Read Kosena Mátíyu 13 Bible Online

Mátíyu 13 - Kosena bible

Mátíyu 13

¹mitáwai Ísu naaúmpaꞌa tuwéna Káríri-nonkwaaunkon-awampaꞌa koména aaí simátimindayavena úwasa

²sáwívarawai tóyo ésa kwená egwaaꞌá tamáyóntavena nompí-sípívímbá usámaaisena máyowasa minkwáásíyómbá nonkwaaúnkón-awampaꞌa máyówana óꞌon-oꞌon-aimba kwántámai simátimakaiye.

³moórá-aimba simátimena séna moóráwai ánáyumba maimaéna kígauvaꞌa kwégwena

⁴máyuꞌmaraisana évakar-anayumba aampaꞌá kunkwáyáísana numaómá túkúnasukaiye.

⁵évakar-anayumba óntankwaraꞌ-maravimba kunkwéna paákáꞌ-márávímbá póna avekáán-umai anón-isana

⁶aaꞌá kaisaná amímá ayáátáákaꞌa íma kunkéna aáyánkaguraiye.

⁷évakar-anayumba karaampimbá kunkwéna kárúraisana karaan-tantáákó araꞌnásukaiye.

⁸évakar-anayumba kaweꞌ-márávímbá kunkwéna karuwéna anón-éna arambá imái sáwívar-aramba iyéna évakaꞌa usáyaaitayan-aramba íyáísana évakaꞌa umaimái-aramba iráiye.

⁹kwéisaawai ísámai kaweꞌá oró Ísu siráiye.

¹⁰Ísu súwasa kwená kwayó-kwáásí kwenópaꞌa tésa taáísaa esa sésa kwésimatimenda nóra séwa kwántámai-aimba kwésimatimeno suwaná

¹¹Ísu séna Áánútu kwená kwaásimo kawááin-ainkona ááimba kwésimatimunda Áánútu keinárawaꞌa imáyáa tímísaꞌa kwéisaavo miwí imáyáa íma tímakaisasa kwéisaantaveꞌa kwántámai-aimba kwésimatimune.

¹²Áánútun-aaimo ísámaimo kaweꞌó íyawai Áánútu túwaꞌnaa ínasa moórá-ainkwaraꞌa isésa mirámó kwéiyanamo éna Áánútu túwaꞌnaa ínasa amápar-ainkwaraꞌa isánááowe. Áánútun-aaimo ímo ísámaimo kaweꞌó ésa kampaꞌá sésa kaweꞌá umái kwéisaumne síyawaima tirumpinkémbá mináímbá maimayáínana íma kwéniye.

¹³kwéisaambanivo íma ísámai kaweꞌá kwéowe. kwéawanaambanivo íma awánamai kaweꞌá kwéowe. mirámó kwéontaveꞌa simátimunda kwántámai-aimba kwésimatimune.

¹⁴naaóváꞌá Áánútun-aai simátímakowai áwíꞌa Áísáya siráimba miwí mirá kwéowe. Áísáya sénakwéisaambanivo íma ísámai kaweꞌá kwéowe. kwéawanaambanivo íma awánamai kaweꞌá kwéowe.

¹⁵miwítí imáyáao umbaí kwétaisana tááko aaimó isáíyávéna ávón-kaisaná túranko awánaiyavena ávón-kwégaivo ímo mirámó ésamo ésa tááꞌo isésamo túrambo awánésamo kesááimo isésamo miwítí sáwí-imayaamo tuwésamo kesópaꞌo tenkákáí sáwí-imayaa maitiyuwéꞌa kaweꞌá umátinkausino Áánútu siráiye Áísáya agaimaréna siráimba Ísu siráiye.

¹⁶Ísu mináímbá simásuwena séna simátimeꞌa séꞌa keinárawaꞌa kaweꞌó umáímo awánaamba Áánútu kaweꞌá kwéumatinkaiye. kaweꞌó umáímo ísáamba Áánútu kaweꞌá kwéumatinkaiye.

¹⁷simátíménda ísáaro. naaóváꞌá Áánútun-aai simátímakowaiye arupí umái máyówaiye sáwíva-kwaasi keinárawaꞌo kwéunda-mayai kwéawanaanten-umai awánanae sésa umbá íma awánaraawe. miwí keinárawaꞌo kwéisaanten-umai isánáe sésa umbá íma ísaraawe Ísu siráiye.

¹⁸Ísu kwená kwayó-kwáásíyávéna simátímatuwena séna moóráwai ánáyumba tuꞌmakáin-ainkona ááimba súnda ísáaro.

¹⁹Áánútu kwená kwaásimo kawááin-aimba isésa íma ísámai kaweꞌá kwéowana Sáátáánigo téna tirumpinkémbá tamaimái úwoivaꞌa kwétiyuwaiye. minkwáásí aampaꞌá kunkwáyáin-anayunkaamba kwéowe.

²⁰ánáyumbo óntankwara-maravimbo kúmímba maarán-ááímbán-iye. Áánútun-aai isésa aamoí ombánivo

²¹íma tirumpimbá tátoꞌmai kaweꞌá owasá Áánútun-aaiyavesa umbai-yántááríꞌa umátinkaantavesa Áánútun-aai ivátukaawe.

²²ánáyumbo karaampimbó kúmímba maarán-ááímbán-iye. Áánútun-aai ísáámbanivo marapár-úmbáí-yántáátávésa imáyáa úmae naaésa óísan-imayaama úmae kwénaaesa mirán-ímáyááó Áánútun-aai káátasuwaisasa íma Áánútuna mayáí kwémayaawe.

²³ánáyumbo kaweꞌ-márávímbó kúmímba maarán-ááímbán-iye. Áánútun-aai isésa tirumpimbá tátoꞌmai kaweꞌá ésa asiramái mésa Áánútuna mayáí kwémaesa kwétuwaꞌnaa-owasa évakarawai usáyaaitamai-mayai kwémaesa kwétuwaꞌnaa-owe Ísu siráiye. sáwí-anayumba uꞌmakáin-kwasai.

²⁴Ísu mináímbá simásuwena séna Áánútu kwená kwaásimo kwégawaain-aimba maarán-áímbán-iye. moóráwai kwená kígauvaꞌa kawer-ánáyúmbá áwíꞌa úwíti-anayumba uꞌmakáisana

²⁵moórá-noꞌwaamba amááraawigwaraꞌa tuún-kwaiguráawana namuro-kwáásígó téna arambó ímo íyáí-uwitiraan-anayumba sáwí-anayumba avuvumpimpáꞌá uꞌmakáisana

²⁶úwíti anón-éna arambá íyáísana úwítiraan-damai uꞌmakáiwai anón-isasá

²⁷mayáí-kwáásí awánésa kígaugo avowánópaꞌa tésa sésa kawer-ánáyúmbá uꞌmakáandavimba úwítiraan-damai náávakena mimpímbá kwáyáivo sewaná

²⁸séna namuro-kwáásígó mauꞌmakáiye sisasá áísaa esa sésa táúyuwanaumne sewaná

²⁹séna ímanivo úwíti táúyuwaavainivo túwéwana

³⁰kwáyainana naaémba úwíti karepáínaꞌa toómbó akaránááowaiyaveꞌa senasá misáwí-úwítíráán-dámáí táúmai asááumai iramá kwégaindavaꞌa tuwésa úwíti úramba ákáꞌmai kesí toón-dáúmpáꞌá maránááowe Ísu siráiye. taaérankona kwaasái.

³¹Ísu maarán-áínkwáráꞌá simátimena séna Áánútu kwená kwaásimo kwégawaaain-aimba maarán-áímbán-iye. moóráwai sáwíyan-taeranko áwíꞌa másátati mintáígó arambá ímo aneꞌó awánaraan-taeramba kígauvaꞌa uꞌmakáawana anón-éna amaimá móivarena kóyáwé uráisana numaómá mimpímpáꞌá ánáamba úmarena kwémaiye Ísu siráiye.

³³Ísu maarán-áínkwáráꞌá simátimena séna Áánútu kwená kwaásimo kwégawaain-aimba maarán-áímbán-iye. moórá-ininko péréti-tomba agayánáe séna kanaráán-tántáákó áwíꞌa páráwaaꞌa maimaéna intoráí-yántááꞌá sáwíyan-tantaaꞌa ayáúmaraisana kwéna intoréna anón-kwéiye Ísu siráiye.

³⁴Ísu kwaásiyomba aaí simátimenae sénamo úmba íma avoraꞌá siráivo kwántámai-aine suꞌmai simátímakaiye.

³⁵naaóváꞌá Áánútun-aai simátímakowai sirónkaꞌa póna Ísu mirá uráiye. kwemá agaimaréna sénasimátíménda kwántámai-aimba simátimenaumne. Áánútu maramá tarórurainkaꞌa aúpáꞌó kwáyom-bayaigon-aai ímo ísaraan-aimba simátimenaumne siráiye agaimaréna siráimba Ísuntavena siráiye. sáwí-anayumba uꞌmakáin-ainkona ááin-kwasai.

³⁶Ísu mináímbá simátímatuwena tiyuwéna naaúmpaꞌa iyúwasa kwená kwayó-kwáásí kwenópaꞌa tésa sésa namuro-kwáásígómó moóráwaina kígauvaꞌo sáwí-anayumbo kwéuꞌmaraiwaina ááimba simásimiyo suwaná

³⁷Ísu séna kawer-ánáyúmbó uꞌmakáiwaina ááimba kemá kwaási úrandako kumpaáruraundawai úne.

³⁸kígaugona ááimba maramán-iye. kawer-ánáyúnkóná ááimba Áánútu kwená kwaásimo kawááin-kwaasiman-owe. sáwí-anayunkona ááimba Sáátáánigona kwaásiman-owe.

³⁹namuro-kwáásígó sáwí-anayumba uꞌmakáiwaina ááimba Sáátáánigon-iye. toómbó akaránááon-kanaaona ááimba maramó ánásanin-kanaaman-iye. toómbó akaránááowaina ááimba Áánútuna kwayóꞌnáꞌá kwíyómpakewaiman-owe.

⁴⁰námáímo áúꞌmaimo iravímbó agaisuwánááontemba naaén-kanaamo tínda mirá ónááowe.

⁴¹kwaási úrandako kumpaáruraundawai kesí kwayóꞌnárawaꞌa kwíyómpakemba tiꞌmáráanasa kesí kwaásivinkemba sáwí-kwaasi óꞌowima sáwí-imayaa tíméwasa sáwí-amba kwégwaraawai kuntúkúmai

⁴²iramó kwégaipaꞌa tiyuwáíyasa mésa iviꞌá tésa túwááyaamba akévundarewasa

⁴³arupí umái máyáawai Áánútu kentivo kawááipaꞌa mésa aaꞌó kwégaintemba mirá ónááowe. kwéisaawai ísámai kaweꞌá oró Ísu siráiye. Áánútu kwaásimo kawááin-kwasai.

⁴⁴Ísu maarán-áínkwáráꞌá simátimena séna Áánútu kwená kwaásimo kwégawaain-aimba maarán-áímbán-iye. óꞌoran-ontamba maravímbá utámarena ména pukáisana moóráwai téna taawánéna aamoí éna káátamarena mimbárámá meéyámbá íníntavena kwená óísamba maimái tímatuwena óntamba mairéna mimbárámá komeéyán-éna minóꞌórán-óntámbó ásámakaamba mairáiye.

⁴⁵Áánútu kwená kwaásimo kwégawaain-aimba maarán-áímbán-iye. moóráwai ameriyáámba meéyámbaraindayavena naaóꞌ-naoꞌa kwénaaena

⁴⁶awánáínda moóráwai óꞌoran-ameriyaamba makáinana awánéna kwená óísamba maimái kwétimena óntamba mairéna minóꞌórán-áméríyáámbá komeéyán-umai kwémayaiye.

⁴⁷Áánútu kwená kwaásimo kwégawaain-aimba maarán-áímbán-iye. kwasen-únánkáámbá moóráwai nompímbá túwáísana óꞌon-oꞌon-doyaaꞌa

⁴⁸minúnámpímbá ógwitagwisana asináíndayavena umái kwéawanaisasa évakarawai áwaꞌnaa umai asímbai áámááívaꞌa makésa kaweꞌ-nóyááꞌá unáámpímbá áítesa sáwí-noyaaꞌa iváꞌá kwétuwaawe.

⁴⁹naaén-kanaa tínímba mirá íníye. kwíyómpaken-kwayoꞌnarawaꞌa kawe-kwáásívínkémbá sáwí-kwaasiyomba tíꞌmai

⁵⁰iramó kwégaindavaꞌa tuwáíyasa iviꞌá tésa tíꞌo íníntavesa túwááyaamba akévundanaaowe simásuwena

⁵¹kwená kwayó-kwáásíyávéna tísaa ena séna simátimunda-ainkona ááimba ára isaaó súwasa owé suwaná

⁵²Ísu simátimena séna ísáamba simátimunda-aimba simátíméro. moóráwai naankó avowá kwená naaúmpaꞌa ááéraan-tantaare aúná-yantaare kwáyáísana taaímbai kwená kwaási kwétimiye. mindánkó avowámó kwétimintemba miráumai ááéraam-bonor-aimpinkene Áánútu kwená kwaásimo kwégawaain-aimpinkene simátíméro Ísu siráiye. Násáretivakewai Ísumba tínaaemba umánkaraan-kwasai.

⁵³Ísu mináímbá simátímatuwena mimbáráváꞌá tuwéna

⁵⁴kwenamáápaꞌa kúmba miwítí monoꞌ-náúmpáꞌá iyéna aaí simátimuwasa táátavesa ésa sésa náávakena kawer-ímáyáá mairéna kawer-áímbá kwésimasimenayaawa nááwawa asirayámbá ámísana kaweꞌ-máyáí ímo awánáúnda-mayai kwémayaiyo.

⁵⁵kesáámó awánáúnda taaineí évaka-tantaaꞌo kwéiwai ááninkoman-iye. Máríyaa áánimba éna Yémési Yósépi Sáímoni Yútási tuwaaómán-iye.

⁵⁶kwenáúnavaꞌa maankáꞌá máyáawe.

⁵⁷maankákéwáímá póna úwoi-kwaasiman-ivo náávakena mináímbá isénawa minásíráyámbá mairénawa kwésiyo sésa kayorésa tínaaemba umámúwana Ísu simátimena séna Áánútun-aai simátímíwai óꞌon-oꞌon-daopaꞌa kwénaaisasa kwenáwíꞌa mósá kwémaraavo kwená naaópaꞌa komáyáimba kwenamááraa sésa kesáámó úndanten-kwaasiman-iye sésa kwenáwíꞌa íma mósá kwémaraawe Ísu siráiye.

⁵⁸kesáámó úndanten-kwaasi póna íma súwaꞌnaa íníye suntávéna ímo awánom-bayai moórá-mora-mayaiye suꞌmai mairáiye.