Read Kosena Mátíyu 14 Bible Online

Mátíyu 14 - Kosena bible

Mátíyu 14

¹minkánáá Ísuna mayáígón-áái símae íyúwana Káríri-marara-kawaanako áwíꞌa Éróti mináímbá iséna

²kwená mayáí-kwáásíyávéna séna minkwáásígó Yóni nombó pétinkaraiwaiman-iye. pukáimpinkemba usásinkena póna asirayámbá kwempímbá kwáyáísana mirám-báyáí kwémayaiye sirái.

³ááéma Éróti kwenáváko awainínkómbá áwíꞌa Erotíyasimba mairówana Yóni séna enáváko awainínkómbá aambá áúmbakaawa mayááne simá-simaꞌa úwana Éróti tiꞌmarówasa Yónimba koáíꞌmaesa ándávaꞌa máánkarowana

⁵Éróti Yónimba inkamónáe súmba kwaási-taaroi inkaiséna íma inkánkaiye. kwaási Yónintavesa sésa Áánútun-aai simátímíwaiman-iye suwaná Éróti séna Yónimba inkámónasa áwááꞌa siyénááowe séna íma inkaména máyowana

⁶kwembó ánkaron-kanaamo túwana anón-tanomba kaumái sáwíva-kwaasi tímúwasa nowaná Erotíyasi ayáámúnko téna túrankaꞌa araimá marówana Éróti aamoí umánkena

⁷minárásígóntávéna séna nóin-tantaatavena ankáíya simásímínaꞌa áméno. áraiꞌa súnda póꞌa sísainaꞌa áméno súwana

⁸anówamba koáísaa ena súwana anówama aaí súwana Érótinopaꞌa téna séna Yóni nombá pétinkaraiwai aꞌnómbá aráꞌmái táávepimba maré simiyó súwana

⁹iséna arumbá kwéumbanivo aivaꞌá asirayán-áímbá siráin-aimba imáyáa éna toómbó naan-kwáásígwáráꞌá ísaraantavaiye séna íma aꞌáo sénáe séna

¹⁰moóráwaimba aiꞌmarówana ándávinkemba Yónimba anumarambá aráꞌmái aꞌnómbá

¹¹táávepimba maréna maimaéna minárásígómbá máamuwana maimaéna anówamba máamuwasa

¹²Yónina kwayó-kwáásí isésa anómba komaimái utamánkesa Ísunopaꞌa tésa tasimámakaawe. naaémba Éróti Ísuna mayáígón-áái iséna séna minkwáásígó Yóni nombó pétinkaraiwai éna pukáimpinkemba usásinkena póna asirayámbá kwempímbá kwáyáísana mirám-báyáí kwémayaiye Éróti siráiye. Ísu sáwíva-kwaasi toómbá tímakain-kwasai.

¹³Yóni puwómba kwená kwayó-kwáásí Ísumba simámúwana iséna tuwéna kwená kwayó-kwáásíyé nompí-sípívímbá usámaaisena kwaásimo ímo máyaiyapata kónáe séna kúmba naaóꞌ-naokewai mináímbá isésa marapáꞌá kóyo uwaná nompí-sípívímbá kwéna

¹⁴marapáꞌá ásávomba misáwívá-kwáásí tuwánéna arumbá umátinkena tíꞌo ún-kwaasi asóvamatinkaraiye.

¹⁵Ísu asóvamatinkowasa enónkaꞌa kwená kwayó-kwáásí kwenópaꞌa tésa sésa íma sáwíva-kwaasi máyáapaꞌan-ivo enáíndaraꞌa tiꞌmárénasa egwaaꞌ-náópimpaꞌa kwénaaesa toómbá meéyámbáráaro suwaná

¹⁶Ísu séna toóntááꞌa íma kwíyaꞌa toómbá tíméro súwasa

¹⁷miwí sésa sáwíyan-tomba évaꞌaasei-tonkwara kaeꞌ-nóyáákwáráꞌá kwáyáivo sáwíva-kwaasivimba íma kanaán-íníye suwaná

¹⁸Ísu maimaé másíméro séna

¹⁹sáwíva-kwaasiyavena maraꞌá máéro séna évaꞌaasei-tonkwara kaeꞌ-nóyáákwáráꞌá maisokéna kwíyómpaꞌa karákéna Áánútuntavena súwi simásuwena mintómbá topán-topan-umai kwená kwayó-kwáásí timúwasa misáwívá-kwáásí tímúwasa

²⁰amáparawai nowaná tímúꞌa vówasa sáwíva-kwaasi 5,000 kwaaima uwasá aaraiyé iyámpóígwarare miráumai-kwaasi nowaná tímúꞌa vówasa Ísuna kwayó-kwáásí mintón-ayai sísamaivakemba kaeꞌá kumbaimái-unampimba áítumai ógwitaraawe. Ísu non-avóvomayaapaꞌa kuráin-kwasai.

²²áítumai ógwitowana minkákémbá Ísu kwená kwayó-kwáásí tiꞌmaréna séna kesí aivaꞌá nompí-sípívímbá usámaaiseꞌa menávápáꞌ-náópaꞌa koró. misáwívá-kwáásí kwétiꞌmareꞌa séꞌa kentí naaóꞌ-naoꞌa koró simátimenaumne séna

²³misáwívá-kwáásí tiꞌmarówasa miwítí naaóꞌ-naoꞌa kuwaná Áánútumpaꞌa námúnaamo síndayavena omápaꞌa umáyowana noꞌwáámba aúkúwana Ísu kweyáá máyowasa

²⁴kwená kwayó-kwáásí nompí-sípívímbá non-avuvumpáꞌá máyówana maramá nénkaꞌa kwáyowana anón-unda toꞌmaé kwétena misípí tayátoꞌmarowasa íma kumbá

²⁵irataróꞌa Ísu non-avóvomayaapaꞌa kwénaaena kwená kwayó-kwáásímó máyónkaꞌa túwasa

²⁶non-avóvomayaapaꞌo kwénaaumba awánésa táátavesa ésa tiyántámbá kwétowasa sésa kwaántáo kwénaaiye suwaná

²⁷Ísu avekáán-umai séna tááꞌa kaivó aáno máéro. kemá úne súwana

²⁸Pítaa simámena séna emó Ísóigo úrambo éma sinaꞌá non-avóvomayaapaꞌa emó máyaandavaꞌa konó súwana

²⁹Ísu séna kanaán-ivo tiyó súwana nompí-sípívínkémbá kunásávena non-avóvomayaapaꞌa Ísumo máyopaꞌa kúmba

³⁰kaweꞌá umái kúmba anón-undamo toróntavena imáyáa éna inkaisúmba nompímbá kunávekoraꞌnara kwéena anónkaꞌa séna Ísóigoo kembá tátoraao súwana

³¹Ísu avekáán-umai ayáámba árúꞌmai tátorena séna anón-undamo toráintavai sáwí-imayaa e kesí asirayántávémo ímo imáyáamo óndayavai kunáveraane. kesí asirayántáváí íma kaer-ímáyáá uwo súwasarai

³²nompí-sípívímbá usámaaisewana anón-undao maivaiyówasa

³³nompí-sípívímbá máyówai Ísuna imáyáa mósá marésa sésa áraiꞌa Áánútu ááninko óne siráawe. Ísu Kénésárétivaꞌa tíꞌo ún-kwaasi asóvamatinkarain-kwasai.

³⁴áraiꞌa Áánútu ááninko óne sésa kwaaúnóná menávápáꞌá Kénésáréti-maravaꞌa kumbá marapáꞌá ásávowasa

³⁵mimbápákén-kwáásí Ísumba aúyésa naaóꞌ-naoꞌa simátimesa Ísumo tamaún-aimba isésa tíꞌo ún-kwaasi tíꞌmaesa tóyo ésa

³⁶sésa ená unáánkwátói-araairaꞌa tátoraiyana tíꞌa étinkainkwae suwasá tátórówana tíꞌa étínkaraiye.