Read Kosena Mátíyu 15 Bible Online

Mátíyu 15 - Kosena bible

Mátíyu 15

¹ámáán-kawaa-kwaasiye ámáámba sun-kwáásíyé Yérúsaremu-naopakemba Ísumo máyopaꞌa tésa sésa

²ená kwayó-kwáásí nóra isasá kentáá síkwáꞌnáí ámáámba íma kwarésa tiyáámba íma sese ombá toómbá kwénaao suwaná

³Ísu séna kentíkwáꞌnámo simátímakaan-amaamba kwaréꞌa Áánútuna ámáámba kwéaraaisemba nóra éra mirá kwéoo.

⁴Áánútu séna kentinóvowi túwíꞌa anómba oró. ánivo anóvowimo sáwíkaambo simátinkaindawaimba tuvuwíyana puwíníye Áánútu siráivo

⁵keinárawaꞌo siráamba moóráwai anóvowiyavena simátimena séna moórá-yantaaꞌa Áánútundeiman-ivo íma kanaán-umai timénaumne siréna anóvowima íma kwétuwaꞌnaa-iye. mirámó ontávéꞌa kanaán-iye kwésewe.

⁶mirá-sáwíꞌó ontávéꞌa Áánútun-aai tuwéꞌa kentíkwáꞌnáí ámáámba kwégwaraawe.

⁷kaumbo-káér-ainkwara-kwaasin-owe. naaóváꞌá Áánútun-aai simátímakowai áwíꞌa Áísáya keinárawatavena árair-aimba siráimba agaimaréna séna Áánútu séna

⁸maawímá kesúwíꞌa tóikakene suꞌmai sésa kesí imáyáa íma tirumpimbá kwáyáiye.

⁹kwaásiti ámáámba simái paárombanivo Áánútuna ámáámban-iye kampaꞌá sembá miráráán-umai kesí imáyáa kampar-ímáyáá mósá kwémaraawe Áánútu siráiye Áísáya simái agaimakáiye Ísu siráiye. kwaásimo sáwíꞌo umátínkáin-tantaakona kwaasái.

¹⁰Ísu mináímbá simátímatuwena kwaásiyavena teró súwasa kwenópaꞌa tuwaná séna simátíménda iséꞌa kaweꞌá oró.

¹¹máápaken-tantaaꞌo naawáí íma kwaási sáwíꞌa kwéumatinkaivo tirumpinkén-áínkó kwaási sáwíꞌa kwéumatinkaiye siráiye.

¹²súwasa Ísuna kwayó-kwáásí kwenópaꞌa tésa sésa ámáán-kawaa-kwaasi emó simátimenda-aimba isésa áwááꞌa aéésa kayóráamba íya isaánó suwaná

¹³Ísu séna kesivo kwíyómpakewai ímo uꞌmakáin-anayumbo éna táúyuwaniye.

¹⁴ámáán-kawaa-kwaasi tááiyaveꞌa íma anón-imayaa oró. miwí ímo aambó awánaakakemba tóikakemba kampaꞌá simátimesa sésa aambá agaráátinkanaumne kwésewe. moórá aúgavitawai moórá aúgavitawaimba ayáán-toꞌmaesarai íma kanaán-umai kóyááoivo mirámó ésaraimo ésarai maipímbá koyuvánkoyaaoiye súwana

¹⁵Pítaa séna kwántámai-aimbo simátimenda-ainkona ááimba simásimiyo súwana

¹⁶Ísu séna kenkwáráꞌá íma tááko pééi kwésisaꞌa méꞌa ísáambanivo íma ísámai kaweꞌá uráawe.

¹⁷máápaken-tantaaꞌo naawáí tindáámpáꞌá kunáyúsúgwinivo

¹⁸aaimó kwésemba tirumpinkén-ímáyááó éna mindá kwaási sáwíꞌa kwéumatinkaiye.

¹⁹tirumpin-ímáyáávínkémbá sáwí-imayaa ésa tínkamiyasamo puwónááoniꞌa ésa aarai-úmóyámbá ésa kwaai-úmóyámbá ésa amápa-tantaaꞌa umóyámbá ésa kampar-áímbá simátinkesa simái sáwíꞌa umátinkesa

²⁰mirá-sáwíꞌó kwéomba tirumpinkén-ímáyááó kwaási sáwíꞌa kwéumatinkaivo tiyáámbo ímo sese ombó toómbó kwénaamba mindáo kwaási íma sáwíꞌa kwéumatinkaiye Ísu siráiye. Kénááni-maravaken-ininkona kwaasái.

²¹Ísu mináímbá simásuwena kwená kwayó-kwáásíyé miváꞌá tuwéna Táyaa-naopare Sáítóni-naopare mináyámpáꞌá kúmba

²²mináyámpákén-ínínkó íma Yútaa-inimba póna Kénááni-ininko Ísunopaꞌa téna anónkaꞌa séna anóndakoo Tévítin-andarakewai arumbá umásinkaao. taraváá-kwámbá kesiyáámúnko arumpimbá máyáísana sáwíꞌa umái máyáiye súwana

²³Ísu iséna íma aaí súwasa kwená kwayó-kwáásí kwenópaꞌa tésa asiramái sésa aiꞌmátuwaao. aasiyaasí mirá siváínivo suwaná

²⁴Ísu séna Áánútu siꞌmákaisaꞌa Ísareri-kwaasiye suꞌmai túwaꞌnaa eꞌa Ísareri-kwaasimo sipisípi-poiraan-umaimo kóyáwé kwéowai kwétuwaꞌnaa-une súwana

²⁵minínínkó Ísun-aókaꞌa maraꞌá kumbaéna séna anóndako súwaꞌnaa uwo súwana

²⁶Ísu séna iyámpóíti toómbá maimái iyámbá timúnavo miráumai Ísareri-kwaasimo túwaꞌnaa úndantemba emá óꞌonkaa-inimba ónda póꞌa áwaꞌnaa únavo kwésune súmbanivo

²⁷minínínkó séna anóndako áraiꞌa sémpo iyánkó avowá owé sisaná toón-ayai takwémandaiye. miráumai óꞌonkaa-ininkoman-iye sinaná kanaán-ína súwaꞌnaa íníyone súwana

²⁸Ísu séna kentáváí asiramái máyaanda-ininko sénda póꞌa mirá ónaumne séna mitáwai ayáámúnkomba asóvamankaraiye. Ísu sáwívarawai asóvamatinkarain-kwasai.

²⁹asóvamankena kúmba Káríri-kwaankon-awampaꞌa koúkúmai omápaꞌa maraꞌá umáyowasa

³⁰sáwíva-kwaasi kwemó máyopaꞌa kumbá tísamaimo tausokón-kwaasiye tiyáántámbo mavíkuron-kwaasiye túrambo kavíkón-kwaasiye aaimó ímo sun-kwáásíyé óꞌon-oꞌon-tiꞌo ún-kwaasi tíꞌmaesa kwenaísamaivimba mótinkowana asóvamatinkowasa

³¹tísamaimo tausokón-kwaasi kaweꞌá uwasá tiyáántámbo mavíkuron-kwaasi kaweꞌá uwasá túrambo kavíkón-kwaasi kaweꞌá umái awánowasa aaimó ímo sun-kwáásí aaí suwasá misáwíváráwáí awánésa ávááraumai tááꞌa kówasa Ísareri-kwaasiti Ísóigo áwíꞌa mósá makáawe. Ísu moórágwaraꞌa toómbá tímakain-kwasai.

³²Áánútu áwíꞌa mósá marówana Ísu kwená kwayó-kwáásí tááyowasa tuwaná séna maankwáásíyómbá kaumbo-táwai kesé máyáawana maimaésa tiráan-tomba ánásaisaꞌa sirumbá kwéumatinkaumne. tiꞌmáráanasa miwítí naaóꞌ-naoꞌa kónááombanivo aampaꞌá kwíyamba kánokaꞌa pósa púwóvainiye súwasa

³³kwená kwayó-kwáásí sésa kavóná-maravaꞌa sáwíva-kwaasin-ovo náánkakenta toómbá maimáíya timénaumno suwaná

³⁴Ísu tísaa ena séna nóraumai-tona kwáyáiyo súwasa avakaeté kwáyáísana esimáí-noyaakwaraꞌa kwáyáiye suwaná

³⁵minkwáásíyóntávéna séna maraꞌá máéro séna

³⁶avakaeté-tone noyááre maisokéna Áánútuntavena súwi séna mintómbá topán-topan-umai kwená kwayó-kwáásíráꞌá timúwasa minkwáásíyómbá tímúwasa

³⁷amáparawai nowaná tímúꞌa vówasa sáwíva-kwaasi 4,000 kwaaima uwasá aaraiyé iyámpóígwarare miráumai-kwaasi nowaná tímúꞌa vówasa kwená kwayó-kwáásí mintón-ayai túwómba avakaeté-unampimba áítumai ógwitowana

³⁹Ísu misáwívá-kwáásí tiꞌmaréna kwená kwayó-kwáásíyé nompí-sípívímbá usámaaisesa Mágátani-ayampaꞌa kuráawe.