Read Kosena Mátíyu 17 Bible Online

Mátíyu 17 - Kosena bible

Mátíyu 17

¹Ísu mináímbá simásuwena avaꞌmoraé-noꞌwaamba kwaéna Pítaante Yémésinte kwenáváko Yóninte umái tíꞌmaena omápaꞌa iyúmba miwíyé suꞌmai umésa

²miwí túrankaꞌa Ísu óꞌoran-auma auvúwana óipakemba aaváúgómó inten-úwana kwená unáánkwátóirakemba sán-kena kwayáníꞌa kówasa

³awánomba kae-kwáásíráí kwíyómpakemba paárésarai mindárai túwíꞌa Mósesiye Íráiyaae Yútaa-kwaasi tíkwáꞌnárai Ísuwe kwaasái kwésuyana

⁴Pítaa Ísuntavena séna Ísóigoo maankáꞌó maúndaya kaweꞌá imbá póta emó sinataamó éta kwááyu-namba kaumbomá ónaundaya moórá endéí éta moórá Mósesindei éta moórá Íráiyaandei éta mirá ónaundayaawe siráiye.

⁵mirá kwésunkaꞌa ainánkó sán-kámaena kwayáníꞌa kámae kuména kunkáátowana mináínámpínkémbá aaigówé suꞌmai séna maawámá kesáánimba isaꞌá kwená imáyáa kwéeꞌa ávááraumai aamoí umánkaumne. kwenáái ísáaro súwasa

⁶kwená kwayóꞌnárau mináímbá isésa marapáꞌá kumbésa táátavesa ésa tiyántámbá kwétowana

⁷Ísu miwímó máyópaꞌa téna tineꞌá tátorena séna tááꞌa kaivó usásinaaro súwasa

⁸awánomba mindárai kwíyómpaꞌa íyúyana Ísuwe suꞌmai méraiye.

⁹máyowasa omápakemba kúmúmba Ísu asiramái simátimena séna awánaamba íma simátíméro. kemá kwaási úrandaꞌa kumpaáruraundawai púwóndavinkemba usásinaandaraꞌa awánaamba kanaaráꞌá simátímaꞌmae íyóro súwasa

¹⁰kwená kwayóꞌnárau Ísumba áísaa esa sésa ámáámba sen-kwáásí Íráiyaa aivaꞌá paárínana Áánútu usásinankaiwai Yútaa-kwaasiya amuꞌmakáúndawaiya naaémba paáriniyemo sembá nóra sésa mináímbá kwéseo suwaná

¹¹Ísu séna aivaꞌá Íráiyaa paáréna toꞌmayaa íníye-aimba árair-aimban-iye.

¹²simátimeꞌa séꞌa Íráiyaa áꞌa paárúwasa íma aúyésa sáwíꞌa umánkanae sésa sáwíꞌa umánkesa mirá uráantemba kembá kwaási úrandako kumpaáruraundawaimba sáwíꞌa umásinkanaaowe súwana

¹³tááko pééi súwasa Íráiyaa siráimba Yóni nombá pétinkaraiwaintavena siráiye siráawe. Ísu taraváá-kwámbá mayáúkain-kwasai.

¹⁴simásuwesa omápakemba kúmúmba sáwíva-kwaasi torupamái máyówasa awánomba moóráwai Ísunopaꞌa téna aísamaivimba kumbéna séna

¹⁵anóndakoo kesáánimba arumbá umánkaao. sáwíꞌa umái ména tanaambá váguvagu kwéena aigaregó nonkáánéna aíyayaamba sápísimagwisana nompíné iravíné tanaambá kwévamae kwénaaisaꞌa

¹⁶ená kwayó-kwáásí máyáapaꞌa máankaunasa íma kanaán-umai kaweꞌá umánkaraawe súwana

¹⁷Ísu séna kentí imáyáa kaeꞌnáér-imayaama isaꞌá kentávéꞌa íma imáyáa kwéowana póna sirumbá umbaí kwétaivo nóraumai-tawaiyaꞌi kesé ménaumpo enáánimba áíꞌmae tiyó súwana áíꞌmaena túwana

¹⁸Ísu taraváá-kwántávéna séna auwé kóaao súwana arumpinkémbá auwéna kóúwana miníyámpóí kaweꞌá umánkowana kaweꞌá umái méraiye.

¹⁹kaweꞌá umánkowasa naaémbo Ísu kweyáá máyonkaꞌa kwená kwayó-kwáásí tésa sésa nóra séta mintáráváá-kwámbá íma kanaán-umaiya mayáúkaumno suwaná

²⁰Ísu séna Áánútuntaveꞌo mayauwáníyemo séꞌo asiramáímo máyáankakai mayaúwáísino. áraiꞌa simátimeꞌa séꞌa moórá-taigo áwíꞌa másátati sáwíyan-aramba maꞌmakáisana áruma kwikéna anón-tainambo kwéiyintemba kesé aráápamai sáwíyankaꞌa méꞌa naaémba anóniꞌa umái aráápamai méꞌa omátaveꞌo séꞌo kítímae ór-ayampaꞌa kóaaomo síyanamo éna mirá íníye.[

²¹Ísu mináímbá siráimba kwesé aráápamai máyáamba kwená mayáí amápaꞌa kanaán-umai mayánááontavena siráiye.] Ísu puwínín-aimba siráin-kwasai.

²²Ísu kwená kwayó-kwáásí Káríri-ayampaꞌa torupamái máyówana Ísu simátimena séna kembá kwaási úrandaꞌa kumpaáruraundawaimba óꞌon-kwaasi timíyasa

²³sínkamiyaꞌa puwéꞌa kaumbo-táwai maisúwáanana usásisinkaniye súwana miwí tirunkó umbaí taráiye. táákísi-ontamba tukáan-kwasai.

²⁴tirunkó umbaí tówasa Ísu kwená kwayó-kwáásíyé Kápénéamu-naopaꞌa kumbá anóm-bonoꞌ-nankontavesa táákísi-ontamba kwémayaawai Pítaanopaꞌa tésa sésa ená anóndako anóm-bonoꞌ-nankontavena táákísi-ontamba kwétuwai. íya kwétuwaiyo suwaná

²⁵Pítaa séna kwétuwaiye simásuwena naaúmpaꞌa iyúwana táákísin-aimbo ímo sirónkaꞌa Ísu Pítaamba áísaa ena séna Sáímoniyo marapákén-ánón-kwáásí timááraawitopakemba táákísi-ontamba maésa óꞌonkaatopakemba maésawa kwéompo nóran-imayaamo kwéemo e simásimiyo súwana

²⁶Pítaa séna táákísi-ontamba óꞌonkaatopakemba mairáawe súwana Ísu séna miráumai Áánútuna kwaásiya póta anóm-bonoꞌ-nankona táákísi-ontamba íma tuwánaundayaanivo

²⁷áwááꞌa seváí póta úwoi tuwánaundayaanivo nonkwaaúmpáꞌá kuré ánda túwénana kumína aivaꞌó torénda-noyaaꞌa mairé óipimbo óntambo kwáyaina maimaé minóntándéí esáváíyé kentáváíyé táákísi móuwo Ísu súwana mirá uráiye.