi anóm-bonoꞌ-naumpaꞌa mayáí kwémaesa agándaan-kanaagwaraꞌa mayáí kwémayaawasa mirámó kwéontavesa íma aaí kwésimatinkesa sésa sáwíꞌa kwéowe íma kwésewe.

⁶simátimeꞌa séꞌa keinárawapimba kwémayaunda-mayaigo anóm-bonoꞌ-naumpaꞌo kwémayaam-bayaigomba usáyaaitaraivo agándaan-kanaa monoꞌ-máyáí-kwáásí mayáí kwémayaantaveꞌo ímo sáwíꞌo kwéowe senkákémbá kesí kwayó-kwáásíyávéꞌa sáwíꞌa kwéowe íma seró.

⁷Áánútun-aai aúváívimba agaimaréna séna Áánútu sénapóímo tuvúꞌmáímo agaimáímo símémba kanaán-ivo tirumbó kwéumatinkaamba anón-aamoi kwéune siráimba mináínkóná ááimbo iséꞌo kwarékai ímo sáwíꞌo uráan-kwaasi aaivimbá íma maitínkáasino.

⁸kwíyómpakemba kwaási úrandaꞌa póꞌa agándai-kanaaraꞌo kárákwiraundawai úmpo agándai-kanaaraꞌo kwaásimo mayáí kwémayaamba kendéímán-iye Ísu siráiye. ayáámba kawévaigurain-kwaasigona kwaasái.

⁹Ísu miváꞌá tuwéna monoꞌ-náúmpáꞌá iyúwana

¹⁰moóráwai ayáámba kawévaiguron-kwaasi máyowasa aaivimbá mayankánáe sésa Ísumba áísaa esa sésa agándai-kanaama mayáí aambá áúmakaan-kanaama póna áíꞌo in-kwáásí asóvamankai-mayai mayáínda ámáámba araaisíni. íya araaisíníyo suwaná

¹¹Ísu tísaa ena séna keinárawapinkemba kentí sipisípi-poraaꞌo maipímbó pékainaꞌo éꞌa agándai-kanaaraꞌa ááéma mósá asinánááoo. owé áꞌa mirá ónááomba

¹²kwaásigo sipisípi-poigomba usáyaaitaraimba póna agándai-kanaa áíꞌo in-kwáásí asóvamankanimba kaweꞌá éna ámáámba íma araaisíníye simátímatuwena

¹³ayáámba kawévaiguron-kwaasiyavena séna enayáámba árútuwaao súwana ayáámba árútuwowana kaweꞌá umánkowana óꞌon-ayaankaamba úwasa

¹⁴ámáán-kawaa-kwaasi monoꞌ-náúmpákémbá kumésa Ísumba nóraumaiya tuvuwónaundayaꞌiyo sésa ámááyu-aimba siráawe. Ísu Áánútuna mayáí-kwáásígóná kwaasái.

¹⁵ámááyu-aimba sun-táámá Ísu iséna mimbáráváꞌá tuwówasa sáwívarawai kwenánaaemba kwárówana tíꞌo ún-kwaasi amápaꞌa asóvamatinkena

¹⁶asiramái séna kemó umátinkaunda-aimba íma simátíméro siráiye.

¹⁷mirámó úmba naaóváꞌá Áánútun-aai simátímakowai áwíꞌa Áísáya sirónkaꞌa póna Ísu mirá uráiye. Áísáya agaimaréna séna Áánútu séna

¹⁸kwembá usásinankaraunana kesí mayáí-kwáásí isaꞌá kwená imáyáa kwéeꞌa aamoí kwéumankeꞌa aaí senaná kesimankó kwesé máyainana óꞌon-oꞌon-kwaasi amáparawai kesí arupí-aimba simátimena

¹⁹íma aaisambá tiyéna íma anónkaꞌa séna naaópaꞌa kwénaaena íma anónkaꞌa séna

²⁰Áánútunopaꞌo ímo asiramáímo máyáan-kwaasi íma tiyuwéna kaweꞌá umátinkaniye. mirá úmae iyéna mayáí maimaé iyéna íma ivátuwainana kesí arupí-ainko usáyaaitena kwáyainasa

²¹óꞌonkaa-kwaasi kwenáwíꞌa isésa sésa áraiꞌa súwaꞌnaa íníwaiman-iye sénááowe Áánútu siráiye sirónkaꞌa póna Ísu mirá uráiye. Ísunte Píyésepuntei kwaasái.

²²moóráwai maúmba kwenarumpimbá taraváá-kwámbá máyowana póna minkwáásígó íma aaí kwésuwana aúramba kavíkówasa áíꞌmaesa Ísunopaꞌa máánkówana Ísu mayauwéna minkwáásígómbá kaweꞌá umánkowana kwemá aaí súwana aúramba awánówasa

²³sáwívarawai táátavesa ésa sésa mindáꞌá Tévítin-andarakemba paáriniyemo siráawaiyaꞌi. óꞌowaꞌiyo suwasá

²⁴ámáán-kawaa-kwaasi mináímbá isésa kampaꞌá sésa ímanivo taraváá-kwántóntí kawáánáꞌá áwíꞌa Píyésepu asirayámbá ámísana tokéna póna taraváá-kwámbá kwémaitiyuwaiye siráawe.

²⁵suwaná Ísu miwí tááma iséna simátimena séna moórá-andama ááiꞌa tiyésa pósa taaínkaar-umai mésa íma asiramáívakaamba kwémaewe. moórá-naoparaꞌi. moórá-akunaꞌi. usíyán-ákúmbá pósa taaínkaar-umai íma asiramáívakaamba kwémaewe.

²⁶Sáátáánigona kwaásimo ááiꞌo tiyésamo taaínkaaꞌo ésamo ésa íma asiramáívakaamba kwémaewe. kentávéꞌo sembá Píyésepu asirayámbá ámísana tokéna póna taraváá-kwámbá kwémaitiyuwaiyemo kwésemba

²⁷ánivo Píyésepuna asirayánkáꞌó taraváá-kwámbó kwémaitiyuwaundarakai kentí kwaásigwaraꞌa Píyésepuna asirayánkáꞌá taraváá-kwámbá maitiyúwáásino. mirán-áímbó síyasamo ésa kentí kwaási kampaꞌá kwésewe sénááowe.

²⁸ánivo kemá Áánútun-amankona asirayánkáꞌá taraváá-kwámbá kwémaitiyuwaundayavena Áánútuna asirayámbá keinárawapimba kwévaarisaꞌa kwéawanaawe.

²⁹moórá-aimba imáyáa oro. moóráwai moórá-nanko avowámó asiramáímo máyainanamo éna mindáúmpákémbó umóyámbó mayáindayavenamo éna íma úwoi uveránívo mindánkó avowámbá ánda asááúmankenamo éna uvékena kwená náaindaamba umóyámbá mayáníye.

³⁰kembá íma kwésuwaꞌnaa-esa kesí namuro-kwáásíráámbá umái kwémaewe. íma súwaꞌnaa esa kwaási torupamái símémba moórá-mora umáguraawe.

³¹mindáyaveꞌa simátíménda ísáaro. kwaási sáwí-mayai kwémaesa simái sáwíꞌa kwéumatinkaamba mindá Áánútu maitiyuwánívo Áánútun-amankontavesa simái sáwíꞌa umánkanaaomba mindá Áánútu íma maitiyuwáníye.

³²kembá kwaási úrandako kumpaáruraundawaimba simái sáwíꞌa umásinkanaaomba mindá Áánútu maitiyuwánívo Áánútun-amankontavesa simái sáwíꞌa umánkanaaomba mindá Áánútu íma maitiyuwéna ívékwara naaénkwaraꞌa íma maitiyuwáníye.

³³kawe-táígó kawer-árámbá íyáísana sáwí-taigo sáwí-aramba kwéiyaivo taaéramba awánésa kawe-táígón-aramban-iye. sáwí-taigon-aramban-iye kwésewe.

³⁴iyánkó póígon-araaꞌan-owe. sáwíre suꞌmai on-kwáásí méꞌa póꞌa íma kanaán-umai kawer-áímbá kwésewe. tirumpimbá kwáyáin-imayaanei kwésewe.

³⁵kawe-kwáásí kawer-ímáyáávínkémbá kaweꞌ-máyáí kwémayaavo sáwí-kwaasi sáwí-imayaavinkemba sáwí-mayai kwémayaavo sáwí-kwaasi éꞌa sáwí-aimba kwésewe.

³⁶simátíménda ísáaro. Áánútu kwaásimo máyáawaina ááintavena tísaa ínín-kanaa tínímba úwoi-aimbo óꞌon-oꞌon-aimbo siráantavena tísaa íníye.

³⁷kawer-áímbó sirén-kwaasiyavenamo éna arupí-kwaasiman-owe Áánútu séna sáwí-aimbo sirén-kwaasiyavenamo éna sáwí-kwaasiman-owe síníye Ísu siráiye. ímo awánáúnda-mayai mayaaó siráan-kwasai.

³⁸súwasa évakaꞌa ámáán-kawaa-kwaasiye ámáámba sun-kwáásíyé Ísumo sáwí-aimbo sínda isánáe sésa anóndakoo áraira Áánútumpakena kunkáana ímo awánáúnda-mayai máyénata awánaano suwaná

³⁹Ísu séna ívéꞌo máyáan-kwaasi sáwí-kwaasi éꞌa Áánútuntaveꞌa íma imáyáa éꞌa kentávéꞌa kwéseꞌa Áánútumo aiꞌmákainamo e íma awánáúnda-mayai máyénata awánaanomo kwésemba naaóváꞌá Áánútu Yónaambo uráintemba kembá mirá ínívo mináímbá imáyáa oro.

⁴⁰naaóváꞌó anón-doyaako Yónaambo nawíkowanamo kaumbo-táwaimo arumpimbó méraintemba kemá kwaási úrandako kumpaáruraundawai kaumbo-táwai maipímbá ménaumne.

⁴¹Yónaa kaumbo-táwai anón-doyaako arumpimbá máyowana miín-kwituwówana minkákémbá Nínívaa-naopaꞌa Áánútun-aai kosimátimuwasa isésa sáwí-mayai tuwésa Áánútun-aai ísaraawe. ívéꞌa Yónaamba usáyaaitaraundawai máyaunaꞌa kesáái íma kwéisaamba póna naaémba Áánútu kwaásimo máyáawaina ááintavena tísaa ínín-kanaa tínímba Nínívaa-naopaken-kwaasi keinárawaꞌa aaivimbá maitinkésa sésa Yónaan-aai iséta sáwí-mayai tukáundayaanivo Yónaamba usáyaaitaraiwai kentí naaópaꞌa máyowaꞌa kwenáái íma iséꞌa sáwí-mayai íma tukáawe Nínívaa-naopaken-kwaasi sénááowe.

⁴²naaóváꞌá kentíkwáꞌnáraꞌa kárákwirowai áwíꞌa Sórómoni kawer-ímáyáávínkémbá aaimá kwésimatimuwana moórá-ininko némpaken-kawaa-ininko Sórómonin-aai koisánáe séna kwémena kuráiye. ívéꞌa kemá Sórómonimba usáyaaitaraundawai máyaunaꞌa kesáái íma kwéisaamba póna naaémba Áánútu kwaásimo máyáawaina ááintavena tísaa ínín-kanaa tínímba minínínkó keinárawaꞌa aaivimbá maitinkéna séna kemá némpakemba Sórómonin-aai taísaraumpo Sórómonimba usáyaaitaraiwai kentópaꞌa máyowaꞌa kwenáái ísómba íma ísámai kaweꞌá uráawe síníye Ísu siráiye. taraváá-kwánkó koyauwékain-kwasai.

⁴³Ísu mináímbá simásuwena séna kwaási arumpinkémbá taraváá-kwánkó auwéna kavóná-maravaꞌa nombá íma kwáyáipaꞌa kogwénaaena séna náávara ménaumno séna avakáá uwááena

⁴⁴séna tayauweréꞌa kesí naambá kwaásigo arumpimbá póꞌa koménaumne simásuwena téna taawánaimba mindánkómbá kankambá kwiyúꞌmái kawer-umásukaisana taawánéna

⁴⁵tayauweréna avakaeté-taravaa-kwamba miwítí sáwí-mayai anómba uráawai tíꞌmaena minkwáásígó arumpimbá tamáyáawana moórá-taravaa-kwamba arumpimbá máyáísana minkwáásígó sáwíꞌa umái máyáísasa naaémba sáwíva-taravaa-kwamba máyáawana kwemá anómba sáwíꞌa umái méraiye. miráumai ívéꞌo máyáan-kwaasi sáwí-mayai kwémaesa anómba sáwíꞌa úmaesa iyónááowe Ísu siráiye. Ísun-anówawe áúnavaꞌmaati kwaasái.

⁴⁶Ísu kwésimatimumba Ísun-anówawe Ísun-áúnavaꞌmaate tésa aaí simámenaaontavesa máápaꞌa máyówana

⁴⁷moóráwai Ísuntavena séna enanówe enáúnavaꞌmaare aaí simámenaesa máápaꞌa máyáawe súwana

⁴⁸Ísu séna kesinó nááwaꞌiyo. kesúnavaꞌa nááwiyaꞌo séna

⁴⁹ayáándei kwená kwayó-kwáásí agaráátinkena séna kesinó kesíváꞌmaaꞌa máyáawe.

⁵⁰kesivo kwíyómpakewai siráiniꞌa kwéowai kesinó kesúnavaꞌmaaꞌa kesímánaaꞌmaaꞌan-owe Ísu siraíye.